लुका 19
19
तिरो लेःओ जखायस
1येसु यरिहो सहरहाङ दाह्सास्यावा र सहरको ल्याम स्याउधय आल्धय मुसास्यावो खेतो। 2ओउ सहरहाङ जखायस त मय्ङ्ओ यातचाक धनि मान्ता मुतो। ओउखे तिरो लेःओ मान्तालमको हाकिमि खेतो। 3ओउइ येसु त तोओ सुखे खेचा त दाह्य्ति योसा बोःङाकान, तर ओउ त्युनो मान्ताझ्यान्ते र नाःतो मान्तालमको हुलइ जाह्ङ्धार्ना ओउइ येसुकाय च्यउसा खायुलु। 4ओउतझ्यान्ते जखायस हुलसय ङ्हा तन्ति आला र येसुकाय योसाको लागि यातज्यो ताह्ङो न्याम्सि सिङहाङ लह्ना धइतिदाह्य्सा येसु ओउ ल्याम स्याउधय आल्सास्याउधय खेतो। 5जब येसु ओउ सिङ मुओ थाउहाङ दाह्सास्यावा, येसुइ त्याःउताङ योति जखायसकाय तोसास्यावा, “अ जखायस, रेह्न्तोले काःम्ताङ ग्ल्युह्ङ्ति वाङ। धइतिदाह्य्सा तेन ङा नाङको किमहाङ मुसा परओ मुना।”
6ओउतझ्यान्ते जखायस रेह्न्तोले काःम्ताङ ग्ल्युह्ङ्ति वाङा र येसुकाय आसति स्वागत जाह्ङाकान। 7जुदा मान्तालमइ ओउ च्यवाकानि, अनि ओउमय एतदाह्य्ति काथ्याउलाङ फाःङाकानि, “इ मान्तापाय पापिको किमहाङ बास मुलाङ आल्धय मुना!”
8केहि समय लोन्हे, जखायसइ ङ्हा चिङ्ति प्रभुकाय तोआथय, “प्रभु, ङा लयको धन-सम्पतिको आधा भाक गरिबलमकाय वेःति बइनाङ, र धोका बइति कुनय मान्ताकसय केहि थोक लेःआलाङ त खेया, ङाइ ओउकाय प्लय भाक द्याःन्ति बइनाङ।”
9अनि येसुइ ओउकाय तोसास्यावा, “तेन इ किमको जुदा माचरलमइ मुक्ति दोःओ मुना, धइतिदाह्य्सा इ जखायसमा अब्राहामको सन्तानले खेना।#१९:९ लयको पुर्खा अब्राहामइ जाह्ङोलेखा परमेस्वरकाय बिस्वास जाह्ङ्ति जखायस स्याका। ओउखे अब्राहामको सन्तान स्यावोझ्यान्ते मात्र स्याकोखे खेलेल। 10धइतिदाह्य्सा ङा मान्ताको चोःपाय परमेस्वरकाय तह्य्मात मिह्ओ मान्तालमकाय बोःङ्लाङ र दल्ताक्लाङले लाङकासय वाङो खेनाङ।”
सुनको ध्याकको ल्हाकराय
(मति २५:१४-३०)
11ओउमयइ इ कुरा साइधय जाह्ङ्धार्ना, येसुइ ओउमयकाय यातज्यो ल्हाकराय तोसास्यावा। धइतिदाह्य्सा येसु यरुसलेमको द्याङ्तो दाह्सास्यावो खेतो, अनि मान्तालमइ परमेस्वरको राज्य रेह्न्तोले थासा लागओ मुना त म्हरितो। 12ओउतझ्यान्ते येसुइ तोसास्यावा, “कुनय यातचाक ताह्ङो मान्ताइ लोक्तो देसहाङ आल्ति लयको देसको राजा स्याउसा अधिकार लात्ति पाह्य्ति वाङ्सा योजना जाह्ङाकान। 13लय आल्सासय ङ्हा, ओउइ लयको दस जना नोकरलमकाय ब्रकले गोताकान अनि या-यातज्यो सुनको ध्याक#१९:१३ सुनको ध्याक ओउतोक बेलाहाङ यातज्यो सुनको ध्याक सुम महिनाको ज्याला सरह स्याउतो। बइधय तोआकान, ‘ङा द्याह्न्ति दाह्माच्युक इ सुनको ध्याकइ बेपार जाह्ङ्ति अरु नाःतो कमाय जाह्ङ्नु।’ 14तर लयको देसको मान्तालमइखे ओउकाय जुगाङमा झाकाकिलि। ओउतझ्यान्ते ओउ आलापछि ओउमयइ खबरदुतलमकाय एतदाह्य्ति तोलाङ ल्होकाकानि, ‘इ मान्ता निको राजा स्यावो नि चाहङसुलु।’
15 तर ओउ मान्ता राजा स्याउसा अधिकार दोःतिले पाह्य्तिवाङा। दाह्नातासले नोकरलमइ गच्युक कमावाकानि त दाह्य्ति चिःसाकाय, ओउइ ओउमयकाय वाङ्सा हुकुम जाह्ङाकान। 16ङ्हाको यातचाक नोकर वाङ्ति दाह्या, ‘मालिक, नाङइ बइसास्यावो यातज्यो सुनको ध्याकसय ङाइ दस गोता सुनको ध्याक कमावालाङ।’ 17राजाइ ओउकाय तोआथय, ‘स्याबास, ङाको पेओ नोकर! धइतिदाह्य्सा नाङ आन मयो कुराहाङमा बिस्वासिलो स्याउतेआ, द्याह ङाइ नाङकाय दस सहरको हाकिमि जाह्ङ्नेनाङ।’ 18अर्को नोकर वाङ्ति दाह्या, ‘मालिक, नाङइ बइसास्यावो यातज्यो सुनको ध्याकसय ङाइ पोङाज्यो सुनको ध्याक कमावालाङ।’ 19राजाइ ओउकाय तोआथय, ‘नाङकाय ङाइ पोङाज्यो सहरको हाकिमि जाह्ङ्नेनाङ।’ 20अनि अर्को नोकर वाङ्ति दाह्या, ‘मालिक, नाङइ बयो सुनको ध्याक इहाङ मुना। ङाइ इ सुनको ध्याककाय पेतोकुसि रुमालहाङ तुय्क्ति नुस्तिगमो खेनाङ। 21ङा नाङकाय रयालाङ, धइतिदाह्य्सा नाङ आन खरो मान्ता खेतेना। नाङइपाय लयको खेमालोमा लेःतेनउ, र लयइ सुक्मालो अन्नमा राःतेनउ।’ 22राजाइ ओउकाय तोआथय, ‘नाङ पेमालो दुस्त नोकर! नाङको म्होतोङको कुरासयले ङाइ नाङकाय गाल बइनेनाङ। ङा खरो मान्ता खेनाङ, ङाइ लयको खेमालोमा लेःनाङ र लयइ सुक्मालो अन्नमा राःनाङ त दाह्यो कुरा नाङइ चिःलेतेउतो। 23यदि ओउतखेया, धइति नाङइ ङाको थेपो बेङहाङ काति गम्तेउलु त? ङा द्याह्न्ति दाह्धार्ना ङाको थेपो केहि ब्याजकुसि दोःचाङ खेतो।’ 24अनि ओहाङ चिङ्तिमुओलमकाय ओउ राजाइ तोआकान, ‘इकुसि मुओ सुनको ध्याक लाति दस गोता ध्याक नाःओ नोकरकाय बइनु।’ 25तर ओउमय त्याङाकाय, ‘मालिक, ओउकुसिपाय दस गोता सुनको ध्याक मुलेनाबा!’ 26राजाइ ओउमयकाय तोआथास, ‘ङाइ निङकाय तोनेनाङ्स, सुकुसि केहि थोक मुना, ओउकाय अझ नाःतो बइलेना। तर सुकुसि नाःल, ओउकुसि मइतो मुओमा ओउकसय लालेना। 27द्याह ङाकाय राजा स्यावो योसा झाक्मालो ङाको बइरिलमकाय, इहाङ वान्ति ङाको ङ्हा सात्नु!’”
येसु यरुसलेम सहरहाङ पोक्सास्यावो
(मति २१:१-११; मर्कुस ११:१-११; युहन्ना १२:१२-१९)
28येसुइ इ ल्हाकराय तोसास्यावापछि, येसु ओउमयको ङ्हा यरुसलेमको ल्यामताङ वाह्सास्यावा। 29जब येसु बेथफागे र बेथानिया त तोओ गाउ द्याङ्तो जयतुन दान्दाहाङ दाह्सास्यावा, येसुइ लयको चेलालम मध्येको निसचाककाय एतदाह्य्ति ङ्हा ल्होक्सास्यावा, 30“ओउ पारिको गाउहाङ आल्ज। ओउ गाउहाङ निङ्जि पोक्तोक बेलाहाङ, देङेसम्म सुमा लह्न्धाङ्मालो गधाको यातज्यो चोः पेह्न्तिगमो निङ्जिइ ङाइतेनाजु। ओउकाय फानाक्तिको इताङ लात्ति वान्जु। 31यदि कुनय मान्ताइ ‘इकाय धइति फानो?’ त दाह्य्ति ह्वत्तेनाज त खेया, ‘प्रभुकाय इ चाहओ मुना’ त दाह्य्ति तोजु।”
32ओउ निसचाक चेलानिस प्रभुइ तोसास्यावो गाउहाङ आलाकाच र येसुइ तोसास्यावो लेखाले गधाको चोः ङाःयाकाचु। 33ओउनिसइ गधाको चोः फान्धय जाह्ङ्धार्ना ओउको मालिकलमइ ओउनिसकाय ह्वताथाच, “धइति निङ्जिइ इ गधाको चोःकाय फान्धय मुतेनाज?”
34“प्रभुकाय इ चाहओ मुना” त दाह्य्ति ओउनिस त्याङाकाच। 35ओउनिसइ गधाको चोःकाय येसुकहाङ वानाकाचु, र लयनिसको क्रमनायइ गधाको चोःकाय क्रमाक्तिको ओउको मल्ग येसुकाय च्युःङ्ताकाकाचु। 36अनि येसु गधाको चोःको मल्ग च्युःङ्ति ङ्हाताङ आल्सास्यावा, र अरु मान्तालमइमा येसुको ङ्हा ल्यामहाङ लयमयको क्रमनायलम न्हापाकानि।
37जब येसु यरुसलेम द्याङ्तो जयतुन दान्दाको तोरहाङ दाह्सास्यावा, येसुइ जाह्ङ्सास्यावो ग्याह्ङ्सिओ कामलमको लागि येसुको चेलालमको ताह्ङो हुललमइ आन चोङाइति, ताह्ङो हाउनयहाङ परमेस्वरको प्रसङ्सा जाह्ङ्सा फाःङाकानि—
38“प्रभु परमेस्वरको मय्ङहाङ वाङ्सास्यावो राजा,
धन्नेको खेसास्याउना!
लाङकाहाङ धोमाइतो स्याउपाना,
र परमेस्वरको महिमा स्याउपाना!”#भजन ११८:२६; १४८:१
39केहि फरिसिलमइ मान्तालमको हुलसय येसुकाय तोआकानि, “गुरु, नाङको चेलालमकाय ङइमात मुन त दाह्य्ति आग्या बइसास्याउपाना।”
40तर येसुइ जवाफ बइसास्यावा, “ङाइ निङकाय तोनेनाङ्स, यदि इ मान्तालम ङइमात मुनय त खेया, बाङलमले हिह्सा फाःङ्नानि।”
यरुसलेमकाय च्यउति येसु र्यासास्यावो
41जब येसु यरुसलेम द्याङ्तो दाह्सास्यावा अनि यरुसलेम सहरकाय लयको ङ्हा च्यउति सहर र ओहाङको मान्तालमको लागि येसु र्यासास्यावा, 42अनि दाह्य्सास्यावा, “अ यरुसलेमको मान्तालम, यदि तेनको दिन धोमायो दोःसाको लागि दोह जाह्ङ्सा परना त दाह्य्ति चिःया स्याउतेइतो! तर द्याह अबेला स्याउतिभ्याआ, ओउतझ्यान्ते निङइ धोमायोको बारेहाङ चिःसा खाइतेनिलि। 43धइतिदाह्य्सा अ यरुसलेम, द्याह नाङकहाङ एतताह्ङो दिनलम वाङ्ना, ओउबेलाहाङ नाङको बइरिलमइ यासो बल्यो पर्खाल लावति वरिपरिसय घेरतेना, र आक्रमन जाह्ङ्तेना। 44ओउमयइ नाङ र नाङकहाङ याको मान्तालमकाय म्हेत्ताक्नानि। र ओउमयइ नाङको किमलम र पर्खाललम द्योक्तोले म्हेत्ताक्नानि, धइतिदाह्य्सा परमेस्वरइ नाङकाय स्याक्ताक्लाङ वाङो समयकाय नाङइ तह्य्सा खाइतेउलु!”
येसु परमेस्वरको मन्दिरहाङ आल्सास्यावो
(मति २१:१२-१७; मर्कुस ११:१५-१९; युहन्ना २:१३-२२)
45जब येसु परमेस्वरको मन्दिरको आङ्गनहाङ पोक्सास्यावा, अनि भोक बइसाको लागि पसुलम र अरु मालताललम विःन्तिमुओ मान्तालमकाय ओहाङसय रुन्सास्यावा। 46येसुइ ओउमयकाय तोसास्यावा, “धर्मसास्त्रहाङ लेखओ मुना, ‘ङाको मन्दिर प्राथनाको किम स्याउसा परलेना।’#यस ५६:७ तर निङइपाय इकाय ‘कुःरेउलम नुको ल्युमपुक’#यर ७:११ ते जाह्ङ्तेआकानि।”
47येसुइ दिनमले मन्दिरहाङ स्यान्सास्याउतो। अनि मुख्य पुजारिलम, धर्मगुरुलम र पाको अगुवालमइ येसुकाय सात्सा बोःङ्नितो। 48तर येसुकाय गतहाइति सात्सा त दाह्यो कुरा ओउमयइ चिःसा खाइनिलि, धइतिदाह्य्सा जुदा मान्तालमइ येसुको स्यानराय साइसा आनले झाकितो।
Currently Selected:
लुका 19: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
