लुका 21
21
राङ्गि मोम्चोको भेति
(मर्कुस १२:४१-४४)
1येसुइ वरिपरि योसास्यावा र मन्दिरको आङ्गनहाङ गमो भेति काओ बकासहाङ धनि मान्तालमइ भेति काधयमुओ च्यउसास्यावा। 2र येसुइ यातचाक गरिब राङ्गि मोम्चोइ आन मयो ताम्बको निसध्याक थेपो काधयमुओमा च्यउसास्यावा। 3अनि येसुइ तोसास्यावा, “दोङ्सिले ङाइ निङकाय तोनेनाङ्स, इ गरिब राङ्गि मोम्चोइ अरु जुदासय नाःतो भेति काओ मुना। 4धइतिदाह्य्सा अरुइपाय लयकुस मुओ नाःतो धनलमसय काआकानि, तर इ गरिब राङ्गि मोम्चोइपाय लयकुस मुओ जुदाले काआकान।”
परमेस्वरको मन्दिर म्हेत्ति वाइना त दाह्य्ति येसुइ तोसास्यावो
(मति २४:१-२; मर्कुस १३:१-२)
5येसुको केहि चेलालम मन्दिरको बारेहाङ नोःधय खेइतो। मन्दिर जाह्ङ्धार्ना काओ पे-पेओ बाङलम र मान्तालमइ बयो अरु सिङगारो थोकलमको बारेहाङ कुरा स्याउधय खेतो। तर येसुइ तोसास्यावा, 6“एतताह्ङो बिनासको समय वाङ्ना, देङे निङइ च्यवो मन्दिरको जुदा बाङलम साहाङ गादाबादा त स्याउना, र यातज्याङ बाङको त्याःउसय अर्को बाङमा चह्य्ङ्ति मुल।”
समस्या र सतावतलम
(मति २४:३-१४; मर्कुस १३:३-१३)
7चेलालमइ येसुकाय ह्वताकानि, “गुरु, इ जुदा कुरालम गल स्याउना र? अनि ओउत स्याउसा लागधार्ना दोह चिनो स्याउलाङ वाङ्ना त?”
8येसुइ तोसास्यावा, “होसियार स्याउति मुन, निङ सुकसयमा धोका दोःजेलाम। धइतिदाह्य्सा नाःतो मान्तालमइ ङाको मय्ङ लेःति ‘ख्रिस्त ङाले खेनाङ’ त दाह्य्ति वाङ्लेनय, अनि ‘समय द्याङ्तोले दाहो मुना’ त तोलेनानि। तर ओउमयकाय गुह्ल्ति वाह्जेलाम। 9जब निङइ युद्ध र कायकायो कुरालम साइतेनानि, निङ रइलाम! धइतिदाह्य्सा द्युम्तो स्याउसासय ङ्हा ओउ कुरालम स्याउलाङ वाङ्साले परना, तर ओउच्युक खेरलेखे ल्हाउदयबाङ द्युम्तो स्याउलेल।”
10अनि येसुइ ओउमयकाय तोसास्यावा, “यातज्यो जातिको बिरोत अर्को जातिइ जाह्ङ्लेनउ, अनि यातज्यो राज्यको बिरोतहाङ अर्को राज्य चिङलेना। 11आन रइसिओ ल्याङलम आल्लेना, नाःतो थाउलमहाङ अनिकाल र माहामारि स्याउलेना। अनि फेलबाङहाङ रइसिओ कुरालम र ताह्ङो-ताह्ङो चिनोलम च्यउलेना। 12तर इ जुदा कुरा स्याउसासय ङ्हा, निङकाय मान्तालमइ चुम्तेनय र दुख बइतेनय, र सभाकिमलमहाङ आःल्ति मुद्दा काति झेलकनहाङ कुङ्तेनय। अनि ओउमयइ निङकाय ङाको मय्ङको कारनइ राजालम र हाकिमिलमको ङ्हा आःल्तेनय। 13अनि ओउ समयखे ओउमयकाय ङाको बारेहाङ तोसाकाय निङको लागि मउका स्याउलेना। 14तर ओउत स्याउसासय ङ्हा लयकाय गतहाइति दल्ताक्सा खेचा त दाह्य्ति लयको ल्हुङतुकहाङ जुगाङमा लिह्लाम। 15धइतिदाह्य्सा ङाइ निङकाय बुद्दि बइनेनाङ्स, ओउतझ्यान्ते दोह नोःसा परना त दाह्य्ति निङइ चिःतेनानि। ओउतस्याउधार्ना निङको बइरिलमइ निङको कुराको जवाफ बइसा ज्योइलि अथबा निङकाय पेमातो तोसा खाइनिलि। 16निङको लयको आपा-आमालम, पुःचोङलम, लयको मान्तालम र होयालमइमा निङकाय चुम्ताक्तेनय। निङमध्ये गच्युककायपाय ओउमयइ सात्लेतेनय। 17निङइ ङाकाय बिस्वास जाह्ङोझ्यान्ते जुदा मान्तालमइ निङकाय हेला जाह्ङ्तेनय। 18तर परमेस्वरइ निङकाय गतताह्ङो दुखलमसय खेयाकायमा दलताक्सास्याउना, ओउतझ्यान्ते यातज्यो म्याङमा निङको तालाङसय रह्तिवाइल। 19मधिम त मुन र निङइ अजम्बरि रुवाङ दोःलेतेनय।”
यरुसलेम म्हेत्लेना त दाह्य्ति येसुइ तोसास्यावो
(मति २४:१५-२१; मर्कुस १३:१४-१९)
20 “तर जब यरुसलेम सहरकाय बइरिलमको सेनालमइ वरिपरिसय घेरओ च्यउतेनानि, अनि सहर म्हेत्सा बेला द्याङ्तो दाहो मुना त दाह्यो कुरा निङइ चिःनु। 21ओउबेलाहाङ यहुदिया छेत्रहाङ मुओलमखे यासो दान्दालमताङ क्रउपनय। यरुसलेम सहरभित्र मुओलमखे रेह्न्तोले सहर फेति क्रउपनय, र बाहिर गाउखा मुओलमखे सहरभित्र पोक्जेलाम। 22धइतिदाह्य्सा धर्मसास्त्रहाङ लेखओ जुदा कुरा पुत्साकाय ओउ समयखे दन्दको लागि खेलेना।#होसे ९:७ 23तर ओउबेलाहाङ चोःतुक मोम्चोलम र खोसहाङ दुतको बालाख नाःओ आमालमकाय झन् गच्युक दुक्तो स्याउना! धइतिदाह्य्सा ल्हाउदयबाङहाङ आन रइसिओ दुख वाङ्लेना, अनि परमेस्वरको दन्द इ जातिको मान्तालमकहाङ परलेना। 24ओउमयमध्ये केहिलमकाय नाःसुइइ पाल्ति सात्नाथास, र अरुकायखे चुम्ति अरु जुदा देसहाङ आःल्नानि। अरु जातिको मान्तालमइखे यरुसलेमकाय लयको अधिनहाङ गम्नानि र ओउमयको राज्यको समय पुत्माच्युक ओउमयकाय आन नाःतो दुख बइनानि।”
ङा मान्ताको चोः वाङ्साखेओ समय
(मति २४:२९-३५; मर्कुस १३:२४-३१)
25 “न्याम, लाह् र कारालमहाङ ग्याह्ङ्सिओ चिनोलम च्यउलेना। अनि समुन्द्रको ङुह्रो र रइसिओ छल्कालमइ जाह्ङ्धार्ना ल्हाउदयबाङको जुदा मान्तालम आन रइति लिह्सितो स्याउलेनय। #
यस १३:१०; इज ३२:७; योए २:३१ 26ल्हाउदयबाङहाङ स्याउलाङ वाङो कुरालमकाय रइति मान्तालम लिह्ति प्रात्तो स्याउलेनय, धइतिदाह्य्सा फेलबाङको जुदा जिःङलम रिह्ङ्लेनय। 27ओहाङसयको जिःङ र महान् महिमाकुस ङा मान्ताको चोःकाय मुसहाङ वाङ्धयमुओ जुदा मान्तालमइ च्यउनानि।#दान ७:१३ 28जब इ कुरालम स्याउलाङ वाङ्ना, चिङ्न र त्याःउताङ त्याउति योनु, धइतिदाह्य्सा निङको छुत्कारा द्याङ्तोले वाङ्तिभ्याओ मुना।”
29अनि येसुइ ओउमयकाय यातज्यो ल्हाकराय तोसास्यावा, “न्याम्सि सिङ र अरु सिङलमकाय योनु। 30जब निङइ सिङको मात तुःरो च्यउतेनानि, धाह्काले समय द्याङ्तो दाहा त दाह्य्ति निङइ चिःतेनानि। 31ओउतहाइतिले, जब निङइ ङाइ तोओ इ जुदा कुरालम स्याउधयमुओ च्यउतेनानि, परमेस्वरको राज्य द्याङ्तो दाह्साले लागआ त दाह्य्ति निङइ चिःतेनानि।
32 दोङ्सिले ङाइ निङकाय तोनेनाङ्स, ङाइ तोओ इ जुदा कुरालम पुत्माच्युकसम्म इ पुस्ताको मान्तालम सिति आल्लेइलि। 33फेलबाङ र ल्हाउदयबाङ अलप्ति ज्याल्लेना, तर ङाको आखर गलमा अलप्लेल।”
चनाखो स्याउति मुसा परना
34 “होसियार स्याउन, निङको नाःतो समय मोजमज्जाहाङ जेःति-तुङ्ति र ङोआक्तिको इ रुवाङको बारेहाङ लिह्ति द्योक्जेलाम, नत्रपाय निङइ चिताउमालो बेलाहाङ अचानक ओउ दिन निङकहाङ धाराप लेखा वाङ्जेचा। 35धइतिदाह्य्सा ओउ दिन इ ल्हाउदयबाङहाङ याको जुदा मान्तालमकहाङ वाङ्लेना। 36ओउतझ्यान्ते जुदा समय तयार स्याउति मुन, र वाङ्साखेओ इ जुदा कुरालमसय बेनसा र ङा मान्ताको चोःको ङ्हा चिङसाकाय जिःङ दोःपाङ्सु त दाह्य्ति जुदा समय प्राथना जाह्ङ्ति जागराम मुन।”
37दिनमले येसुइ दिनखे परमेस्वरको मन्दिरहाङ आल्ति स्यान्सास्याउतो, र याह्दिङखे सहरसय ग्ल्युह्ङ्ति जयतुन दान्दाहाङ एःन्लाङ आल्सास्याउतो। 38जुदा मान्तालम बिहान सइबर च्योक्ति येसुको स्यानराय साइलाङ मन्दिरहाङ वाङितो।
Currently Selected:
लुका 21: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
