लुका 8
8
येसुकाय सहयोग जाह्ङो मोम्चोलम
1ओहाङसयको येसु परमेस्वरको राज्यको पेओ खबर प्रचार जाह्ङ्धय सहर-सहर र गाउ-गाउताङ आल्सास्यावा। बाह्र जना मुख्य चेलालममा येसुकुस ब्रकले आलाकाय। 2अनि दुस्त ग्वालामलम र रोगलमसय स्याको गच्युक मोम्चोलममा येसुकुस ब्रकले खेइतो, र ओउमय मध्येहाङ मग्दलिनि त तोओ मरियममा खेतो, र येसुइ ओउको ज्यानसय सात गोता लानलम रुःन्ति ल्होक्सास्यावो खेतो। 3हेरोद एन्तिपास राजाको किमहाङ काम जाह्ङो हाकिमि खुजासको माचा योअन्ना, र सुसन्ना, र अरु नाःतो मोम्चोलमइमा येसु र ओउको चेलालमकाय लयको थेपो बइति सेवा जाह्ङ्नितो।
बिया वारो ल्हाकराय
(मति १३:१-९; मर्कुस ४:१-९)
4गाउ-सहरलमसय नाःतो मान्तालम येसुकताङ वाङ्धयले खेइतो। अनि जब नाःतो मान्तालमको हुल हुम्ति भ्याआकाय, येसुइ ओउमयकाय इ ल्हाकराय तोसास्यावा, 5“यातपल्त यातचाक किसानि राङहाङ आल्ति बिया वाराकान। ओउइ राङहाङ बिया वारतोकहाङ, कोय बिया ल्यामहाङ दिह्लाङ आला, र ओउ बियाकाय मान्तालमइ झोआकानि अनि बन वाःलमइ वाङ्ति जेःआकानि। 6गच्युक बियाखे बाङराङहाङ दिह्लाङ आला, ओहाङ दुङसापाय दुङा, तर न्याःतो साः नाःमालोझ्यान्ते ओउ बिरुवा र्युमा। 7अनि गच्युक बियाखे चुःको झ्युरहाङ दिह्लाङ आला, र चुःको झ्युरइ बोःम्तिझ्यान्ते दुङो बिरुवाकाय पेतो ताह्ङ्साले बयुलु। 8तर गच्युक बियाखे पेओ आह्य्साःहाङ दिह्लाङ आला, र होर्योर्यो त ब्रावा अनि यातज्यो बियासय यात सय गुना नाःतो साया।”
अनि येसुइ इ ल्हाकराय द्युम्ताक्धय एत तोसास्यावा, “सुको साइसा नो मुना, ओउइ साइपनउ।”#मति ११:१५; १३:९,४३; मर्क ४:९,२३; ७:१६; लुक १४:३५
ल्हाकरायहाङ तोओको कारन
(मति १३:१०-१७; मर्कुस ४:१०-१२)
9येसुको चेलालमइ ल्हाकरायको माने दोह खेना त दाह्य्ति येसुकाय ह्वताकानि, 10अनि येसुइ ओउमयकाय तोसास्यावा, “परमेस्वरको राज्यको गोप्पे कुरा चिःओ ग्यान निङकाय बयो मुना। तर धर्मसास्त्रहाङ तोओ अनुसार अरुकुसखे ङा ल्हाकरायहाङले नोःनाङ। ओउतझ्यान्ते,
‘ओउमयइ योसापाय योनानि,
तर च्यउनिलि।
र साइसापाय साइनानि,
तर चिःनिलि।’” #
यस ६:९
येसुइ बिया वारो ल्हाकरायको बारेहाङ तोसास्यावो
(मति १३:१८-२३; मर्कुस ४:१३-२०)
11 “इ ल्हाकरायको माने इ खेना, बिया त तोओखे परमेस्वरको आखर खेना। 12ल्यामहाङ दिह्लाङ आलो बियाइ इ चिःताक्नउ, कि ओउमयइ आखर साइसापाय साइनानि तर ल्हुङतुकहाङ गम्सा खाइनिलि, धइतिदाह्य्सा बिस्वास जाह्ङ्ति स्याक्सा दोःलाम त दाह्य्ति दुस्त सय्तान वाङ्ना, अनि सायो नोःराय ओउमयको ल्हुङतुकसय सेक्ति आःल्नउ। 13ओउ बाङराङहाङ दिह्लाङ आलो बियाइखे इ चिःताक्नउ, कि ओउमयइ परमेस्वरको आखर साइति आसति त्याक्नानि। तर ओउमयकुस ज्युह्म्तो रुत नाःमालोझ्यान्ते आखरकाय लयको ल्हुङतुकहाङ पेतोकुसि गम्सा खाइनिलि। ओउत स्याउधार्ना ओउमयको बिस्वास यातछिनकाय मात्र स्याउना, अनि दुको र दुखको बेलाहाङ पतन स्याउना। 14अनि ओउ चुःराङहाङ दिह्लाङ आलो बियाइखे इ चिःताक्नउ, कि ओउमयइ परमेस्वरको आखरपाय साइनानि, तर ल्हाउदयबाङको लिह्सिओ थोकलम, धन-सम्पतिको लोभ र मोजमज्जालमइ जाह्ङ्धार्ना बिस्वासकाय ब्याउसाले बयुलु र ओउमयकसय दोह सायमा साइलेल। 15तर ओउ आह्य्साःहाङ दिह्लाङ आलो बियाइखे इ चिःताक्नउ, कि गच्युक जनाइ परमेस्वरको आखर साइनानि, अनि आग्याकारि स्याउति सायो आखरकाय पेतोहाइति ल्हुङतुकहाङ गम्नानि, र साय साइमाच्युककाय मधिम त मुति ल्युह्ङ्नानि।”
बत्तिको ल्हाकराय
(मर्कुस ४:२१-२५)
16 “सुइमा बत्तिको थोङोकाय भान्दाइ बोःम्निलि, अनि भान्दाइ कोःम्ति खात ताल्गेमा गम्निलि। बरु किमभित्र मुओलमकाय थोङतो स्याउपा त दाह्य्ति बत्तिकाय तेउकाहाङ गम्नानि।
17 दोह थोक च्यउमातो मुना ओउ थोक थालाङ वाङ्ना, र दोह थोक बोःम्तिगमो मुना ओउ थोक ङाइना र थोङोहाङमा वाङ्ना।
18 ओउतझ्यान्ते निङइ सायो नोःरायकाय पेतोकुसि घिःति साइनु, धइतिदाह्य्सा सुकुस मुना ओउकाय अझले बइलेना, तर सुकुसि दोहमा नाःल ओउकसय मुओमा लालेना।”
येसुको आमा र हउलम
(मति १२:४६-५०; मर्कुस ३:३१-३५)
19यात दिन येसुको आमा र हउलम येसुकाय क्रुस्लाङ वाङाकाय, तर मान्तालमको नाःतो हुल मुओझ्यान्ते ओउमयइ येसु द्याङ्तो आल्सा खाइनिलि। 20यातचाकइ येसुकाय तोआथय, “नाङको आमा र हउलम नाङकाय क्रुस्साको लागि बाहिर ल्युह्ङ्ति मुनय।”
21येसुइ ओउमय जुदाकाय तोसास्यावा, “परमेस्वरको नोःराय सायो र ङ्हामोलमले ङाको आमा र हउलम खेनय।”
येसुइ ताह्ङो गाइधकाय दिःताक्सास्यावो
(मति ८:२३-२७; मर्कुस ४:३५-४१)
22यात दिन येसु लयको चेलालमकुस दोङगाहाङ लह्न्सास्यावा र ओउमयकाय तोसास्यावा, “लउ, द्याह नि दुह्मान तिःको पारिताङ आलि।” ओहाङसयको ओउमय पारिताङ आलाकाय। 23दोङगाहाङ आल्धय जाह्ङ्धार्ना येसु एःन्सास्यावा। अचानक दुह्मान तिःहाङ ताह्ङो गाइध वाङा, र दोङगाहाङ तिः ब्लिङ्सा लागआ, ओउतझ्यान्ते ओउमय ताह्ङो आपतहाङ परआकाय। 24अनि येसुको चेलालम येसुको द्याङ्तो आलाकाय, र येसुकाय म्हाङ्धय तोआकानि, “गुरु, गुरु, निपाय सिसाले लागआतहि!”
एत साइति येसु च्योक्सास्यावा र तिःकुस वाङो ताह्ङो गाइधकाय एवेङ त स्याउसा आग्या बइसास्यावा। र गाइध दिःआ र ओहाङ एवेङ त स्यावा।#भजन ६५:७; १०४:७; १०७:२९; मति १४:३२; मर्क ६:५१; लुक ४:३९
25ओहाङसयको येसुइ चेलालमकाय तोसास्यावा, “निङको बिस्वास गाहाङ मुना?”
तर ओउमय ग्याह्ङाकाय र रयाकाय, अनि लयमय तोकायाकाय, “इ मान्ता सु खेना र?#मति २१:१०; लुक १:६६; ५:२१; ७:४९; ९:९ इ मान्ताइ आग्या बइनउ, ओउतले गाइध र तिःलमइमा इको आग्या ग्यानय!”
लानइ ङाःयो मान्ताकाय येसुइ स्याक्ताक्सास्यावो
(मति ८:२८-३४; मर्कुस ५:१-२०)
26येसु र ओउको चेलालम गालिल समुन्द्रको पारिसय गेरासेनस त तोओ सहरहाङ दाहाकाय। 27दोङगासय ग्ल्युह्ङ्धार्ना ओउ थाउको यातचाक लानइ ङाःयो मान्ताकाय येसुइ क्रुस्सास्यावा। ओउ मान्ताइ नाःतो दिनहाङसय नाय लावाक्सल, तर किमहाङमा मुमात तेसराङको ल्युमपुकलमहाङ याक्तो। 28येसुकाय च्यउति ओउ जोक्तो हिह्आ, र येसुको ङ्हा बाःति सेवति तोआकान, “अ येसु, जुदासय ताह्ङो प्रभु परमेस्वरको चोः, नाङको ङाकुस दोह काम र? ङाइ नाङकाय सेवनेनाङ, ङाकाय दन्द बइजेलाम!” 29येसुइ दुस्त ग्वालामकाय ओउकसय ग्ल्युह्ङ्ति क्रउसाकाय आग्या बइसास्यावोझ्यान्ते ओउइ एत दाह्यो खेतो। नाःतो खेप ओउकाय दुस्त ग्वालामइ ङाःयो खेतो, मान्तालमइ ओउको क्रुत-दोम साङ्लाइ पाःन्ति गम्धार्नामा ओउइ साङ्ला तेत्ति वायुतो अनि लानइ ओउकाय सुमा याक्मालो थाउताङ आःल्थातो।
30येसुइ ओउकाय ह्वत्सास्यावा, “नाङको मय्ङ दोह?”
“ङाको मय्ङ ‘फउज’#८:३० फउज ग्रिक भासा अनुसार “फउज” को मानेखे “छ हजार सिपाहिलमको ताह्ङो समुह” त दाह्य्ति चिःसा खाइना। खेना” त दाह्य्ति ओउ त्याङा, धइतिदाह्य्सा ओउकाय नाःतो लानलमइ ङाःयो खेतो।
31ओउमयकाय ज्युह्मो नालाताङ ल्होक्लाम त दाह्य्ति लानलमइ येसुकाय बिन्ति जाह्ङाकानि।#भजन १४०:१०; रोम १०:१७
32ओहाङ द्याङ्तो दान्दाको ध्यापहाङ नाःतो प्याकको बथानलम ह्राम्तिमुओ खेइतो। अनि लानलमइ “प्याकलमको बथानहाङ पोक्सा अनुमति बइसास्याउपाना” त दाह्य्ति येसुकाय सेवति तोआकानि अनि येसुइ अनुमति बइसास्यावा। 33ओउ लानलम मान्ताकसय ग्ल्युह्ङ्ति प्याकलमकहाङ पोकाकाय। अनि ओउ प्याकलमको बथान वारसय दुह्मान तिःहाङ ज्योस्ति ज्युप्ति सिआकाय।
34एत स्यावो च्यउति प्याक ह्राःमोलम क्रवाकाय र ओउ कुरा गेरासेनस सहरको वरिपरिको गाउ-थाउहाङ ल्हाक्ति छ्यानाकानि। 35नाःतो मान्तालम दोह स्यावो त म्हर्ति योलाङ वाङाकाय। अनि जब ओउमय ओहाङ दाहाकाय, ओउमयइ ओउ लानइ ङाःयो मान्ताकाय आन पेतो स्याकाक्तिको नाय लावति येसुको दोम द्याङ्तो च्युःङ्तिमुओ क्रुसाकानि। ओउत च्यउति ओउमय आन जोक्तो रयाकाय। 36ओउ लानइ ङाःयो मान्ता स्याको ङ्हा च्यवोलमइ, सहरसय वाङो अरु मान्तालमकाय जुदा कुरा ल्हाक्ति छ्यानाकानि। 37ओहाङसयको ओउ गेरासेनसको मान्तालमइ येसुकाय इहाङसय पाह्य्सास्याउपाना त दाह्य्ति बिन्ति जाह्ङाकानि, धइतिदाह्य्सा ओउमय आन जोक्तो रयो खेइतो। ओउतझ्यान्ते येसुइ दोङगाहाङ लह्न्ति ओउ थाउ फेति पाह्य्सा बोःङ्सास्यावा। 38लानलम ग्ल्युह्ङ्ति क्रवो ओउ मान्ताइ येसुकाय “ङामा नाङकुस वाङ्सा दोःपाङ” त दाह्य्ति बिन्ति जाह्ङाकान।
तर येसुइ ओउकाय ल्होक्धय तोसास्यावा, 39“नाङ लयको किम पाह्य र परमेस्वरइ नाङकाय दोह ते जाह्ङ्ति बइतेआ ओउ कुरा अरुकाय ल्हाक्ति छ्यानु।”
येसुइ ओउकाय गतहाइति स्याक्ताकाथय त दाह्यो कुरा ल्हाक्ति छ्यान्धय, ओउ मान्ता सहरको ल्याम स्याउधय पाह्या।
येसुइ याइरसको चोःद्याङ र अर्को बिरामि मोम्चोकाय स्याक्ताक्सास्यावो
(मति ९:१८-२६; मर्कुस ५:२१-४३)
40जब येसु दुह्मान तिःको पारिसय द्याह्न्सास्यावा, मान्ताको हुलइ येसुकाय स्वागत जाह्ङाकानि, धइतिदाह्य्सा ओउमयइ येसुकाय ल्युह्ङ्तिमुओ खेइतो। 41अनि यातचाक याइरस त मय्ङ्ओ मान्ता ओहाङ दाह्तिवाङा, ओउखे ओहाङको रइथाने सभाकिमको हाकिमि खेतो। ओउइ येसुकाय ङाको किमताङ वाङ्सास्याउपा त दाह्य्ति येसुको दोमहाङ खुःङ्ति बिन्ति जाह्ङाकान, 42धइतिदाह्य्सा ओउको यातज्योले खेओ बाह्र बर्सको चोःद्याङ सिसा लागओ खेतो।
ओउको बिन्ति साइति येसुइ ओउकुस आल्सा बोःङ्सास्यावा, तर येसुकाय मान्तालमको हुलइ वरिपरिसय घेरतिगमो खेतो। 43र ओउ हुलहाङ बाह्र बर्सहाङसय वुइ होओ बेथाइ दुख च्यवो यातचाक मोम्चोमा खेतो, र सुइमा ओउ मोम्चोकाय स्याक्ताक्सा खायो नाःआक्ल।#८:४३ कुनय-कुनय सङ्सकरनलमहाङखे “ओउ मोम्चोइ लयको जुदा थेपो ओखति जेःसाकाय बइदाङ्गिलमकाय बइति द्योकाकान, तर ओउइ स्याक्साले खायो नाःआक्ल” त दाह्य्ति लेखओ मुना। 44ओउइ मान्तालमको हुलहाङ काह्सय वाङ्ति येसुको नायको छेउसय धिनाकान, अनि धिन्नातासले ओउको वुइ होओ बेथा स्याक्माआ। 45येसुइ ह्वत्सास्यावा, “ङाकाय सुइ धिनाताङ?”
तर ओहाङ सुइमा धिनो कुरा जाह्ङ्निलि, अनि पत्रुस दाह्या, “गुरु, नाङको वरिपरि नाःतो मान्तालम मुनय र मान्तालमको हुलइ नाङकाय न्हेङो मुना।”
46तर येसुइ तोसास्यावा, “सुखेलो यातचाकइ ङाकाय धिनाताङ, धइतिदाह्य्सा ङाइ चिःआलाङ ङाकसय जिःङ ग्ल्युह्ङ्ति आलो मुना।” 47द्याह ङाकाय चिःनाताङ त म्हर्ति ओउ मोम्चो आन रिह्ङ्तो रया, र येसुको ङ्हा वाङ्ति दोमहाङ खुङा। ओहाङ जुदा मान्तालमको ङ्हाहाङले, धइति ओउइ येसुकाय धिनो खेतो र गतहाइति येसुकाय धिन्नातास ओउ स्याका त दाह्यो कुरा ओउ मोम्चोइ येसुकाय तोआथय। 48अनि येसुइ ओउकाय तोसास्यावा, “ङाको चोःद्याङ, नाङको बिस्वासइ नाङकाय स्याक्ताको मुना। द्याह ल्हुङ धोमाइति पाह्य।”
49जब येसु एत तोसास्याउधय खेतो, सभाकिमको हाकिमि याइरसको किमसय यातचाक खबरदुत ओहाङ वाङा। ओउइ याइरसकाय तोआथय, “नाङको चोःद्याङ सितिखाया, द्याह गुरुकाय दुख बइजेलाम।”
50तर इ कुरा साइति येसुइ याइरसकाय तोसास्यावा, “रइलाम, बिस्वास मात्र जाह्ङु, र नाङको चोःद्याङ स्याक्ना।”
51जब येसु याइरसको किमहाङ दाह्सास्यावा, येसुइ पत्रुस, युहन्ना, याकुब, र चोःद्याङको आपा-आमाबाहेक अरु सुकायमा भित्र पोक्सा बयुलु। 52ओहाङ हुम्तिमुओ जुदा मान्तालम मोम्चो सिओझ्यान्ते र्याति अनि लिह्तिमुओ खेइतो। येसुइ ओउमयकाय तोसास्यावा, “र्यालाम, बालाख नानि सिओ नाःल, ओउपाय एःनो मात्र खेना।”
53इ कुरा साइति ओउमयइ येसुकाय निःति थ्यावाकानि, धइतिदाह्य्सा ओउ मोम्चो दोङ्सिले सितिखाया त दाह्य्ति ओउमयइ चिःओ खेतो। 54तर येसुइ नानिको क्रुत चुम्ति तोसास्यावा, “चोःद्याङ, च्योक!” 55अनि मोम्चोको रुवाङ द्याह्न्ति वाङा, र ओउ रेह्न्तोले च्योका, अनि येसुइ “इ मोम्चोकाय केहि जेःगालम जेःसा बइनु” त दाह्य्ति ओउमयकाय तोसास्यावा। 56मोम्चोको आपा-आमा जोक्तो ग्याह्ङाकाच, तर येसुइ ओउमयकाय “इ कुरा सुकायमा छ्यानलाम!” त दाह्य्ति आग्या जाह्ङाथास।
Currently Selected:
लुका 8: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
