मर्कुस 8
8
येसुइ चार हजारके खावाइकेभइल
(मति १५:३२-३९)
1केहाउ दिन पाछु फेरि बड्क भिड जम्मा भइल, तर उसबसाङ खइलाहार कुरा केहाउ पुनु नइजे रहइ। उहइगुनेइ येसुइ चेलासब्के बोलाइकुन कहिकेभइल, 2“इसे भिडके देखिकुन मेह्राके बेस्के दया लाग्ते बाटइ, किकेकने इसब मेह्रासे बोस्ल तिन दिन भइसक्ल, तर इसबसाङ खइलाहार कुरा कने केहाउ पुनु नइजे। 3यदि मोइ इसब्के भुख्लइ घर पाठानेपार इसब पइडायँ मुर्छा पोरिके सक्ताहात्, किकेकने कत्का जेना त टाढोसे पुनु अइल बाटत।”
4हसे चेलासबेइ येसुके कहल, “इसे उजाड ठाउयँ हामे कुछिसे रोटि आनिकुन खावाइके?”
5येसुइ चेलासब्के पुछिकेभइल, “तेउह्रासे कत्का रोटि बाटइ?”
उसबेइ कहल, “सातोटा।”
6उपाछु ओनेनेइ भिडके जमारयँ बोसिके आह्राइकुन, सातोटा रोटि लेइकुन धन्यबाद देइके भइलपाछु रोटि टुक्रेइके भइल, हसे चेलासब्के देइकुन उसे भिडसब्के बाटिदेल। 7उसबसाङ चुत्कि मसिन माछ रहइ, ओनेनेइ उसे माछक लागि पुनु धन्यबाद देइकुन चेलासब्के बाटिके लागाइके भइल। 8सभुनि आघाइलालइके खइल, हसे उसबेइ खाइकुन उब्रल टुक्रासब चेलासबेइ उठातेखना सात ढकिया भरिल। 9उछिका लगभग चार हजार जेना मानुससब रहत। उपाछु ओनेनेइ उसब्के बिदा देइकेभइल। 10हसे ओनेन् ओख्निहिँ चेलासबसाङ डोङायँ चढिकुन दलमनुथा जिल्लापटि जाइकेभइल।
फरिसिसबेइ चिना माङ्ल
(मति १६:१-४)
11हसे फरिसिसब येसुलघि आइकुन बहस करिके थाल्ल। उसबेइ ओनेन्के जाँचिके खोजिकुन कहल, “हाम्राके सोर्गमाटे अइलाहार एक्टा चिना देखाओ।”
12इसे सुनिकुन ओनेनेइ लाबो सास फेर्तिन कहिकेभइल, “इसे पुस्ताइ जइहाँ पुनु किके चिना खोज्ताहात्? साच्चिकइ मोइ तेउह्रासब्के कहतम्, इसे पुस्ताके केहाउ चिना नाइदेओइ।”
13हसे उसब्के छाडिकुन, ओनेन्चाहिँ फेरि डोङायँ चढिकुन ओपार जाइकेभइल।
फरिसिसब र हेरोदक खमिर
(मति १६:५-१२)
14चेलासबेइ आफ्नसाङ रोटि लेजिके बिस्राल रहत, डोङायँ उसबसाङ एक्टा मत्रइ रोटि रहइ। 15हसे येसुइ चेलासब्के चेतावनि देतिन् कहिकेभइल, “तोहेसब फरिसिसब र हेरोदक खमिरसे जोगिकुन बोसउ।” 16तर चेलासबेइ, “हाम्रासे रोटि नइजेगुनेइ ओनेनेइ यस्न कहिकेभइल हखत” कहतिन् एक-अर्कसाङ कुरा करिके थाल्ल।
17उसबेइ कुरा कर्ल थाहा पाइकुन येसुइ उसब्के कहिकेभइल, “तेह्रासब्से रोटि नइजे कइकुन किके बहस कर्ते बाटउ? किति तेउह्रसब्क मन कठोर भइल बाटइ से? अझइ पुनु नादेखउ र नाबुझउ? 18किति तेउह्रसब्क आँखि भइते पुनु नादेखउ? किति कान भइते पुनु तोहेसब नासुनउ? किति तेह्रासब्के याद नइजे? 19जब मोइ पाँचोटा रोटिके पाँच हजारक माझयँ टुक्रा पार्ल रहम, तब कत्का ढकियाभरि रोटिक टुक्रासब उठाल?”
उसबेइ कहल, “बाह्र।”
20येसुइ फेरि पुछिकेभइल, “जब सातोटा रोटि मोइ चार हजारक माझयँ टुक्रा पार्ल रहम, तब तोहेसब कत्का ढकिया रोटिक टुक्रासब उठाल रहउ?”
उसबेइ ओनेन्के कहल, “सात।”
21फेरि येसुइ उसब्के पुछिकेभइल, “किति तोहेसब अझइ पुनु नाबुझउ?”
नइजेदेख्लाहारके निक पार्ल
22उपाछु येसु चेलासबसाङ बेथसेदा आइकेभइल, उछिका मानुससबेइ एक जेना नइजेदेख्लाहारके येसुकलघि आनिकुन, “उख्राके छिइकुन निक पारिदेओ” कइकुन बिन्ति कर्ल। 23हसे ओनेनेइ नइजेदेख्लाहार मानुसके हाथयँ धरिकुन गाउसे बाहार लेजिकुन, उक्र आँखियँ थुथ लागाइकुन आफ्नेन्क हाथ उसे उप्र राखिकुन कहिकेभइल, “तोइ केहाउ देख्ते बाटस्?”
24उहाइ चारिओर चाहातिन् कहल, “मोइ मानुससब्के रुख हिठ्ल जस्नइ देख्ते बाटम।”
25फेरि येसुइ उसे मानुसक आँखियँ हाथ राखिके भइल। हसे उक्र आँखि खुल्ल र उहाइ सभइ थोक छर्लङगइ देखिके सक्ल। 26हसे ओनेनेइ उख्राके, “गाउयँ झुनपोसुक।” कइकुन आग्या देइकुन घर पाठाइकेभइल।
येसु बाचालाहार ख्रिस्ट
(मति १६:१३-२०; लुका ९:१८-२१)
27उपाछु येसु आफ्न चेलासबसाङ कइसरिया फिलिप्पि नजिकइक अरु गाउपटि जाइकेभइल। पइडायँ जइतिन् कर्ते ओनेनेइ चेलासब्के पुछिकेभइल, “मानुससबेइ मेह्राके कोनो कताहात्?”
28उसबेइ कहल, “कोलोउयेइ तेउह्राके बप्तिस्मा देलाहार युहन्ना कताहात्, कोलोउयेइ एलिया त, कोलोउ-कोलोउयेइ चाहिँ अगमबक्तासबमद्धेक एक जेना।”
29हसे ओनेनेइ उसब्के पुछिकेभइल, “तर तोहेसब चाहिँ किति कताहाउ, मोइ कोनो हखम?”
पत्रुसेइ ओनेन्के कहल, “पाउ बाचालाहार ख्रिस्ट हखउ।”
30हसे येसुइ उसब्के, “मेर बारेयँ कोख्राहुके पुनु झुनकहउ” कइकुन चेतावनि देइकेभइल।
येसुइ आफ्न मोर्लाहारबारे कहिकेभइल
(मति १६:२१-२८; लुका ९:२२-२७)
31उपाछु येसुइ चेलासब्के आफ्न बारेयँ यस्न कइकुन सिखाइकेभइल, “मानुसक छावाइ धेरइ दुख भोगिके पोरित, हसे अगुवा, बड्क पुजेहेरि र धर्मगुरुसबेइ इन्कार करित् र मारित, तर तिन दिनपाछु जिउत भइकुन उठित।” 32येसुइ इसे कुरा बुझ्लाहार करिकुन कहिकेभइल। उहइगुनेइ पत्रुसेइ ओनेन्के एकपटि लेजिकुन, यस्न झुनकहउ कइकुन हप्काल।
33तर ओनेनेइ फर्किकुन आफ्न चेलासब्के चाहिकेभइल र पत्रुसके हप्कातिन कहिकेभइल, “ए सइतान, मेह्रासे हटिजा, किकेकने तेर मन परमेसोरपटि नभइकुन, मानुसपटि बाटइ।”
34उपाछु ओनेनेइ आफ्नेन्क चेलासबसाहिन भिडसब्के बोलाइकुन कहिकेभइल, “कोलोउ मेर चेला भइके खोज्ताहात् कने, उहाइ आफइके इन्कार करिकुन आफ्न क्रुस बोकिकुन मेर पाछु लागुस। 35किकेकने जोनेइ आफ्न जिबन बाचाइके खोजित, उहाइ उसे गुमाइत, तर जोनेइ मेर र सुसमचारक लागि आफ्न जिबन गुमाइत, उहाइ उसे बाचाइत। 36मानुसेइ सन्सारक सभइ थोकके आफ्न बानाइकुन आफ्न जिबनके चाहिँ गुमाइत कने उख्राके किति फाइदा भइत र? 37मानुसेइ गुमाल आफ्न जिबन कस्के फिर्ता पाइके सकित र? 38इसे बेभिचारि र पापि पुस्तायँ जोनो-जोनो मोइ र मेर बचनसे लाजाइत, मानुसक छावा पुनु आफ्न बुबाक महिमायँ पबित्र सोर्गदुतसाहिन अइतेखना उक्रसाङ लाजाइत।”
Currently Selected:
मर्कुस 8: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
