लुका 17
17
पाप, बिस्वास रे कर्तब्य
(मत्ति १८:६-७,१५; मर्कुस ९:४२)
1इसुले आफना सिस्यानलाइ भुन्यो, “पाप अद्द लाउन्या परिछ्या अवस्य आउनाहान्। रे धिक्कार तइ मान्सलाइ जइले पाप अद्द लाउछ! 2जइ मान्सले यिन नानामध्ये एकलाइ पाप अदद् लाउछ, तइका घाँटिन जाँतो बाधिबर तइलाइ समुन्दरइन खित्दिनु तइकि निउति निको हुन्या छ। 3आफना बिसयमि होस अरिबर बस!
“तमरा भाइले पाप अर्यो भन्या तइलाइ हकार रे तइले पस्याताप अर्यो भन्या तमले तइलाइ छिमा अर। 4तमरा भाइले दिनमि सात बेर तमरा बिरुद्मि पाप अर्यो भन्या, रे सातइ बेर तमतिर फर्किबर आइ ‘मु पस्याताप अद्उ’ भुन्यो भन्या, तमले तइलाइ छिमा अद्दुपणन्छ।”
5प्रेरितनले प्रभुलाइ भुन्यो, “प्रभु, हामरो बिस्वास बडाइदिय।”
6प्रभुले भुन्यो, “तममि रायाका गेडो जतिलइ बिस्वास भयाले तमुले यइ किम्मुका रुखलाइ ‘उखलिबर समुन्दरमि रोपिन जा’ भन्याले तइले मान्न्या छ।
7“तमुमध्ये कसइको नउकर गडो जोतिबर या भेडा चराइबर घर फर्किन्ज्या, तइ नउकरलाइ ‘झटट् आइबर खान बस् भनन्छउ ब?’ 8कि उइले तइलाइ यसो भन्नइन्? ‘मेरि निउति खाना पका रे पटुको बाद, मुइले खाइपिइ नसकन्ज्या मेरो सेबा अर’ तइपाछा तुइले खानपान अर। 9आफुले अराया अन्सारको काम अर्यामि कि उइले तइ नउकरलाइ धन्यबाद दिन्छ ब? 10तसेरि तमुलाइ अराया सप्पइ काम अर्यापाछा तमुले लइ यसो भन, ‘हाम त अयोग्य दास हुँ, हामले त हामरो कर्तब्य मात्तरइ मान्या हुँ।’”
इसुले दस जना कोड रोग लाग्या मान्सलाइ निको पाड्यो
11इसु यरुसलेतिर जान्ज्या सामरिया रे गालिल छेत्रका सिमाना होइबर जान्नाथ्या। 12उन एक गाउँमि पसन्ज्या दस जना कोड रोग लाग्या मान्सनसित इसुको भेट भयो। दुरइ कल्लिबर तिनुनले 13ठुला सोरले भुन्यो, “हे प्रभु इसु, हाम्मि दया अर।”
14उनुले तिनुनलाइ धेकिबर भुन्यो, “तमु पुजारिनका वाँ जाइबर आफुलाइ धेका” तिनुन जाना जानाइ निका भया।
15तिनुनमिको एक जनाले आफु निको भया थाँ पायो रे ठुला स्वरले परमेस्वरको प्रसम्सा अद्दोइ त्यो फर्कियो। 16इसुलाइ धन्यबाद दिबर त्यो इसुका खुट्टानि घोप्टो पण्यो। त्यो एक सामरि थ्यो। 17इसुले भुन्यो, “कि निको भया दस जना होइनन् ब? अउर नउ जना काँ छन्? 18कि यो सामरि बाहेक फर्कि आइबर परमेस्वरको प्रसम्सा अद्या अउर कोइ भएन्?” 19तइपाछा उनुले तइलाइ भुन्यो, “उठ, रे आफना बाटा लाग्। तेरा बिस्वासले तु लाइ निको पाण्या छ।”
परमेस्वरका राज्यको आगमन
(मत्ति २४:२३-२८,३७-४१)
20परमेस्वरको राज्य कब आउछ भन्न्या फरिसिनको प्रस्नका जवाफमि इसुले तिनुनलाइ भुन्यो, “परमेस्वरको राज्य धेकिन्या अरिबर आउन्या आथिन्। 21कसइले लइ, ‘हेर परमेस्वरको राज्य याँ छ या ताँ छ’ भन्न सक्दइन्, क्यालाइकि परमेस्वरको राज्य तमराइ बिचमि छ।”
22उनुले सिस्यानलाइ भुन्यो, “तन दिन आउन्य छन्, जबइ तमले मान्सका चेलाको एक दिन हेद्या इछ्या अद्या छउ, तबइलइ धेक्द्या आथिनउ। 23मान्सनले तमुलाइ भन्या छन्, ‘हेर, उ याँ छ!’ वा ‘उ ताँ छ।’ रे तइबेला तम तिनरा पाछा जनलागउ। 24क्यालाइकि जसेरि बिजुलि चम्कन्ज्या अग्गासमि एक ठउँरहइ अर्का ठउँरसम्म उजालो पणन्छ, मान्सका चेलाकोलइ आफना दिनमि तसोइ हुन्या छ। 25रे तसो हुन् भन्नापइलि उइले भउत कस्ट सहन पड्या छ, रे यइ पुस्ताका मान्सनले उइलाइ असुइकार अद्या छन्। 26नोआका पालामि जसो भयाथ्यो मान्सको चेलो आउनज्या लइ तसोइ हुन्याछ। 27नोआ जहाज भित्र नपसन्ज्यासम्म मान्स खान्नाथ्या, पिउन्नाथ्या, ब्याबारि अद्दाथ्या। रे तइबेला जलप्रलय आयो रे सप्पइलाइ नस्ट पाड्यो। 28लोत भन्न्या मान्सका पालामि लइ यसोइ होइरइथ्यो। मान्सन खान्नाथ्या, पिउन्नाथ्या, किनबेच अद्दाथ्या, गाडानमि रोप्दाथ्या, घर बनाउन्नाथ्या। 29रे जइ दिन लोतले सदोम सहर छाड्बर गयो, अग्गास बटहइ आगो रे गन्धक झडिबर तिनुन सप्पइलाइ नस्ट पाड्यो। 30मान्सको चेलो प्रकट हुन्या दिनमि यसोइ हुन्या छ।
31“तइ दिन जो घरका छतमि छ, तइको मालसामान घरभित्र छ भन्या लइ त्यो ल्याउनाइलाइ तल्तिर जन ओरलउ। तसेरि खेतमि हुन्यालइ फर्किबर घर जनआउ। 32लोतकि स्वानिलाइ याद अर!#१७:३२ परमेस्वरले लोत रे उइकि स्वानिलाइ तइ सहरबटहइ भाग रे फर्किबर जन हेर्या भन्या थ्यो। रे स्वानिले फर्किबर हेर्यो क्यालाइकि आफुले छाड्या कुरामि तिनरो मन अड्किया थ्यो। परमेस्वरले तइलाइ नुनको खामो बनाइ दियो। उत्पति १९:२६ 33जइले आफनो जिबन बचाउन खोजन्छ, तइले त्यो गुमाउन्या छ, रे जइले आफनो जिबन गुमाउन्या छ, तइले त्यो बचाउन्या छ। 34मु तमखि भुन्नउ, तइ रात दुइ जना एकइ खाटमि हुन्या छन्। एक जनो लइन्या छ रे अर्खो छाडिन्याछ। 35दुइ जनि स्वानिन सङइ जितरा पिस्सारयइ हुनेइछन्। एक लइनेइ छ, अर्खि छाडिनेइछ। 36[दुइ जना मान्स खेतमि हुन्याछन्, एक जनो लइन्याछ, अर्खो छाडिन्याछ।]”#१७:३६ कतिब पुराना ग्रिक बाइबलमि पाइनइन।
37रे सिस्यानले इसुलाइ सोध्यो, “यो काँ हुन्या हो प्रभु?”
इसुले तिनुनलाइ भुन्यो, “जाँ सिनो हुन्छ ताँइ गिद् लइ जम्मा हुनाहान्।” #१७:३७ मर्या सिनोमि गिद्न वरिपरि भया जसेरि, सप्पइले मान्सको चेलोलाइ तसेरि धेक्द्या छन्।
Currently Selected:
लुका 17: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
