लुका 20
20
इसुका अधिकारमि प्रस्न
(मत्ति २१:२३-२७; मर्कुस ११:२७-३३)
1एक दिन इसुले मन्धिरमि मान्सनलाइ सिछ्या दिन्नाथ्या, रे तिनुनलाइ असल रइबार प्रचार अद्दाथ्या। तइबेला धर्म-गुरुन, मुख्यपुजारिन रे धर्म-गुरुन उनरा वाँ आया। 2रे उनलाइ सोध्यो, “हामुलाइ भण, कइ अधिकारले तम यिन काम अद्दाछउ? यो अधिकार तमलाइ कइले दियो?”
3उनुले तिनुनलाइ भुन्यो, “मु लइ तमलाइ एक कुरा सोद्दउ, मुलाइ उत्तर दिय। 4युहन्नाले बप्तिस्मा दिन्या अधिकार स्वर्गबटहइ थ्यो, कि मान्सबटहइ थ्यो?”
5तिनुन एक आपस्मि बहस अद्द लाग्या, “स्वर्गबटहइ भुन्नाउ भन्या, ‘तमुले युहन्नालाइ क्याकि बिस्वास अर्यानु?’ भनिबर तिनले भन्याछन्। 6मान्सबटहइ भुन्नाउ भन्या, सप्पइ मान्सले हामुलाइ ढुङा हान्याछन्, क्यालाइकि युहन्ना अगमबक्ता हुन् भन्या तिनुनले पक्का बिस्वास अर्या छन्।” 7तबइलाइ तिनुनले भुन्यो, “हाम जान्नाइन् काँबटहइ उनुले यो अधिकार पाया हो।”
8तबइ इसुले तिनुनलाइ भुन्यो, “तसो भया मुइले यो अधिकार काँबटहइ पाइबर यिन काम अद्दाछु तमुलाइ भुन्नइन्।”
दुस्ट किसानको उखान
(मत्ति २१:३३-४६; मर्कुस १२:१-१२)
9उनुले मान्सनलाइ यो उखान भुन्यो, “एक जना मान्सले अंगुर खेति लायो, रे किसानलाइ अधिया दिबर भउत समयखिलाइ प्रदेस गयो। 10फल पाकिसक्यापाछा अंगुर खेतिबटहइ केइ फल ल्याउनाइलाइ अंगुर खेतिका मालिकले आफना एक नउकरलाइ अधिया अद्या किसानका वाँ पाठायो। रे किसानले तइलाइ हाणिबर रितोइ पठाइदियो। 11तिनले अज अर्खा नउकरलाइ पठायो, रे तिनुनले तइलाइ लइ हाणिबर तइको बेजत अरिबर रिताइ हात पठाइदियो। 12तइपाछा तिनले तेसरालाइ लइ पठायो, रे तिनुनले तइ नउकरलाइ लइ घाइत्या बनाइबर निकाल्दियो। 13रे अंगुर खेतिका मालिकले भुन्यो, ‘आब मु कि अरु? मु आफनो प्यारो चेलो पठाउन्या छु, सायद उइलाइ त तिनुनले आदर अरन्ना!’ 14रे अधिया कमाउन्या किसानले उइलाइ धेकिबर आपसमि कुरा अर्यो, ‘यो त हकवालो हो। हाम यइलाइ माद्दाउ, रे सम्पतिको हक हामरो हुन्या छ।’ 15तइपाछा तिनुनले उइलाइ अंगुर खेतिका बाइर लइजाइबर मार्यो। आब अंगुर खेतिका मालिकले तिनलाइ कि अरन्ना?
16“तिन आइबर अदिंया अद्या किसानलाइ माद्या छन्। रे अंगुर खेति अउरलाइ दिन्याछन्।”
मान्सनले यो सुनिबर भुन्यो, “यसो कभइ जनहोउ!”
17रे इसुले तिनुनलाइ हेरिबर भुन्यो, “यो लेखिया अर्थ कि हो?
“‘जइ ढुङालाइ घर बनाउन्याले रद्दि अर्यो।
त्यो ढुङो कुनाको सिर ढुङो बन्यो।’#भजनसंग्रह ११८:२२
18तइ ढुङामि झड्या हरेक चकनाचुर हुन्या छ, रे जइमि त्यो झडन्छ तइले तइ मान्सलाइ धुलोपिठो पाड्या छ।”
कर तिद्या बिसयमि प्रस्न
(मत्ति २२:१५-२२; मर्कुस १२:१३-१७)
19तबइ धर्म-गुरु रे मुख्य पुजारिनले तसइबेला उनलाइ पकड्खोज्यो, तिनुनलाइ थाँ थ्यो कि यो उखान तिनराइ बिरुद्मि भनिया थ्यो रे तिनुन मान्ससङ डराउथ्या। 20तिनुनले इसुलाइ पकड्या मउका हेद्लाग्या। रे इमान्दार हुँ भणि टोपल्या जासुसनलाइ तिनुनले उनरा वाँ पठायो, क्यालाइकि इसुले भुन्या कुरामि उनलाइ फसाइबर अधिकारि रे हाकिमका हातमि उनलाइ सुम्पिदिन्या दाउमि तिनुन थ्या। 21तिन जासुसनले इसुलाइ सोध्यो, “गुरुज्यु, हाम जान्नउकि तम ठिक बोलन्छउ, कसइको पछ्यपात अद्दानु, रे सत्यतासाथ परमेस्वरका मार्ग सिकाउन्छउ। 22हामले रोमि सरकारलाइ कर तिद्दु ठिक छ कि छइन्?” #२०:२२ रे इसुले “हुन्छ,” भनिबर भन्या भयाले, यहुदिनको धार्मिक ब्यबस्थालाइ तोण्या आरोप लाग्द्सक्देइथ्यो क्यालाइकि तइले इस्वर निन्दा अद्या मान्समि आफ्नो भक्ति राख्या हुनथ्यो। रे इसुले “हुनइन” भन्या भयाले, तइले रोमि कानुनलाइ तोण्या साबित हुनेइथ्यो क्यालाइकि तइले सत्ताधारि सरकार प्रति भक्तिलाइ इन्कार अर्या धेकाउथ्यो।
23रे इसुले तिनुनको कपट बुजिबर तिनुनलाइ भुन्यो, 24“मुलाइ एक सिक्का धेका। यइमि कइको चित्र रे कइको नाउँ खोपिया छ?” तिनुनले भुन्यो, “रोमि माहाराजाको।” #२०:२४ रोमि माहाराजाको कइसर भन्याको रोमि राजालाइ दिएको पद हो।
25उनुले तिनुनलाइ भुन्यो, “तबइलाइ जे रोमि माहाराजाको हो त्यो रोमि माहाराजालाइ दिय, रे जे परमेस्वरको हो त्यो परमेस्वरलाइ दिय।”
26मान्सनका अगाडि तिनुनले इसुलाइ कुरामि फसाउन सकेनन्, रे उनरा जवाफमि तिनुन अचम्ममि पड्या रे चुप लाग्या।
जिउना भइ उठ्या बारेमि प्रस्न
(मत्ति २२:२३-३३; मर्कुस १२:१८-२७)
27तइपाछा इसुका वाँ कोइ कोइ सदुकिन आया। मर्याबटहइ जिउना हुनाइन् भन्या तिनुनको बिचारथ्यो। तिनुनले उनलाइ सोध्यो, 28“गुरुज्यु, मोसाले हामरि निउति लेख्या ब्यबस्थामि, ‘क्या कसइ मान्सको ब्याअर्या दाइ सन्तान नभएइ मर्यो भन्या, भाइले तइकि स्वानिलाइ ब्या अरिबर दाइकि निउति सन्तान जन्माइदिनपड्न्छ।’#ब्यबस्था २५:५-६ 29सात भाइ थ्या जेठाले एक स्वानि लेइबर सन्तान नभएइ मर्यो। 30माइला 31रे साइलाले तइलाइ ब्या अर्यो रे तसोइ अरिबर तन सातइ जना सन्तान नभएइ मर्या। 32रे पाछा त्यो स्वानिलइ मरि 33तबइलाइ मर्याबटहइ जिउना हुन्ज्या त्यो स्वानि तिनुनमध्ये कइकि स्वानि हुन्छे? क्यालाइकि त्यो सातइ जनाकि स्वानि भएइ थि।”
34इसुले तिनुनलाइ भुन्यो, “यइ युगका मान्सन ब्या अद्दाहान्, रे ब्या अरदिनाहान्। 35रे मर्याबटहइ जिउना भइबर स्वर्ग जानाइलाइ योग्य भया मान्सनले तइ युगमि न ब्या अद्दाहान न ब्या अरिदिनाहान। 36तिनुन दोसर्या मद्या आथिनन् क्यालाइकि तिनुन स्वर्गदुत समान हुनाहान् रे तिनुन मर्याबटहइ जिउना भया परमेस्वरका सन्तान हुन्याछन्। 37रे मर्याबटहइ जिउना भइ उठ्याछन् भन्या कुरा मोसाले बलिरया पोथ्राका बिबरणमि परमप्रभुलाइ ‘अब्राहामका परमेस्वर इसाहकका परमेस्वर रे याकुबका परमेस्वर’ भनिबर पुकारा अरन्ज्या धेकाइदियो।#प्रस्थान ३:१-६ 38उन मर्याका परमेस्वर हइनन्, रे जिउनाका परमेस्वर हुन क्यालाइकि सप्पइ उनरि निउति जिया छन्।”
39रे धर्म-गुरुमध्ये कसइ कसइले भुन्यो, “गुरुज्यु, तमले निकोइ भुन्या।” 40तइपाछा अज कसइले उनलाइ केइ प्रस्न सोध्या आँटइ अरेइन।
ख्रिस्ट कइका चेला?
(मत्ति २२:४१-४६; मर्कुस १२:३५-३७)
41इसुले तिनुनलाइ सोध्यो, “ख्रिस्ट दाउदका चेला हुन् भन्या तिनुन कसेरि भुन्नसक्दाहान्? 42क्यालाइकि दाउदले लेख्या भजनमि आफुइ भुन्नाहान्,
“परमप्रभुले मेरो प्रभुलाइ भुन्यो।
तम मेरा दाइन हाततिर बस।
43जबसम्म मु तमरा सत्तुरलाइ तमरा खुट्टा तल्तिरको तुल्याउनइन्#भजनसंग्रह ११०:१ ।”
44“इसेरि दाउदले उनलाइ ‘प्रभु’ भुन्नाहान् भन्या, अज उन कसेरि दाउदका चेला भया?”
45रे सप्पइ मान्सले सुन्नासुन्नाइ इसुले आफना सिस्यानलाइ भुन्यो, 46धर्म-गुरुन बटहइ होसियार बस, “तिनुन लामा लामा लत्ता लाइबर इथउथ हिट्या, बजारमि अबिबादन खोज्या, सभाघरमि प्रमुख आसन रे भोजमि आदरको स्थान रुचाउनाहान। 47तिनुनले बिधुवानका घर कबज्जा अद्दाहान्, रे लामो देखावटि प्रार्थना अद्दाहान् यिनुन नइ बर्ता दण्ड पाउन्याछन्।”
Currently Selected:
लुका 20: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
