लुका 1
1
भुमिका
1मान्जन थियोफिलस ज्यु, थुप्रोय मानुसलके हाम्राठालाइ येसुक् बिसइमाहा भेल घट्नाक् कहिनलक् लेखिबानाइ बाटाबाक्नि काम कर्ल धरट्थ्ला।
2उ घट्नालक् सुरुहिंसौ आफ्निक् आँखे देख्लाहार आउँ उहे कहिनक् बिसइमा खुस्सिक् खभर सुनाटे बुल्लाहारलके हाम्रालाइ जानाल धरट्थ्ला। 3मुँइ आको यक्राक् बिसइमाहा सुरुहिंसौ मज्जाइसौ खोजि कर्ल धरम्ना आउँ तोहोरानि यक्राक् बिसइमाहा एकेपरे लेख्ल राम्रो भेला बाजिहिन्के लेख्बा ठाल्ल धरम्ना। 4असौ यि कागत पर्हिबानाइ तोहोरानि सिखाल कहिनलक् कट्कामानें साँच्चिकक् रहेला बाज्बाक् कहिन् तोहोलेके थाहा पाहोला।
बप्तिस्मा देलाहार यहुन्नाक् जल्मक् भबिस्यबानि
5यहुदिया पर्देसक् राजा हेरोदक् समइमा जकरिया नाउँ भेल पुझरि रैल्हक्। उसेहे अबिया बाज्ल पुझरिक् खलकक् मानुस रैल्हक्। ओक्राक् बोइकक् नाउँ एलिसिबा रैल्हकुन् आउँ उसेहे हारुनक् खलकक् एक्जेना पुझरिक् बेटेक रैल्हक्।#१ इतिहास २४:१० 6उ दोहोजेनायँ परमेस्वरक् नजरइ धर्मि रैल्लुहुन्। आउँ परमपर्भुक् आग्या आउँ जम्मा नियमलक् नहिं बिराहिने मानथ्। 7एलिसिबा बाँझिं रैल्हसैर्हे उखर्ह्वाक् कुन्हुँ छाउरापुटा नहिं रैल्लाहा आउँ दोहोजेन् बुढ्रा-बुढ्रि भेहिन् सक्ल रैल्हुहुन्।
8एक्बाजि जकरिया आफ्निक् समुहक् पालो पोर्लोसैर्हे मन्दिरमाहा परमेस्वरक् आगारि पुझरिक् काम कर्तिहि रैल्हक्। 9पुझरिलकक् कामक् चलन अनुसार चिट्ठा बाज्राटे बेलाइ बेदिमाहा धुप बाल्बा जाबाक् पालो जकरियाहिंक् नाओइ पोर्लोकुन्। उहेसैर्हे ओहिं परमपर्भुक् मन्दिरक् भिट्रइ धुप बाल्बा जाइलक्। 10ओहिं धुप बाल्बा जाइलटाकै बाहारै जम्माभेल मानुसलक्सेहे पाराथ्ना कर्तिहि रैल्हुहुन्। 11उहेटाकिहिंमा जकरियाक् ठालाइ परमपर्भुक् स्वर्गोदुत#१:११ स्वर्गोदुत: स्वर्गोक्भटे पाठाल परमेस्वरक् सेवा कर्लाहार दुत देख्वार पोर्लोक् आउँ धुप बाल्बाक् बेदिक् दैन्हक्पटि ठड्ध्यालक्। 12स्वर्गोदुतलाइ देखिहिन् जकरिया आहाटिबानाइ डरे थरथर् भेलक्। 13तसौ स्वर्गोदुते ओक्रालाइ बोल्लोकुन्, “जकरिया, बुन् डराउ! परमेस्वरे तोरा पाराथ्ना सुन्ल धर्देस्ला। तोरा बोहेर एलिसिबाइ एक्टा पुर्खर छावा जर्माइदेस्ला। तुँइ ओक्राक् नाउँ यहुन्ना धरिदेबसिक्। 14उटाकै तोरालाइ रामाहट आउँ खुस्सि मन भेस्ला, आउँ ओर्को थुप्रय मानुसलक् आको ओक्राक् जर्मल कहिनें रामाट्थ्ला! 15किसाबुने उ परमपर्भुक् नजरइ बर्के मानुस भेइस्। ओहिं अङ्गुरक् छिप्ल रस आउँ कुन्हुँ ओर्को माट्लाहार् चिंज नहिंखाबगे। आउँ माँइकक् पेटिहिमा भेइतिहि उ पबित्र आत्माइ भोरोइस्।#१:१५ पबित्र आत्माइ भोरोइस्: पबित्र आत्माइ डोर्याल अनुसार परमेस्वरक् इच्छाइ हिंठ्लाहार#गन्ति ६:३ 16आउँ ओहिं इस्राएलि जातक् थुप्रय मानुसलकलाइ आफ्निक् परमपर्भु परमेस्वरक्पाखा फर्काहिन् आनेंट्थ्ला। 17ओहिं आत्माइ आउँ सक्तिमाहा एलियाहिक् परौ भेहिन् पर्भुइसौ आगारि आइबानाइ ओक्राक् पैंदा तियार काराइदेला। ओहिं बाप्पो आउँ छाउरापुटालकक् बिचइ मेलमिलाप आनिदेट्थ्ला आउँ जिम्मरलकुहुलाइ परमेस्वरक् आग्या मान्लाहार मानुसक् ग्यानक्पटि डोर्यायट्थ्ला। यरङ् करिहिन् ओहिं परमपर्भुक् मानुसलाइ ओक्रिहिक् खातिरमाहा तियार कारायट्थ्ला।”#मलाकि ४:५-६
18जकरियाइ स्वर्गोदुतलाइ बोल्लोकुन्, “यि कहिन् साँच्चिकिहिंक् भेबा आयला बाजिहिन्के मुँइ कन्हि पट्याबा? आको मुँइ ता बुढ्राटे भेहिन् सकम्बे आउँ मोरा बहुऔ बुढ्रि भेहिन् सक्ल रहैस्।”
19स्वर्गोदुते जुबाप देलकुन्, “मुँइ परमेस्वरक् आगारि ठध्यालाहार गब्रिएल स्वर्गोदुत हो। ओहिंय मोरानि तोराठालाइ कहिन् कर्बा आउँ यि खुस्सिक् खभर सुनाबा पाठाल धरैस्।#दानिएल ८:१६; ९:२१ 20मुँइ तोरानि बोल्लो जम्मा कहिनलक् ठिक समइहिमा पुरा भेबा आयला। तर दिठाउ, मुँइ बोल्लो कहिनलाइ तुँइ बिस्वास नहिं कर्लसैर्हे यि कहिन् पुरा नहिं भेबायसम्म तुँइ लाटा भेहिन् साराबा नाप्पारस्।”
21बाहारै मानुसलक् जकरियालाइ अस्याहिन् बस्ल रैल्हुहुन् आउँ ओहिं किसा ढिलो कर्ल बाजिहिन् अचम्म पोर्लुहुन्। 22तसौ जकरिया जख्नि बाहार निस्कलक्, उ ता मानुसलकक्सङ्हिं साराबाय नहिंपार्लाहार भेइबानाइ आइलक्। जकरियालाइ ओरोङ् भेल देखिहिन् उखर्ह्वाइ मन्दिर-भिट्रइ ओहिं दर्सन पाइल बाजिहिन् थाहा पाइलुहुन्। ओहिं साराबाय नहिंपारिबानाइ बाहारै ओक्रानि अस्यालाहार मानुसलकलाइ हाथ हल्लाहिन् इसाराक्भरे बोल्लाहा।
23तसौ जकरियाक् पुजा कर्बाक् पालो सिधानेसौ उ घर जाइलक्। 24चुटेक् दिनपाछुहि ओक्राक् बोइकोक् धिंर्ह् भेलकुन्। ओक्राक्पाछु ओक्राक् बोहेक पाँच मैन्हासम्मयँ घरक्भटे कट्टुहु नहिंनिस्कलकुन्। 25तसौ एलिसिबाइ बाज्लक्, “यि काम परमपर्भुहि मोरा लागि कर्ल धरिदेइस्। यि दिनलकै मोरा उप्रै दाया करिबानाइ मोरानि मानुसलके छावापुटा नहिंभेलाहार बाज्बाक्भटे पर्भुइ जोगाल धरैस्!”
येसुक् जल्मक् भबिस्यबानि
26एलिसिबाक् छ मैन्हाँक् धिंर्ह् भेलटाकै परमेस्वरे गब्रिएल स्वर्गोदुतलाइ गालिल पर्देसक् नासरत सहरइ बस्लाहार एक्जेना कुमारो अइमाइक्ठालाइ पाठालकुन्। 27ओक्राक् नाउँ मरियम रैल्हकुन्। दाउद राजाक् बङ्सक् योसेफ नाउँ भेल मानुसक्सङ्हिं ओक्राक् बिहाउ भेबाक् कहिन् मिलाहिन् सक्ल रैल्हकुन्।#मत्ति १:१८ 28स्वर्गोदुते उ कुमारो अइमाइक्ठालाइ आहिन् बोल्लोकुन्, “मरियम, तोरानि सालाम्! परमपर्भुइ तोरानि थुप्रो आसिक् देल धरेस्ला आउँ परमेस्वर तोरासङ्हिं रहैस्।”
29स्वर्गोदुते बोल्लो कहिन् सुनिहिन् मरियम एक्दमे डरालक् आउँ बुझ्बा नहिंपारिहिन् अलबक्क् भेलक्। 30तसौ स्वर्गोदुते ओक्रानि बोल्लोकुन्, “मरियम, तुँइ बुन् डराउ, परमेस्वरे तोरालाइ बर्के दाया कर्ल धरेस्ला। 31यटे सुन्, तुँइ असौ दुइजिवा भेस्ला आउँ एक्टा पुर्खर छावालाइ जल्म देसिला। उ बेटाहिरक् नाउँ तुँइ येसु धर्देब्सिक्।#मत्ति १:२१ 32उसेहे एक्दमे माहान् भेइस् आउँ ओक्रालाइ माहान् परमेस्वरक् बेटायक बोलिजाइस्। परमपर्भुइ ओक्रानि ओक्रिहिक् पुर्खा दाउदिहिक् परौ राजा बानायला।#२ समुएल ७:१२-१३,१६; यसैया ९:७ 33ओहिं याकुबक् बङ्सक् उप्रै राज करैस् आउँ ओक्राक् राज्जे कख्नुहुँ नाटुर्हेक्।”
34यि कहिन् सुन्नेसौ मरियमे स्वर्गोदुतक्लाइ बोल्लोकुन्, “असौ यि कहिन् कहने भेबा पारेला? किसाबुने मुँइ कुमारोय रहम्ना।”
35स्वर्गोदुते ओक्रानि यन्हिं बोल्लोकुन्, “परमेस्वरक् पबित्र आत्मा तोरा उप्रै आयस्ला। माहान् परमेस्वरक् सक्तिक् छायाँइ तोरानि झाँकायस्ला। उहेसैर्हे जुन् बालख जर्मइस् उसेहे पबित्र भेइस् आउँ परमेस्वरक् बेटायक बाजिजाइस्। 36तसौ यटे सुन्, असौ तोरा आफ्नि-मानुस एलिसिबा आको दुइजिवा भेल रहैस्। एलिसिबा बुढ्रि भेहिन् सक्ल भेटौ अख्नि ओक्राक् पेटइ छ मैन्हाँक् धिंर्ह् रेहेक्ला। ओक्राक् ता बाच्चाय नाभेक् बाजिहिन् बाज्ल रैल्ह। 37भेटौ दिठाउ, परमेस्वरे कर्बा नहिंपार्लाहार काम किच्छुय बोइने।”#उत्पति १८:१४
38तसौ मरियमे बाज्लक्, “भेला, मुँइ परमपर्भुक् सेवा कर्लाहार चाकर्निय हो, तुँइ जे बोल्लो धरस्ला मोरानि उहेरङे भेउस्।” ओक्राक्पाछु स्वर्गोदुत ओछिसौ बिदा भेहिन् जाइलक्।
मरियमे एलिसिबालाइ भेंटाबा जाइल
39चुटेक् दिनपाछु मरियम हटार-हटार करिबानाइ यहुदिया पर्देसक् एक्टा पाहारक् गाँओइ जाइलक्। 40ओछि जकरियाक् घरइ जाहिन् ओहिं एलिसिबालाइ सालाम् कर्लकुन्। 41मरियमे एलिसिबालाइ सालाम् कर्ल सुनेहे बिट्के एलिसिबाक् कोखइ भेल बाच्चा पुक्लुक्क चाल कर्लकुन्। उहेटाकिहिंमा एलिसिबा पबित्र आत्माक्भरे भोर्लोक्। 42तसौ एलिसिबाइ यन्हिं बाजिहिन् बर्के स्वरेसौ बोल्लोकुन्, “अइमाइलकमाहा तुँइ कनङ् धेरे आसिक् पाइल रहस्ला, तोरा पेटक्भरे जर्मलाहार बालखे आसिक् पाइल रहैस्! 43मुँइ कुन् होटे, तुँइ मोरा पर्भुक् माँयक भेहिनौ मोरानि भेंटाबा आओइ? 44दिठाउ, तुँइ सालाम् बाज्ल मोरा काने सुनेहे बिट्के मोरा कोखइ भेल बालख खुस्सि भेहिन् उफ्रओक्। 45परमपर्भुइ तोरालाइ बोल्लो कहिन् पुरा भेला बाजिहिन्के तुँइ बिस्वास कर्लसैर्हे, तोरा उप्रै कट्काकुर आसिक् पोर्लो रहेस्ला!”
मरियमे परमेस्वरलाइ पर्सन्सा कर्बाक्नि गित्काल गित
46तसौ मरियमे यन्हिं बाजिहिन् गित्कालक्,
“मुँइ मोरा हिर्दायाइसौं परमपर्भुक् जइजइ करम्ना,
47आउँ मोरा मन मोरानि मुक्ति देलाहार परमेस्वरक्सङ्हिं खुस्सि मानाम्ना,
48किसाबुने ओहिं मुँइ किच्छु ना किच्छुक् चाकर्निहुलाइ दाया कर्ल धरैस्!
अखसौ ओर्साक् जम्मा पुस्ताक् मानुसलके मोरानि कट्काधेरे आसिक् पाइल धरैस् बाजिहिन् बोलोट्थ्ला।#१ समुएल १:११
49किसाबुने सक्तिगर परमेस्वरे मोराखातिरै एक्टा बर्के काम कर्ल धरिदेइस्।
परमेस्वरक् नाउँ पबित्र रहेक्ला।
50आउँ ओक्राकसङ्हिं डरालाहारलकलाइ
जुग्मा-जुग् सम्मय दाया करिरहैस्।
51ओहिं आफ्निक् सक्तिगर बाहाँइ मुँइ-हो बाजिहिन् मन भिट्रेसौ घमन्ड कर्लाहारलकलाइ
छिन्न-भिन्न पार्ल धरेट्थ्ला।
52ओहिं मुँइ-हो बाज्लाहार राजालकलाइ सिंहासनेसौ झार्ल धरेट्थ्ला,
आउँ सोंझो मन भेलाहारलकलाइ ओहिं बर्के काराल धरेट्थ्ला।#अय्युब ५:११; १२:१९
53ओहिं भुखाललकलाइ साउह्वार थोकलक् देल धरेट्थ्ला,
तसौ धनिलकलाइसेहे सुद्धे हाथ फर्काल धरेट्थ्ला।
54परमेस्वरे हाम्रा बाज्या-बाराजुलकक्सङ्हिं कर्ल बाचाक् काम करिहिन्
ओक्राक् सेवा कर्लाहार चाकर इस्राएललाइ मदप कर्ल धरेला।
55ओहिं अब्राहाम आउँ ओक्राक् सन्तानलकलाइ
दाया देखाबा कख्नुहुँ नाहाँबिस्राओइ!”#उत्पति १७:७; १ समुएल २:१-१०
56उटाकै मरियम तिन मैन्हा जट्का एलिसिबाक्सङ्हिं बस्लक् आउँ ओक्राक्पाछु घर फर्किहिन् जाइलक्।
बप्तिस्मा देलाहार यहुन्नाक् जल्म
57एलिसिबाक् छाउरा पाबाक् बेथा लाग्लकुन् आउँ ओहिं पुर्खर छाउरा पाइलक्। 58परमपर्भुइ एलिसिबालाइ ओट्का बर्के दाया कर्ल देखिहिन् ओक्राक् आफ्नि-मानुसलक् आउँ छेउँछाओक् छरछिमेकिलकौ रामालुहुन्।
59उ बालख आठ दिन पुग्नेसौ ओक्राक् खतनाक् बिधि कर्बाक्नि उखर्ह्वा भेला भेलुहुन्। उखर्ह्वाइ बापिकिहिक् नाँओक् परौ बेटाहिंकक् नाउँ आको जकरिया धर्बा ठाल्ल धर्लुहुन्।#लेबि १२:३ 60तर ओक्राक् माँइके बाज्लक्, “बोइने, यक्राक् नाउँ ता यहुन्ना धर्बा पोर्लाहार।”
61उखर्ह्वाइ एलिसिबालाइ बोल्लिहिंक्, “आको तोरा आफ्निक् मानुसलकै यरङ् नाउँ भेलाहार ता कुन्हुँय बोइने!” 62उहेरङ् भेइटे उखर्ह्वाइ बापिकिहिलाइ बेटाहिकक् नाउँ किवा धर्बा बाजिहिन् हाथे बाटाहिन् सोर्ल्हिहिंक्।
63तसौ जकरियाइ लेख्बाक् पाटि माङ्लक् आउँ “यक्राक् नाउँसेहे यहुन्ना धर्बा पोर्लाहार” बाजिबानाइ पाटिमा लेख्लक्। यि देखिहिन् उखर्ह्वा जम्मायँजेना छक्क पोर्लोहुन्। 64तसौ ताट्काले जकरिया साराबा पार्लाहार भेलक् आउँ ओहिं परमेस्वरक् पर्सन्सा कर्बा ठाल्लक्। 65यरङ् भेल देखिहिन् छेउँछाओक् जम्मायँ छरछिमेकिलक् छक्क पोर्लुहुन् आउँ परमेस्वरक् डर मान्बा ठाल्लुहुन्। तसौ ओक्राक्पाछु यि कहिनलक् बाँइ-बाँइ भेहिन् यहुदियाक् पाहारक् गाउँलकइ फिंज्लकुन्। 66यरङ् कहिन् सुन्लाहार जट्का जम्माहिं मनमने बाज्बा ठाल्लुहुन्, “यि बालख पाछु जाहिन् कनङ् भेइस् भेका?” किसाबुने परमपर्भुक् सक्ति ओक्राक् उप्रै रैल्हकुन्।
जकरियाइ गित्काल परमेस्वरक् पर्सन्साक् गित आउँ भबिस्यबानि
67जकरिया परमेस्वरक् पबित्र आत्माइसौ भरिपुर्न भेलक् आउँ भबिस्यबानि बाज्बा ठाल्लक्,
68“इस्राएलक् परमपर्भु परमेस्वरक् पर्सन्सा भेउस्!
किसाबुने ओहिं आफ्निक् मानुसलकलाइ साहारा देहिन् छुट्कारा कर्ल धरैस्।
69ओहिं आफ्निक् सेवा कर्लाहार दाउदक् एक्टा सन्तान तियार करिबानाइ
एक्जेना सक्तिगर मुक्ति देलाहार राजा बानाल धरैस्।
70-71ओहिं हाम्रानि हाम्रा सत्रुक् हाथक्भटे आउँ
हाम्रानि घिन कर्लाहारलकक् सक्तिक्भरे बाँचाइस्
बाज्बाक् कहिन् आफ्निक् पबित्र अगमबक्तालकक्भटे आगारिय ओहिं बाचा करिसक्ल धर्लक्।
72ओहिं हाम्रा बाज्या-बाराजुलकलाइ दाया देखाबाक्नि
आफ्निक् पबित्र बाचालाइ सम्झल धरैस्।
73-74ओहिं हाम्रा पुर्खा अब्राहामकसङ्हिं मुँइ साँच्चिय बाचा पुरा करम्ना बाजिहिन् बाचा कर्लक्,
आउँ हाम्रा सत्रुलकक् हाथक्भटे हाम्रानि छुटाइस्,
75उहेसैर्हे हामि डर नहिंमानिहिने ओक्राक् छेंओइ सहि आउँ पबित्र बनिबानाइ
जिबने भोरि ओक्रिहिक् सेवा कर्बा पारुहुँक्ला।
76असौ अ मोरा छावा,
तुँइ ता माहान् परमेस्वरक् अगमबक्ता बाजिजास्ला।
तुँइहिं पर्भुक् पैंदा बानाबाक्नि ओक्राक् आघु-आघु जाबैइबे।#मलाकि ३:१
77‘पापक्भटे छेमा पाहिन् मुक्ति पाहोला’
बाज्बाक् कहिन् तुँइ पर्भुक् मानुसलकलाइ सिखाबसिखान्बे।
78किसाबुने हाम्रा परमेस्वर दाया कर्लाहार आउँ माया कर्लाहार रहैस्।
उहेसैर्हे ओइहिं मुक्तिक् उँजत#१:७८ मुक्तिक् उँजत: स्वर्गोक्भटे आइलाहार मुक्ति देलाहार खिरिस्टलाइ जानायला स्वर्गोक्भटे हाम्राठालाइ पाठाबगे,
79तसौ आँधारइ बस्लाहार आउँ कालक् मुखै पोर्बालाग्ल लकलाइ उँजत बनिदेट्थ्ला।
आउँ उहे उँजतिहि हाम्रानि सान्तिक् पैंदाइ डोर्याबाक् काम कर्बगे।”#यसैया ९:२
80बालख यहुन्ना देहिमा आउँ आत्माइ बर्ह्टे जाइलक्, आउँ इस्राएलिलकक् माझै खुल्ला रुपइ आफ्निक् काम नहिं ठाल्बायसम्म उ उखास लाग्दो ठाउँहिमा बस्लक्।
Currently Selected:
लुका 1: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
