मर्कुस 10
10
छोलपत्रक् बिसइमा येसुक् सिच्छा
(मत्ति १९:१-१२; लुका १६:१८)
1तसौ येसुइ उ ठाउँलाइ छारिबानाइ यहुदियाक् इलाकाइ आहिन् यर्दन खोलाक् ओसाकपार जाइलक्। फेरि ओच्छुहु मानुसलकक् धुइरो ओक्राक्ठालाइ जउर भेलुहुन्। तसौ ओहिं साँद्धाउकिहिंक् परौ उखर्ह्वालाइ सिखाबा ठाल्लाहा।
2ओछि कुन्हुँ-कुन्हुँ फरिसिलके येसुक्ठालाइ आइबानाइ ओक्रानि जाँच्बाक्लाइ यन्हिं बाजिहिन् सोर्ल्हिहिंक्, “लु हाम्रानि जानाउना, किस् कुन्हुँ मानुसे आफ्निक् बहुलाइ छोलपत्र कर्बाक् हाम्रा नियम अनुसार मिलेला ना बोइनें?”
3तसौ येसुइ उखर्ह्वानि यन्हिं बाजिहिन् जुबाप देलाहा, “मोसाइ तोहोराखर्ह्वानि कनङ् आग्या देल धरेहेर्ला?”
4तसौ उखर्ह्वाइ यन्हिं बाज्लुहुन्, “मोसाइ ता कुन्हुँ मानुसे आफ्निक् बोहेथालाइ मुँइ छार्ल हो बाजिहिन् छोलपत्रक् कागत लेखिबानाइ पाठाबा पारेला बाजिहिन् लेख्ल धरैस्।”#ब्यबस्था २४:१-४; मत्ति ५:३१
5तर येसुइ उखर्ह्वानि यन्हिं बोल्लाहा, “तोहोराखर्ह्वाक् मन कठोर भेलसिहिरे माटेन् ओहिं तोहोराखर्ह्वानि यि आग्या लेखिदेल रैल्हक्। 6तर सिरिस्टिक् सुरुहिसौ परमेस्वरे मानुस जातलाइ पुर्खर आउँ अइमाइ करिहिन् बानालक्।#उत्पति १:२७; ५:२ 7‘उहेसिहिरे पुर्खर मानुसे आफ्निक् बाप्पो-महँटारलाइ छारिहिन् आफ्निक् बहुक्सङ्हिं मिलिहिन् बसट्थ्ला।#उत्पति २:२४ 8आउँ उखर्ह्वा दोहोजेनाक् एकेग्वा देहिक् परौ भेट्थ्ला।’ असौ ता उखर्ह्वा दुइजेना बोइनें, तर एकेग्वा भेट्थ्ला। 9उहेसैर्हे परमेस्वरे जक्रालाइ एकेसङ्हिं जोर्लो धरैस्, मानुसे उखर्ह्वालाइ बुन् छुटाउस्।”
10ओक्राक्पाछु येसु आउँ ओक्राक् चेलालक् एक्टा घरै रैल्हटाकै चेलालके फेरि येसुलाइ यिहे कहिनक् बिसइमा सोर्ल्हिहिंक्। 11येसुइ उखर्ह्वानि यन्हिं बाजिहिन् बोल्लाहा, “जुन् पुर्खर मानुसे आफ्निक् बहुलाइ छोलपत्र करिबानाइ छारैस्, आउँ ओर्को अइमाइक्सङ्हिं बिहाउ करैस्, ओहिं पैल्हाकोक् बोइकोलाइ धोखा देइस् भेने, उ काम ब्यबिचार हो।#मत्ति ५:३२; १ कोरिन्थि ७:१०-११ 12ओहोरङ् करिहिन् कुन्हुँ अइमाइ मानुसे आफ्निक् साइकक्सङ्हिं छोलपत्र करिबानाइ ओर्को पुर्खर मानुसक्सङ्हिं बिहाउ करैस् बुनेंमा, ओहिं ब्यबिचार कर्ल भेइस्।”
येसुइ बालखलकलाइ आसिक् देल
(मत्ति १९:१३-१५; लुका १८:१५-१७)
13एक्दिन मानुसलके उखर्ह्वाक् छोट्-छोटे बालखलकलाइ येसुइ आफ्निक् हाथे छुइबानाइ आसिक् देउस् बाजिहिन् ओक्राक्ठालाइ आन्लाहा। तर चेलालके उखर्ह्वालाइ हप्कालाहा। 14तसौ यरङ् देखिहिन् येसु रिसालक्, आउँ उखर्ह्वालाइ यन्हिं बोल्लाहा, “छोट्-छोटे बालखलकलाइ मोराठालाइ आबादेहो, उखर्ह्वानि बुन् छेंकहखान्, किसाबुने परमेस्वरक् राज्जे ता यहेरङ् बालखलकक् लागिय हो। 15साँच्चिय मुँइ तोहोराखर्ह्वालाइ बोल्मेहेंर्ला, जैहिं परमेस्वरक् राज्जेलाइ एक्टा छोट्के बालखलकक् परौ करिहिन् सुइकार नाकरथ्, उ मानुस कख्नुहुँ परमेस्वरक् राज्जेक् भिट्रै पोस्बा नाँपाओइ।”#मत्ति १८:३ 16तसौ येसुइ उ छोट्-छोटे बालखलकलाइ आफ्निक् कोख्लाइ लेलाहा आउँ उखर्ह्वा जम्माहिंक् उप्रै आफ्निक् हाथे छुइबानाइ आसिक् देलाहा।
धनि मानुस आउँ परमेस्वरक् राज्जे
(मत्ति १९:१६-३०; लुका १८:१८-३०)
17येसु ओच्छिसौ जाबाक् कर्लटाकै एकजेना मानुस दग्रटे आइबानाइ ओक्राक् आगारि ठेउन्हाँ टेकिबानाइ येसुलाइ यन्हिं बाजिहिन् सोर्ल्होकुन्, “गुरु, तुँइ राम्रो मानुस रहस्ला, अजम्बरि जिबन पाबाक्लाइ मुँइ किवा कर्बा पोर्लाहार?”
18तसौ येसुइ ओक्रालाइ यन्हिं बोल्लोकुन्, “तुँइ मोरानि किसा राम्रो बाजस्ला? एक्टा माटेन् परमेस्वर बाहेक ओर्को कुन्हुँय राम्रो बोइनें। 19परमेस्वरक् नियमक् आग्यालक् ता तोरानि थाहाय रहेस्ला, मानुसक् हत्या बुन् कर्बा, ब्यबिचार बुन् कर्बा, बुन् चोराबा, झुठा साछि बुन् देबा, कुन्हुँलाइ बुन् ठघ्बा, आफ्निक् महँटार-बाप्पोक् मान कर्बा।”#प्रस्थान २०:१२-१६; ब्यबस्था ५:१६-२०
20तसौ ओहिं येसुलाइ यन्हिं बोल्लोकुन्, “गुरु, यि सेब्भ्रोउ आग्यालक् ता मुँइ छोट्केहिंसौ मानिहिन् आइल रहम्ना।”
21येसुइ ओक्रालाइ दिठाइबानाइ माया कर्लकुन् आउँ बोल्लोकुन्, “तुँइ अज्झौ एक्टा काम कर्बाक्नि बाँकिय रहेस्ला। जा, आउँ तोराठालाइ भेल सेब्भ्रोउ धन-सम्पति बेंचिबानाइ उ पैसा गरिपलकलाइ बाँटिदेहिखान, आउँ तुँइ स्वर्गोइ बास्तबिक धन पास्ला, तसौ आइबानाइ मोरा पाछु लाग।” 22तर यि कहिन् सुनिबानाइ उ मानुसक् मुख आँधार भेलकुन्, आउँ ओहिं मन खिन्न पारिहिन् जाइलक्, किसाबुने ओक्राक्सङ्हिं थुप्रोय धन-सम्पति रैल्हकुन्।
23तसौ वरिपोरि दिठाहिन् येसुइ आफ्निक् चेलालकलाइ यन्हिं बोल्लाहा, “सुनह! धनि मानुसलाइ परमेस्वरक् राज्जेइ पोस्बाक् कट्का गार्हो रहेला।”
24येसुइ बाज्ल यि कहिन् सुनिबानाइ चेलालक् छक्क पोर्लुहुन्, भेटौ येसुइ अज्झ उखर्ह्वालाइ यन्हिं बोल्लाहा, “दिठाहो बालखेहेलक्! मानुसलकलाइ परमेस्वरक् राज्जे भिट्रै पोस्बाक् कट्का गार्हो रहेला। 25धनि मानुसलाइ परमेस्वरक् राज्जेइ पोस्बाइसौ ता बरुस उँटलाइ टिप्निक् छेंरक्भटे छिर्बाक् सजिलो भेला।”
26तसौ यि कहिन् सुनिहिन् चेलालक् अज्झउ झन् छक्क पोर्लुहुन्, आउँ एक्टाइ ओर्कोक्सङ्हिं यन्हिं बाज्लुहुन्, “ओरोङ् भेने कुनेग्वाइसेहे मुक्ति पाबा पारैस् ते?”
27येसुइ उखर्ह्वालाइ दिठाहिन् यन्हिं बोल्लाहा, “मानुसलकक् लागि यि ता भेबाय नहिंपार्लाहार काम रहेला, भेटौ परमेस्वरक्भटे सेहे यि काम भेबा पारेला, किसाबुने परमेस्वरमा सेब्भ्रोउ काम सम्भब रहेला।”
28तसौ पत्रुसे येसुलाइ बोल्लोकुन्, “दिठाउ, हामि ता सेब्भ्रोउ चिंजलक् छारिबानाइ तोरापाछु लाग्ल धरुहुँक्ला।”
29येसुइ चेलालकलाइ बोल्लाहा, “साँच्चिय मुँइ तोहोराखर्ह्वालाइ बोल्मेहेंर्ला, जैहिं मोरा लागि आउँ खुसिक् खभर पर्चार कर्बाक् लागि आफ्निक् घरबार, जग्घा-जिमि, महँटार-बाप्पो, ताचु-भाइ, दिदि-बैन्हि, छाउरा-पुटा छारैस्, 30ओहिं आफ्नि छार्लैसम् सइ गुना बर्ता पाइस्। सतावट आउँ दुक्खक् सङ्सङ्हिं ओहिं महँटार-बाप्पो, छाउरा-पुटा, ताचु-भाइ, दिदि-बैन्हि, घरबार, आउँ जग्घा-जिमि यिहे सन्सारइ पाइस्, आउँ आयला जुगैसेहे अजम्बरि जिबन पाइस्। 31तर अख्नि आगारि रैल्ह थुप्रोय मानुसलक्सेहे पाछु पोरोट्थ्ला, आउँ अख्नि पाछु रैल्ह थुप्रोय मानुसलक्सेहे आगारि भेट्थ्ला।”#मत्ति २०:१६; लुका १३:३०
येसुइ फेरि आफ्निक् मिर्तुक् बिसइमा बाज्ल
(मत्ति २०:१७-१९; लुका १८:३१-३३)
32येसु आउँ ओक्राक् चेलालक् यरुसलेमक्पटि जाइतिहि रैल्हुहुन्। येसुसेहे चेलालकक् आघु-आघु हिंठ्तिहि रैल्हक्। चेलालक् छक्क पोर्लो रैल्हुहुन्, आउँ उखर्ह्वाक् पाछु-पाछु आइलाहार मानुसलक्सेहे डराल रैल्हुहुन्। उहेटाकै येसुइ फेरि बार्हजेना चेलालकलाइ एकपाखा लेगिबानाइ आफ्निक् उप्रै आइपोर्लाहार दुक्खक् बिसइमा यन्हिं बोल्लाहा, 33“यते सुनहँ, हामि यरुसलेमक्पाखा जाइतिहि रहुँक्ला। ओछि मुँइ मानुसक् बेटाहिकलाइ धोखा देहिन् पक्रिबानाइ बर्के-पुझरिलक् आउँ धर्म-गुरुलकक् हाथै सोंपोट्थ्ला, आउँ उखर्ह्वाइ मोरानि मार्बाक् साजाइ देट्थ्ला, आउँ अरजाति मानुसलकक् हाथै जिम्मा लागाट्थ्ला। 34तसौ उखर्ह्वाइ ओक्रानि हँस्थिला, थुक्थिला, कोर्राइसौ बाज्राथिला आउँ ओक्रानि मार्थिला। तर तेस्रो दिनै उ फेरि मोर्लोक्भटे जिउँटो भेहिन् उठैस्।”
याकुब आउँ यहुन्नाक् बिम्ति
(मत्ति २०:२०-२८)
35ओक्राक्पाछु जब्दियाक् दुइजेना बेटायकलक् याकुब आउँ यहुन्ना येसुक्ठालाइ आइबानाइ यन्हिं बाज्लुहुन्, “गुरु, हामि तोरासङ्हिं जे माङुहुँक्ला तुँइ हाम्रा लागि पुरा करिदे बाजिहिन् हामि चाहाहुँक्ला।”
36येसुइ उखर्ह्वालाइ सोर्ल्हाहा, “बाजह ता तोहोराखर्ह्वालाइ किवा चाइल्ह?”
37तसौ उखर्ह्वाइ येसुलाइ बोल्लिहिंक्, “तोरा आदर-महिमाक् राज्जेइ हाम्रानि एकजेना तोरा दैन्हँक्पाखा आउँ एकजेना तोरा देब्रिक्पाखा बस्बा दे।”
38तर येसुइ उखर्ह्वानि बोल्लाहा, “तोहोराखर्ह्वाइ किवा माङ्तिहि रहला, तोहोराखर्ह्वाइ नाजनह। जुन् दुक्खक् कचौरा मुँइ पिबा पोर्लाहार, किस् उ तोहोराखर्ह्वाइ पिबा पारहला ते? अथबा जुन् कस्टक् बप्तिस्मा मुँइ लेबा पोर्लाहार, उ बप्तिस्मा तोहोराखर्ह्वाइ लेबा पारहला ते?”#लुका १२:५०
39उखर्ह्वाइ येसुलाइ बोल्लिहिंक्, “हामि पारुहुँक्ला।”
तसौ येसुइ उखर्ह्वालाइ यन्हिं बोल्लाहा, “जुन् दुक्खक् कचौरा मुँइ पिबा पोर्लाहार, उ तोहोराखर्ह्वाइ आको पिहोला, आउँ जुन् कस्टक् बप्तिस्मा मुँइ लेबा पोर्लाहार उ बप्तिस्मा तोहोराखर्ह्वाइ आको लेहोला। 40तर मोरा दैन्हँक्पाखा आउँ देब्रिक्पाखा बस्बा देबाक्सेहे मोरा काम बोइने। यि ठाउँलक् ता परमेस्वर आफ्निहि जक्राक् लागि तियार पार्ल धरैस्, उहेखर्ह्वाक् लागिय हो।”
41याकुब आउँ यहुन्नाइ माग कर्ल कहिनक् बिसइमा सुनिहिन् दस जेना चेलालक् उखर्ह्वाक्सङ्हिं रिसालुहुन्। 42तसौ येसुइ उखर्ह्वानि आफ्निक्ठालाइ हाँख्राइबानाइ यन्हिं बोल्लाहा, “तोहोराखर्ह्वालाइ थाहाय रहेर्ला, अरजातिलकक् उप्रै सासन कर्लाहारलके उखर्ह्वाक् उप्रै मनपोरि सासन चालाट्थ्ला। आउँ उखर्ह्वाक् गन्या-मान्यालके उखर्ह्वाक् उप्रै अधिकार चालाट्थ्ला।#लुका २२:२५-२६ 43भेटौ तोहोराखर्ह्वा सेहे ओरोङ् भेबा नाँभेक्। यदि तोहोराखर्ह्वामध्ये जैहिं बर्के भेबाक् इच्छा करैस्, ओहिं तोहोराखर्ह्वाक् सेवा कर्बा पोर्लाहार।#मत्ति २३:११; मर्कुस ९:३५ 44तसौ तोहोराखर्ह्वामध्ये जैहिं सेब्भुइसौ आगारि भेबाक् इच्छा करैस्, उ जम्माहिंक् कामारा भेबा पोर्लाहार। 45किसाबुने मुँइ मानुसक् बेटायक ओर्को मानुसलकक्भटे सेवा पाबाक्लाइ आइल बोइने, तर सेवा कर्बा आउँ थुप्रोय जेनालाइ पापक् साजाइक्भटे छुट्कारा देबाक् लागि आफ्निक् पारान देबा आइल रहम्ना।”
येसुइ बारतिमै बाज्ल अन्धालाइ राम्रो पार्ल
(मत्ति २०:२९-३४; लुका १८:३५-४३)
46ओक्राक्पाछु येसु आफ्निक् चेलालकक्सङ्हिं यरिहो सहरै आइपुग्लक्। तसौ उ सहरक्भटे बाहार निस्किहिन् जाबा ठाल्लटाकै उखर्ह्वाक्सङ्हिं थुप्रोय मानुसलक् सङ्हिं आइलुहुन्। उहे पैंदाक् छेंओइ तिमैक् बेटायक बारतिमै बाज्ल एकजेना अन्धा मानुस भिख माङिबानाइ बस्ल रैल्हक्। 47जब ओहिं नासरतक् येसु यिहे पैंदाक्भटे आइतिहि रहैस् बाजिहिन् थाहा पाइलक्, तसौ ओहिं बारा चोटे चिच्याइबानाइ यन्हिं बाज्बा ठाल्लक्, “अ येसु, दाउदक् बेटायक, मोराउप्रै दया कर्!”
48उहेटाकै थुप्रोय मानुसलके ओक्रानि बुन् साराउ बाजिहिन् हप्कालिहिंक्। भेटौसुधा ओहिं अज्झ बारा चोटे चिच्याहिन् बाज्लक्, “अ दाउदक् बेटायक! मोराउप्रै दया कर्।”
49तसौ येसु जाइतिहि-जाइतिहि ठिङ्ङ ठड्ध्यालक्, आउँ यन्हिं बाज्लक्, “ओक्रालाइ यटे हाँख्राहाक्।”
आउँ उखर्ह्वाइ उ अन्धा मानुसलाइ यन्हिं बाजिहिन् हाँख्रालिहिंक्, “तुँइ रामाटे उठ्, येसुइ तोरानि हाँख्राल धरेस्ला।”
50तसौ ओहिं आफ्निक् होर्लो पछौरि घुघाहिन् जुरुक्क उठ्लक् आउँ येसुक्ठालाइ आइलक्।
51येसुइ ओक्रालाइ बोल्लोकुन्, “तोरा लागि मुँइ किवा कर्बा, बाज्?”
तसौ अन्धा मानुसे येसुलाइ बिम्ति करिहिन् यन्हिं बोल्लोकुन्, “गुरु, मुँइ आँखे देख्बा पाउस्।”
52तसौ येसुइ ओक्रानि बोल्लोकुन्, “असौ आफ्निक् पैंदाइ जा, तुँइ मोरानि बिस्बास कर्लसिहिरे तोरानि राम्रो पार्ल रहस्ला।”
आउँ उहेटाकै उ आँखे देख्बा पार्लाहार भेलक्, आउँ येसुक् पाछु-पाछु लाग्लक्।
Currently Selected:
मर्कुस 10: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
