लुका 2
2
इसुको जुन्म
(मत्ति १:१८-२५)
1तेइबेला रोमिका म्हाँराजा अगस्टसले स्हबै राज्यभरिका मान्ठहरुको गन्ति गन्नुपड्छ भुनि हुकुम दिया।#२:१ रोमि राजाकन स्हबै मान्ठले तिरो तिरुन् भुनि गन्ति गर्या हो। 2कुरेनियस सिरियाका ठुला हाकिम भया बेला पैलो जुनगनना छियो। 3तेइबिअ स्हबै जुन नाउँ दत्ता गराउन आम्ना, आम्ना जुन्म्याथला गया।
4तेइबेला योसेफ पुनि नाउँ दत्ता गन्न गालिलको नासरतबाट यहुदियाको बेथलेहेम भुन्या राजा दाउदको गाउँमै गया, क्यानभुन्या तिँ दाउदका स्हुन्तान छिया। 5नाउँ दत्ता गराउन आपुकन मागियाइ मरियमकन स्हातै ल्हिकन गया, तेइबेला मरियाम गुर्बिनि छिन्। 6तिनुहरु बेथलेहेममै भयाकै बेला स्हुत्केरि हुन्या बेला आयो। 7तिनुले आम्नो जेठो भाउ जुन्माइन् र उनुकन टालाले बेडिकन डुँठोमै राखिन्, क्यानभुन्या तिनुका निम्ति धरमसालामै बइन्या ठाउँ छियोन।
परमेसोरका रैबार्या र भेडिगला
8बेथलेहेम गाउँति भेडिगला चउरौनि रातभरि आम्ना भेडाका हेरबिचार गद्दा छिया। 9प्रभुका रैबार्या भेडिगलाति देखिया, र प्रभुको महिमाको उज्यालो तिनुका वरिपोरि चुम्क्यो, अनि तिनुले जात्तिगरि भेइ मान्या। 10तर प्रभुका रैबार्याले तिनुकन भुन्या, “भेइ नमान! मु तुमिहरुकन खुबै राम्मो रैबार स्हुनाउछु, यइ रैबार स्हुन्यापछि स्हबै मान्ठ आनन्दित हुन्याछुन। 11आज दाउदको सहरमै तुमिहरुका बिअ एक जुन मुक्तिदिन्याको जुन्म भयाछ, तिँ ख्रिस्ट प्रभु हुन। 12तुमिहरुकन चिनारि यइ हुन्याछ, तुमिहरुले भाउकन टालाले बेडिकन डुँठोमै स्याइराख्या देख्न्याछौ।”
13तेइबेला अरु मथ्थै परमेसोरका रैबार्याहरु देखिया अनि परमेसोरको गुनगान गद्दै गाना गाउन लाग्या,
14“सोर्गमा बइन्या परमेसोरको जयजयकार होस्,
अनि धत्तिका जो मान्ठहरु स्हात परमेसोर खुसि छुन तिनुकन सान्ति होस्!”
15अनि प्रभुका रैबार्याहरु तिनुहरुबाट बिदा भइ सोर्ग तिर गइस्हक्यापछि भेडिगलाहरुले भुन्या, “आउ हामि बेथलेहेम स्हम्म जाउ, र ताँइ क्या भयाछ र परमेसोरले हामिकन भुन्या कुडा गइकन हेरौँ।”
16तिनुहरु तापाताप गरिगया, र मरियम र योसेफ दुबैकन, र भाउकन पुनि डुँठोमै ढुलिराख्या फेला पार्या। 17जब तिनुहरुले तेइ देख्या, गलाहरुले भाउको बारेमै प्रभुका रैबार्याले भुन्या कुडा स्हबैकन भुनिदिया। 18यि कुडा स्हुन्याजति स्हबैले अचुम्म मान्या। 19तर मरियमले यि स्हबै कुडा स्हुम्जुदै मुनौदा राखिन्। 20जैथो प्रभुका रैबार्याले तिनुहरुकन भुन्याछिया तेइथै भेडिगलाहरुले स्हुन्यार देख्याहुनाले, परमेसोरको महिमा र गुनगान गद्दै फर्क्या।
भाउको नाउँ इसु राख्या
21आठ दिन पुगि स्हक्या भाउकन इस्राएलि अइन उन्सारको खतना गद्दा तिनुको नाउँ इसु राख्या, यइ नाउँ परमेसोरका रैबार्याबाट आमाका कोखौनो आउनुभुन्दा पैला दिया छियो।#उत्पति १७:१२; लेबि १२:३
परमेसोरको मुन्दिरमै इसुकन स्हुम्प्या
22मोसाको अइन उन्सार मरियम चोखिन्या दिन पुरा भयापछि, योसेफ र मारियमले भाउकन यरुसलेममै परमेसोरकन स्हुम्पिन परमेसोरको मुन्दिरमै ल्याया।#२:२२ यहुदि स्हैनिले भाउ पाइन् भुन्या चालिस दिनपछि मात्तै मोसाका अइन उनुसार मुन्दिरभित्त पसि बलि चडाउन पाउन्छिन्। 23ज्या परमप्रभुको अइनमै लेख्या छ, “पैला जुन्मन्या स्हबै छोरा परमप्रभुको निम्ति पबित्त मानिन्याछ।”#प्रस्थान १३:२ 24अनि परमप्रभुको अइनमै भुन्याजैथै ढुकुर या परेउका एक जोला चल्ला पुनि चढाउनु पड्डो छियो।#लेबि १२:८
25तेइबेला यरुसलेममै एक जुन सिमियोन नाउँ गर्या मान्ठ छिया। तिँ इस्राएलका धर्मि र भक्तजन भया हुनाले, तिँ इस्राएलिहरुकन बचाउन्या मान्ठको बाटो ढुकि बस्या छिया। परमेसोरको आत्मा तिनुति छियो। 26परमेसोरको आत्माबाट तिनुले थाँ पाया “जैबेला स्हुम्म परमप्रभुले पठाउन्या भुन्या मुक्ति दिन्याकन नदेख्या स्हम्म तुमि मन्यानाइ।” 27परमेसोरको आत्माले सिमियोनकन डोराइकन परमेसोरको मुन्दिरभित्त ल्हिया। तेइबेला योसेफ र मरियमले पुनि अइन उन्सार इसुकन स्हुम्पिन परमेसोरको मुन्दिरभित्त ल्हिया। 28अनि सिमियोनले भाउकन आम्नो काखौनो ल्हियार परमेसोरकन धन्यबाद दिदै भुन्या,
29“हे प्रभु तुमिले आम्नो भाकल पुरा गर्याउ,
अब आम्ना कमाराकन पठारो गरि मन्नदेउ।
30क्यानभुन्या तुमिले पठाया मुक्तिदाताकन मेरा आँखाले देख्न पायाँ।
31तुमिले उनुकन स्हबै जातिका मान्ठहरुले देखुन् भुनि पठाया हौ।#यसैया ४०:५
32उनु नै अरु जातिका मान्ठहरुकन तुम्मो बाटो देखाउन्या जोति,
र इस्राएलिहरुको महिमा हुन।”#यसैया ४२:६; यसैया ४९:६
33भाउको बारेमै सिमियोनले भुन्या कुडा स्हुन्यार उनुका आमा र बाबाले अचुम्म मान्या। 34अनि सिमियोनले तिनुहरुकन असिपात दिदै भाउकि आमा मरियमकन भुन्या, “यइ भाउ इस्राएलिका मथ्थै मान्ठहरुका निम्ति नास गन्न्या र बचाउन्याको चिनारि होस् भुनि परमेसोरले छान्या छुन, अनि मथ्थै मान्ठहरुले तिनुको बिरुद्द बोल्न्या छुन्।#यसैया ८:१४-१५ 35यइबिअ हिर्दयका मथ्थै विचारहरु देखिउन् अनि तुम्मो हिर्दया धारिलो तरबारले छेक्या जैथै दुखले छियाछिया हुन्याछ।”
36अनि ताँइ परमेसोरको मुन्दिरमै आसेरको कुलकि फनुएलकि छोरि हन्ना नाउँ भयाइ एक जुनि बड्डि भबिस्याका कुडा थाँ पाउँदि छिन्। भ्या भया सात बर्स पछि तिनुको पोइ मर्यो र तिँ एक्लै भइन, 37र अइले तिँ चौरासि बर्सकि भयाइ छुन्। तिँ परमेसोरको मुन्दिर छोड्डि छिनुन्, तर बत्त र प्रार्थना गद्दै रातदिन परमेसोरको ध्यान गद्दिछिन्। 38तेइबेला तिनुले पुनि योसेफ र मरियमका काखति आइकन परमेसोरकन धन्याबाद दिइन्, र यरुसलेमको छुट्कराको बाटो हेरि बैन्याहरुकन इसुको बारेमै भुनिन्।#यसैया ५२:९
योसेफ र मरियम नासरत फर्क्या
39परमप्रभुको अइनले भुन्या उन्सार गन्नु पड्न्या जत्ति स्हबै काम गरि स्हक्यापछि, योसेफ र मरियमले भाउकन ल्याइ आम्नै सहर नासरतको गालिलमै फर्क्या। 40भाउ बुद्दिले बड्दै र जोरले भरिदै गया, र परमेसोरको अनुग्र तिँ स्हात छियो।
छोट्या इसु परमेसोरको मुन्दिरमै
41इसुका आमा बाबा बर्स्ह बर्स्ह मुक्तिको त्युबार मान्न यरुसलेममै जाँन्छिया।#प्रस्थान १२:१-२७; बेबस्था १६:१-८ 42जब इसु बार बर्स्हका भयाछिया तिनुका बा आमाले इसुकन ल्हिइ रिति उन्सार त्युबार मान्न यरुसलेम गया।#२:४२ यहुदिका चलन अनुसार १२ बर्स्हका छोट्याहरु टटुकि नभइ अबदेखि पुडो तन्नेरि भया मान्नाछुन्। 43त्युबार स्हकि स्हक्या स्हबै घर फर्किन लाग्या। इसु ताँइ यरुसलेममै रया, तर तिनुका आमा बाबाले थाँहै पायानुन्। 44इसु अरु स्हात्या स्हात हुनान स्हुचि तिनुहरु दिनभरि हँड्या। बास्हा भयापछि स्हात्या र स्हागका म्हाँजौदै तिनुकन खोइन लाग्या। 45इसुकन काँइपुनि पायानुन् र फेरि खोइन यरुसलेम फर्क्या। 46खोज्या तिन दिनपछि धौधौगरि परमेसोरको मुन्दिरमै फेला पाड्या। इसु धर्मगुरुहरु स्हात बसि तिनुका कुडा स्हुन्दै पुडामुखि स्होद्दा छिया। 47इसुको कुडा स्हुन्याजति स्हबैले ग्यान बुद्दि र जबाक दिया देख्यार अच्चुम्म मान्या। 48इसुले यइथो गर्या आमा बाबाले ताँइ देख्यार अचुम्म मान्या। मरियमले स्होदिन्, “भाउअ तोइले हामिकन यइथो क्यान गरिस्? हेर, तेरा बाबा र मु भलै आत्तिकन खोइदैछियाउँ!”
49इसुले भुन्या, “तुमिहरुले मुकन क्यान खोज्यौ? मु आम्ना बाबाको घरमै हुनु पड्डोछ भुनि तुमिहरुकन थाँ छियोन?” 50तर इसुले भुन्या कुडा योसेफ र मरियमले बुज्यानुन्।
51अनि इसु आम्ना आमा बाबा स्हात नासरतमै फर्क्या र तिनुहरुको हुकुम मानिकन बस्या। इसुकि आमाले यि स्हबै कुडा नबिर्सिकन मुनौदा राखिन्। 52इसुले परमेसोरको अनुग्र र मान्ठको कृपा पायार हड र बुद्दिमै बड्डै बड्डै गया।#१ समुएल २:२६; हितोपदेस ३:४
Currently Selected:
लुका 2: JUML
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
