Lukas 13
13
ONTOPORUA 13.
Omakumagido gokuidirurura.
1Momasiku ngano okua adikirua ku jamue, mba taa mu epururire, nokutja Pilatus okua dipagica aagalileji, manka taa gandja omagano gauo.
2Nde ta ti ku jo: Omua ruka, te ti, aagalileji mbono oja ri aarunde je vure aagalileji aakuauo ajeshe, morua shi ja mona iishuna ji cike mpono?
3Aaue. Andi mu rombuere nduno, ng’itamu idirurura, na ne tamu ka sa ngashika.
4Nenge omua ruka, nokutja mbejaka omurongo nuunutatu, mba ja guirua kondjugo ondeendeka mu Silo, nde tahi ja dipaga, ja ri nuurunde u vure mbu uajeshe mu Jerusalem?
5Aaue. Andi ti itshee: Ng’itamu idirurura, na ne tamu ka sa ngashika.
6H’ote ja rombuere uo ejere ndika: Omuntu guontumba okua zike mepja rje rjomavinju omukuju. H’okue ja ko, ta kongo ko iihimati, nd’ita mono tsha.
7H’ota ti komurongi guepja: Tara, onda ninga eemuvo ndatu, nde ja ndi konge iihimati momukuju ngu, ndere inii mona tsha. Gu ka po. Otshike tagu epica ouara eshara?
8Nde ta jamukura: Muene, gu eca omuvo gumue, manka andi ce, ndi gu ture uushosho.
9Puamue tagu ki ima komesho, go gu keue po muvogari, ng’inagu ima.
Jesus te eruda omukiintu omukundi.
10Mesiku rjesabata Jesus h’okua rongo mosinagoga.
11Nde tara, opua ri omukiintu gumue, ngu a ninga eemuvo omurongo nuunutatu e nombepo huunkundi, te ende a njongama, ita tshiua okuukirira.
12Jesus sho e mu mono, okue mu icana, e je ku he, nde ta ti ku he: Meme, ue eruka uuvu uohe.
13H’ote mu tenteke eke rje, naanzija h’oku ukurira, nde ta amberere Karunga.
14Nde muene guosinagoga okua geje, sho Jesus a panga mesabata. H’ota rombuere aantu: Omasiku oge ri kanekamue, omuntu mu ta rongo, omo mu ja, mui ipangice, ndere mesabata, ngere.
15He Muene te mu jamukura: Ooneruado ne, ndi tshi, na ne ohamu piica mo ongombe nenge ondongi motshigunda mesabata, mu ke hi ugire?
16Ndere omuna ngu gua Abraham, ngu a ri meemango da satana eemuvo omurongo nuunutatu, ita mangurururua mo ngeno meemango de mesiku rjesabata?
17Sho e tshi ti shii, aatamaneki je ajeshe oja s’oshoni, ndere aantu ajeshe oja njanjikirua iironga iikumici ajishe, mbi a ninga.
Omeere gaari.
18He ta ti: Otshirongo tsha Karunga otsha facana na tshike, tsho nandi tshe ereke na tshe?
19Otsha fa omuma hotshinjapi, omuntu e hi kucire, nde te ke hi kuna motshikunino tshe. Ho tahi koko, tahi ningi omuti omure, nd’eedira do keguru tadi vururukua miitaji jago.
20Itshee ta ti: Andi ereke otshirongo tsha Karunga na tshee?
21Tsho otsha fa ontaku, omukiintu e hi kucire, te hi rungu nuusira uiiherekero iitatu, sigo tahi pi ajishe.
Jesus itshee mu Jerusalem.
22H’ote ende niirongo neemukunda, ta rongo aantu, nde tu uka ku Jerusalem.
23Gumue po ta ti ku he: Muene, mba taa hupicua, oja tshidir’ike nenge?
24H’ota ti ku jo: Kembadareni neenkondo adishe okupita motsheero tsha cinana, oshoka otii mu rombuere: Ojendji ja ara ngaa ja pite mo, ndere taa ka njengua.
25Muene guegumbo nge a pita mo, ota ke edira po omueero, nde ne tamu ka cikama pondje, tamu tameke okukonkora pomeero nokuigida: Muene, tu egurura. Ndere te ke mu rombuera: Kandi tshi mpo mua zi.
26Ne otamu ka tameka okupopja: Sse oombo, mba tua rire, sse tua nuine miipaci johe, nguee muene oue tu ronga meendjira detu.
27He one rombuere: Kandi tshi mpo mua zi, zii po pu ngaje amushe, jarunde ne!
28Oko taku kara eriragano nehikokoto rjomeego, nge tamu mono Abraham na Isaak na Jakob naaprofeti ajeshe motshirongo tsha Karunga, ndere ne mue ekeruashi.
29Jo taa ka za kuuziro no kuuninginino, kuumbugantu no kuumbandjantu, nde taa ka kaatumba kotshiriro motshirongo tsha Karunga.
30Nde tara, oomba aashugunini nena ojo taa ka ninga jotango, ndere jotango nena taa ningi aashugunini.
31Esiku ndioka aafariseji jamue oje engene ku he, taa ti: Za po mpo u he kokure, oshoka Herodes a hara e ku dipage.
32Nde ta ti ku jo: Indeni mu ka rombuere okaandje hoka: Tara, otandi tida mo eembepo eembuineji, ngaje andi erukica nena na ngura, mesiku etitatu otii ka ada keshuriro.
33Ndere nena na ngura na shera ondi nokuenda natango, oshoka itatshi ningi, omuprofeti a sire pondje ha Jerusalem.
34Jerusalem, Jerusalem, ngu ho dipaga aaprofeti, nde to mbanbanga uo nomamanja, mba taa ku tuminua, rungapi nda arere okugongera aanohe tsh’odira, tahi gongere uudirona koshi homauaua, nde ngueje ino tsha ara.
35Tareni, egumbo rjeni otamu ke ri cigirua ri ri ouara, ndere andi mu rombuere, itamu ka mona ndje ue sigo okesiku ndioka tamu ka tja: Na ambererue, ngu te ja medina rja Muene.
Currently Selected:
Lukas 13: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
