Lukas 20
20
ONTOPORUA 20.
Aafariseji meembata na Jesus.
1Esiku rimue, sho a ronge aantu montempeli e ju uvicire evangelium, aapristeri aakuruntu naanongo jomambo oje ja mo uo.
2Jo taa mu pura: Tu rombuera ano: shi to ningi, oto tshi ningi meenkondo da re, nenge ore e ku p’eenkondo dika?
3Jesus h’ota jamukura, ta ti ku jo: Na ngaje onda ara ndi mu pure ohapu himue. Jamukurii ndje.
4Etshatsho rja Johannes orja zire keguru nenge omaantu?
5Jo otaa hidiradira, nde taa kundacana: Ng’otua ti okeguru, he ota ka tja: Otshike nduno inamu mu iteera?
6Ng’otua ti omaantu, aantu taa ke tu mbambanga nomamanja, oshoka oji iteera nokutja Johannes omuprofeti.
7Ano oja jamukura mo nokutja kaa tshi uo mpo rja zire.
8Jesus h’ota ti ku jo: Ano na ngaje itii mu rombuere, nokutja omeenkondo da re tii rongo shi.
Ejere rjepja rjomavinju.
9Nde ta tameke okuronga aantu neehapu dejere: Omuntu gumue okua tsike epja rjomavinju, te ri gandja uucica kaantu, manka ta hi a ka menekere ko.
10Etango sho rja ciki, okua tumu omupija kaarongi, je mu p’iihimati je jotshikunino, ndere oje mu denge, jo taa mu undura ko ouara.
11Itshee ta tumu omupija gumue a hiri, ndere na nguka taa mu denge, taa mu tuku, jo taa mu undura ko ouara.
12Omutitatu ta tumua, na nguka ta dengua uo iiraro, jo taa mu tida ko.
13Nde muene guotshikunino ti ipura: Andi ningi ngiini ano? Onda ara ndi tume mumuandje omuorike; nge taa mu mono, shira taa ke mu simaneka.
14Ndere aarongi sho je mu mono, oja kundacana, taa ti: Ngok’omucigururi, tu mu dipageni, uuciga opo u ninge uetu.
15Jo otaa mu tida mo motshikunino, nde taa mu dipaga. Muene guotshikunino ote ja ningi ngiini ano?
16H’ote ke ja, ta ka dipaga aarongi mbo, nd’otshikunino te ke tshi p’aarongi ji iri. Sho je tshu uvu, oja ti ku he: Tshivarerue, itatshi ningua ngaaka.
17Ndere he te ja tara, nde ta ti ku jo: Omutshango nguka momambo ogua ara tshike, sho kua tiua: Emanja ndi rje ekeruashi kaatungi, orjo rja ninga emanja rjo potshikororo.
18Keshe ngu ta guire kemanja, ota muashuka, ndere ngu tari guire, ota njanjuka.
Jesus ta purua efendero nejumuko.
19Mesiku ndija aapristeri aakuruntu naanongo jomambo oja konga je mu kuate, ndere oja tira aantu, oshoka oja dimburura nokutja ojo kua ta popi mejere ndika.
20Oje mu rangere, jo taa tumu aamentu aasisiti meni, ja tshiue okumukuatera meehapu de, opo ja mone ompito okumufara mepanguro rjaakuruntu no rjomureri guotshirongo.
21Mbono oje mu pura ano: Muongi, otu tshi tshi, nokutja oto popi nguee to rongo uo shi tshu uka, nguee ku tara nand’orupe ruomuntu, nde oto rong’ike notshiri ondjira ha Karunga.
22Otshu uka tuu okufuta efendero rjomukuaniirua nenge aaue?
23H’okua nonga iirundo jauo, nde ta ti ku jo: Otshike tamu makerere ndje?
24Urukirii ndje ondenari. Ohi na ecano nokutshanga kua re? Jo taa mu jamukura: Orjomukuaniirua.
25He ta ti ku jo: Gandjeni nduno komukuaniirua shi tshomukuaniirua, ne ku Karunga shi tsha Karunga.
26Jo ja njengua okuganda ohapu he mokati kaantu, aaue, oja muena, ndere oja ri ja kumua ko kejamukuro rje.
27Aasaduzeji oje engene ku he, mba haa ti: Kapen’ejumuko. Jo taa mu pura:
28Muongi, Moses okue tu rombuerere: Omumuahina gua gumue po ta si, ngu a ri nomukiintu, ndere ina ciga po ojana, nena omumuahina gue ne mu okane a pendurire po omumuahina oruvaro.
29Nd’aamuahina aarumentu oja ri uunuari. Guotango po to okana, nde ta si ke noruvaro.
30Omutijari te mu okana po, nde na he uo ta si ke noruvaro.
31Nomutitatu te mu okana po, tsh’otsho tuu ajeshe uunuari. Ajeshe taa si kaa noruvaro.
32Nde shugunina omukiintu ngu a he uo a ka sa.
33Ota ningi nduno gua re pu mboka mejumuko?
34Jesus te ja jamukura: Aana juujuni mbu haa hokana, jo haa hokanua.
35Ndere mbeja, mba ja tiua ojo opara okumona uujuni mbuija nejumuko rjaasi, kaa hokana, jo kaa hokanua ue.
36Kaa pondoka ue okusa, oshoka otaa ka facana naajengeli naana ja Karunga morua shoka jo aana jejumuko.
37Nokutja aasi otaa ka jumuka, shik’otsha romborua ngaa ku Moses, mpa a hepurura eno ndija enene, mpa a rukira Muene Karunga kAbraham, kIsaak no ka Jakob.
38Karunga ke shi Karunga kaasi, aaue, okaanamuenjo tuu.
39Aanongo jomambo jamue taa jamukura, taa ti ku he: Muongi, ua popja naua.
40Inaa hitsica ue okumupura ohapu.
41Ndere he ta ti ku jo: Matsa, aantu otaa ti ngiini: Kristus anuua Omumua David.
42Ndere David muene a shanga membo rjeepsalmi: Muene okua rombuera Muene guandje: Kaatumba korurjo ruandje.
43Sigo otii rangeke aatondi johe poshi ja ninge otshiratero tsheempadi dohe?
44David ano, nge te mu ti Muene, Omona nduno itshee ngiini?
45Manka aantu ajeshe je mu pupa, h’ota, rombuere aarongua je:
46Angareni aanongo jomambo, mba jo ore okuenda ja zara eenguuo eende nokukundua potshirandero, jo ja ara omakaatumbiro gokomesho meesinagoga niipundi jotango miituci.
47Jo taa ri po ouara omagumbo gaasherekadi nokupopja niiherere omagarikano omare. Otaa ka mona epanguro edigu ri vure po.
Currently Selected:
Lukas 20: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
