Lukas 22
22
ONTOPORUA 22.
Uurarero ua Paska.
1Otshituci tsheemboroto eentoue, shi tashi tiua uo Opaska, otsha ri popepi.
2Aapristeri aakuruntu naanongo jomambo taa kundacana, nokutja otaa dipaga Jesus ngiini, ndere oja ri ja tira aantu.
3Ndere satana ta hi mu Judas, ngu ha tiua uo Iskariot, h’okua ri gumue guo mbeja omurongo na jaari.
4He ota hi a ka kundacane naapristeri aakuruntu nookapitija, shi te mu gandja ngiini miikasha jauo.
5Jo ja panda, taa huvacana je mu pe iimariua.
6H’oti iteere, nde ta kongo ompito hokumugandja kapun’evundakano maantu.
7Esiku rjeemboroto eentoue orje ja, mu hamu dipagua onzigona ha Paska.
8He ta tumu Petrus na Johannes, ta ti: Indeni mu ke tu rongikidire onzigona ha Paska, tu hi rje.
9Jo taa mu pura: Oua ara tu ke hi rongikidire peni?
10He te ja jamukura, ta ti: Tareni, nge tamu hi momukunda, otamu ka tsakanekua komuntu, a humbata ombiga homeja. Ohe mu ka randure ngu megumbo, mu ta hi.
11Ne tamu rombuere muene guegumbo: Omuongi e tu undura, ta ti: Ondunda hokurira, mu tandi rire onzigona ha Paska naarongua jandje, ohi ri peni?
12Te ke mu urukira ondunda onene hokurira, ha rongerua naua. Omu mu ke hi tu rongikidira mo.
13Jo ja pita, nde taa mono ajishe ngashi e ja rombuere. Jo taa rongikida nduno onzigona ha Paska.
14Erara sho rje ke ja, h’ota kaatumba, na mbeja omurongo na jaari na he.
15H’ote ja rombuere, ta ti: Onda jeerukirirua okurja onzigona ndjika ha Paska na ne, mank’inande epekua.
16Oshoka andi mu rombuere: Okuza konena itandi hi ri ue sigo otsh’ada eguanico rjo muukuaniirua ua Karunga.
17H’ota kuca ano ehoro, ta pandura, ta ti: Tuumbeni, ri itoporereni.
18Oshoka andi ti: Itandi ka nua ue iihimati jomavinju, manka otshirongo tsha Karunga inatshi cika.
19Ta kuca uo omboroto, ta amberere, te hi pambura, he te hi ja pe, ta ti: Shika orutu ruandje, ndu taru mu gandjerua.
20He otsho tuu a kuca itshee ehoro konima hokurja, ta ti: Shika ehoro rjeguaneno epe mombinzi handje, ndji tahi mu tikire.
21Ndere guanene tara, eke rjomuorori guandje ori ri na ngaje kotshiriro.
22Omuna guOmuntu ota hi ngaaka ngashi kua tiua, ndere ojeeje komuntu ngo, ngu te mu orora.
23Jo oja tameke okupuracana, ore nduno po mu jo, ngu te ke tshi ninga.
24Pua tsuua eembata mokati kauo, nokutja ore mokati kauo ta moniua ando e vure mukuauo.
25He ta ti ku jo: Aakuaniirua jaapagani ohaa ja rere, nde mba taa ja pangere, ohaa hicanua tate.
26Ha sho mokati keni. Mokati keni ngu a hara a ninge omukuruntu ku mukuauo, ni ininge omutshona ku mukuauo; na ngu a ninga guotango, ni ininge omupija.
27Ore nduno e vure mukuauo: Ohe ngu ta kaatumba kotshiriro nenge ohe ngu ta jakura ko? Ondi tshi, ngu ta kaatumba kotshiriro. Ndere ngaje ondi ri mokati keni nda f’omukareri.
28One mbo, mba mui ididimikira puamue na ngaje momamakero gandje.
29Ano andi ke mu rongera uukuaniirua ngashi Tate e u rongera ndje.
30Mu rje, ne mu nue kotshiriro tshandje motshirongo tshandje, ne uo mu kaatumbe miipundi jepangero okupangura omazimo omurongo na gaari ga Israel.
31Muene ta tsikire ko, ta ti: Simon, Simon, tara, satana a harere ngeno e mu cice a f’omuntu ta cic’iirja.
32Ndere ngaje onde ku garikanena, ehiteero rjohe karje egeje, nguee ng’oui idirurura, koreka jakueni.
33Nde nguka ta ti ku he: Muene, ngaje onda guana okuha puamue na nguee meemango no mokusa.
34Nde he ta ti: Otii ku rombuere, Petrus, nena tuu ndjika, manka ekondomboro inari iga, oui idimbika ndje rutatu, anuua ku tshi ndje.
35Sho nde mu tumine, mu he kamu nompunda nondjepera neengaku, omua ri mue epa?
36Jo taa ti: Aaue. Nde he ta ti: Ndere nena, ngu ke nompunda, na he ete po, tsh’otsho tuu nondjepera, ngu ke hi na nande, na randice po eruakani rje ri he momuere.
37Oshoka andi mu rombuere: Naanena otatshi guanicirua ndje, shi tsha tshangua: Okua jarurirua maakorokoshi. Oshoka ajishe mbi ja tshangerua ndje, otaji guanicua.
38Jo taa ti: Muene, tara ko, mpak’opu na eemuere mbaari. Nde he ta ti: Opuuo.
39H’ota hi pondje, nde ta hi ngashi i igirire, kondundu heemono; aarongua je mu randura.
Judas to orora Jesus.
40So a ciki ko, okue ja rombuere: Garikaneni, kamu guire momamakero.
41H’ote engene komesho puure ngashi tau umbua ekuma, ta ts’eengoro, nde ta garikana, ta ti:
42Tate, ng’oua ara, kuca ko ngaje ehoro ndika, ndere kari sh’eharo rjandje, aaue, orjohe nari ningue.
43Ndere omujengeli e mu orokera a zi keguru, he te mu koreke. Nd’uumbanda uokusa ue mu uangukira, okua ta garikana.
44Epupju rje orja ri rja f’ombinzi ahi ndondere poshi.
45Sho a dimbuka okugarikana, okue ja kaapostoli, nde te ja ada ja koca kuupongo.
46Ta ti ku jo: Omua koca nani? Pendukeni, ne tamu garikana, kamu guire momamakero.
47Mank’e ri ta popi di, tara, ongundu tahi engene ko, gumue gua mbeja omurongo na jaari, Judas, e ja tetekerera. Te ja popepi na Jesus e mu cipe eemurungu.
48Nde Jesus ta ti ku he: Judas, nokucipa eemurungu oto orora Omuna guOmuntu?
49Mba ja ri na he, sho ja mono shi tatshi ka ningua, oja ti ku he: Muene, inatu denga mo omuere mu jo?
50Gumue guo mu jo ta denge omupija guomupristeri omukuruntu, nde te mu kepura okutsi kokurjo.
51Jesus ta jamukura, ta ti: Eca, opuuo! H’ota njenge okutsi kue, nde te mu erukica.
52Ndere ku mbono, mba je ja okumukondjica, kaapristeri aakuruntu, kaarangeri jontempeli nokaakuruntukuruntu Jesus ta ti: Omue ja mua fa mue endere omudipagi guekoto, mua tj’eemuere needimbo.
53Uunarushe onda ri pu ne montempeli, nde inamu jerucira ndje omake, mu kuate ndje, ndere ndika erara rjeni neenkondo deemurema.
54Jo oje mu kuata, nde taa mu fara kegumbo rjomupristeri omukuruntu. Petrus te mu randura ko, e ri ngaa ngahuija.
Petrus ti idimbike Jesus.
55Sho ja teme omuriro mokati kotshoto, te taa kaatumba je gu dingirira, na Petrus a kaatumba mokati kauo.
56Omupija omukadona te mu monene keje rjomuriro, te mu taratara, nde ta ti: Na nguka uo okua ri na he.
57Nde te mu idimbike, ta ti: Mukadona, ngaje kandi mu tshi.
58Konima herara rimue gumue a hiri te mu mono, ta ti: Na nguee gumue gua mbono. Petrus ta ti: Menguee, ha ngaje!
59Otundi himue ha piti, itshee gumue ta ti: Tshiri, na nguka okua ri pu he, oshoka omugalileji uo.
60Petrus ta ti: Mentu nguee, kandi tshi shi to popi. Naanzija, manka e ri po ta popi, ekondomboro rjo otari igi.
61Naangashingika Muene ota pungurukire ku Petrus, nde te mu tara. Petrus h’okua dimburukua eehapu da Muene, sho a tire: Ekondomboro mank’inari iga, ngueje oto idimbike ndje rutatu.
62Petrus h’ota zi mo nokuri a huka kondje, a riririre.
63Nd’aarumentu mba taa kuata Jesus, otaa mu tsheke, jo taa mu denge.
64Taa mu siikire otshipara, taa mu denge, nde taa pura: Tu ucira, ore e ku denge?
65Nomatsheko gi iri taa ga cindi mu he.
66Ongura, sho kua tshi, aakuruntu jotshirongo naapristeri aakuruntu naanongo jomambo taa gongara itshee, jo taa mu fara motshingongi tshauo, nde taa ti: Nguee ng’oKristus, tu rombuera ano!
67He ta ti ku jo: Nge andi tshi mu rombuere, itamu iteere ndje.
68Ndere ngaje nge tandi mu pura, itamu jamukura ndje, n’itamu mangurura ndje uo.
69Ndere kongashiingika otamu ka mona Omuna guOmuntu ta kaatumba korurjo rua Karunga.
70Ajeshe taa ti: Nani ongueje Omumua Karunga? He ta ti: Eno, ongaje!
71Jo taa ti: Otua pumbua itshee ihokorora jimue ji iri po? Sse otue tshi ihuvire ojene mokana kue.
Currently Selected:
Lukas 22: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
