Mateus 20
20
ONTOPORUA 20.
Aarongi mepja rjomavinju
1Otshirongo tsheguru otsha fa muene guegumbo, ngu a meneka ongura onene a ka shije aarongi jepja rje rjomavinju.
2Tu uvacana naarongi ondjambi hondenari himue mesiku, h’ote ja tumu mepja rje.
3Potundi ontitatu ta piti mo, nde ta mono jamue je nonjaro potshirandero.
4Te ja rombuere: Na ne uo indeni mepja rjandje, otii mu pe shi tshu uka.
5Jo otaa hi: Potundi ontikanekamue nomutimugoji ta piti mo itshee, he ta ningi nga tshikuauo.
6Potundi ontimurongo na himue okua hi, nde ta ada po jamue, ja cikama, nde ta ti ku jo: Otshike mua cikama etango arishe mpoka, itamu rongo tsha?
7Jo otaa jamukura: Oshoka kapena ngu e tu shija. H’ote ja rombuere: Na ne uo indeni mepja rjandje.
8Onguroshi muene guepja rjomavinju ta rombuere kapitija ke, ta ti: Icana aarongi, nde to ja p’ondjambi, to shimbike ku mba ja shugunina sigo oko jotango.
9Mbeja ojo je ja po tango, mba ji ire kiironga potundi ontimurongo na himue. Nde keshe tuu ogumue ta peua ondenari he.#20:9 Jesus a hara e tu ronge tu tsiue, nokutja ondjambi ho meguru itahe erekua necimbo rjiironga, nande ua kara eemuvo 20 nenge 50 nenge 80 pevi, aaue, oneharo euanaua, nokutja mokurongo noshenda ndji tua peua ku Karuga.
10Jotango sho je ja momutete, okua ja tega ja peue je vure po, ndere na jo oja peu’ike ondenari.
11Pokuhifutua oja ngunguturire muene guepja.
12Nde taa ti: Mba ja shugunina, oja ronga otundi himuike, ndere oue je ereka na sse, mba tu umbata uudigu nomutenja guetango arishe.
13H’ota jamukura po gumue, ta ti: Kuume, inandi ku ningira otshineji. Inatu uvacanena nani ondjambi hondenari himue?
14Kuca shi tshohe, nde to hi. Na ngu a shugunina otii mu pe ngaa uo tshi cike po tshohe.
15Nenge ite vuru okuninga na shi tshandje shi nda ara? esho rjohe orja ninga okasheshe, sho ngaje omuanaua?
16Otsho ngii aashugunini ojo naa ninge jotango, jo jotango taa ningi aashugunini. Oshoka ojendji oji icanua, ndere aatshona jo ogororua.
Okuepekua kua Jesus
17Mondjira Jesus sho a hi ku Jerusalem, okui ikucire po aarongua je omurongo na jaari, nde te ja rombuere:
18Tareni, otatu hi ku Jerusalem, Omuna guOmuntu a ka gandjue kaapristeri aakuruntu no kaanongo jomambo, jo taa ke mu tokora a se.
19Jo otaa mu ecere nduno miikasha jaapagani a tshekue, a dengue neengora, a harerue komutshigakano, nde mesiku etitatu ta ka jumuka itshee.
Aana ja Zebedeus
20Po opue ja ku he hina haana ja Zebedeus naamati je, h’oti injongamene ku he, e mu indire tsha.
21Jesus h’ota ti ku he: Oua ara tshee? H’ota jamukura: Popja, aamati jandje mba jaari ja ka kaatumbe motshirongo tshohe, gumue korurjo, mukuauo korumosho.
22Jesus ti i mo: Kamu tshi nande shi tamu indire. Otamu vuru nani okunua ehoro, ndi tandi ka nua? Jo taa ti: Otatu tshi vuru.
23Nde he ta ti: Ehoro rjandje otamu ke ri nua ngiika, ndere okupa iipundi korurjo ruandje nenge korumosho katshi shi otshironga tshandje, aaue, otsha Tate tuu, h’ote ji pe mba e ji rongera.
24Aakuauo omurongo sho je tshu uvu, oja geere aamuahina mba jaari.
25Nde Jesus te ji icana ku he, he ta ti: Omu tshi tshi, nokutja aakuaniirua jiirongo ohaa ji rere, nomarenga hage ji pangere.
26Ha tsho tshi kare mokati keni; mokati keni ngu a hara a ninge omukuruntu ku mukuauo, ni ininge omupija gueni.
27Ngu a hara a ninge guotango mokati keni, na ninge omupika gueni.
28Ngashi Omuna guOmuntu ine ja a karerue, aaue, okue ja a karere tuu, nomuenjo gue e gu gandjerere ojendji ong’otshikurira.
Aaposi mu Jeriko
29Sho ja zi ko ku Jeriko, aantu ojendji oje ja randura.
30Nde tara, aaposi jaari taa kaatumba pondjira; sho ju uvu, nokutja Jesus te ende po, oji igida: Muene, tu siroshenda, nguee Mumua David!
31Aantu oje ja ganda ja muene. Ndere jo otaji igida itshee muure: Muene, tu siroshenda, nguee Mumua David!
32Jesus ta cikama, h’ote ja pura: Omua ara ndi mu ningire tshike?
33Jo otaa ti: Omesho getu ga pashurue.
34Jesus e ja siroshenda, ta njenge omesho gauo, jo oja mono ko, jo otaa mu randura nokuri.
Currently Selected:
Mateus 20: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
