Luk 13
13
Ɓoƴsoh kipes
1Ŋ jamanooneem, ɓi ɓo' naandsukka Yeesu findi Pilaat apoh ɓi ɓo' gen Galile wa ɓa seeƴkee wuu Kooh. 2Yeesu loffa ɓa ne : « Ɗu liiɓ ne ɓooɓeem ɓeɗ uupiɗ bakaaɗ ŋ Galile sagu miskiɗi ɓa raak weem e ? 3Muk ! Waaye ñam na woyee ɗu ne, ɗu ɓoƴsohɗi kipes ɗah, ɗu hey name boomu jen findiiɓa. 4Te ɓooɓa ndaŋkiyaah na yasna-kaahay (18) ca, taɓaha yakka ŋ Silowe keenee nga ɓa, ɓa kaannda, ɗu liiɓ ne ɓeɗ uupee nik bakaaɗoh ŋ Yerusalem jen e ? 5Muk ! Waaye ñam na woyee ɗu ne, ɗu ɓoƴsohɗi kipes ɗah, ɗu hey name boomu jen findiiɓa. »
Kidgi na rimeeɗi
6Yeesu naandsukka ɓa andiinii : « Ƴaar raakeen ndun ŋ yohon ce. Wa a kaɗa ɓeena, a raakɗi ali rim nga. 7A woosa ƴaara na pangkiɗee ɗe ŋ yohna ne : “ Kiis kaahay ceɗɗi, ŋ hayya ɓeene ŋ ndunii ɗah, ŋ raakuu rim nga. Ƴoɓaa ! Wa joyɗi naaf ɗiski ŋ ɓarang ɓarang. ” 8Ƴaara loffa ɗe ne : “ Kilifaani, faɗaa kiis kii ; ŋ hey bongɗe tasiŋ wa, ŋ tuma kotar. 9Miniɗ nik ne wa hey rime ; wa rimɗi ɗah, fu ƴoɓɗuka. ” »
Yeesu wirɗiɗ ɓitiɓ njuuƴiɗ ŋ mbehi na iɗsiɗkohse
10Wa nikee ŋ mbehi na iɗsiɗkohse, Yeesu jangɗoheeɗa ŋ sinaagoga. 11Ɓitiɓ nikeen nga, a njuuƴee njuuƴ, a mineeɗi jaɗtuk delem, a jiini ambee ɗe. A tumiɗ na kosaay keem kiis ndaŋkiyaah na kiis yasna-kaahay (18). 12Wa Yeesu hot ɗe, a ɓeeɗukka ɗe, a woosa ɗe ne : « Ɓoyi, fu saɓsohuuɗ na kosaay kiŋ ɗa. » 13A degga ɗe yaah ciŋ ɗe, ŋ ɗiska ɗiska ɓoya jaɗtukka, a yakɗeeɗa Kooh.
14Waaye ƴaara adgohee sinaagoga ayrukka ŋ ini Yeesu wiriɗ ɓitɓa ŋ mbehi na iɗsiɗkohse, a woosa mboolnda ne : « Neeh yasna-yino ceɗ na pangkohse.#Pula 20:9-10; Rohƴiɗi 5:13-14 Hayaat nga ca ɗu paƴuk, waaye ŋ mbehi na iɗsiɗkohse haa. »
15Heɗ ɓoo Yeesu loffa ɗe ne : « Naafeehaaci ! Ŋ mbehi na iɗsiɗkohse ya ɓa na tokseeɗi inoh fiŋ ɗe wala mbaamiŋ ɗe ŋ ɗiska a toku ne a kaɗ ɗe anɗa ? 16Ŋ hot ɓitɓii ɓaah ŋ ɓi rimkoh ŋ Ibrahiima, te Seytaani jatngiɗ ɗe kiis ndaŋkiyaah na kiis yasna-kaahay (18) ; wa ye joy tah po a toksassanɗi ŋ mbehi na iɗsiɗkohse ? » 17Woo kiŋ Yeesu weem tahha po ɓi sang ɗe ñaarra, waaye mboolnda neɓuusa ŋ in ca feyohiɗ ca baahiɗ ca a tumee jen.
Tisohiŋ mutardaani na lawiiri
18Yeesu woyissa ne : « Hayaat ŋ teeɓ ɗu Nguuriŋ-Kooh findi wa mand na ini ŋ mina mandtiɗkoh. 19Wa mand na inii : A nikee ɓo', a ɓayya kuɓu mutarda, a sokkaa ŋ yohon ce, wa paarra, wa nikka kidig po sel ci taarra ŋ naak ciŋ wa. »
20Yeesu woyissa ne : « Ŋ min mandtiɗohis Nguuriŋ-Kooh na ye ? 21Wa mand na findi ɓitiɓ na ɓayohee lawiir a siiɓa na kanoh mun kaahay ; ƴut ɗah, ini siiɓuuɗi jen guuf. »
Yahndeeri ɓengiɗi
22Kaɗaŋ Yeesu Yerusalem, a taambee ŋ kur ci yakak ci na ci ƴin ci, a jangɗoheeɗa. 23Raakka ƴaara meekis ɗe ne : « Kilifaani, ɓooɓi na hee mucɗasse, ɓa hey laaye e ? » Yeesu loffa ɓa ne : 24« Ndengɗukaat ɗu aasoh yahndeeri ɓengiɗi, laam ñam na woyee ɗu ne, ɓi ɓo' laayiɗ hey jeeme aas, waaye ɓa heyɗaa mine.
25Te jamanooni heɗ kahni na hee kurkohe ne a rang buntaani, ɗu ɓi wa raakan ŋ hara, ɗu hey nike nga, ɗu laɓɗee buntaani, ɗu woyee ne : “ Heɗi, rangsiɗa ɓoo ! ” A hey ɗu lofe ne : “ Ŋ inahɗi ɗiski ɗu kurkoh. ” 26Ŋ ineem ɗu hey woye ne : “ Moo ɓoo ñamiɗ na ɗa, ɓoo aniɗ na ɗa te fu jangɗohiɗ ŋ mbeeddaaciŋ ɓoo ! ” 27A hey ɗu lofisse ne : “ Ŋ inahɗi ɗiski ɗu kurkoh, usaat to, ɗu ɓi tumoh bakaaɗ ci jen. ”
28Teemb ndeem, ɗu hey hote Ibrahiima, na Isaahha, na Yaŋhooɓa na woosuuɗ ci jen ŋ ɗooƴ Nguuriŋ-Kooh, ɗu mbetu ŋ hara, ɗiska fuɗ na ɗoɓɗoh sis raak. 29Ɓooɓi hey pulohe ŋ ɓak ci jen, ɓa ɓoof ŋ Nguuriŋ-Kooh ne ɓa ñam kañam ka yakka. 30Raakiɗ ɓooɓi mirndoh woti, ɓeɗ na hee adge ; te raakiɗ ɓi adug woti, ɓeɗ na hee mirndohe. »
Yeesu na Yerusalem
31Teemb ndeem, ɓi ɓo' ɓaah Farisen ca hayya ŋ Yeesu, ɓa woosa ɗe ne : « Kurka ndii fu coot laam Herod na waaɗee ɗa ap. » 32Yeesu loffa ɓa ne : « Kaɗaat ɗu woya ɓaakoɓeem ne, mi yii saɓsoh ɓooɓi na jiiniici te mi yii wiriɗ kosaayiɗ ci woti na kim, faaha kim ŋ hey ɗiindohe ini ŋ hay ne ŋ haɓiɗa. 33Ŋ joyiɗ taalndiɗ waasiŋ ngo woti na kim na faaha kim, woosuuɗ apohsuu ŋ ɗiski nikɗi Yerusalem.
34Cey Yerusalem, fu yi na ape woosuuɗ ci, fu tapee ɓooɓi fu na woosohse atoh po ɓa kaan, waas hend na weɗ ŋ waaɗ nangɗoh kuɓuuciŋ ɗa findi pambi na nangɗohe ƴiil ciŋ ɗe ŋ ooɓ ce, waaye ɗu moosɗi waaɗoh ! 35Weɗ tah ɗu hey faɗse na kahan ɗu, te ñam na woyee ɗu wa, ɗu hotissanɗi so po mbaɗna ɗu na hee woye ne : “ A barke'iɗ, yi na haye ŋ tiikiŋ Heɗ ɓoo ! ” »
Currently Selected:
Luk 13: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
