Hechos 1
1
Jesú-mä̧ Epíritu Sa̧tu̧rü̧ weäkua'a ji'äwinü̧
1Cha̧wa̧ru̧wa̧ Teófilo, ukú ukuo i̧sa̧ kua'attü̧, ä̧kuo̧mȩnä̧ Jesú aditino̧mȩttü̧ kkä̧mä̧dü̧, u̧wo̧juȩti̧nü̧mä̧ o'kajuiyünä̧ wȩyu̧tu̧ wedinä̧ku̧jä̧ ä'kojimä̧, 2Epíritu Sa̧tu̧ a̧'kua̧iweyenä̧, umüwäyotü apótore-rü jȩttä̧kuȩ wȩnȩ we'äji̧'ka̧ mo̧ro̧jä̧ra̧'a̧ käekuächino̧mȩbü päi'ünä̧. 3Ja̧'wa̧ta̧nü̧ juätürümä̧, usurä ȩmä̧u̧ wa'ü ikuäja'attü tto'ächäji̧'ka̧mä̧, wäjuönä̧ ttu̧wo̧juö̧nä̧tä̧, ttü̧ja̧ ta̧ju̧ mo̧ro̧ jo̧mȩnä̧ i̧jȩkui̧nä̧u̧, ru̧wa̧ Dio weü wȩnȩ ji'äu kkä̧nü̧. 4Ja̧'wa̧ta̧nü̧ umüwäyotü apótore-ku pä̧mä̧dä̧ji̧'ka̧ päinä̧u̧: Jerusarȩ́-ttü̧mä̧ dükuekuächätukuä, Chä'o iya päinü̧ iyätukuaku,
—Ttü jidäwa'a kuä̧ju̧kui̧nä̧tu̧ku̧ta̧'a̧nü̧ 'kuäopäkua'a; 5Isopäi'ünä̧ Ju̧a̧-mä̧ ajiyanä̧tä̧ bautizo jȩpi̧nü̧, ja̧'wa̧nü̧ ja̧'a̧nä̧ a̧'u̧kua̧'a̧tä̧ mo̧ro̧ o'ka'a ukutumä̧ Epíritu Sa̧tu̧nä̧ bautizo jȩä̧kuä̧u̧jä̧.
Jesú mo̧ro̧jä̧ra̧'a̧ kä'ekuächinü̧ wȩnȩ
6Ja̧'wa̧nü̧ Jesú-ku ji̧nä̧ yo̧mȩtȩ pȩjü̧, jä'epü ttä̧ju̧kui̧nä̧ku̧: —Chu̧ru̧wa̧, ¿Jitä pi̧yȩtä̧ pä̧nä̧, Irae ttü̧ja̧ tturuwomä̧ weäwi'ünä̧ ppa̧kuä̧dä̧kua̧'a̧ tä̧jí̧? 7Jesú, ädätinä̧u̧: —Chä'o Dio, Chutä ukuo kka̧'a̧ku̧ amükuädü u̧ju̧ni̧nü̧ mo̧ro̧'i̧nä̧, jä̧kuȩ'i̧nä̧ ku̧wo̧juä̧tu̧kua̧ pä'ümä̧ rekuä rü̧jo̧ko̧u̧jä̧; 8Ja̧'wa̧nü̧ ja̧'a̧nä̧, Epíritu Sa̧tu̧ ukutunä̧ ichi'ü ü̧jä̧mä̧do̧mȩnä̧mä̧, kujurutuku kuȩmä̧kuo̧tü̧jä̧; jua'amä̧, Jerusarȩ́-nä̧'i̧nä̧, Judea rȩjȩnä̧'i̧nä̧, Samaria-nä̧'i̧nä̧ ja̧'wa̧ta̧nü̧ pi̧jä̧ beipomȩbü päi'ünä̧ 'chä̧nü̧ ttürü 'kuäopa'a to'kuinä̧tu̧ku̧ jikuäwätukua pä'ü. 9Pi̧yȩ pä'ü käda'a, to̧pä̧rü̧ ttü̧ja̧kua̧'a̧nä̧, Jesú-mä̧ käekuächa'attü̧, ajiya isoppa, a̧ttä̧di̧'i̧nä̧ku̧, jua'a yabomä̧ tottü juiyünä̧tä̧. 10Ja̧'wa̧nü̧ käekuächi̧yä̧u̧, mo̧ro̧jä̧ra̧'a̧ to̧ttä̧ro̧mȩ 'kä̧tȩnä̧, ttü̧ja̧ ta̧ju̧, teü o̧ta̧ 'ka̧tä̧wä̧tü̧ kka̧kuä̧mü̧, 11Pättinä̧u̧: —Galirea ttü̧ja̧, ¿tta̧'a̧nü̧ pä'ü mo̧ro̧jä̧ra̧'a̧ to̧pä̧rü̧ ku̧ja̧kuä̧tu̧kua̧'a̧jä̧ttü̧? Pide Jesú, ukutu ku'kä̧tȩtu̧ku̧ttü̧ mo̧ro̧jä̧ra̧'a̧ ȩmä̧wi̧'ä̧jä̧ku̧mä̧, käekuächa'a to'kuäjätukuta'anü̧, pä'äjita'anü̧'i̧nä̧ ja̧'wa̧nü̧tä̧ i̧chä̧kua̧.
Matía-rü pojopü ttȩmi̧nü̧ wȩnȩ
12Ja̧'wa̧nü̧ jä̧ji̧ o'ka'a Jerusarȩ́-ra̧'a̧ku̧ 'chi̧nä̧tü̧, Olivar pä'ü mikuä'ka mü̧ä̧'kattü kkä̧mä̧dü̧, sawaru mo̧ro̧ 'chä̧kuä̧wo̧mȩ ä̧tȩkuo̧mȩ jo̧mȩtä̧. 13Ja̧'wa̧nü̧ ja̧'a̧ rȩbȩä̧kuä̧wi̧'ü̧mä̧, isode wä̧mȩ i̧so̧ka̧nä̧ ttü̧ja̧kuä̧jä̧ka̧nä̧ dodepinä̧tü̧, juätümä̧: Peduru'i̧nä̧, Ju̧a̧'i̧nä̧, Jacobo'i̧nä̧, André'i̧nä̧, Felipe'i̧nä̧, Tomá'i̧nä̧, Bartoromé'i̧nä̧, Mateo'i̧nä̧, Alfeo i̧tti̧ Jacobo'i̧nä̧, Simón Zerote pä'ü ottinä̧ku̧'i̧nä̧ ja̧'wa̧ta̧nü̧ Juda, Jacobo ü̧jä̧wa̧'i̧nä̧ ji̧na̧'a̧. 14Ja̧'wa̧nü̧ ja̧'a̧, juätü o'katoi'ünä̧ ka̧ka̧ku̧ Dio-rü ji̧nä̧ yo̧mȩtȩttü̧ ukuokuinä̧tü̧, juätükumä̧ nätü̧'i̧nä̧ ji̧na̧'a̧, Jesú ja̧ju̧ María'i̧nä̧, ü̧jä̧wa̧tü̧'i̧nä̧, jü̧nä̧. 15Ja̧'wa̧nü̧ ttü̧'ȩjü̧ mo̧ro̧, ciento veinte-nü̧ jo̧mȩnä̧ ji̧yȩtȩnä̧ wotü ka̧ka̧kuä̧jä̧tü̧rü̧ Peduru-mä̧ ä̧rä̧mi̧'ü̧ pä'inü̧: 16Chawaruwä chi̧jä̧wa̧tü̧, wȩyu̧kuä̧ wȩnȩ päüta'anü̧, Dawi-nä̧ Epíritu Sa̧tu̧ ukuokuinü̧ta'anü̧ 'kuäopina̧'a̧, Jesú-ru kuä'ü ttikua pä'ü 'chuttädünä̧ iyü ikuinü̧, Juda ütü'kümä̧. 17Isopäi'ünä̧ Juda-mä̧ ujutu i̧sa̧ ji̧na̧'a̧ ja̧'wa̧nü̧ ujututäku ji̧nä̧ ji̧yȩtȩnä̧ aditinü̧. 18Ja̧'wa̧nü̧ ja̧'a̧nä̧, suronä̧ amükuädü iyü ikuäji, ji̧yȩtä̧ pärätänä̧ rȩjȩ ȩmä̧ji̧'ka̧, u da̧ri̧kuä̧nü̧ ma̧'ä̧chü̧ kkä̧'ka̧nä̧ 'toi'omȩnä̧, u̧wä̧si̧yu̧'i̧nä̧ räreächünä̧tä̧ päi'inä̧ku̧, 19ja̧'wa̧nü̧ ja̧'a̧ Jerusarȩ́ ttü̧ja̧'i̧nä̧ ä̧ju̧ku̧, juȩnȩmä̧ o'inä̧tü̧, Haceldamá, jü̧nä̧, ja̧'wa̧nü̧ pä'ümä̧, «ukuoja rȩjȩ» pä'ü päwä, ji̧na̧'a̧ tti̧wȩnȩnä̧mä̧. 20Ja̧'wa̧nü̧ ja̧'a̧, Salmos-mä̧ pä'a:
«¡Ojusodemä̧ juiyodetä kki̧'a̧ pä'ü,
ya̧tȩ'i̧nä̧ ü̧jü̧ juiyünä̧tä̧!
¡Aditäwä ji̧nü̧mä̧ kka̧ra̧tä̧ aditünä̧!».
21«Ja̧'wa̧nü̧ ja̧'a̧ttü̧, Tu̧ru̧wa̧ Jesú kueächüta'anü̧, jua̧u̧tä̧ku̧ ujutuku 'kuäopünä̧ kue'ächä'ijätü pȩnȩ́ pȩjä̧tü̧ttü̧, 22Tu̧ru̧wa̧rü̧ Ju̧a̧ bautizo jȩi̧no̧mȩttü̧ kkä̧mä̧dü̧, mo̧ro̧jä̧ra̧'a̧ i̧wi̧no̧mȩbü päi'ünä̧, ujutuku kue'ächä'ijätüttü, ya̧tȩrü̧ tȩma̧ pä'ü ja̧'a̧; Jesú ttoächinü̧ wȩnȩ ujutuku ji̧ä̧wä̧kua̧rü̧.» 23Ja̧'wa̧nü̧ pä̧i̧yä̧u̧ ta̧ju̧ru̧ pätetü kku̧ni̧nä̧tü̧: José-rü, Barsabás pä'ükkä̧nü̧, Justo pättä'ijäkuru'i̧nä̧ ja̧'wa̧ta̧nü̧ Matía-rü'i̧nä̧, jü̧nä̧. 24Ja̧'wa̧nü̧ jȩpü̧, pa̧'a̧nü̧ Dio-rü ukuokuinä̧tü̧: «Uku Chu̧ru̧wa̧mä̧, o'katoi'ünä̧ tta̧mi̧so'ki wo̧jua̧jä̧ ja̧'wa̧nü̧ ja̧'a̧ttü̧ pitü ta̧ju̧ttü̧ kuȩmä̧ku̧ru̧ i̧jȩpi̧tü̧, 25pi̧yȩ kuaditäwä, apótore jäwänä̧, Juda i̧'cha̧ päina̧'a̧ 'chä̧nü̧, aditino̧mȩ o'komȩ aditäkua'anü̧.» 26Ja̧'wa̧nü̧ pä'ü, «suerte» pättünä̧ jȩpü̧ tottomȩnä̧, Matía-rü ma̧i̧na̧'a̧; Ja̧'wa̧nü̧ jȩpü̧ o̧cȩnü̧ wotü apótore-ku ppächi'ünä̧ dottädinä̧kü̧.
Currently Selected:
Hechos 1: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
