San Juan 18
18
Jesú-ru 'chuttädinü̧ wȩnȩ
(Mt 26.47-56; Mc 14.43-50; Lc 22.47-53)
1Pi̧yȩ pä'ü kä'ädü u̧wo̧juȩtä̧u̧ku rä'opächü 'chi̧nü̧, Cedrón aje ji̧jä̧ku̧nä̧ ja̧'a̧ku̧. Juȩnȩ kuäwä kka̧kuo̧mȩ, Jesú-mä̧ u̧wo̧juȩtä̧u̧ku do'ächinü̧. 2Ja̧'wa̧nü̧ ja̧'a̧, Jesú-ru iyü iku, Juda-mä̧ juȩnȩ wo̧jui̧nü̧, kko̧ro̧nü̧ jü̧ta̧'a̧nü̧ juȩnȩtä̧ u̧wo̧juȩtä̧u̧ku ü̧ka̧ka̧kuä̧'i̧ja̧'a̧ttü̧. 3Ja̧'wa̧nü̧ ja̧'a̧ttü̧, Juda-mä̧, sacerdote tturuwotü wȩttä̧jä̧u̧ su̧ro̧do̧u̧ku̧ ja̧'wa̧ta̧nü̧ fariseo wotü wȩttä̧jä̧u̧ su̧ro̧do̧u̧ku̧ o'ipächäji̧'ka̧ rȩbȩwi̧pi̧nü̧, dauwiyäku, ttitejäworiyäku, ttürowä'äku, jü̧nä̧. 4Ja̧'wa̧nü̧ ja̧'a̧, Jesú-mä̧ 'kuäopäkuȩmä̧ o'kajuiyünä̧ u̧wo̧jua̧'a̧ttü̧, 'chä̧wi̧'ü̧ päinä̧u̧:
—¿Dirü kusätukua'a jä̧ttü̧?
5Jä̧ȩpä̧u̧ ädätinä̧tü̧:
Jesú, Nazare ttü̧ja̧sa̧rü̧.
Pättiyäku, Jesú pä'inü̧:
—Ttütäsä.
Ji̧nä̧so iyü iku, Juda-mä̧ juätütäku kki̧nü̧. 6Ja̧'wa̧nü̧ ja̧'a̧, Jesú, «ttütäsä» päomȩnä̧, tto'ka'aku pä'i'ü, rȩjȩku̧ 'po'ächinä̧tü̧. 7Pä'äjita'anü̧, Jesú jä'epü ä̧ju̧kui̧nä̧u̧:
—¿Dírü kusätukua'ajä̧ttü̧?
Päomȩnä̧, ädätinä̧tü̧:
—Jesú, Nazare ttü̧ja̧sa̧rü̧.
8Jesú-mä̧ pä'äjita'anü̧, päinä̧u̧:
—Täkü, Ttütäsä, pädäjä̧u̧jä̧; ttürü kusätukuttümä̧, pitürümä̧ tti̧wa̧'a̧nä̧ ja̧'a̧tä̧ topätukui.
9Pi̧yȩmä̧, chutä Jesú pa̧'a̧nü̧ jiäwinü̧ jo̧mȩnü̧ päia'a ji̧na̧'a̧: «Ttürü kuiyinä̧u̧ttü̧mä̧ ya̧tȩrü̧'i̧nä̧ to'e'ächokü pinü̧sä̧», jü̧nä̧. 10Ja̧'wa̧nü̧ päi'omȩnä̧ Simón Peduru-mä̧ ukurodä 'cho'äwo'ü, Maco pä'ü mi̧kua̧, sacerdote ttu̧ru̧wa̧ u̧mü̧wä̧ya̧rü̧ ä̧ja̧ u̧wo̧jua̧'a̧ku̧nä̧ i̧sä̧ja̧ 'kui'opü ikuinü̧. 11Ja̧'wa̧nü̧ jȩi̧yä̧ku̧, Jesú-mä̧ Peduru-rü pä'inü̧:
—Kururodämä̧, ȩkä̧jo̧mȩ ȩni̧: Poya reoya chawa pä'ü, Chä'o iya'amä̧ ¿Chau juiyü'anü̧ ja̧'a̧ tä̧jí̧?
Sacerdote ttu̧ru̧wa̧ ä'ka jo̧mȩ Jesú-ru ȩpi̧nä̧tü̧
(Mt 26.57-58; Mc 14.53-54; Lc 22.54)
12Ja̧'wa̧nü̧ ja̧'a̧, su̧ro̧do̧u̧mä̧, ttu̧ru̧wa̧ku̧ ja̧'wa̧ta̧nü̧ judío ttu̧wo̧juȩtä̧u̧ su̧ro̧do̧u̧'i̧nä̧ Jesú-ru 'chu'ädo'ü nü̧'kinä̧tü̧. 13Ja̧'wa̧nü̧ ja̧'a̧, ä̧kuo̧mȩnä̧mä̧ Aná ojusodera̧'a̧ ttȩpi̧nä̧ku̧, sacerdote-tü̧ ttu̧ru̧wa̧ Caifá i̧mi̧ya̧ jo̧mȩttü̧. Jua̧u̧nü̧ pä̧nä̧ Caifámä̧ sacerdote ttu̧ru̧wa̧ ji̧na̧'a̧. 14Jua̧u̧tä̧, Caifá ji̧na̧'a̧, ttü̧ja̧ tti̧mi̧nä̧ 'korujuoächa pä'ü, ya̧tȩrü̧ rekuä rü̧ja̧'a̧ pä'inü̧mä̧.
Peduru-mä̧, Jesú ütü'kü ä̧ppü̧tä̧ri̧nü̧
(Mt 26.69-70; Mc 14.66-68; Lc 22.55-57)
15Simón Peduru-mä̧, kka̧ra̧ u̧wo̧juȩtä̧u̧ i̧sa̧ku̧ otonä̧ ru'inä̧tü̧ Jesú-ru. Jua̧u̧mä̧ sacerdote ttu̧ru̧wa̧ u̧wo̧juä̧ku̧ ja̧'a̧, Aná ojusode u̧mi̧ isaräku do'ächinü̧ Jesú-ru dottäda'a. 16Ja̧'wa̧nü̧ ja̧'a̧nä̧ Peduru-mä̧ äpate ä'ka kki̧'i̧pi̧nü̧. Ja̧'wa̧nü̧ ji̧yä̧ku̧, u̧wo̧juȩtä̧u̧ i̧sa̧, sacerdote-tü̧ ttu̧ru̧wa̧ u̧wo̧juä̧ku̧ päjimä̧, äpate tta̧'ä̧rä̧ju̧ru̧ ukuokuomȩnä̧, dottädiniyä̧ku̧, Peduru-rümä̧. 17Äpate ä'ka tta̧'ä̧rä̧ju̧mä̧ Peduru-rü jä'epü ä̧ju̧kui̧nä̧ju̧:
—¿Uku'i̧nä̧, jua̧u̧ u̧wo̧juȩtä̧u̧ i̧sa̧mä̧kü̧jä̧?
Päjäku, Peduru-mä̧ ädätinü̧:
—Ttümä̧kü̧sä̧,
18Ja̧'wa̧nü̧ ja̧'a̧, ttu̧wo̧juȩtä̧u̧'i̧nä̧, su̧ro̧do̧u̧'i̧nä̧, di̧ya̧wä̧u̧ okurä ttujuwäja'a tä̧nü̧ kka̧kui̧nä̧tü̧; ja̧'wa̧nü̧ ja̧'a̧ Peduru'i̧nä̧ juätütäku okurä tä̧nü̧ kki̧nü̧.
Sacerdote-tü̧ ttu̧ru̧wa̧ Jesú-ru jä̧'ȩpä̧ri̧nü̧
(Mt 26.59-66; Mc 14.55-64; Lc 22.66-71)
19Sacerdote ttu̧ru̧wa̧mä̧, Jesú-ru jä̧'ȩpä̧rü̧ ä̧ju̧kui̧nü̧, u̧wo̧juȩtä̧'i̧jü̧ tükü'i̧nä̧ ja̧'wa̧ta̧nü̧ u̧wo̧juȩtä̧u̧ ttütü'kü'i̧nä̧, jü̧nä̧, 20Jesú-mä̧ ädätinä̧ku̧:
—Ttümä̧ ttü̧ja̧ o'katoi'ünä̧ ttä'ka jo̧mȩttü̧ ukuokuä'ijüsä; sinagogas odewiyättü'i̧nä̧ ja̧'wa̧ta̧nü̧ Dio-rü ukuokuäkuäwodettü'i̧nä̧, jü̧nä̧; judío ttü̧ka̧ka̧kuä'ijomȩmä̧, yä̧wä̧i̧nä̧mä̧ ukuokuokü pä'ijüsä. 21¿Tta̧'a̧nü̧ pä'ü ttürümä̧ jä̧kuȩpä̧rä̧ku̧sä̧ttü̧? Jidäwa'a ä̧ju̧kuä̧'i̧jä̧tü̧rü̧ jä'epü ä̧ju̧kui̧, däjé jidäwä'ijatü ja̧ pä'ü; juätütä jidäwä'ijü wo̧juä̧tü̧mä̧.
22Ja̧'wa̧nü̧, Jesú ädätiyäku, su̧ro̧do̧u̧ i̧sa̧ ppeyänä̧ kkü̧mä̧, Jesú i'ebabanä̧ ppeopo'ächinü̧, pa̧'a̧nü̧ pä'ünü̧:
—¿Ja̧'wa̧nü̧ kuädäta'a, sacerdote-tü̧ ttu̧ru̧wa̧rü̧mä̧?, pä'ünü̧.
23Päiyäku, Jesú-mä̧ ädätinä̧ku̧:
—Surojü pädäjittümä̧, pi̧yȩ suronä̧ pä'üjä̧ pä'ittü; ja̧'wa̧nü̧ ja̧'a̧nä̧ adiunä̧tä̧ pädäjittümä̧ ¿Tta̧'a̧nü̧ pä'ü kuäkuäjä̧ttü̧ttü̧?
24Ja̧'wa̧nü̧ ja̧'a̧ Aná-mä̧, Jesú-rumä̧ nü̧'kä̧wa̧rü̧tä̧ sacerdote-tü̧ ttu̧ru̧wa̧ Caifá ü̧ja̧'a̧ku̧ we'inü̧.
Peduru-mä̧ pä'äjita'anü̧ Jesú ütü'kü a̧ppü̧tä̧ri̧nü̧
(Mt 26.71-75; Mc 14.69-72; Lc 22.58-62)
25Ja̧'wa̧nü̧ ja̧'a̧nä̧mä̧, Peduru-mä̧ okurä jäyä, tä̧nü̧ ü̧ja̧'a̧ pättinä̧ku̧:
—¿Uku'i̧nä̧ Jesú u̧wo̧juȩtä̧u̧ i̧sa̧mä̧kü̧jä̧?
Pättäku, Peduru-mä̧ ä̧ppü̧ti̧'ü̧ pä'inü̧:
—¡Juätü i̧sa̧mä̧kü̧sä̧!
26Sacerdote-tü̧ ttu̧ru̧wa̧ u̧mü̧wä̧ya̧, Peduru ä̧ja̧ 'kui'opü ikuinä̧ku̧ a̧wa̧ru̧wa̧, jä'epü ä̧ju̧kui̧nä̧ku̧:
—¿Uku'i̧nä̧ Jua̧u̧tä̧ku̧, kuäwä kko̧mȩ ȩmü̧ tti̧wä̧jo̧mȩttü̧ tochäkujä̧kü̧ pädäjä'ä?
27Peduru-mä̧ pä'äjita'anü̧ ä̧ppü̧ti̧'i̧nü̧; ja̧'wa̧nü̧ ä̧ppü̧ti̧'a̧'a̧nä̧ äkärämä̧ ra̧'i̧nü̧.
Pilato ä'ka jo̧mȩ Jesú-ru ttȩpi̧nü̧ wȩnȩ
(Mt 27.1-2,11-14; Mc 15.1-5; Lc 23.1-5)
28Ja̧'wa̧nü̧ ja̧'a̧, mo̧ro̧juoa'aku juätümä̧ Caifá ojusodettü ru̧wa̧ gobernador ojusodeku Jesú-ru ȩpi̧nä̧tü̧. Ja̧'wa̧nü̧ ja̧'a̧nä̧, judío tturuwotümä̧ juodenä̧ dodepokotü pinä̧tü̧, Pacua ttukuäkua'a ja̧'a̧, surojuotächä pä'ü. 29Ja̧'wa̧nü̧ ja̧'a̧, Pilato-mä̧ juätü ttü̧jo̧mȩku̧ rä'o'i'ü päinä̧u̧.
—¿Däjé surojü jȩä̧ja̧'a̧, piderümä̧ kui'chächäjätukuättü̧?
30Päomȩnä̧, ttädätinä̧ku̧: Suronä̧ jȩpo̧kü̧ jü̧ttü̧mä̧, ti'chächokoku pajü.
31Pättiyäku Pilato-mä̧ päinä̧u̧:
—Ukututä jäwä, weäwä wȩnȩ wea'aku jȩpä̧tu̧kui̧rü̧.
Päomȩnä̧ judío-mä̧ pä'inä̧tü̧:
—Ujutumä̧ ya̧tȩrü̧'i̧nä̧ kuä'ü tikua pä'ümä̧ weäwi'o̧ko̧u̧jä̧.
32Pättomȩnä̧; Jesú-mä̧, Churutä kuä'ü tti̧kuä̧kuȩ ukuokuinü̧, jo̧mȩnü̧ päia'a ji̧na̧'a̧. 33Ja̧'wa̧nü̧ ja̧'a̧ jakuänä̧, Pilato-mä̧ pä'äjita'anü̧ ruwode u̧mi̧ isaränä̧ ichi'ü, Jesú-ru wopo'ü pä'inü̧.
—¿Ukutäjä̧, judío ttu̧ru̧wa̧ rey-mä̧?
34Jäepäku, Jesú-mä̧ pä'inü̧:
—¿Jua̧u̧mä̧ ukutä amükuädü päkua'a tä̧jí̧ ja̧'wa̧nü̧ jü̧ juiyü'i̧nä̧ kkorotü pättiyäku päkua'a tä̧jí̧?
35Päomȩnä̧, Pilato-mä̧ pä'inü̧:
—¿Ttümä̧ judío i̧sa̧mä̧kü̧sä̧? Ukutä kuidepiyu ttü̧ja̧tä̧, sacerdote tturuwotütä ttürü iyü ttikuäjäku̧jä̧.
¿Däjé jȩ'kuä̧jä̧ttü̧? 36Jesú-mä̧ ädätinü̧:
—Ttü wedü churuwomä̧ pi̧jä̧ jäwämä̧kü̧; ttü wedü pi̧jä̧ jäwä jü̧ttü̧mä̧, chumüwäyotü rowäwajatü, judío-rü iyü ttiku juiyattü pä'ü; ja̧'wa̧nü̧ ja̧'a̧nä̧ ttü churuwo wedümä̧ pi̧jä̧ jäwämä̧kü̧.
37Päomȩnä̧ Pilato-mä̧ pä'inü̧:
—¿Jua̧u̧nu̧mä̧, ukutäjä̧ judío ttu̧ru̧wa̧ rey-mä̧?
Jesú ädätinü̧:
—Ukutäjä̧, ttürü judío ttu̧ru̧wa̧ rey-jä̧ pä'ümä̧. Ttümä̧ pi̧yȩtä̧ ä̧tȩkuä̧nä̧ uwäpächü ichinü̧sä̧ pi̧jä̧ra̧'a̧mä̧, jueü wȩnȩ jidäwa pä'ü. O'katoi'ünä̧ jueü wȩnȩ isotümä̧, ttü chi̧wȩnȩ ä̧ju̧kuä̧tü̧. 38Päiyäku, Pilato-mä̧ pä'inü̧;
—¿Däjéjä̧ttü̧ jueü wȩnȩmä̧? pä'ü kä'ädü, pä'äjita'anü̧ rä'o'ü judío-rü pä'inü̧: Ttümä̧ piderümä̧, suronä̧ jȩä̧ji̧mä̧ chü̧'o̧kui̧'ü̧ juiyünä̧ jä̧ku̧sä̧. 39Ja̧'wa̧nü̧ ja̧'a̧nä̧, ukutumä̧ Pacua pä'kärinä̧mä̧, kärenä̧ pȩjä̧tü̧ttü̧ ya̧tȩrü̧ rä'epü ttikua pä'ä'ijä̧tü̧jä̧: Ja̧'wa̧nü̧ ja̧'a̧ttü̧ ¿Judío ttu̧ru̧wa̧ rey-rü rä'epü chikua pä'ätüjä̧?
40Päomȩnä̧, o'katoi'ünä̧ pä'äjita'anü̧ pä̧i̧ku̧nä̧ wopi'inä̧tü̧:
—¡Jua̧u̧ru̧mä̧kü̧! ¡Barrabá-rütä rä'epü ikuí!, jü̧nä̧.
Jua̧u̧ Barabá-mä̧, nä̧u̧kuä̧rä̧kuä̧wä̧ i̧sa̧ pinü̧.
Currently Selected:
San Juan 18: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
