San Juan 20
20
Jesú ttoächinü̧ wȩnȩ
(Mt 28.1-10; Mc 16.1-8; Lc 24.1-12)
1Semana-ttü̧ ä̧kuo̧mȩnä̧ mo̧ro̧, María Madarena-mä̧ mo̧ro̧ päia'a, ji̧nä̧ yo̧a̧'a̧nä̧ wa'are idorära̧'a̧ 'chä̧jä̧'kaju tojomȩnä̧; ä'koju mü̧ȩkuäjäyumä̧ pporädü ikuäwa'atä topinä̧ju̧. 2Ja̧'wa̧nü̧ ja̧'a̧ topo'ü Simón Peduru-rü'i̧nä̧ ja̧'wa̧ta̧nü̧ kka̧ra̧, Jesú u̧wo̧juȩtä̧u̧ttü̧ rü̧ȩnä̧ repeä'ijäkuru'i̧nä̧ 'chä̧wi̧'ü̧ jopächü 'chä̧wi̧'ü̧ pä'inä̧ju̧:
—¡Ttu̧ru̧wa̧rü̧mä̧, wa'are idorättümä̧ ȩmi̧pä̧jä̧tü̧ päjätü ja̧'wa̧nü̧ ja̧'a̧ ttütäjomȩmä̧ tieruwünä̧tä̧!
3Päjiyä̧u̧, Peduru-mä̧ ja̧'wa̧ta̧nü̧ kka̧ra̧ u̧mü̧wä̧ya̧ pä'ijüku, rä'opächü wa'are idorära̧'a̧ku̧ jopächü 'chi̧nä̧tü̧. 4Ta̧ju̧kuäyotü yo̧mȩtȩnä̧ jotta'anä̧, kka̧ra̧mä̧ Peduru-rü'i̧nä̧ 'kuä'oü jopächü, wa'are idorära̧'a̧ ä̧kuo̧mȩnä̧ 'chä̧wi̧'i̧nü̧. 5Ja̧'wa̧nü̧ ja̧'a̧, do'ächi'ünä̧nü̧ toomȩnä̧, juä'opü ttütäjä̧ta̧tä̧ pa̧'a̧nä̧, jakuäkumä̧ do'ächi'okü pinü̧. 6Jua̧u̧tä̧ o'ka'anä̧, Simón Peduru-mä̧ ichi'opo'ü, wa'are idorä jakuä do'ächi'ü, toomȩnä̧, juättopä̧jä̧ta̧mä̧ juȩnȩtä̧ pa̧'a̧ topinü̧; 7Ja̧'wa̧ta̧nü̧, Jesú Unä̧ juäokuäjä̧ta̧mä̧, churutä juättopäjä̧ta̧ttü̧'i̧nä̧, i̧mi̧ku̧nä̧ juä'opü rütäwa'a pi̧na̧'a̧. 8Ja̧'wa̧nü̧ doächächiyäku, kka̧ra̧ u̧mü̧wä̧ya̧ pä'ijü, ä̧kuo̧mȩnä̧ wa'are idorära̧'a̧ ichi'äji päjimä̧, do'ächi'ü topü esetinü̧. 9Ja̧'wa̧nü̧ ja̧'a̧nä̧, wȩyu̧kuä̧ wȩnȩnä̧, Jua̧u̧mä̧ wa'arettü ttoächa pä'ü rekuä rü̧ja̧'a̧, pä'ijomȩmä̧ ttu̧wo̧jui̧po̧ka̧'a̧ jä̧'i̧ja̧'a̧ ji̧na̧'a̧. 10Jua̧u̧nü̧ o'ka'a, Jesú u̧wo̧juȩtä̧u̧mä̧ ttojusodera̧'a̧tä̧ ppa̧'a̧chi̧nä̧tü̧.
María Madarena-rü̧ Jesú i̧jȩkui̧nü̧ wȩnȩ
(Mc 16.9-11)
11Ja̧'wa̧nü̧ ja̧'a̧nä̧, María-mä̧ wa'are idorä u̧mi̧nä̧ ajuäu kki̧'i̧pi̧nä̧ju̧. Ja̧'wa̧nü̧ äjuäu kkä̧nü̧, jakuäjuku tojomȩnä̧, 12Á̧gȩrȩ ta̧ju̧ru̧ topinä̧ju̧ ttü̧'ka̧tä̧wä̧ti̧yu̧ te'ätürü, Jesú o'ko jäwä ttütäjomȩ ttü̧'ȩja̧'a̧; ya̧tȩmä̧ U jä̧ja̧'a̧ku̧nä̧ ja̧'wa̧ta̧nü̧ kka̧ra̧mä̧ ü̧jä̧pi̧yä̧ jä̧ja̧'a̧ku̧nä̧, jü̧nä̧. 13Juätü jättepinä̧kua̧:
—Isaju, ¿Tta̧'a̧nü̧ pä'ü kuajuäwa'ajä̧ttü̧? Pättäkua, pä'inä̧ju̧:
—Chu̧ru̧wa̧rü̧ ȩmi̧pä̧jä̧'kotü, ttütäjomȩ'i̧nä̧ jerupü ajuäwäjusä.
14Ja̧'wa̧nü̧ pä'ü kkä̧nü̧, kküjärächi'omȩnä̧ Jesú-ru juȩnȩtä̧ ü̧ja̧'a̧ toja'anä̧; jua̧u̧ pä'ümä̧ jerupinä̧ju̧. 15Jesú-mä̧ jä'epü ä̧ju̧kui̧nä̧kua̧:
—Isaju, ¿Tta̧'a̧nü̧ pä'ü kuajuäwa'ajä̧ttü̧? ¿Dírü kusa'ajä̧ttü̧? pä'ü jäepäkua,
Juȩnȩtä̧ kuäwä tta̧wä̧rä̧kuä̧wä̧ i̧sa̧kü̧ pä'ü, pä'inä̧ju̧:
—Chu̧ru̧wa̧, uku kuȩmi̧pä̧ji̧ttü̧mä̧, kutäjomȩ ji'äwittü, chȩmä̧ja̧rü̧.
16Päjiyäku, Jesú-mä̧ päinä̧kua̧:
—¡María! Päkua, kkärächi'ü, hebreo wȩnȩnä̧ pä'inä̧ju̧:
—¡Raboni! pä'ümä̧ «Wo̧juȩkuä̧ i̧sa̧ pä'ü päwä ja̧'a̧.»
17Jesú-mä̧ päinä̧kua̧:
—¡Mȩkuä̧ttü̧!, ji̧nä̧ Chä'o ü̧ja̧'a̧mä̧ 'chä̧wi̧'o̧kü̧sä̧; ja̧'wa̧nü̧ ja̧'a̧nä̧ chawaruwä chi̧jä̧wa̧tü̧rü̧ pa̧'a̧nü̧ jikuäwajä̧: Ttümä̧ Chä'o Dio, ukutu'i̧nä̧ Kuä'otuku Dio ü̧ja̧'a̧ 'chä̧nü̧ kä'ekuächüsä.
18Ja̧'wa̧nü̧ ja̧'a̧ttü̧ María Madarena-mä̧ u̧wo̧juȩtä̧u̧ pä'ijätürü 'chä̧wi̧'ü̧ ji'äwinä̧ju̧, jareü wȩnȩ, Tu̧ru̧wa̧rü̧ topäjäjusä pä'ü ja̧'wa̧ta̧nü̧ pa̧'a̧nü̧ ji'äwäji pä'ü.
U̧wo̧juȩtä̧'i̧jä̧ü̧rü̧ Jesú-mä̧ i̧jȩkui̧nü̧
(Mt 28.16-20; Mc 16.14-18; Lc 24.36-49)
19Semana-ttü̧ ä̧kuo̧mȩnä̧ mo̧ro̧, ni̧pä̧cho̧mȩnä̧ u̧wo̧juȩtä̧u̧mä̧, judío-rü ye'eku äpate ppe'tädü ikuäwa'a ka̧ka̧kuä̧jä̧'kotü ttü̧'ȩja̧'a̧, Jesú-mä̧ do'ächi'ü, u̧wo̧juȩtä̧u̧ ttü̧'ȩjo̧mȩ kkä'ko kkä̧mä̧dü̧ te'äu päinä̧u̧:
—¡Wȩnȩ juiyü jäwä ukunä̧ kka̧ pä'üsä!
20Pi̧yȩ pä'ü kä'ädü, u̧mü̧pi̧yä̧'i̧nä̧, i'esubä'i̧nä̧ i̧jȩkui̧nä̧u̧. Ja̧'wa̧nü̧ ja̧'a̧ ttu̧ru̧wa̧rü̧ topü eseäkuäwinä̧tü̧. 21Ja̧'wa̧nü̧ ja̧'a̧, pä'äjita'anü̧ Jesú-mä̧ päinä̧u̧:
—¡Wȩnȩ juiyü jäwä ukutunä̧ kka̧ pä'üsä! Chä'o ttürü weinüta'anü̧, ukuturu'i̧nä̧ ja̧'wa̧ta̧nü̧ we'üsä.
22Ja̧'wa̧ta̧nü̧, a̧mi̧yuppa ppü'ü juätürü pä'inü̧:
—Epíritu Sa̧tu̧rü̧ ȩmä̧tu̧kui̧, ja̧já̧. 23Suronä̧ jȩtto̧mȩnä̧, mikuä pä'ü jȩ'kuä̧tu̧ku̧ juiyüttü̧mä̧, ukuturu'i̧nä̧ mikuä jo̧ka̧'a̧ jä̧kua̧'a̧; ja̧'wa̧nü̧ ja̧'a̧nä̧ surojü jȩtto̧mȩnä̧ mikuä jȩpü̧rü̧mä̧, churutä'i̧nä̧, mikuä jȩä̧kuä̧wä̧kua̧'a̧.
Tomá esetokü ji̧nü̧ wȩnȩ
24Ja̧'wa̧nü̧ Jesú i̧jȩkua̧'a̧nä̧, doce-nü̧ wotü u̧wo̧juȩtä̧u̧ pä'ijätüttü, ya̧tȩ Tomá-mä̧, ja̧'a̧tä̧ i̧mi̧mä̧ ta̧ju̧winü̧ pättä'ijäkumä̧ toina̧'a̧. 25Ja̧'wa̧nü̧ ja̧'a̧ kkorotü u̧wo̧juȩtä̧u̧mä̧, jittäwinä̧ku̧:
—Tu̧ru̧wa̧rü̧ topäjätüjä̧, pä'ü jittäwäku, Tomá-mä̧ pä'inü̧:
—U̧mü̧nä̧ jutujui pȩtti̧no̧mȩ topü, chüdo'che rädädädü juiyüttümä̧ ja̧'wa̧ta̧nü̧ i'esubänä̧ chu̧mü̧ rädädü juiyüttümä̧, esetoküsä.
26Kko̧ro̧mü̧ttü̧nü̧ wäbodäkuä mo̧ro̧ o'ka'a, u̧wo̧juȩtä̧u̧mä̧ ka̧ka̧kuä̧jä̧'kotü isode jakuä ttü̧'ȩja̧'a̧ Tomá'i̧nä̧ pi̧nü̧; äpatemä̧ 'kiyünä̧ mü̧ȩkua̧'a̧ ja̧'a̧nä̧, Jesú-mä̧ do'ächi'ü, kkä'ko kkä̧mä̧dü̧, te'äu päinä̧u̧:
—¡Wȩnȩ juiyü jäwä ukutunä̧ kka̧ pä'üsä!
27Pä'ü kä'ädü, Tomá-rü̧ pä'inü̧:
—Kudo'che i'kächü, chu̧mü̧pi̧yä̧ topittü ja̧'wa̧ta̧nü̧ ku̧mü̧ chi'esubänä̧ rä'ädi; kuesetoka'amä̧ jȩ'kuä̧'chä̧ ¡Esetütä, eseti!
28Päku, Tomá-mä̧ ädätinü̧:
—¡Ukumä̧ Chu̧ru̧wa̧jä̧, chü̧ä̧nä̧wa̧ Dio-jä̧!
29Päiyäku Jesú-mä̧ päinä̧ku̧:
—¿Ttürü topütätä esetüjä̧, Tomá? ¡Tottoka'anä̧, esetäjätütä ja̧'a̧ rü̧ȩnä̧ eseäkuäwä po̧kui̧pä̧tü̧mä̧!
¿Tta̧'a̧nü̧ pä'ü i̧wȩyu̧ti̧nü̧jä̧ttü̧ pi̧yȩ wȩyu̧kuä̧ wȩnȩmä̧?
30Jesú-mä̧, u̧wo̧juȩtä̧u̧ ttä'ka jo̧mȩttü̧mä̧ kkoro jȩtto̧kü̧ jueimä̧ rü̧ȩnä̧ jȩi̧na̧'a̧nä̧, jua̧u̧mä̧ wȩyu̧kuo̧ka̧'a̧ pi̧yȩ wȩyu̧kuä̧ wȩnȩnä̧mä̧. 31Ja̧'wa̧nü̧ ja̧'a̧nä̧, pi̧yȩmä̧ wȩyu̧kui̧'i̧na̧'a̧, Jesú-mä̧ Crito ja̧'a̧, Dio I̧tti̧ pä'ü esetü, jua̧u̧ i̧mi̧nä̧ kkä̧kuä̧wä̧ i'ko ttu̧ju̧nä̧ra̧ pä'ü.
Currently Selected:
San Juan 20: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
