San Mateo 4
4
Äwettä Jesú-ru kka̧kuä̧mȩ'ü̧ toinü̧ wȩnȩ
(Mc 1.12-13; Lc 4.1-13)
1Ja̧'wa̧nü̧ jä̧ji̧ o'ka'a Epíritu Sa̧tu̧mä̧, äwettä kka̧kuä̧mü̧ toarü pä'ü, Jesú-ru rȩba̧ dȩ'a̧ra̧'a̧ku̧ o'ipinü̧.#4.1 Pi̧yȩ, Jesú u̧kuȩ ukuoka'a ttü̧ja̧ ta̧ju̧ mo̧ro̧ jo̧mȩnä̧ ü̧ja̧'a̧ äwettä kka̧kuä̧mȩ'ü̧ toinü̧mä̧ wȩnȩkuä̧cha̧'a̧ Irae ttü̧ja̧ Egito-ttü rättopomȩnä̧ 'kuättopinü̧ wȩnȩ (vv. 4-10). Jesú-mä̧ ma̧ä̧cha̧ pä'ü äwettä suronä̧ jȩa̧'a̧nä̧'i̧nä̧ a̧mi̧'ki'ächi'inü̧ wȩnȩ (Mc 1.12-13; Lc 4.1-13; Heb 2.18; 4.15).
2Jua'attümä̧, ttü̧ja̧ ta̧ju̧ mo̧ro̧ jo̧mȩnä̧ ja̧'wa̧ta̧nü̧ ttü̧ja̧ ta̧ju̧ yodó jo̧mȩnä̧ u̧kuȩ ukuoka'a ü̧jä̧ja̧'a̧, ukua ppäirü̧jä̧chi̧'i̧nä̧ku̧.#4.2 cf. Dt 8.2-4. Pi̧yȩ número cuarenta-mä̧ Irae ttü̧ja̧ku̧ Moisé rȩba̧ dȩ'a̧ra̧'a̧ttü̧ 'kuäopinü̧ jiäwa'a. (Ex 24.18; 34.28; Nm 14.33-34; 32.13; 1 R 19.8...). 3Ja̧'wa̧nü̧ ja̧'a̧ Äwettämä̧ kka̧kuä̧mü̧ toa pä'ü, Jesú ü̧jo̧mȩku̧ ichi'ü päinä̧ku̧:
—Isopäi'ünä̧ Dio I̧tti̧ kuttümä̧,#4.3 Jesú bautizo jȩä̧kuä̧wo̧mȩnä̧ Jä'o Dio-mä̧, pidemä̧ Chi̧tti̧ pä'ü ji'äwinü̧ (Mt 27.40). pi̧yȩ inä̧du kuäkuäwä päi'ünä̧ pärowächünä̧, pä'i.
4Päiyäku, Jesú-mä̧ ädätinä̧ku̧:
—Wȩyu̧kuä̧mä̧ pä'ija'a: Ttü̧ja̧sa̧mä̧ u̧kuȩttü̧tä̧mä̧ a̧'kua̧ro̧kü̧ jä̧kua̧, o'kajuiyünä̧ Tü̧ä̧nä̧wa̧ Dio ättü räopüttü'i̧nä̧ a̧'kua̧rä̧kua̧.
5Jua̧u̧nü̧ o'ka'a, Äwettämä̧, Jerusarȩ́#4.5 Jerusarȩ́-mä̧ Judío-rümä̧ ukuo isomȩ ji̧na̧'a̧ ttidepiyu jü̧nä̧ tta̧'kua̧ ttu̧wȩnä̧ro̧mȩ ja̧'a̧ttü̧. Ttü̧ä̧nä̧wa̧ Dio-rü'i̧nä̧ ukuokuäkuäwodewo̧mȩ ja̧'a̧ttü̧. ütawiyära̧'a̧ku̧ o'ipächü, Dio-rü ukuokuäkuäwode ju'toju jo̧mȩku̧ ȩmi̧pü̧ kku̧nä̧ji̧'ka̧, 6päinä̧ku̧:
—Isopäi'ünä̧, Dio I̧tti̧ kuttümä̧ rȩjȩku̧ tü'ächi; wȩyu̧kuä̧ wȩnȩmä̧ pä'ija'a:
«Dio-mä̧ umüwäyotü á̧gȩrȩ-rü wȩä̧kua̧
'chuttädaku pä'ü,
i̧nä̧wänä̧ ppekuokuächü juiyünä̧.»
7Jesú-mä̧ ädätinä̧ku̧:
—Ja̧'wa̧ta̧nü̧ wȩyu̧kuä̧ wȩnȩmä̧ pä'ija'a: «Ku̧ru̧wa̧ Dio-rümä̧ kka̧kuä̧mȩ'ü̧mä̧ to'kuä.»#4.7 Äwettä weü jȩpü̧mä̧ Dio-rü kka̧kuä̧mȩ'ü̧ toäkuäwä ja̧'a̧. (Dt 6.16)
8Pä'äjita'anü̧ Äwettämä̧, mü̧ä̧'ka rü̧ȩnä̧ ju'toju jä'kara̧'a̧ o'ipäji̧'ka̧, pi̧jä̧ ruwäkuiyä uruwo'i̧nä̧, üadiwä'i̧nä̧ i̧jȩpü̧, 9päinä̧ku̧:
—Pi̧yȩ o'kajuiyünä̧ chi̧yä̧kua̧jä̧, ttürü kuiwe'kiyunä̧ ma̧'ä̧mu̧nü̧ kueseuttümä̧.
10Päomȩnä̧, Jesú-mä̧ ädätinä̧ku̧:
—Satanás#4.10 Satanás ya̧pa̧rȩwa̧ ja̧'wa̧ta̧nü̧ to'ija̧'a̧ku̧ päwä i̧sa̧ pä'ü päwä jua̧u̧mä̧ ja̧'wa̧ta̧nü̧ Äwettä pä'ü'i̧nä̧ pä̧'ä̧wa̧ (Mc 1.13; Lc 22.3). täkü täi, wȩyu̧kuä̧ wȩnȩmä̧ pä'a: Ku̧ru̧wa̧ Dio-rütä kuiwe'kiyunä̧ mä̧'ä̧mü̧ esewirü ja̧'wa̧ta̧nü̧ Jua̧u̧ weütätä tukuota pä'ü ja̧'a̧.
11Ja̧'wa̧nü̧ päku, Jesú ü̧jo̧mȩttü̧ äwettämä̧ i̧wi̧'a̧'a̧nä̧, A̧gȩrȩ-tü̧mä̧ ichi'ü ppättädinä̧ku̧.
Jesú aditäwä kkä̧mä̧dü̧ aditinü̧
(Mc 1.14-15; Lc 4.14-15)
12Ju̧a̧-rü̧ kärenä̧#4.12 Ju̧a̧-rü̧ kärenä̧ rütinü̧ Herode Antipa-mä̧ Galirea-nä̧'i̧nä̧, perea-nä̧'i̧nä̧ ru̧wa̧ weü pä̧nä̧ ji̧na̧'a̧ (Mt 14.3; Mc 6.17-18). ttütäja'a ä̧ju̧kuä̧ji̧'ka̧, Jesú-mä̧ Galirea rȩjȩra̧'a̧ku̧ 'chi̧nü̧. 13Nazare-nä̧ ü̧jä̧'i̧ja̧'a̧, juorü rä'opächü#4.13 Nazare-mä̧ Jesú buojuoino̧mȩ ütawiyä ji̧na̧'a̧ (Lc 4.16; Mt 2.23). rü̧ä̧ dubora jäyora wȩjü̧ Cafarnaúm ütawiyänä̧#4.13 Carfanaúm Pi̧yȩ ütawiyänä̧mä̧ rekuätü ttiäre mikuä pä'ü iyä'chinä̧tü̧; Judío-ku, wokotüku 'kä̧u̧nä̧ kka̧kui̧nä̧tü̧ jua̧u̧ ütawiyänä̧mä̧ (Jn 2.12). ü̧ja̧ pä'ü ichinü̧, Zaburó̧, Neftarí pä'ü miku rȩjȩnä̧#4.13 Zaburó̧-mä̧, Neftarí-mä̧: Irae i̧tti̧mü̧ isotü ta̧ju̧ 'tä̧'ȩpinü̧'kotü ttü̧ja̧kui̧no̧mȩ ja̧'a̧ ja̧'wa̧nü̧ mikuinü̧ pi̧yȩmä̧ (Gn 46.14; Ap 7.8).. 14Pi̧yȩmä̧ 'kuäopina̧'a̧, profeta Isaía ukuokuinü̧ jo̧mȩnü̧ päia'attü. Jua̧u̧mä̧ pa̧'a̧nü̧ päina̧'a̧ ji̧na̧'a̧:
15Ä̧ju̧kuä̧tu̧kui̧ Zaburó̧ i̧rȩjä̧,
rü̧ä̧ aje tü'kü kka̧kuä̧tü̧mä̧;
Ä̧ju̧kuä̧tu̧kui̧ Neftarí i̧rȩjä̧ ttü̧ja̧mä̧,
Jordán ajenä̧ kkä̧wa̧ ma̧ä̧cha̧'a̧ku̧nä̧ kka̧kuä̧tü̧mä̧,
Ä̧ju̧kuä̧tu̧kui̧ Galirea rȩjȩnä̧ kka̧kuä̧tü̧mä̧,
Judío pokotü tti̧rȩjä̧nä̧:
16Ttü̧ja̧ yo̧ü̧nä̧ kka̧kui̧nä̧tü̧mä̧
rü̧ȩnä̧ tȩya̧u̧ tottäkuotü;
ji̧yȩtȩ tȩya̧u̧, kkä̧dȩpä̧kua̧'a̧
wa'are isoppanä̧ kka̧kuä̧tü̧rü̧.
17Juorütä kkä̧mä̧dü̧ Jesú-mä̧, ji'äwinü̧: «Dio-ku ppa̧'ä̧chä̧tu̧kui̧, täkü Ru̧wa̧ Dio weümä̧ tü'kü ja̧'a̧,» jü̧nä̧.
Pa̧ja̧kuä̧nü̧ wotü po̧i̧ ȩmä̧tü̧rü̧, Jesú-mä̧ wopinü̧
(Mc 1.16-20; Lc 5.1-11)
18Ja̧'wa̧ta̧nü̧ Jesú-mä̧, Galirea rü̧ä̧ dubora jäyänä̧ i̧'cho̧mȩnä̧, po̧i̧ ȩmä̧wä̧ isotü ta̧ju̧ru̧ topinü̧: André'i̧nä̧, ubüo Simón ja̧'a̧nä̧, Peduru pä'ü ottinä̧ku̧'i̧nä̧ po̧i̧ wo̧ä̧wä̧sa̧ ikuäu kka̧kui̧nä̧tü̧. 19Jesú juätürü pä'inü̧:
—Ttüku ichätukui, ttü̧ja̧rü̧ ȩmä̧wä̧ isotü jü̧nä̧tä̧ juodepätukuaku.
20Ja̧'wa̧nü̧ pä̧u̧, yotäku tti̧ä̧rȩsa̧mä̧ kä'ädi'ü, chutäku 'chi̧nä̧tü̧.
21Jua'a yabonä̧ i̧'chi̧'o̧mȩnä̧, Sa̧ti̧a̧ku̧'i̧nä̧, ü̧jä̧wa̧ Ju̧a̧'i̧nä̧ po̧i̧ wo̧ä̧wä̧sa̧ woi'kanä̧, ti̧'chä̧rü̧ ttü̧'ȩja̧'a̧ po̧kui̧pi̧nü̧, ttä'o Zebedeo-ku. Juätü ta̧ju̧ru̧ Jesú-mä̧ wopinü̧: 22Ja̧'wa̧nü̧ wo̧ä̧u̧, yotäku 'chi̧nä̧tü̧, ttä'otä woi'kanä̧ ü̧ji̧pa̧'a̧nä̧.
Jesú rekuätürü wo̧juȩti̧nü̧
(Lc 6.17-19)
23Jesú-mä̧, Galirea rȩjȩ o'kajuiyünä̧, sinagogas odewiyä jü̧'a̧kuä̧#4.23 Sinagoga Ji̧nä̧ yo̧mȩtȩ ka̧ka̧ku̧ pȩjü̧ ttu̧wo̧jui̧'ode, Dio-rü ra̧ttode ja̧'wa̧nü̧ o'inä̧tü̧ Irae ttü̧ja̧mä̧ (Lc 4.16-21; Hch 13.14-15). kue'ächü wo̧juȩti̧nü̧. Wo̧juȩtü̧mä̧ ji'äwinü̧ jareünä̧ Ru̧wa̧ Dio weü wȩnȩ,#4.23 Ru̧wa̧ Dio weü wȩnȩ: Dio ru̧wa̧ jü̧nä̧ weü pä'ü'i̧nä̧ päwä. ji'äu kkä̧nü̧mä̧ na̧nȩttü̧ttü̧'i̧nä̧, ubara ttu'u usurä ttȩmä̧u̧'i̧nä̧ aditü ikuinü̧. 24Ja̧'wa̧nü̧ ja̧'a̧, Siria rȩjȩ#4.24 Siria rȩjȩmä̧ kko̧ro̧jä̧ ttü̧ja̧ ja̧'a̧nä̧ Roma ttü̧ja̧ wȩtti̧nä̧u̧. o'kajuiyünä̧ Jesú-mä̧ ukuowi'omȩnä̧ o'katoi'ünä̧ kkorottü'i̧nä̧, kkorottü'i̧nä̧ na̧nȩpä̧tü̧rü̧ i'chächinä̧tü̧. Barau na̧nȩpä̧tü̧rü̧'i̧nä̧, epíritu-tu̧ suropätü ttü̧ja̧kuä̧u̧ru̧'i̧nä̧, epilépcia mä̧richei na̧nȩpä̧tü̧rü̧'i̧nä̧ ja̧'wa̧ta̧nü̧ parárisi mä̧richei na̧nȩpä̧tü̧rü̧'i̧nä̧, Jesú-mä̧ aditü ikuinä̧u̧. 25Ja̧'wa̧nü̧ jo̧mȩnä̧, Galirea ttü̧ja̧'i̧nä̧, Decápoli#4.25 Mc 3.7-8. DecápoliPä'ümä̧ To̧mü̧rȩ jäwä jo̧mȩnä̧ ütawiyä o'inä̧tü̧, grecia'i̧nä̧, roma'i̧nä̧ ttü̧ja̧ tti̧wȩnȩ ukuokuinä̧tü̧. ttü̧ja̧'i̧nä̧, Jerusarȩ́ ttü̧ja̧'i̧nä̧, Judea rȩjȩ ttü̧ja̧'i̧nä̧ ja̧'wa̧ta̧nü̧ Jordán ji̧jä̧ku̧nä̧ ttü̧ja̧'i̧nä̧, rekuätü Jesú o'ka'anä̧ 'chi̧nä̧tü̧.
Currently Selected:
San Mateo 4: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
