San Mateo 7
7
Kkorotürü suronä̧ päwokü wȩnȩ
(Lc 6.37-38,41-42)
1Kkorotürümä̧ ja̧'wa̧nü̧ wotüjä̧ päkuätukuä, Dio'i̧nä̧ ukuturu ja̧'wa̧nü̧ wotüjä̧ päü juiyäkua'anü̧. 2Isopäi'ünä̧ Dio-mä̧ kkorotürü ja̧'wa̧nü̧ wotüjä̧ pä'ü jȩ'kuä̧tu̧ku̧ta̧'a̧nü̧, ukuturu'i̧nä̧ ja̧'wa̧ta̧nü̧tä̧ jȩä̧kuä̧u̧jä̧; ja̧'wa̧ta̧nü̧ kkorotü jȩttü̧ pa̧ja̧tȩ'ü̧ jȩ'kuä̧'i̧jä̧tu̧ku̧ta'anü̧, ukuturu'i̧nä̧ ji̧yȩta̧'a̧kuä̧ jȩä̧kua̧. 3¿Tta̧'a̧nü̧ pä'ü kui̧jä̧wa̧ i'ärenä̧ iso'ki ȩka̧'a̧mä̧ to'kua'ajä̧ttü̧ ukutä kui'ärenä̧ ȩkä̧'ka ikui'ka to'kuäkuäwoka'anä̧mä̧? 4Ja̧'wa̧nü̧ ukutä kua̧mü̧nä̧ kui'ärenä̧ ikui'ka ȩka̧'a̧nä̧mä̧ ¿Toku pä'ü kui̧jä̧wa̧rü̧mä̧ kui'ärenä̧ iso'ki ȩkä̧ku̧jä̧ ȩmü̧ chikuaku päkua'ajä̧ttü̧? 5¡Ä'koyättü jȩä̧kuä̧wä̧ isotü̧jä̧! Ä̧kuo̧mȩnä̧mä̧ kua̧mü̧nä̧ kui'ärenä̧ ȩjä̧'ka ikui'ka ȩmä̧u̧ ikui, ȩmä̧u̧ ikuipü'ka̧tä̧ adiu to̧'kuä̧kua̧jä̧ kui̧jä̧wa̧ i'ärenä̧ ȩjo̧'ki ȩmü̧ kuikua pä'ümä̧. 6Dio jäwämä̧ ä̧wi̧ri̧tü̧rü̧mä̧ kuiyätukuä, ukuturutä ttaboiyotü juo'epü yü̧yü̧pü̧ ttikuiyätukuäku ja̧'wa̧ta̧nü̧ ido'ki rü̧ȩnä̧ mikuäwo'kimä̧ ku̧chi̧tü̧ ttä'kamä̧ kuikuätukuä 'kuȩ'ku̧ ttikuiyätukuäku.
Jä'epü, usú, woäkuäwä wȩnȩ
(Lc 11.9-13; 6.31)
7Jä'epätukui, Dio-mä̧ iyäkuäu̧jä̧; usätukui, kusätukumä̧ ku̧'o̧kui̧'ä̧kuo̧tü̧jä̧; äpatenä̧ wopätukui, wo'kuätukuomȩnä̧ bawekuäkua'a. 8Isopäi'ünä̧ jä'epümä̧ ȩmü̧; ja̧'wa̧ta̧nü̧ usumä̧, po̧kui̧pü̧; ja̧'wa̧ta̧nü̧ äpatenä̧ wopürümä̧, bawekuäkua'a. 9¿Ukututtü ya̧tȩ ü̧ja̧'a̧, trigo i̧ri̧si̧ i̧tti̧ jäepomȩnä̧ ido'kitä iyümä̧? 10¿Ja̧'wa̧nü̧ jü̧juiya pä'ü'i̧nä̧ i̧tti̧ po̧i̧sa̧rü̧ jäepüttümä̧ ä̧ka̧rü̧tä̧ iyäkua'a tä̧jí̧? 11Ukutumä̧ suropätü kuätukua'anä̧, kui̧tti̧mü̧tu̧ku̧ru̧mä̧ adiwäjueitätä iyäwä wo̧juä̧tü̧jä̧, ¡Jua̧u̧ttü̧'i̧nä̧ yabonä̧ Kuä'otuku mo̧ro̧jä̧nä̧ kkü̧mä̧ jä'epätürümä̧ adiwäjuei i̧yä̧kua̧! 12Jua̧u̧ jü̧ta̧'a̧nü̧, ukuturu o'kajuiyünä̧ kkorotü ttü̧ja̧ jȩttä̧tu̧kua̧ku̧ päkuä'ijätukumä̧ juätürü'i̧nä̧ ji̧yȩta̧'a̧kuä̧ jȩpä̧tu̧kui̧; jua'amä̧ jua̧u̧ ja̧'a̧ weäwä wȩnȩmä̧ ja̧'wa̧ta̧nü̧ profeta ttukuokuinü̧mä̧.
Äpate 'ko̧a̧te wȩnȩ
(Lc 13.24)
13Äpate 'ko̧a̧tenä̧ dodepätukui. Isopäi'ünä̧ äpate käweate'i̧nä̧, mä̧nä̧ kä̧wȩä̧mä̧'i̧nä̧ toe'ächäkuäwa'atä ȩpa̧'a̧ ja̧'wa̧ta̧nü̧ jua̧u̧nä̧ dodepätümä̧ rekuätü ja̧'a̧. 14Ja̧'wa̧nü̧ ja̧'a̧nä̧ äpate 'ko̧a̧temä̧ ja̧'wa̧ta̧nü̧ mä̧nä̧ a̧'u̧kuä̧mä̧mä̧ a̧'kua̧rä̧kuä̧wä̧ra̧'a̧tä̧ ȩpa̧'a̧; jua̧u̧ po̧kui̧pä̧tü̧mä̧ a̧'u̧ku̧nä̧tä̧ wotü ja̧'a̧.
Jȩttü̧ttü̧ wo̧juä̧wa̧'a̧
(Lc 6.43-44)
15Profeta-tü̧ 'kua̧rü̧nä̧ jȩpä̧tü̧rü̧ tta̧'a̧rä̧kuä̧wä̧tu̧kui̧, oweja-tü̧ 'kua̧rü̧nä̧ 'ka̧tä̧wi̧'ü̧ ku̧jä̧tu̧kua̧'a̧ku̧ ichätürü, juätümä̧ jakuänä̧mä̧ ä̧wi̧ri̧tü̧ pä̧i̧kuä̧tü̧tä̧ wotü. 16Jȩttü̧ttü̧ topü ku̧wo̧juä̧tu̧kua̧jä̧, ¿Ditäjä̧ttü̧ soäkättü uwa ocha 'to'ümä̧ ja̧'wa̧nü̧ jü̧ juiyüttü'i̧nä̧ wä̧rȩcha̧ päjäkättü higo ka̧ka̧tü̧mä̧? 17Ja̧'wa̧nü̧ jü̧ta̧'a̧nü̧ o'kajuiyünä̧ dauwiyä adiwäjueimä̧, u̧wä̧ju̧ adiutä wȩjü̧ oi ja̧'a̧, ja̧'wa̧nü̧ ja̧'a̧nä̧ dau suräjäimä̧ u̧wä̧ju̧'i̧nä̧ surojütä wȩjäi. 18Dau adiwäjuei isäimä̧ u̧wä̧ju̧ surojümä̧ wȩjo̧koi ja̧'wa̧ta̧nü̧ dau suräjuei isäimä̧ u̧wä̧ju̧ adiwäjueimä̧ wȩjo̧koi. 19O'kajuiyünä̧ dauwiyä u̧wä̧ju̧ adiwäjuei wȩjo̧kü̧ oimä̧, kku̧'u̧ iku okuränä̧ kkuwü ikuäwä ja̧'a̧. 20Ja̧'wa̧nü̧ ja̧'a̧ttü̧ ukutumä̧ jȩttü̧ttü̧ topü ku̧wo̧juä̧kuo̧tü̧jä̧.
Jȩtta̧'a̧nä̧ doächäkuäwoka'a jä̧kua̧'a̧
(Lc 13.25-27)
21O'katoi'ünä̧ chu̧ru̧wa̧, chu̧ru̧wa̧ pätta'anä̧ o'katoi'ünä̧mä̧ mo̧ro̧jä̧ jäwä weomȩmä̧ do'ächokotü ttäkuotü, suro chä'o Dio mo̧ro̧jä̧nä̧ kkü̧ üjü'komȩnä̧ jȩpä̧tü̧tä̧ jä̧kua̧'a̧ do'ächätümä̧. 22Ji̧yȩnü̧ mo̧ro̧ rekuätü ttürü pättäkuotü: Chu̧ru̧wa̧, chu̧ru̧wa̧ kui̧mi̧nä̧ profeta 'kua̧rü̧nä̧ ji'äwinä̧tü̧jä̧ kui̧wȩnȩmä̧ ja̧'wa̧ta̧nü̧ kui̧mi̧nä̧mä̧ epíritu-tu̧ suropätürü'i̧nä̧ rä'epü iku kkä̧nü̧ jȩtto̧kü̧ juei'i̧nä̧ rü̧ȩnä̧ jȩpi̧nä̧tü̧jä̧. 23Ja̧'wa̧nü̧ pättomȩnä̧ chä̧dä̧tä̧kuä̧u̧: Yoriso chu̧wo̧juo̧ko̧u̧ pinä̧tü̧jä̧; ¡surojütä jȩä̧kuä̧wä̧ isotümä̧, ttüttümä̧ 'kȩ'i̧pä̧chä̧tu̧kui̧!
Ttojusode ttu̧wȩni̧nü̧ wȩnȩ
(Mc 1.22; Lc 6.47-49)
24Ja̧'wa̧nü̧ ja̧'a̧ttü̧, yotukunä̧ ttü pädü ä̧ju̧ku̧ jȩpü̧mä̧, ya̧tȩ wo̧juȩku̧nä̧ amükuädü i̧nä̧wänä̧ ojusode aditinü̧'a̧nü̧ wa̧, 25Ajiya ma̧ä̧mo̧mȩnä̧, ajewiyä suwädi'a'attü rü̧ȩnä̧ kkä̧rü̧'ko̧wü̧ isodenä̧ düa'anä̧ ma̧ä̧chokode ji̧no̧de; jua'amä̧ i̧nä̧wänä̧ 'chu̧ä̧rü̧nä̧ adikua'attü̧. 26Ja̧'wa̧nü̧ ja̧'a̧nä̧ yotukunä̧ ttü pädü ä̧ju̧ku̧ ukuotokümä̧, ya̧tȩ wo̧juȩku̧nä̧ amükuädokü ojusodemä̧ rȩba̧nä̧ aditinü̧'a̧nü̧ wa̧. 27Ajiya ma̧ä̧mo̧mȩnä̧, ajewiyä suwädi'a'attü rü̧ȩnä̧ kkä̧rü̧'ko̧wü̧ isodenä̧ düomȩnä̧, rü̧ȩnä̧tä̧ pparächi'inode. 28Ja̧'wa̧nü̧ ja̧'a̧ pi̧yȩ, Jesú ji'äu kädomȩnä̧, ttü̧ja̧mä̧ isoó ja̧'wa̧nü̧ wo̧juȩtü̧dí̧ pä'inä̧tü̧. 29Jua'amä̧ ukuo kkü̧nä̧ u̧wo̧juȩto̧mȩnä̧, tturuwotü weäwä wȩnȩ wo̧juȩtä̧tü̧'i̧nä̧ ttu̧wo̧juȩto̧ko̧mȩ jä̧'i̧jo̧mȩnä̧.
Currently Selected:
San Mateo 7: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
