Лука 1
1
1-3Кельгома Феофил, Шкаень надияфтоматне пяшкодсть минь ётксонк и ламотне ушедсть сёрмадома тянь колга сятнень валснон коряс, конат ушетксстокиге няезь семботь тянь эсь сельмосост и конат арасть покодикс Шкаень валти, и пачфтезь тейнек семботь мезе ульсь. Сяс монга сань мяльс, ушетксста сявомок, анцяйняньбес тонафнемадон меле, азондомс тейть семботь тянь мельцек-мельцек. 4Тя сядонга кемокстасы эсот ся тонафтомать видешинц, конанди тон тонафтфат.
Инголькиге азф кулясь Иоанн Кстиндайть шачеманц колга
5Иродонь, Иудеянь оцязорть пингста эрясь Захария озксвятись, кона сувсесь Авиять озксвятиень кярьмазонцты#1:5 Шкаень кудса озксвятихнень явонкшнезь комсь нилие кярьмазга (тяса: смена), конатнень ёткса Авияннесь ульсь кафксоцесь. Авия ульсь Аарононь уноконь-уноконзон эзда.. Сонь ульсь рьвац Елисавета, сявок Аарононь юромстоль. 6Синь кафцьке видексшинь ломаттельхть Шкайть инголе, седишкава пяшкотькшнезь Азорть сембе кошардоманзон и мярьгоманзон. 7Синь ашельхть идьсна, сяс мес Елисавета ульсь аф шачфтовикс, и кафцьке ни сиретольхть.
8Весть, мзярда сась пинге Авиянь кярьмазонцты покодемс Шкаень кудса и Захария покодсь озксвятиень тевса Шкайть инголе, лиссь тяфта: 9жерьбань вельде, кода фалу и явондовсть тефне озксвятихнень ёткова, Захариянди сатсь сувамс Азорть кудс качакофтома#1:9 качакофтома – каждение; нолямс танцти шине качам. 10Качакофтомань пингть ломанень пуромкссь озондсь Шкаень кудть пирьфсонза.
11Эста качакофтомань алтарть види ширеса Захариянди эвондась Азорть ангелоц. 12Захария няемстонза абондсь и пяк эводсь. 13Ангелсь мярьгсь тейнза: «Тят пеле, Захария, кульф тонь озондомаце: Елисавета рьвяце шачфты тейть цёра, и лемдьсак сонь – Иоанн. 14Сон канды тейть оцюдонга оцю кенярдема. Ламотне кенярдихть сонь шачеманцты, 15сяс мес сон ули пяк оцю Азорть инголе. Сон аф кармай симома винада и лия иретьфтида и тядянц потмостокиге пяшкоди Иняру Ваймопожфта. 16Израилень ломаттнень эзда ламотнень шарфтсыне Азорти, синь Шкайснонды. 17Сон сай Азорда инголи стамка ваймопожфса и стамка вийса, кодамса сашендсь Илия. Сонь мялец алятнень седиснон шарфтомс эсь идьснонды и аф кулхцодыхнень кошардомс арьсема видексшинь ломаттнень лаца: аральхть Азорти анок ломаньтналкс».
18Захария мярьгсь ангелти: «Кода содаса – видет тонь валхне али аф? Мон сирян, рьвязевок эряфкшу». 19Ангелсь каршезонза мярьгсь: «Мон Шкайть инголе ащи Гавриилсь. Мон кучфан мархтот корхтама и тя Пара кулять пачфтема. 20Ся, мезе тейть азонь, пяшкоди эсь пингстонза, но валненди аф кемаманкса илядат кяльфтома-валфтома и аф корхтават ся шить самс, мзярс сембось тя аф тиеви».
21Тя ёткть ломаттне учендозь Захариянь и дивандакшнесть, мес сон куватьс кирневи Шкаень кудса. 22Лисемда меле Захария ашезь корхтав мархтост; ломаттне шарьхкодсть: сон няйсь Шкаень кудса няйфкс#1:22 няйфкс – видение. Захария няфнесь тейст кядьса-сурса и иляткшнесь кяльфтома-валфтома.
23Мзярда аделавсть озксвятемань шинза, сон мрдась эсь кудозонза. 24Курокста Елисавета рьвац пекиясь, и вете кофт ашезь лисенде ломань ёткс. Сон корхнесь: 25«Тянь Шкайсь тиезе тейне! Варжакстсь лангозон и сявозе лангстон ломанень сялдомать».
Инголькиге азф кулясь Иисусонь шачеманц колга
26Елисаветань пекиямда меле котоце ковть лангс Шкайсь кучезе Гавриил ангелть Галилеянь Назарет ошу, 27Мариянди, аляса апак токак стирти, конань ладязь максомс рьвакс Давидонь юромста Иосифонди. 28Ангелсь сась тейнза и мярьгсь: «Шумбрат! Тейть максовсь Шкайть эзда пароказне#1:28 пароказне – благодать! Азорсь мархтот! Тон бславафат аватнень ёткса». 29Мариянь пяк абонтфтозь валонза, арьсезевсь: мезень колга корхтай тя шумбракстомась. 30Но ангелсь мярьгсь тейнза: «Тят пеле, Мария, Шкайсь макссь тейть пароказне; 31вов пекият и шачфтат Цёра, лемдьсак Иисус. 32Сон ули пяк оцю и лемдеви Инь Вярденнети Цёракс. Азор Шкайсь макссы Тейнза Давид атянь-атянц оцязоронь озама вастонц. 33Сон кармай оцязорондама Иаковонь юромонц, Израилень ломаньтналть лангса пефтома пингс, и Сонь оцязорондаманцты аф ули пе». 34Мария мярьгсь ангелти: «Кода тя ули, мзярда мон мирдьта аф содан?» 35Ангелсь каршезонза мярьгсь: «Иняру Ваймопожфсь сай лангозт, Инь Вярденнеть виец вельхтятанза тонь; сяс шачи Идняське ули иняру и лемдеви Шкаень Цёракс. 36Вов Елисаветавок, эсь юромонь ломаньце, тяни сиредембяльхть пекиясь, канни цёраня. Сон ни котоце ковть лангса, а лемневсь аф шачфтовикс! 37Шкайти аш аф тиеви тев». 38Эста Мария мярьгсь: «Мон Азорть урецан; улеза сембось стане, кода мярьготь». И ангелсь тусь маластонза.
Мария моли Елисаветань варжама
39Мзярошка шинь ётазь, Мария тусь ошу, кона ащесь панда лангонь Иудеяса. 40Сон сувась Захариянь кудс и шумбракстсь Елисаветань мархта. 41Мзярда Елисавета кулезе Мариянь шумбракстоманц, потмосонза шерьхкозевсь иднясь; и Елисавета пяшкодсь Иняру Ваймопожфта. 42Кайги вайгяльхть сон ювадсь: «Бславафат тон сембе аватнень ёткса, бславаф Идняське, конань каннесак потмосот! 43Киян мон тяфтамсь, тейне сась Азорозень тядяц? 44Ся ёткть, мзярда пачкодсь пилезон вайгяльце, потмосон кенярдезь шерьхкозевсь иднясь. 45Павазуват тон, кемайсь, сяс мес пяшкоди ся, мезе азфоль тейть Азорть пяльде».
Мария морай шнамань мор Шкайти
46Мария мярьгсь:
«Седиезе шнасы Азорть,
47ваймозе кенярди Шкайть, монь Идиезень инкса,
48вдь Сон варжакстсь монь лангозон,
Эсь сятяв уренц лангс.
Тячиень шиста сембе пингонь ломаттне
кармайхть лемнемон павазукс,
49вдь Вии Шкайсь тись тейне оцю тефт,
и Сонь лемоц иняру.
50Сон сембе пинкнень
максесы Эсь кельгозь ужяльдеманц сятненди,
кит пелихть эздонза.
51Сон тиезе вии тевть Эсь кядьсонза;
Сон срафтозень прянь няихнень
синь седиень арьсефснон мархта.
52Сон валхтозень оцюнятнень азоронь вастстост
и кеподезень сятяфнень.
53Вачедотнень пяшкодезень парода,
а козятнень панезень шавонь кятть.
54Сон лездсь Израильти, Эсь покодиенцты,
и мяляфтозе Эсь кельгозь ужяльдеманц,
55конань надияфтозе минь атянь-атяньконди,
Авраамонди и сонь уноконь-уноконзонды пефтома пингс».
56Мария инжиендась Елисаветань пяле колмошка ков и тяда меле мрдась куду.
Иоанн Кстиндайть шачемац
57Елисаветанди сась пинге шачфтомс, и сон шачфтсь цёра. 58Шабранза и эсь ломаненза, мзярда кулезь конашкава Азорсь кельгозь ужяльдезе сонь, кеняртькшнесть мархтонза. 59Кафксоце шиня синь састь керомс иднять киськопенц#1:59 киськопень керома – обрезание, и ёразь лемдемс сонь алянц лемса, Захариякс. 60Иднять тядяц тянь каршес мярьгсь: «Аф, сон лемдеви Иоаннкс». 61Тейнза корхтайхть: «Аш юромсонт ломань, кона каннель тяфтама лем». 62Кизефтезь сурса-кядьса идть алянц, кода сонь мялец лемдемс. 63Сон анась седяфкя и лангозонза сёрмадсь: «Сонь лемоц Иоанн». Сембе дивандасть. 64Эстокиге панжевсь Захариянь кялец, и сон кармась корхтама, шнамонза Шкайть.
65Маласост сембе эряйхнень сявозень пелема; и азонкшнесть семботь тянь колга марнек Иудеянь панда лангонь масторга. 66Сембе кулихне путозь тянь седиезост и корхтасть: «Кикс ули тя иднясь?» Вдь Азорть виец ульсь сонь мархтонза.
Захария морай шнамань мор Шкайти
67Иднять аляц, Захария, пяшкодсь Иняру Ваймопожфта и пророчендась:
68«Шнама Азорти, Израилень Шкайти,
сяс мес Сон сась и идезе Эсь ломаньтналонц.
69Сон кучезе тейнек виидонга вии Идить
Давид покодиенц юромста,
70кода Сон азозе кунардонь пингстокиге
Эсь иняру пророконзон вельде.
71Сон идесамазь минь лангозонк моли душматтнень эзда
и сембе аф кельгиеньконь кядьснон эзда.
72Тяфта Сон кельгозь ужяльдьсыне минь атянь-атяньконь
и мяляфтсы иняру сотксонц,
73максф валонц, конаса Авраам варась аляньконди.
74-75Тяфта Сон нолдасамазь минь душматтнень кядялда,
и тяфта минь, киньге эзда аф пелезь,
карматама покодема Тейнза,
эрязь Сонь инголенза инярушиса и видексшиса
марнек эряфоньконьберьф.
76И тон, идняй,
лемдеват Инь Вярденнети прорококс,
вдь тон кармат молема Азорть инголе
и аноклама Тейнза ки:
77тон азсак Сонь ломаньтналонцты – синь идемасна ащи пежеснон нолдамаса.
78Кельги и ужяльди седи Шкаеньке
кучи тейнек менельста шинь стямань валда,
79кона валдоптсыне шобдаса и куломань цильфса ащихнень
и кона ладясыне минь пильгоньконь сетьмошинь ки лангс».
80Иднясь кассь-кеподсь, кемокснесь ваймопожфса. Сон эрясь шавмодаса, мзярс изь эвонда Израилень ломаньтналть инголе.
Currently Selected:
Лука 1: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
