Лука 2
2
Иисусонь шачемац
(Матф. 1:18-25)
1Ся пингть Август, Римонь кесарсь, макссь кошаркс сёрмадомс сембе ломаттнень сонь масторстонза. 2Тя ульсь васенце сёрмадомась#2:2 сёрмадома – тяса: перепись населения и сон ётафтовсь, мзярда Сирияса азорондась Квириней. 3Сембе тусть прянь сёрматфтома, эрсь эсь атянь-авань ошезонза.
4Иосифовок тусь Галилеянь Назарет ошста Иудеяв, Давидонь шачема ошезонза, кона лемневсь Вифлеем; сяс мес Иосиф шачемас коре ульсь Давидонь юромста. 5Сон тусь прянь сёрматфтома Мариянь мархта, конань ладязь максомс тейнза рьвакс и конац учсь идня. 6Вифлеемса улемстост Мариянь сась шачфтома пингоц. 7Сон шачфтозе Цёранц, васенценянц, ашкодозе Сонь нуласа и путозе жуватань андома кядьгос, сяс мес инжиень кудса тейст ашезь сата васта.
Учань ваныхне и ангелхне
8Ошть маластонь паксяса ульсть учань ваныхть, конат веть ванфтозь эсь учаснон. 9Апак учт инголест эвондась Азорть ангелоц, и синь валдоптозень Азорть иневалдоц. Синь сявозень оцюдонга оцю пелема. 10Ангелсь мярьгсь тейст: «Тяда пеле; мон азан тейнть Пара куля, кона ули оцю кеняртьксокс сембе ломаньтналти: 11тячи Давидонь ошса шачсь тейнть Идись, Сон Христос Азорсь. 12Вов тейнть тяштькс: тинь мусасть Иднять ашкотфста жуватань андома кядьгоста». 13Апак учт ангелть ваксса эвондась менелень ушмовий, ламодонга лама ангелда, конат шназь Шкайть и корхтасть:
14«Шнама Шкайти вярдень менельса,
и модать лангса сетьмоши ломаттненди,
конатнень кельгсыне Шкайсь!»
15Мзярда ангелхне кеподсть менели, учань ваныхне мярьгсть фкя-фкянди: «Аряда Вифлеему и ванцаськ, мезе тоса тиевсь, мезть колга Азорсь пачфтсь тейнек куля». 16Эрязста пачкодсть, музь Мариянь мархта Иосифонь и Иднять, кона путфоль жуватань андома кядьгос. 17Тянь няемста синь азондсть сянь колга, мезе тейст азфоль тя Иднять кувалма. 18Сембе кулисна дивандасть сянди, мезе азондсть тейст учань ваныхне. 19А Мария сембе ня валхнень путозень седизонза и арьсекшнесь кульфть колга.
20Мрдамста учань ваныхне шназь Шкайть и азондсть Тейнза сюконямат сембонкса, мезе кульсть и няйсть. Сембось ульсь стане, кода тейст азфоль.
Иисусонь кандозь Шкаень куду
21Кафкса шида меле, мзярда сась пинге керомс Иднять киськопенц, Тейнза путсть лем Иисус. Тя лемть максозе ангелсь нинге тядянц пекса эвондамдонза инголе. 22Мзярда сась синь пингсна пяшкодемс аруяфтомань койть, кона сёрматф Моисеень коенц эса, Мария и Иосиф кандозь Иднять Иерусалиму Азорть инголи ладямонза, 23вдь Азорть койсонза сёрматф: эрь васень цёранясь эряви лемнемс Азорти. 24Тяка пингть тейст нинге эрявсь, Азорть коенц коряс, кандомс озксказненди вирень кафта гуленят али гуленянь кафта лефкст.
25Ся пингть Иерусалимса ульсь ломань, лемоцоль Симеон. Сон ульсь видексшинь и Шкаень коень ванфты аля, кона учендозе Израильти Шкайть лездоманц; и Иняру Ваймопожфсь ульсь сонь лангсонза. 26Тейнза Иняру Ваймопожфсь инголькиге азозе: сон аф кулы, мзярс аф няйсы Азорть Мессиянц. 27Иняру Ваймопожфть тердеманц коряс сон сась Шкаень куду. И мзярда тядятне-алятне кандозь тоза Иисус идняснон – тиемс Сонь лангсонза сянь, мезенди кошарды койсь, 28Симеон сявозе Сонь кядезонза, шназе Шкайть и мярьгсь:
29«Тяни, Азор, валцень коряс,
Тон нолдасак Эсь урецень тя эряфста озаф седихть,
30сяс мес монь сельмоне няезь кучф идемацень,
31конань Тон аноклайть няемс
сембе ломаньтналхненди;
32валдть, кона валдоптсыне сембе ломаньтналхнень,
и иневалдть Тонь Израилень ломаньтналцти».
33Иосиф и Мария дивандасть Иднять колга азфти. 34Симеон бславазень синь и мярьгсь Мариянди, Иднять тядянцты: «Тя Идсь арай туфталкс Израильса ламотнень прамаснонды и кеподемаснонды. И Сон арай Шкаень тяштьксокс, конань каршес стяйхть ламотне. 35Тянь вельде панжевихть ламотнень седипотмонь арьсемасна и тонценьге ваймоцень пачк ётай пеель».
36Тяса ульсь Аннавок, пророк авась, Асиронь юромста Фануилонь стирец. Сон ни пяк сирель. Анна од стирькс лиссь рьвакс и эрясь мирденц мархта сисем кизот, 37сяльде кадовсь удавакс, а тяни ни тейнза кафксогемонь нилие киза. Сон мзярдонга ашезе кадонда Шкаень кудть, тосоль шинек-венек, постонь кирдезь и озондозь сюконясь-покодсь Шкайти. 38Анна тя пингоня нежедсь тейст, шназе Шкайть и корхтась Идть колга сембонди, кие учендозе Иерусалимть воляшис мянеманц.
39Азоронь койть коряс семботь тиемда меле, Иосиф и Мария мрдасть Галилеяв, Назарет ошезост. 40Иднясь кассь-кеподсь и кемокснесь ваймопожфса; Сон пяшкотькшнесь смузьса и Шкаень пароказнесь ульсь мархтонза.
Иисус цёранясь Шкаень кудса
41Эрь кизоня тядянза-алянза якасть Иерусалиму евреень Очижинь илас. 42Мзярда Иисусонди кемгафтува кизоль, синь, кода фалу, тусть Иерусалиму Очижис. 43Очижинь шитнень ётамдост меле тядянза-алянза тусть меки куду, а Иисус Цёранясь илядсь Иерусалиму. Иосиф и Мария ашезь сода илядоманц, 44арьсесть, Сон моли лиятнень мархта. Мзярда синь ётасть фкя шинь кувалма, кармасть вешендемонза Сонь мала ломаньцнон и содафснон ёткста. 45Ашезь му Сонь и мрдасть Иерусалиму вешемонза.
46Колма шида меле музь Цёранять Шкаень кудста. Сон озадоль тонафтыхнень ёткса, кулхцондсь синь эсост и макссесь тейст кизефкст. 47Сембе сят, кит кулезь Сонь корхтаманц, дивандасть Сонь шарьхкодеманцты и кизефкснень каршес азфонцты. 48Мзярда тядянза-алянза няезь Сонь, дивандасть. Тядяц мярьгсь Тейнза: «Цёрай! Мезенкса тяфта тиеть мархтонк? Вов аляцень мархта палы седихть вешендеме эсот». 49Сон каршезост корхтай: «Мезенди эрявонь вешендемс? Али тинь ашесть сода: Тейне улема Алязень кудса?» 50Но синь ашезь шарьхкоде азф валонзон.
51Иисус тусь синь мархтост, сась Назарету и сембоса ульсь кулхцондыкс тядянцты-алянцты. А Мария тядяц семботь тянь путозе эсь седизонза. 52Иисус кассь-кеподсь, кочкась смузьши и ульсь кельговиксокс Шкайть и ломаттнень инголе.
Currently Selected:
Лука 2: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
