Лука 3

Иоанн Кстиндайсь аноклай ки Азорти

(Матф. 3:1-12; Марк 1:1-8; Иоанн 1:19-28)

1Тиверий кесарть кеветиеце кизонь оцязорондамста – мзярда Понтий Пилат азорондась Иудеяса, Ирод оцюняль Галилеяса, Филипп, сонь брадоц, оцюняль Итуреянь и Трахонитонь масторхнень эса, а Лисаний оцюняль Авилинеяса, 2и озксвятиень оцюнякс ульсть Анна и Каиафа – Шкайсь пачфтезе Эсь валонц Иоаннонди, Захариянь цёранцты, кона эрясь шавмодаса. 3Тяда меле Иоанн кармась якама Иорданть перьфке ащи масторхнень ланга: тернезень ломаттнень шарфтомс Шкайти и кстиндафтомс пряснон пежетнень нолдаманкса. 4Лиссь стане, кода сёрматф Исаия пророкть книгаса:

«Серьгядить вайгялец кайги шавмодаса:

"Аноклада Азорти ки,

видептесть Тейнза китнень-яттнень!

5Эрь лашмось пяшкодеза,

эрь пандсь и губорсь алнялгодоза,

кичкор китне видемост, лотку-латкуфне вадявгодост.

6И эрь ломанць няйсы Шкайть эзда идемать!"»#3:6 Исаия 40:3-5

7Пяк лама ломань сашендсь Иоаннонди прянь кстиндафтома. Сон корхтась тейст: «Пупай куень лефкст! Кие тонафтодязь тинь ворьгодемс Шкайть сай пингонь судонц эзда? 8Эсь тевсонт няфтесть Шкайти шарфтомантень, и тяда арьсе идемс прянтень валса: "Минь аляньке – Авраам". Корхтан тейнть: Шкайсь машты тиемс ня кефнень эзда Авраамонди итть. 9Узерсь ащи ни шуфттнень юрснон ваксса: эрь шуфтть, кона аф канды цебярь имошт, керсазь и ёрдасазь толти».

10Ломаттне кизефтезь сонь: «Мезе ина тейнек тиемс?» 11Сон мярьгсь каршезост: «Кинь кафта панардонза, ся максозазе фкять сянди, кинь прокс аш; кинь ули ярхцамбялец, тиеза тяка лаца». 12Каяфксонь кочкайхневок састь прянь кстиндафтома. Синь мярьгсть Иоаннонди: «Тонафты, мезе тейнек тиема?» 13Сон каршезост мярьгсь: «Тяда сяве каяфкс сяда лама мярькфть коряс». 14Кизефнезь сонь ушматтневок: «Тейнек ина мезе тиема?» Тейст мярьгсь: «Аф вихца, аф люпштазь тяда ватка киньге кядьста ярмак, сатфтость сянь, мезе пандови тейнть покодеманкса».

15Ломаттне учендозь Христость, и седисост арьсекшнесть Иоаннонь колга: «Афоли сон Христоссь?» 16Иоанн тянь каршес корхнесь сембонди: «Мон кстиндатядязь тинь ведьса, но мельган сай мондедон Виись, и мон аф кондястян нльне сандалия шнанянцка юксомс. Сон кармай тинь кстиндамонт Иняру Ваймопожфса и толса. 17Сонь кядьсонза каймоц, Сон понжафтсы сёроть тинголангса. Тозерть кочкасы утому, а ювть плхтасы аф мадонды толса».

18Тяфтама и лама лия валса корхтась Иоанн ломаттненди Пара кулять азондомста. 19Иоанн лихнезень лангу Ирод оцюнять сембе зияну тевонзон и Иродиадань мархта эряманцка, вдь Иродиада туфоль рьвакс Иродонь брадонцты. 20Ирод касфтозень аноконь кальдяв тевонзон лувксснон, мзярда сёлгозе Иоаннонь пякстамгудс.

Иисусонь кстиндамац

(Матф. 3:13-17; Марк 1:9-11)

21Ламотне кстиндафтсть пря Иоаннонь кядьста. Иисусовок кстиндафтсь пря и, мзярда Сон озондсь, панжевсь менельсь, 22и Иняру Ваймопожфсь няевиста, гуляня лаца валгсь Сонь лангозонза, и менельста кулевсь вайгяль: «Тон Монь кельгома Цёразят; Тон Монь кенярдемазят!»

Иисусонь атянь-атянза

(Матф. 1:1-17)

23Иисусти Эсь покодеманц ушедомста колмогемоньшка кизоль, и Сон ульсь, кода ламотне арьсесть, Иосифонь Цёрац, кона ульсь цёракс Илиянди. 24Иисусонь лядыкс атянь-атянза ульсть: Матфат, Левий, Мелхий, Ианнай, Иосиф, 25Маттафия, Амос, Наум, Еслим, Наггей, 26Мааф, Маттафия, Семей, Иосиф, Иуда, 27Иоаннан, Риса, Зоровавель, Салафиил, Нирий, 28Мелхий, Аддий, Косам, Елмодам, Ир, 29Иосий, Елиезер, Иорим, Матфат, Левий, 30Симеон, Иуда, Иосиф, Ионан, Елиаким, 31Мелеай, Маинан, Маттафа, Нафан, Давид, 32Иессей, Овид, Вооз, Салмон, Наассон, 33Аминадав, Арам, Есром, Фарес, Иуда, 34Иаков, Исаак, Авраам, Фарра, Нахор, 35Серух, Рагав, Фалек, Евер, Сала, 36Каинан, Арфаксад, Сим, Ной, Ламех, 37Мафусал, Енох, Иаред, Малелеил, Каинан, 38Енос, Сиф, Адам, тянь аляц ульсь Шкайсь.

Currently Selected:

Лука 3: ОС16

Highlight

Copy