Лука 4

Идемэвозсь тяряфнесы сувафтомс Иисусонь пежес

(Матф. 4:1-11; Марк 1:12,13)

1Иисус Иняру Ваймопожфта пяшкотьфста мрдась Иордан ляйть трваста и Ваймопожфсь вятезе Сонь шавмодав. 2Тоса идемэвозсь нильгемонь ши тяряфнезе Сонь сувафтомс пежес. Сембе ня шитнень Сон мезьдонга ашезь ярхца, и меколи пяк вачсь пекоц. 3Идемэвозсь мярьгсь Тейнза: «Кда Тон Шкаень Цёрат, эста кошартк тя кевть арамс кшикс». 4Иисус каршезонза мярьгсь: «Сёрматф: "Аф аньцек кшить вельде кармай эряма ломанць, но эрь валть вельде, кона лиси Шкайть кургста"».

5Сяльде идемэвозсь вятезе Сонь сери панда пряс и эстокиге няфтезень Тейнза модалангонь сембе масторхнень. 6Сон мярьгсь Иисусти: «Кядялот макссайне сембе ня масторхнень сембе козяшиснон мархта, сяс мес синь максфт тейне, и монь ули виезе максомс синь кинди мялезе. 7Сюконяндярят тейне, эста тя сембось ули Тонь». 8Иисус каршезонза мярьгсь: «Аертт эздон, Сатана. Сёрматф:

"Азорти, Шкайцти сюконякшнек

и аньцек Тейнза покотть"#4:8 5 Моисея 6:13».

9Эста идемэвозсь вятезе Сонь Иерусалиму, стяфтозе Шкаень кудть пряс и мярьгсь Тейнза: «Кда Тон Шкаень Цёрат, ёрдак тяста пря алу; 10вдь сёрматф:

"Шкайсь кошардсыне ангелонзон ванфтомс Тонь

11и кядьсост канттядязь Тонь,

афоль пупорда Тонь пильгце кев лангс"#4:11 Псалтирь 90:11-12».

12Иисус каршезонза мярьгсь: «Азф: "Тяк варчсе Азорть, Тонь Шкайцень виенц"».

13Иисусонь тяфта и стане варчсемдонза меле, идемэвозсь мзярошка пингс тусь маластонза.

Иисус ушедозе Эсь покодеманц

(Матф. 4:12-17; Марк 1:14,15)

14Иняру Ваймопожфонь вийса Иисус мрдась Галилеяв. Сонь колганза кулясь срадсь сембе перьфпяльге. 15Иисус тонафнезень ломаттнень синагогаваст, и сембе шнакшнезь Сонь.

Иисусонди аф кемайхть Назарет ошса

(Матф. 13:53-58; Марк 6:1-6)

16Иисус сась Назарету, коса кассь и, кода фалу ваймамань шиня, сувась синагогав. Сон стясь ломаттнень инголи Иняру Сёрматфксть лувома. 17Тейнза максозь Исаия пророкть книганц; книгать панжемста Сон музе вастть, коса сёрматфоль:

18«Азорть Ваймопожфоц Монь лангсон,

сяс мес Сон вадемань-кочкамань Монь

пачфтемс Пара кулять ашуфненди.

Сон кучемань Монь пчкафтомс кольф седихнень,

азомс пякстафненди воляс нолдамаснон колга

и сокорхненди сельмонь панжемаснон колга.

Сон кучемань Монь нолдафтомост люпштафнень,

19и азомс тянь: сась Азорть кельгозь ужяльдемань пингоц»#4:19 Исаия 61:1-2.

20Иисус пякстазе книгать, максозе меки синагогань покодити и озась; сембонь сельмованфсна сялкфтольхть лангозонза. 21Сон кармась корхтама тейст: «Тячи кулхцондомстонт пяшкодсь тя Сёрматфкссь». 22Сембе ломаттне тянь кемокстазь и дивандакшнесть ся пара валхненди, конат лиссть Иисусонь кургста, и корхтасть: «Кали тя аф Иосифонь цёрац?!»

23Иисус мярьгсь тейст: «Вов, мярьктяда Тейне валмуворксонь валса: "Пчкафты, пчкафтк Эсь пряцень!" и "Тик тясонга, Эсь ошсотка сянь, мезе, кода минь кулеськ, Тон тиендеть Капернаумса"». 24И мярьгсь: «Видеста корхтан тейнть: кодамовок пророксь эсь ошсонза аф путневи пара лувксс. 25Видеста корхтан тейнть: Израильса ульсь лама удавада Илиянь пингста, мзярда колма кизот и кота кофт ашель пизем и марнек масторлангса ульсь вачаши, 26но Илия эздост конандинге апак кучтоль, аньцек Сидононь Сарепта ошста удавати. 27Тяфта Елисей пророкть пингстонга Израильса ламоль наксафты урмаса сярядида, но фкявок эздост ашель аруяфтф, Сириянь эряй Наманда башка».

28Тянь кулемста синагогаса сембонь пяшкодезень кяжсь. 29Синь стясть и панезь Иисусонь ошста; вятезь панда пряс, конань лангса ащесь синь ошсна, мяльсноль ёрдамс Сонь тоста алу пандт. 30Но Иисус ётась кучкаваст и тусь Эсь киганза.

Капернаумонь синагогаса

(Марк 1:21-28)

31Иисус сась Галилеянь Капернаум ошу, тоса тонафнезень ломаттнень ваймамань шиня. 32И дивандасть Сонь тонафтоманцты, сяс мес валсонза марявсь азорксши.

33Синагогаса ульсь аля, кона колафоль кяжи аф ару ваймопожфса, и сон ювадсь оцю вайгяльхть: 34«Назаретонь Иисус, мезе Тейть миньцтонк эряви? Тон сать юмафтомонк? Мон содате кият, Тон Шкаень Инярусь!» 35Иисус кемоста кардазе сонь, мярьгсь: «Лоткак корхтамда и листь эздонза!» Эста кяжи ваймопожфсь прафтозе алять ломаттнень ёткс, лиссь потмостонза мезеньге кальдявонь апак тик. 36Сембе дивандазевсть и корхтасть эсь ётковаст: «Мезе тя тяфтамсь Сон корхтай? Сон азорксшиса и вийса кардасыне аф ару ваймопожфнень и сят лисендихть». 37Иисусонь колга кулятне срадсть сембе перьфпяльге.

Иисус пчкафтсы Симононь авозенц и лия сярядихнень

(Матф. 8:14-17; Марк 1:29-34)

38Синагогаста лисемда меле Сон сувась Симононь пяли. Симононь авозец пяк сярядсь, сон ульсь пси урмаса. Иисусонди эняльдсть лездомс тейнза. 39Иисус комась вельхксозонза и панезе пси урмать; урмась эстокиге кадозе сонь. Авась стясь и кармась синь перьфкаст шарома.

40Ши валгома ёткть ломаттне вятнезь и каннезь Иисусонди эрь кодама урмаса сярядиснон. Сон эрь сярядить лангс путнезень кядензон и пчкафнезе. 41Ламотнень потмоста лисендсть кяжи ваймопожфневок, конат пешкодсть: «Тон Шкайть Цёрацат!» Но Сон карнезень синь корхтамда, сяс мес синь содазь: Сон – Христоссь.

Иисус тонафты Иудеяса

(Марк 1:35-39)

42Варьхмодемшовор Сон лиссь ошста и тусь шава вастс. Ломаттне вешендезь Сонь, и мзярда музь, кармасть кирнемонза, афоль ту эздост. 43Но Сон мярьгсь тейст: «Тейне лия ошеванга эряви кандомс Пара кулять Шкаень Оцязорксшить колга, вдь Мон тянкса кучфан». 44Сон стаки тонафтсь Иудеянь синагогава.

Currently Selected:

Лука 4: ОС16

Highlight

Copy