Марк 10
10
Кизефкс полада явомать колга
(Матф. 19:1-12)
1Тоста Иисус тусь Иорданть фтала ащи Иудеянь мастору. Сонь перьфканза тага пуромсть ломатть; и, кода фалу, Сон тага тонафтсь эсост. 2Састь ваксозонза фарисейхть и, ёрамок кундамс Иисусонь валса, кизефтезь: «Койть коряс мярьгондеви мирдти кадомс рьванц али аф?» 3Иисус каршезост мярьгсь: «Кодама кошардома макссь тейнть Моисей?» 4Синь азозь: «Моисей ашезь карда сёрматкшнемс явомать колга кагод и кадомс рьваньконь». 5Иисус каршезост мярьгсь: «Пяк калгода седиентень сюнеда сон сёрмадозе тейнть тя кошардомать; 6а Шкайсь менельть-масторть тиемста ломанть тиезе алякс и авакс. 7Сяс кадсы ломанць алянц мархта тядянц и педи эсь рьванцты, 8и кафттне арайхть фкя ронгокс. Лисенди, синь эздост ни аф кафта, а фкя. 9Стане, мезе Шкайсь сотсь марс, сянь ломанць тязазе явфне».
10Кудса тонафниенза тага кизефнезь Иисусонь кядьста сякоть. 11Иисус мярьгсь тейст: «Кие яви рьванц мархта и сяви рьвакс лия ава, ся полафнесы поланц. 12И кда рьвясь яви мирденц мархта и лиянди лиси рьвакс, сявок полафнесы поланц».
Иисус бславасыне иттнень
(Матф. 19:13-15; Лук. 18:15-17)
13Вятнесть-каннесть Иисусонди итть лангозост кяденц путфтома, но тонафниенза изь ноля Тейнза шабань вятихнень. 14Тянь няемста Иисусонь састь кяженза и мярьгсь тейст: «Нолдасть шабатнень Тейне, тясть перя киснон, сяс мес тяфтамста ащи Шкаень Оцязорксшись. 15Видеста корхтан тейнть: кие аф васьфтьсы Шкаень Оцязорксшить шаба лаца, ся аф сувави эзонза». 16Иисус озафтозень иттнень элезонза, путозень лангозост кядензон и бславазень синь.
Козя ломань
(Матф. 19:16-30; Лук. 18:18-30)
17Мзярда Иисус лиссь ки лангс, ласьксь Тейнза фкя ломань, прась инголенза плманжа лангс, и кизефтезе Сонь: «Цебярь тонафты! Мезе тейне эряви тиемс пефтома эряфонь сатоманкса?» 18Иисус мярьгсь тейнза: «Мес тон лемнесамак Монь цебярькс? Аньцек Шкайсь ськамонза цебярь. 19Тон вдь содасайть кошардомвалхнень: тят полафне пола; тят шавонда; тят сала; тят васькафне лиянь лангс; тят сявонде васькафнезь; ванк аляцень и тядяцень мяльснон». 20Козя алясь мярьгсь Иисусть каршес: «Тонафты! Семботь тянь ванфтыне нинге од пингстонкиге». 21Иисус кельгозь варжакстсь лангозонза и мярьгсь: «Фкя тейть аф сатни: архт, мик марнек уликс-пароцень, и явк ярмакть ашуфненди, эста кармай улема козяшице менельса; сяльде сак, мольхть мельган». 22Ся ломанць пяк козяль, сяс ня валхнень эзда сонь кольсь мялец, и тусь пичедезь.
23Иисус варжакстсь перьфпяльге, мярьгсь тонафниензонды: «Конашкава стака козя ломанти сувамс Шкаень Оцязорксшити!» 24Тонафниензон пяк дивандафтозь ня валонза. Но Иисус тага азозе тейст: «Идне! Конашкава стака козяшить лангс надияйхненди сувамс Шкаень Оцязорксшити! 25Пяк стака сувамс козя ломанти Шкаень Оцязорксшити, сяда тёждя ишимти ётамс салмокс пиленява». 26Тонафниенза нинге сяда пяк дивандазевсть и корхтасть эсь ётковаст: «Кие ина эста идеви?» 27Иисус варжакстсь лангозост и корхтай: «Ломаттненди тя аф тиеви, а Шкайти тиеви; сяс мес Шкайти сембось тиеви».
Мезе максови Иисусонь мельге молеманкса?
28Эста Пётр кармась корхтама Тейнза: «Вов минь сембоньконь кадоськ и туме мельгат». 29Иисус каршезонза мярьгсь: «Видеста корхтан тейнть: эрсь, кие кадсы кудонц, али брадонзон, али сазоронзон, али алянц, али тядянц, али рьванц, али идензон, али паксянзон Монь инксон и Пара кулять инкса, 30сянди тяниень эряфса панцематнень пингста максови сядонь крда лама кудта, брадта, сазорда, аляда-тядяда, идьта, паксяда, и сай пинкнень тейнза максови пефтома пингонь эряфсь. 31Эста васенцетнень эзда ламотне арайхть мекольцекс, а мекольцетне васенцекс».
Иисус тага азонды Эсь куломанц колга
(Матф. 20:17-19; Лук. 18:31-34)
32Мзярда синь ульсть ки лангса Иерусалиму, Иисус мольсь инголест, а тонафнихне таколдсть и мольсть Сонь мельганза пелезь. Иисус тердезень кемгафтувотнень, тага ушедсь тейст корхтама, мезе тиеви мархтонза: 33«Вов минь мольхтяма Иерусалиму, и Ломанень Цёрать макссазь озксвятиень оцюнятненди и койти тонафтыхненди, и сят судендасазь Сонь куломас и макссазь лия тналонь ломаттнень кядьс. 34Сят кармайхть рахсема лангсонза, сельгондьсазь, пикссесазь и шавсазь Сонь; и колмоце шиня Сон вельмай кулофста».
Иаковонь и Иоаннонь эняльдемасна
(Матф. 20:20-28)
35Эста састь Иисусти Зеведеень цёранза Иаков и Иоанн, мярьгсть: «Тонафты! Тик тейнек сянь, мезе кядьстот анатама». 36Сон кизефтезень синь: «Мезе мяленте анамс кядьстон?» 37Синь азозь Иисусти: «Мзярда саят Эсь иневалдозт, мярьк тейнек озамда ваксозт, фкяти види ширесот, а омбоцети кержи ширесот». 38Иисус мярьгсть тейст: «Тинь аф содасасть, мезе анатада; симови-аф тейнть ризфонь ся кядьгось, конань Мон симса, кстиндафттада-аф ризфонь ся кстиндамаса, конаса Мон улян кстиндаф?» 39Синь мярьгсть каршезонза: «Тейнек тя тиеви». Эста Иисус азозе: «Ся кядьготь, конань Мон симса, симсасть, и ся кстиндамаса, конаса Мон улян кстиндаф, тиньге ульхтяда кстиндафтфт; 40но кинь озафтомс Монь види и кержи ширезон – ся аф Монь эздон ащи, ня васттне – сятненди, кинди синь аноклафт».
41Тянь кулемста лия кемонь тонафниенза кармасть кяжияфнема Иаковонь и Иоаннонь лангс. 42Но Иисус тердезень синь и мярьгсь: «Тинь содасасть: кит лувондовихть ломаньтналонь оцязоркс, сят азорондайхть лангсост и ломаньтналхнень оцюнясна кирдьсазь кядялост ломаньтналхнень. 43Но тинь ётксонт тяфта тяза уленде: а кинь мялец ётксонт арамс сяда оцюкс, ся араза лиянди покодикс; 44кинь мялец ётксонт арамс васенцекс, ся улеза сембонди урекс. 45Вдь Ломанень Цёраське сась аф Эсь лангозонза лиятнень покотьфтема, а лиятнень лангс покодемс и максомс Эсь ваймонц ламотнень идемаснон инкса».
Иисус пчкафтсы сокор Вартимей алять
(Матф. 20:29-34; Лук. 18:35-43)
46Састь Иерихону. Мзярда Иисус лиссь Иерихонцта Эсь тонафниензон и лия пяк лама ломань мархта, кить лангса ащесь Тимеень цёрац Вартимей, сокор анцись. 47Мзярда сон марязе: тя Назаретонь Иисуссь, кармась юватькшнема: «Иисус, Давидонь Цёрац! Ужяльдемак монь!» 48Ламотне карнезь сонь юватькшнемда; но сокорсь нинге сяда пяк пешкоткшнесь: «Давидонь Цёрац! Ужяльдемак монь!» 49Иисус лоткась и мярьгсь: «Тердесть сонь». Сокорть тердезь, корхтасть тейнза: «Тят пеле, стяк, терди эсот». 50Сон ёрдазе лангонь щамонц, комотсь вастстонза и сась Иисусти. 51Иисус кизефтезе: «Мезе мяльце тифтемс кядьстон?» Сокорсь мярьгсь Тейнза: «Тонафты! Панжить сельмонень». 52Иисус мярьгсь тейнза: «Архт, кемамаце пчкафтонзе#10:52 Тя валсь греконь кяльста нинге ётафневи кода: идензе. тонь». Сон эстокиге кармась няема и тусь киге Иисусонь мельге.
Currently Selected:
Марк 10: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
