Марк 11
11
Иисусонь самац Иерусалиму
(Матф. 21:1-11; Лук. 19:28-40; Иоанн 12:12-19)
1Иерусалимти маладомста, мзярда синь ни аф ичкозетольхть Виффагиять и Вифаниять эзда, конат ащесть Вайшуфта пандть лангса, Иисус кучезень кафта тонафниензон инголи 2и мярьгсь тейст: «Арда инголент ащи веленяв. Сувамдонт меле эстокиге няйхтяда пиксс сотнеф од осёл, конань лангса нинге кивок ашезь арне. Юксость сонь и вятесть сей. 3Кда кивок кизефттядязь, месенттяда тяфта, мярьгода: осёлсь эряви Азорти, Сон курок мрдафтсы тейнть меки».
4Тонафниенза тусть и музь од осёлть курняса ортать ваксса сотнефста. Синь юксозь сонь. 5Тоса ащихне кизефтезь: «Месенттяда? Мес сонь юкссасть?» 6Тонафнихне каршезост мярьгсть стане, кода кошардозень Иисус, и ломаттне нолдазь синь. 7Синь вятезь оселть Иисусонди и лаподезь лангозонза эсь щамснон. Иисус озась ластя. 8Ламотне ацсезь кить лангс эсь щамснон, а лиятне синнесть шуфтста таратт и ацсезь синь кить лангс. 9И сят, кит мольсть Иисусонь инголенза и фталонза, юватькшнесть:
«Осанна!
Бславаф Азорть лемса Сайсь!
10Бславаф Давидонь, минь аляньконь, Азорть лемса сай оцязорксшиц!
Осанна Инь Вярдень Шкайти!»#11:10 Псалтирь 117:25-26
11Иисус сась Иерусалиму и сувась Шкаень куду, тоса семботь ванозе. Шись мадомлангсоль ни, сяс Сон тусь кемгафтувотнень мархта Вифанияв.
Иисус сюдосы смоква шуфтть
(Матф. 21:18,19)
12Омбоце шиня, велеста лисемдост меле, Иисусонь вачсь пекоц. 13Сон ичкозде няйсь лопав смоква шуфта и маладсь ваномонза, улихть-аш лангсонза имошт. Смоква шуфтть лангса имошт ашельхть, аньцек лопатольхть, сяс мес имошнень пингсна нинге ашезь са. 14Эста Иисус мярьгсь шуфтти: «Катк мзярдовок кивок аф сиви эздот фкявок имож!» Тонафниенза марязь Сонь валонзон.
Иисус панцесыне Шкаень кудста мишендихнень-рамсихнень
(Матф. 21:12-17; Лук. 19:45-48; Иоанн 2:13-22)
15Синь састь Иерусалиму. Иисус сувась Шкаень кудть пирьфонцты и тоста кармась панцемост мишендихнень и рамсихнень. Сон веляфнезень ярмаконь полафнихнень шраснон и гуленянь мишендихнень эземснон, 16Шкаень кудть пирьфонц пачк ашезь мярьге каннемда кодамовок парши. 17Сон тонафтозень ломаттнень тяфта: «Дяряй аф сёрматф: "Монь кудозе ули лемтьф озондомань кудкс сембе ломаттненди"? А тинь сонь тиесть салаень-шавиень пизокс».
18Озксвятиень оцюнятне и койти тонафтыхне марязь тянь и кармасть арьсема, кода шавомс Иисусть. Синь пельсть эздонза, сяс мес ломаттне путнезь седиезост Сонь тонафтоманц.
19Илять Иисус тонафниензон мархта тага тусь ошста.
Тонафтома смоква шуфтть колга
(Матф. 21:20-22)
20Омбоце шобдаваня смоква шуфтонять вакска ётамста синь няезь: шуфтсь коськсь юрть самс. 21Пётр лятфтазе, мезе ульсь тяда инголе, мярьгсь: «Тонафты! Ватт! Смоква шуфтсь, конань Тон сюдыть, коськсь!» 22Иисус каршезост мярьгсь: «Улеза кемаманте Шкайти! 23Видеста корхтан тейнть, кда кие мярьги тя пандти: "Кепотть и ёрдак пря оцюведти", и седиец аф кармай абонкшнема, но кармай кемама: лиси валонзон коряс, – тяфта и ули. 24Сяс корхтан тейнть: семботь, мезть тинь анасасть озондомасонт, – кемада: сянь ни тинь сявость, и сявсасть! 25Мзярда озонттада и киньге лангс кирттяда кяж, нолдасть тейст синь пежеснон, эста Алянтевок, кона менельса, нолдасыне тинь пежентень. 26Кда аф нолдасасть лиятнень пежеснон, эста Менелень Алянтевок аф нолдасыне тинь пежентень».
Кизефкс Иисусонь азорксшинц колга
(Матф. 21:23-27; Лук. 20:1-8)
27Синь тага састь Иерусалиму. И мзярда Иисус ульсь Шкаень кудса, Тейнза маладсть озксвятиень оцюнятне, койти тонафтыхне и ломаньтналонь оцюнятне. 28Синь кизефнезь Сонь: «Кодама азорксшиса Тон тянь семботь тиендьсак? Кие максозе Тейть азорксшить тиендемс тянь?» 29Иисус каршезост мярьгсь: «Монга тинь кизефттядязь. Васенда тинь азость кизефксозень каршес мялентень, эста Монга азса, кодама азорксшиса тянь тиендьса. 30Иоаннонь кстиндамац менельста али ломаттнень эзда? Кода арьсетяда?» 31Синь эсь ётковаст корхтасть: «Мярьгондярятама: "Менельста", эста Сон кизефтьсамазь: "Мес мле ашеде кема тейнза?" 32Пади мярьктяма: "Ломаттнень эзда"?» Но синь пельсть ломаньда, сяс мес Иоаннонь сембе лувондозь афкуксонь прорококс. 33И синь мярьгсть Иисусонди: «Аф содасаськ». Эста Иисус азозе тейст: «Монга аф азса тейнть, кодама азорксшиса сембонь тянь тиендьса».
Currently Selected:
Марк 11: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
