Марк 14

Евреень озксвятихне арьсихть, кода шавомс Иисусонь

(Матф. 26:1-5; Лук. 22:1,2; Иоанн 11:45-53)

1Кафта шида меле улемаль евреень Очижити и аф шапама кшинь илати. Озксвятиень оцюнятне и койти тонафтыхне вешендсть, кода васькафтозь кундамс Иисусонь и шавомс Сонь. 2Но синь корхтасть: «Аньцек аф илашиня, афольхть кеподе тянкса ломаттне».

Иисусть танцти шине вайса вадемац

(Матф. 26:6-13; Иоанн 12:1-8)

3Мзярда Иисус ащесь Вифанияса ся Симонть шранц ваксса, кона инголи сярядсь наксафты урмаса, каваняма ёткть сувась тоза ава. Сон кандсь мархтонза алебастрань кядьгоняса нардста#14:3 Нард – тише, кона касы Индияса. Сонь эздонза тиендсть питни танцти шине вай. тиф пяк питни вай. Авась колазе кядьгонять и каязе вайть Иисусонь пряванза. 4А конат-конат сафтозь кяжснон и эсь ётковаст корхтасть: «Мезенди стак ётафнемс тяфтама вайть? 5Сяда пара улель мимс сонь и сявомс инксонза колмосятта лама динарий, и ярмакнень явомс ашуфненди». И синь сюцезь авать.

6Но Иисус мярьгсь: «Кадость сонь; мезенди кольфнесасть мяленц? Сон пара тев тись Тейне. 7Вдь ашуфне фалу кармайхть мархтонт, и тейнть тиеви тейст пара, мзярда мяленте, а Мон улян мархтонт аф фалу. 8Сон тиезе сянь, мезе тейнза тиевсь. Ронгозень инголькиге вадендезе, тяфта анокламань калмамс. 9Видеста корхтан тейнть: сембе масторть келеса, коса азондсазь тя Пара кулять, тоса лятфтасазь аватьке и сянь, мезе сон тись».

Иуда срхкась мимс Иисусонь

(Матф. 26:14-16; Лук. 22:3-6)

10Эста Иуда Искариот, кемгафтувотнень эзда фкясь, тусь озксвятиень оцюнятненди Иисусть мимонза. 11Сят кенярдсть тянь марямста и надияфтсть Иуданди пандомс ярмак. И Иуда учсесь пинге, кона ёткть мимс тейст Иисусонь.

Очижинь илядень ярхцамась

(Матф. 26:17-30; Лук. 22:7-20; Иоанн 13:21-30; 1 Кор. 11:23-25)

12Аф шапама кшинь илать васенце шистонза, мзярда печксельхть очижинь вероскя, Иисусонь тонафниенза корхтайхть Тейнза: «Коса мяльце ярхцамс очижинь вероскада? Мярьк, минь мольхтяма и аноклатама». 13Сон кучезень тонафниензон ёткста кафттнень и корхтай тейст: «Арда ошу; и няйхтяда аля, кона канды ведь кукшень. Моледа мельганза, 14и ков ся ломанць сувай, мярьгода кудазорти: "Тонафтысь кизефнесы, коса кудбялькссь, конаса Сон ярхцаль очижинь вероскада тонафниензон мархта". 15Ся кудазорсь няфти оцю вярце кудбялькс, кона ули ацаф и урядаф; тоса аноклада тейнек ярхцамс». 16Тонафниенза тусть и састь ошу. Сембось тиевсь стане, кода мярьгсь тейст Иисус, и синь аноклазь очижинь ярхцамать.

17Илять Иисус сась тов кемгафтувотнень мархта. 18Мзярда синь озасть ярхцама, Иисус мярьгсь: «Видеста корхтан тейнть, ёткстонт фкясь, мархтон ярхцайсь, мисамань Монь». 19Синь ризназевсть и кармасть фкя-фкянь мельге Тейнза корхтама: «Тя аф монан?» и омбоцесь: «Тя аф монан?» 20Иисус каршезост мярьгсь: «Ёткстонт, кемгафтувотнень эзда фкясь, ся, кона навсесы мархтон фкя шаваняс кшинц. 21Ломанень Цёрась моли стане, кода сёрматф колганза, но вай, кодань кальдяв ули ся ломанти, кона мисы Ломанень Цёрать! Сяда пара улель, кда ся ломанць афи шачель».

22Мзярда синь ярхцасть, Иисус сявозе кшить, бславазе, синдезе, максозе тейст и мярьгсь: «Сявость и ярхцада, тя Монь ронгозе». 23Сяльде сявозе кядьготь, азсь сюконяма Шкайти, венептезе тейст, и сембе симсть эздонза. 24И Сон мярьгсь тейст: «Тя Монь верозе, од сотксонь вер, кона валови сембе ломаттнень инкса. 25Видеста корхтан тейнть: Мон ни аф симан виноградонь винада ся шить самс, мзярда Мон симан од винада Шкаень Оцязорксшиса».

26Шкайти шнама моронь морамда меле синь тусть Вайшуфта пандть лангс.

Иисус инголькиге азонды Пёторонь потаманц колга

(Матф. 26:31-35; Лук. 22:31-34; Иоанн 13:36-38)

27Тоса Иисус корхтай тейст: «Тя веня тинь сембе потатада Монь эздон, вдь сёрматф: "Шавса учань ваныть и учатне срадыхть". 28Но вельмамдон меле Мон тиндедонт инголи молян Галилеяв». 29Пётр мярьгсь каршезонза: «Катк хуш сембе потайхть эздот, мон тянь аф тиса». 30Иисус корхтай тейнза: «Видеста корхтан тейть: тячи, тя веня, атёкшсь омбоцеда аф кенери моразевомс, кода тон колмоксть потат Монь эздон». 31Но Пётр нинге сяда псиста корхтась: «Кда тейне саволь мархтот куломс, эстовок афолень пота эздот». Сякоть корхтазь сембе.

Иисус озонды Гефсиманиянь переса

(Матф. 26:36-46; Лук. 22:39-46)

32Састь ся вастти, кона лемневи Гефсимания. Иисус мярьгсь тонафниензонды: «Ащеда тязк, мзярс Мон озондан». 33Сявозень мархтонза Пёторонь, Иаковонь и Иоаннонь; и Сонь фатязе пелемась и тошнась. 34Мярьгсь тейст: «Куломшка ризнай ваймозе. Ащеда тяса и тяда уда». 35Иисус аердсь аф ламода шири, прась модать лангс и озондсь тянкса: кда ули кода, ётаза ваксканза тя пингсь. 36Сон корхтась: «Авва#14:36 Авва – тя валть арамеень кяльса смузец «аляй». Тяфта идсь пшкятькшни эсь алянцты. Иисусовок тяфта пшкятькшнесь Шкайти озондомста., Аляй! Тейть сембось тиеви; ётафтк вакскан тя кядьготь; аньцек улеза аф Монь мялезень коряс, а кода Тонь мяльце».

37Иисус мрдась меки и сатозень синь удозь. Корхтай Пёторонди: «Симон! Тон удат? Тон фкя част ашеть кирдев апак удок? 38Тяда уда, озондода: варчсемстонт афоледе пра пежес. Ваймось анок паронь тиемс, а ронгсь лафча».

39Иисус тага аердсь, озондсь, азозень сяка валхнень. 40Меки мрдамстонза тага сатозень синь удозь, сяс мес сельмосна коневсть, и синь ашезь сода, мезе азомс Иисусонь каршес.

41Колмоцеда самдонза меле Иисус корхтай тейст: «Тинь нинге удотада и ваймосетяда? Саты утцемс! Сась пингсь: вага, Ломанень Цёрась максови пежуфнень кядьс. 42Стяда, аряда! Вага, Монь миизе маладсь».

Иисусонь кундамац

(Матф. 26:47-56; Лук. 22:47-53; Иоанн 18:3-12)

43Эстокиге, мзярда Иисус нинге корхтась, сась тоза Иуда, кемгафтувотнень эзда фкясь. Сонь мархтонза сась тор и пяль мархта лама ломань, конатнень кучезь озксвятиень оцюнятне, койти тонафтыхне и ломаньтналонь оцюнятне. 44Иуда инголькиге ладязе мархтост, кода тейст содамс Иисусонь: «Кинь паласа, ся Сон, сявость Сонь и вятесть, лацкас кирдесть». 45Иуда сась, эстокиге маладсь Иисусонди и мярьгсь: «Тонафты!», и палазе Сонь. 46Эста тюрембяль мархтотне фатязь Иисусонь и сявозь Сонь. 47Тоса ащихнень эзда фкясь таргазе торонц, эрьхтезе озксвятиень оцюнять покодиенц и керозе сянь пиленц.

48Эста Иисус мярьгсь тейст: «Тинь саде Монь сявомс торса и пяльса, кода нельги-шави ломанень мельге! 49Эрь шиня Мон улендень мархтонт Шкаень кудса и тонафтонь, и тинь ашемасть сявонде. Но Сёрматфксонь валхненди эряви пяшкодемс». 50Эста сембе тонафниенза кадозь Сонь и ворьгодсть.

51Фкя од ломань, конань лангс ашкотфоль аньцек иляназонь котф, мольсь Иисусонь мельге. Соньге кундазь, 52но сон ёрдазе лангстонза котфть и крхтапа тусь ласькозь эздост.

Иисус Оцю пуромксть инголе

(Матф. 26:57-68; Лук. 22:54,55; Иоанн 18:13,14,19-24)

53Иисусонь вятезь озксвятиень оцюняти; и тов кочкавсть сембе озксвятиень оцюнятне, ломаньтналонь оцюнятне и койти тонафтыхне. 54Пётр ичкозьге мольсь Иисусонь мельге, нльне сувась озксвятиень оцюнять пирьфс; озась тоса Шкаень кудть ванфтыензон ёткс, и эжендсь толмарть ваксса.

55Озксвятиень оцюнятне и сембе Оцю пуромкссь вешендсть няфтемат Иисусонь каршес. Тяфта улель туфталсна максомс Сонь куломас, но стама туфталхт синь ашесть мушенда. 56Лама няида-кулида васькафнезь корхтась Иисусонь лангс, но синь няфтемасна мольсть карань-каршек. 57Конат-конат стясть и васькафнезь корхтасть лангозонза: 58«Минь кулеськ, кода Сон корхтась: "Мон срафтса тя Шкаень кудть, кона тиф ломанень кядьса, и колма шиста путан лия, аф ломанень кядьса тиф"». 59Но тяфтамовок няфтемасна карань-каршектольхть.

60Эста озксвятиень оцюнясь лиссь кучкати и кизефтезе Иисусонь: «Мес мезевок аф корхтат? Тейть аш мезе азомс синь няфтемаснон каршес?» 61Но Иисус кашт изь моле и каршезост мезевок ашезь аза. Озксвятиень оцюнясь тага кизефтезе Сонь: «Тон Христоссят, Бславафть Цёрацат?» 62Иисус мярьгсь: «Тя Монан; и тинь карматада няемонза Ломанень Цёрать, кона ащи озада Виить види кядь ширесонза и кона сай менелень коволхнень лангса». 63Эста озксвятиень оцюнясь сязезе эсь щамонц, мярьгсь: «Мезенди нинге тейнек эрявихть няихне-кулихне? 64Тинь кулесть кода Сон сялдсы Шкайть; мезе тинь астада?» И сембе синь мярьгсть максомс Иисусонь куломас.

65Кона-кона ломаттне кармасть лангозонза сельгондема, и сотнемок сельмонзон, эрьхнезь Сонь и корхтасть: «Пророчендак!» Ванфтыхневок эрьхнезь шама ланга.

Пётр потай Иисусонь эзда

(Матф. 26:69-75; Лук. 22:56-62; Иоанн 18:15-18,25-27)

66Пётр учсесь алува, пирьфса. Тоза сась озксвятиень оцюнять лангс покоди ава. 67Сон, няемок Пёторонь, кона эжендсь тоса, оржаста ванць лангозонза и мярьгсь: «Тонга улеть Назаретонь ломанть, Иисусть мархта». 68Но Пётр сёпозь мярьгсь: «Аф содаса и аф шарьхкодьса, мезе тон корхтат», и лиссь тоста ингольце пирьфти; и моразевсь атёкшсь. 69Покоди авась тага няезе сонь, кармась тоса ащихненди корхтама: «Тя синь ёткстост». 70Пётр тага сёпсь пря. Аф лама пингта меле тостотне тага кармасть корхтама Пёторонди: «Тон афкукс синь ёткстост. Тон вдь Галилеянь эряят и корхтамацевок тостонне». 71Но сон кармась варама Шкайть лемонц кунцезь: «Аф содаса Ся Ломанть, конань колга корхтатада». 72Эста атёкшсь моразевсь омбоцеда. И Пёторонь мяльс лядсть Иисусонь валонза: «Атёкшсь омбоцеда аф кенери моразевомс, кода тон колмоксть потат Монь эздон». И аварьгодсь.

Currently Selected:

Марк 14: ОС16

Highlight

Copy