Марк 5
5
Иисус панцы аф ару ваймопожфть ломанть потмоста
(Матф. 8:28-34; Лук. 8:26-39)
1Синь ётасть эрьхкть омбокс Гадарина мастору. 2Мзярда Иисус лиссь венчста, каршезонза калмонь кевботмарста лиссь ломань, конань потмос сувафоль аф ару ваймопожф. 3Тя ломанць эрясь калмонь кевботмарса, нльне цинзерсовок киндинге ни ашезь кирдев. 4Мзярксть ашезь сотнекшне кядензон-пильгонзон цинзерса, сон эрь мезня тапсезень-сязендезень синь. И киндинге сон ашезь сетьмофтов. 5Шинек-венек сон калмотнень и панттнень ланга юватькшнесь пиже вайгяльса и шавсь пря кефненди. 6Мзярда тя ломанць ичкозде няезе Иисусонь, сон ласьксь Тейнза, комась пильгозонза 7и оцю вайгяльхть пешкодозь, мярьгсь: «Мезе Тейть эздон эряви, Иисус, Инь Вярдень Шкайть Цёрац? Эняльдян Шкайть лемса, тямак маятафта!» 8Иисус вдь мярьгсь тейнза: «Листь тя ломанть эзда, аф ару ваймопожф!» 9Иисус кизефтезе сонь: «Кода лемце?» Ся азозе: «Монь лемозе – Легион, сяс мес эздонк, аф ару ваймопожфта, ламодонга лама». 10И кармасть аф ару ваймопожфне эняльдема Иисусти, афолезень панце синь ся масторста.
11Ся пингоня панда лангса ванцть пяк лама тува. 12Аф ару ваймопожфне эняльдсть Тейнза: «Мярьк тейнек сувамда ня тувотнень потмос». 13Иисус мярьгсь, и аф ару ваймопожфне лиссть ся ломанть эзда и сувасть тувотнень потмос. Сембе тувотне – эздост кафтошка тёжянель – пандста ёрдасть пря инголи, комотсть эрьхкти и ваясть.
14Тувонь ваныхне ворьгодсть тоста и азондозь ошса и маластонь веленятнень эзга, мезе лиссь. Ломаттне састь ванома, мезе ина тиевсь. 15Синь мольсть Иисусонь малас и няезь: ся, конань эса ульсть кяжи ваймопожфне, тяни щаф и ащи шумбра ёньца – сяка ломанць, конань потмоса ульсь ламодонга лама кяжи ваймопожфта. Ломаттне эводсть. 16Эсь сельмосост няихне азондозь тейст сянь, мезе тиевсь тувотнень мархта и кяжи ваймопожфса колаф ломанть мархта. 17Эста эвотьф ломаттне кармасть эняльдема Иисусти: катк Сон туй ширдест.
18Мзярда Иисус кармась озама венчти, ся ломанць, конань потмоц аруясь аф ару ваймопожфнень эзда, вешсь пря молемс Сонь мархтонза. 19Но Иисус ашезе сяве сонь, а кошардозе: «Архт куду эсетненди, азонтк тейст сянь, мезе тись тейть Азорсь и кода Сон кельгозь ужяльдензе тонь». 20Сон тусь и ся вастова, конань лемоцоль Кемонь Ошт, кармась азонкшнема ломаттненди, мезе мархтонза тись Иисус. Сембе дивандакшнесть.
Иисус вельмафтсы кулофста синагогань оцюнять стиренц и пчкафтсы сяряди авать
(Матф. 9:18-26; Лук. 8:40-56)
21Мзярда Иисус венчса сась меки эрьхкть омба трвас, перьфканза пуромсь лама ломань. Сон ащесь эрьхкть трваса. 22Тов сась синагогань оцюнятнень эзда фкясь, лемоц Иаир. Иисусонь няемста сон прась пильгозонза 23и кармась пяк эняльдема: «Стирнязе кулома лангса. Сак путыть лангозонза кяттнень: пчкафтолить и кадолить сонь эряма». 24Иисус тусь мархтонза. Перьфканза мольсь пяк лама ломань, и синь сембе пяльде эцесть Сонь малазонза.
25Тоса ульсь фкя ава, кона кемгафтува киза сярядсь веронь шудемаса. 26Сон лама маятась ламоц пчкафтыень эзда, ётафтозе лангозост сембе уликсонц, а эздост кодамовок лезкс ашель, меколанкт, прянц марязе нинге сяда стакаста. 27Авась кулендсь Иисусонь колга, сяс фталга ётась ломаттнень ёткова Иисусти и токафтозе кяденц Сонь щамонцты. 28Авась арьсесь: «Токафтондяряса кядезень щамонцты, пчкан». 29Сяка ёткть веронь шудемац лоткась, и сон марнек ронгсонза марязе – пчкясь.
30Иисус эстокиге марязе: эздонза лиссь вий. Сон ломаттнень ёткса шарфтсь фталу и кизефтезе: «Кие токафнезе щамненди кяденц?» 31Тонафниенза мярьгсть Тейнза: «Тонць няйсак, мзяра ломань сембе пяльде люпштай эсот, и кизефнят, кие токанзе Тонь!» 32Но Иисус нинге ванондсь перьфпяльге, вешендезе сянь, кие тянь тиезе. 33Эста авась, шарьхкодемок, мезе мархтонза тиевсь, пелемать эзда трнатозь шаштсь Иисусть малас, прась инголенза и азондозе Тейнза сембе видеть. 34Иисус мярьгсь тейнза: «Стирняй, кемамаце пчкафтонзе тонь. Архт сетьмошиса и ульхть шумбра сярядемацень эзда».
35Мзярда Иисус нинге корхтась, састь синагогань оцюнять кудста кулянь азома: «Стирце кулось. Мезенди нинге томошиндасак Тонафтыть?» 36Иисус кулезе, мезе синь корхтасть, мярьгсь синагогань оцюняти: «Тят пеле. Аньцек кемак!» 37Сон киндинге ашезь мярьге мельганза молемда, аньцек сявозень мархтонза Пёторонь, Иаковонь и сонь брадонц Иоаннонь. 38Мзярда синь сувасть синагогань оцюнять пяли, Иисус няйсь абонтф, кайгиста аварди и явси ломатть. 39Сон мярьгсь тейст: «Мезенкса тяшкава ризнатада и аварттяда? Стирнясь ашезь кула, сон уды». 40Иисусонь лангса кармасть пеетькшнема. Но Сон мярьгсь сембонди лисемда, а Сонць стирнять тядянзон-алянзон и колма тонафниензон мархта сувась кудбяльксти, косоль стирнясь. 41Сон сявозе стирнять кядьта и мярьгсь тейнза: «Талифа́ куми́!» Тя ётафтови: «Стирня, мярьган тейть: стяк!» 42Стирнясь эстокиге стясь и кармась якама; тейнза ульсь кемгафтува киза. Тянь няиенза пяк дивандазевсть. 43Иисус кемоста мярьгсь: киндинге аф азонкшнемс тянь колга и кошардозень максомс стирняти кодамовок ярхцамбяль.
Currently Selected:
Марк 5: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
