Марк 6
6
Иисусонди аф кемайхть Назарет ошса
(Матф. 13:53-58; Лук. 4:16-30)
1Иисус лиссь тоста и тусь Эсь ошезонза. Тонафниенза мольсть мельганза. 2Мзярда сась ваймамань шись, Сон ушедсь тонафтома синагогаса. Ломаттне кулхцондозь Сонь и ламотне эздост дивандакшнесть: «Коста Тейнза сембось тя сась? И кодама ся смузьшись, кона Тейнза максф? И кода тяшкава оцю тефне тиендевихть Сонь кядьсонза? 3Дяряй Сон аф узерьса шапись, Мариянь цёрац, Иаковонь, Иосиянь, Иудань и Симононь брадсна? Афоли сазоронзовок тяса ётксонк?» И ашель мяльсна кулхцондомс Сонь и кемамс Тейнза.
4Иисус мярьгсь тейст: «Пророксь пара лувксса кирдеви эрь кодама вастса, но аньцек аф эсь масторсонза и аф эсь ломанензон ёткса, и аф эсь кудсонза». 5И Тейнза ашезь тиев тоса кодамовок дивань тев, аньцек мзярошка сярядиень лангс путозень кядензон и пчкафтозень синь. 6Иисус пяк дивандась синь аф кемамаснонды.
Иисус кучсыне кемгафтува апостолхнень
(Матф. 10:1,5-15; Лук. 9:1-6)
Тяда меле Сон якась перьфке ащи велетнень ланга и тонафнезень ломаттнень. 7Иисус тердезень кемгафтува тонафниензон, кармась кучсемост синь кафтонь-кафтонь и макссь тейст азорксши панцемс аф ару ваймопожфнень. 8Сон мярьгсь тейст мезевок аф сявондемс ки лангс мандоняда башка: аф кяскав, аф кши, аф серень ярмак, 9но пильгозост щакшнемс шнань карьсембяльхть и сявомс аньцек фкя щам. 10Нинге мярьгсь тейст: «Кодама кудс афоледе сува, ащеда тоса, мзярс аф тутада ся аймакста. 11Кда кие тинь аф васьфттядязь и аф кармай кулхцондомонт, эста туда тоста и шукадесть пульть пильгонтень лангста. Катк тя ули тейст муворгофтомань тяштьксокс. Видеста корхтан тейнть: судонь шиня Содом и Гоморра ошненди ули сяда тёждя ся ошть коряс».
12Тонафнихне тусть и азонкшнезь ломаттненди: «Шарфтода Шкайти!» 13Синь панцезь ламоц кяжи ваймопожфнень ломаттнень потмоста, и ламоц сярядихнень вадендезь вайса и пчкафнезь синь.
Иоанн Кстиндайть куломац
(Матф. 14:1-12; Лук. 9:7-9)
14Иисусонь колга кулятне якасть перьфпяльге. Синь пачкодсть Ирод оцязорти, и сон корхтась: «Тя Иоанн Кстиндайсь вельмась кулофста, и сяс тиенди тяфтама вии тефт». 15Лиятне корхнесть: «Сон Илиясь». А лиятне: «Сон кунардонь пророкнень лаца пророк». 16Ирод кулезень ня корхнематнень и мярьгсь: «Тя Иоанн, конань прянц керфтыне, вельмась кулофста».
17Самай тя Иродсь мярьгсь кундамс Иоаннонь и цинзерса озафтомс сонь пякстамгуду Иродиадань, Филипп брадонц рьванц инкса. Ирод сонь сявозе рьвакс, 18но Иоанн корхнесь Иродонди: «Койть коряс аф мярьгондеви тейть эрямс эсь брадцень рьванц мархта». 19Иродиадась кирдсь кяж Иоаннонь лангс, мялецоль шавфтомс сонь. Но тя тейнза ашезь тиев, 20сяс мес Ирод пельсь Иоаннонь эзда. Ирод содазе: Иоанн видексшинь и иняру ломань, и сяс ванфнезе сонь. Ирод кулхцонкшнезе Иоаннонь тонафтоманц и лама тиендсь сонь валонзон коряс. Сон оцю мяльса кулхцондозень Иоаннонь валонзон.
21Меколеньбяли Иродиаданди мувсь кяжень пандома ётка. Ирод шачемшинц сюнеда срхкафтсь оцю ила эсь маластонь ломанензонды, тёжянень оцюнятненди#6:21 тёжянень оцюня – тысяченачальник, командир; Римса тёжянь ушманонь лангса оцюнясь и Галилеянь оцюнятненди. 22Сувась Иродиадань стирец и ушедсь кштима. Сон пяк тусь Иродонь и инжиензон мяльс. Ирод оцязорсь мярьгсь стирти: «Анак кядьстон, мезе мяльце, и мон сянь максса тейть». 23Сон макссь вал стирти: «Мезе афолеть ана, максса тейть, нльне оцязорксшизень эзда пялетьке». 24Стирсь лиссь, кизефтезе тядянц: «Мезе кядьстонза анама?» Ся мярьгсь: «Анак Иоанн Кстиндайть прянц». 25Стирсь эстокиге эряскодозь мрдась оцязорти и мярьгсь: «Тяфтама мялезе: тяникиге кантфтк тейне Иоанн Кстиндайть прянц лапш шава лангса».
26Оцязорть пяк колавсь мялец, но максф валонц инкса и тоса ащи инжихнень инкса ашезе полафта эсь мяленц. 27Сон эстокиге кучезе фкя ушманонц и мярьгсь тейнза кандомс Иоаннонь прянц. Ся тусь пякстамгуду, керозе Иоаннонь прянц, 28кандозе лапш шава лангса и максозе стирти. Стирсь максозе прять эсь тядянцты.
29Мзярда тянь марязь Иоаннонь тонафниенза, синь састь, сявозь ронгонц и калмазь.
Иисус анды вете тёжятть ломань
(Матф. 14:13-21; Лук. 9:10-17; Иоанн 6:1-14)
30Апостолхне мрдасть Иисусти и азондозь тейнза семботь, мезе синь тисть и мезьс тонафтозь ломаттнень. 31Сон мярьгсь тейст: «Аряда мархтон сетьме вастс, тейнть аф ламос эряви ваймамс». Тоса, коса синь ащесть, ульсь пяк лама сашенды-тушенды ломаньда. Синь нльне изь ляда пингсна ярхцамска. 32Сяс синь ськамост тусть венчса сетьме вастс. 33Но ломаттне няезь, кода синь тусть уезь, и ламотне содазь синь. Сембе ошнень эзда ломаттне тусть ласькозь ведть трвава и венчта инголи пачкодсть тоза, коза срхксесь Иисус тонафниензон мархта. 34Мзярда Иисус лиссь венчста, Сон няйсь лама ломань. Тейнза ужялькс арасть синь, сяс мес синь ульсть кода учат, конатнень аш ванысна. Тяфта Сон кармась ламонди тонафтомост.
35Шись валгома лангсоль, сяс Иисусонь тонафниенза мольсть ваксозонза и мярьгсть: «Вастсь тяса шава, а пингсь лама ни. 36Нолдайть ломаттнень, катк молихть маластонь ошненди-веленятненди и мезевок рамайхть эстейст ярхцамс». 37Но Иисус каршезост мярьгсь: «Тинь максода тейст ярхцамс». Синь мярьгсть Тейнза: «Кали тейнек молемс кафта сятт динариень питне лангс кшинь рамама и андомс синь?» 38Сон кизефтезень: «Мзяра кшидонт? Арда ваность». Синь ванозь мзяра кшидост, и мярьгсть: «Минь вете кшиньке и кафта калоньке».
39Иисус мярьгсь озафнемс сембе ломаттнень пижелды нарнять лангс. 40И озасть кочкафкаста марса, сядонь и ведьгемонень ломань. 41Иисус сявозень вете кшитнень и кафта калхнень, кеподезень сельмонзон менели и бславазень. Сон синнезень кшитнень и максозень тонафниензонды, сят явондозь ломаттненди. Станяк сембонди явондозень кафта калхненьге. 42Сембе ярхцасть и топодсть. 43Сяльде тонафнихне кочкасть кемгафтува кептерь лятф сускомда и кал пакшта. 44А ярхцайда ульсь ветешка тёжянь аля.
Иисус моли ведть ланга
(Матф. 14:22-33; Иоанн 6:16-21)
45Тяда меле Иисус мярьгсь тонафниензонды озамс венчти и Сондедонза инголи ётамс эрьхкть тона пяли, Вифсаидав, а Сонць мзярс ляды тозк ломаттнень нолдама. 46Мзярда ломаттне тусть, Сон куцсь панда пряс озондома.
47Сась илядьсь, венчсь пачкодсь эрьхкть кучкас, а Иисус тя ёткть ськамонза ащесь эрьхкть трваса. 48Сон няезе, тонафниензонды стака миледемс, сяс мес уфась карша варма. И варьхмодемшовор Сон маладсь тейст ведть ланга молезь. Сонь мялецоль ётамс вакскаст. 49Мзярда тонафниенза няезь, кода Сон моли ведьга, арьсесть – тя шопача и кармасть пешкодома, 50сяс мес сембе Сонь няезь и пяк эводсть. Но Иисус эстокиге ушедсь мархтост корхтама: «Сетьмода! Тя Монан. Тяда пеле». 51Сон озась ёткозост венчти, и вармась лоткась. Синь пяк дивандазевсть, 52сяс мес сявок, мезе лиссь кшитнень мархта, ашезь шарьхкодев тейст, сяшкава калготт ульсть синь седисна.
Иисус пчкафни сярядихть Геннисаретонь масторса
(Матф. 14:34-36)
53Синь ётасть эрьхкть туркс, пачкодсть Геннисаретонь масторс и венчсна токась эрьхке трвати. 54Мзярда синь валгсть венчста, ломаттне эстокиге содазь Иисусонь. 55Синь ласькондезь сембе ся аймакть и ушедсть ацамнек каннема сярядихть тов, коса маряфнезь Иисусонь улеманц. 56И ков Сон ашезь сашенда – велес али ошс али аф оцю веленяс – ломаттне лихнезь сярядихнень мишендема-рамсема васттненди. Синь эняльдсть Иисусти максомс сярядихненди токамс хуш щам пенянцты. И сембе, кит токафнезь кядьснон Иисусти, пчксесть.
Currently Selected:
Марк 6: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
