Лука 13
13
13-тӥ ЛЮКЕТ
1Та дыре кинъёс ке но лыктыса Солы веразы, кызьы Пилат Галилеяысь вием адямиослэсь вирзэс соослэн курбонлы сётэм пудо виренызы сураз. 2Иисус соослы та ласянь шуиз: «Тазьы курадӟемзы понна таосыз Галилея муртъёс мукет Галилея адямиослэсь сьӧлыкоесьгес вал шуыса малпаськоды-а? 3Ӧвӧл, – шуисько тӥледлы, – нош ӧпкельыса сьӧлыкъёстылэсь ӧд ке куштӥське, ваньды тазьы ик быроды. 4Оло, Сӥлоам каланча дас тямыс мурт вылэ усьыса, соосты быдтӥз, но соос Иерусалимысь вань улӥсьёслэсь янгышоесьгес вал шуыса малпаськоды-а? 5Ӧвӧл, – шуисько тӥледлы, – нош ӧпкельыса сьӧлыкъёстылэсь ӧд ке куштӥське, ваньды тазьы ик быроды». 6Иисус таӵе мадён вераз: «Одӥг муртлэн виноград бакчаяз смоквапуэз мерттэмын вылэм; со емышсэ утчаны лыктэм но шедьтымтэ. 7Соку со виноград будэтӥсьлы шуэм: ”Тани мон куинетӥ арзэ та смоквапулэсь емышсэ утчаны ветлӥсько ни, нош номырзэ но уг шедьтӥськы, кора сое: мар со пайдатэк музъемез басьтыса улэ?” 8Нош виноград будэтӥсь солы ответ сётыса шуэм: ”Кузёе! Та арлы но кельты ай сое, мон солэсь котырзэ гудӟо но кыед вӧлдо: 9емыш уз вайы-а со. Ӧз ке вайы, вуоно арын коралод сое”».
10Иисус одӥгаз сӥнагогаын суббота нуналэ дышетыса улӥз. 11Отын дас тямыс ар ӵоже курадӟытӥсь духен улӥсь кышномурт вал: со куасалтӥськемын, йырзэ но ӝутэмез уг луы вал. 12Иисус, сое адӟыса, дораз ӧтиз но солы шуиз: «Кышномурт! Тон ас курадӟонэдлэсь мозмытскиськод». 13Со вылэ кизэ понӥз. Со соку ик шонертӥськиз но Инмарез данъяны кутскиз. 14Соку сӥнагогалэн кузёез, Иисуслэн суббота нуналэ бурмытэмезлы йыркуръяськыса, калыклы шуиз: «Вань куать нунал, куке ужаны яра. Соку ик йӧнатскыны лыктэ, суббота нуналэ уг яра». 15Солы Кузё-Инмар ответ сётыса шуиз: «Чеберъяськись! Котькудӥз но тӥ пӧлысь суббота нуналэ гидысьтыз ошсэ яке ишаксэ уг пертчылы но люктаны уг нуы-а? 16Нош тае, Авраамлэсь нылзэ, кудзэ шайтан дас тямыс ар талэсь азьвыл ини думылӥз, уг яра вал-а суббота нуналэ думетысьтыз мозмытыны?» 17Иисуслэсь та верам кылъёссэ кылыса, ваньзы Солы пумитъяськисьёс возьытэ вуизы. Вань калык шумпотӥз Солэн паймымон дано ужъёсыз понна.
18Иисус шуиз: «Инмар Эксэйлык малы укша, маин сое ӵошатом? 19Со горчица кидыслы укша, кудзэ адями басьтӥз но аслаз садаз мерттӥз; будӥз, бадӟым писпу луиз, ин тылобурдоос вайёсаз пегӟыса улӥзы». 20Эшшо вераз на: «Инмар Эксэйлыкез маин ӵошатом? 21Со нянь шӧмлы укша. Со шӧмез кышномурт басьтэм но ӝужйытозязлы куинь мертэт пызь пӧлы понэм».
22Городъёстӥ, гуртъёстӥ дышетыса, Иерусалиме сюрессэ азьланьтӥз.
23Кин ке но Солы шуиз: «Кузёе! Ӧжытэз гинэ адямиос утиськозы-а?» Иисус соослы шуиз: 24«Тыршелэ ӟоскыт капкатӥ пырыны, уго тӥледлы верасько, тросэз пырыны тыршозы, но уз быгатэ. 25Коркалэн кузёез султыса ӧссэ пытсаз ке, соку тӥ, педлон сылыса, ӧсэ йыгаськоды но шуоды: ”Кузё-Инмар! Кузё-Инмар! Усьты милемлы”. Нош Со тӥледлы ответ сётыса шуоз: ”Тӥледыз уг тодӥськы, кытысь тӥ”. 26Соку тӥ вераны кутскоды: ”Ми Тон азьын сиимы, юимы, милям ульчаосамы Тон дышетӥд”. 27Нош Со шуоз: ”Тӥледлы верасько: уг тодӥськы тӥледыз, кытысь тӥ. Кошке Мон дорысь, ваньды зэмлыктэм ужез лэсьтӥсьёс”. 28Инмар Эксэйлыкысь Авраамез, Исаакез, Иаковез но вань пророкъёсты адӟоды, нош тӥ асьтэос педпала уллямын луоды, отын бӧрдон, пинь сыскон луоз. 29Шундыӝужанысь но, шундыпуксёнысь но, уйпалась но, лымшорысь но лыктыса, Инмар Эксэйлыке интыяськозы. 30Берпумъёс пӧлын вань сыӵеос, кудъёсыз нырысь радын луозы; нырысьёс пӧлын вань сыӵеос, кудъёсыз берпум радын луозы».
31Со нуналэ фарисейёс пӧлысь куд-огез лыктыса Иисуслы веразы: «Пот, кошкы татысь, Ирод Тонэ виыны турттэ». 32Иисус шуиз: «Мыныса со ӟичылы вералэ: ”Периосты уллясько, нош висисьёсты бурмытъясько туннэ но, ӵуказе но. Куинетӥ нуналэ ужме быдэсто”. 33Озьы ке но Мон туннэ но, ӵуказе но, мукетаз но нуналэ азьлань мыныны кулэ, малы ке шуоно Иерусалимлэн палэназ пророк виемын мед луысал – озьы уг луы. 34Иерусалим, Иерусалим, пророкъёсты виылӥсь, тон доры ыстэмъёсты изъёсын жугылӥсь! Кызьы тылобурдо аслэсьтыз пиоссэ бурд улаз люка, кӧня пол Мон тынэсьтыд нылпиостэ люканы турттӥсько вал, нош тӥ кулэ ӧд каре! 35Тани тӥляд коркады тӥледлы тырттэм кельтӥське. Тӥледлы верасько: ”Кузё-Инмарлэн нимыз понна Лыктӥсь дано!” шуытозяды, тӥ Монэ уд ни адӟе».
Currently Selected:
Лука 13: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
