Лука 18

18-тӥ ЛЮКЕТ

1Усем мылкыдын улытэк, ялан вӧсяськыса улонлэн кулэез сярысь Иисус соослы мадён вераз, 2Со шуиз: «Одӥг городын Инмарлэсь курдасьтэм судья вылэм, со адямиослэсь уг возьдаськы вылэм. 3Со городын ик вылэм одӥг палкышно, со судья доры лыктыса шуылэм: ”Тушмонъяськись муртэ азьын мыным дурбасьты”. 4Нош солэн кема дыр ӵоже мылыз потымтэ. Но бӧрысь ас понназ ачиз шуэм: ”Инмарлэсь уг ке но курдаськы, калыклэсь уг ке но возьдаськиськы, 5та палкышно мыным каньылэн улыны маза уг ни сёты бере, солэн палаз пыро: огпӧртэм мыным акыльтыса медаз ни ветлы”». 6Кузё-Инмар шуиз: «Кылӥськоды-а, мар шуэ шонер улӥсьтэм судья? 7Инмар-а уз утьы Аслэсьтыз быръемъёссэ, уй но нунал Солы тэльмырисьёсты, соослы дурбасьтыны уз-а дырты? 8Тӥледлы верасько: ӝоген соослы дурбасьтоз. Нош Адями Пи лыктӥз ке, шедьтоз на меда музъем вылысь осконэз?»

9Асьсэды шонер улӥсьёс шуыса лыдъясьёслы, нош мукетъёссэ ултӥяса улӥсь куд-ог муртъёслы Иисус таӵе мадён вераз: 10«Кык адямиос храме вӧсяськыны пыриллям: одӥгез – фарисей, нош мукетыз – выт бичась. 11Фарисей султыса ас понназ ачиз тазьы вӧсяськем: ”Инмаре! Тыныд тау карисько мон сыӵе ӧвӧлысь, кыӵеесь луо мукет муртъёс – адями таласьёс, ултӥясьёс, азыса-калгыса улӥсьёс яке тани та выт бичась кадь. 12Арнялы быдэ кык пол визясько, мар гинэ басьтӥсько, дасэтӥ люкетсэ сётӥсько”. 13Нош выт бичась, палэнын сылыса, синзэ но инме ӝутыны дӥсьтымтэ. Со гадяз шуккылыса шуэм: ”Инмаре! Жаля монэ, сьӧлыкоез!” 14Тӥледлы верасько: соиз сярысь таиз юнгес шонере потыса дораз бертӥз: уго котькудӥз но ассэ ачиз вылӥе ӝутӥсь мурт ултӥямын луоз, нош ассэ ачиз ултӥясь мурт – ӝутӥськоз».

15Бордазы мед йӧтӥськоз шуыса, Иисус доры пичи нылпиосты но вайылӥзы. Нош дышетскисьёсыз, тае адӟыса, соосты пырыны лэзьытэк улӥзы. 16Иисус соосты дораз ӧтьыса шуиз: «Мон доры нылпиосты ветлыны лэзе, эн люкетэ соослы, таӵеослэн Инмар Эксэйлыксы вань уго. 17Зэм ик тӥледлы верасько: кин Инмар Эксэйлыкез пичи пинал кадь кабыл ӧз ке басьты, со отчы уз пыры».

18Кин ке но кузёяськисьёс пӧлысь Иисуслэсь юаз: «Ӟеч Дышетӥсь! Быронтэм улонэз басьтон понна мон мар карыны кулэ?» 19Иисус солы шуиз: «Малы тон Монэ ”ӟеч” шуиськод? Одӥг Инмар сяна, нокин но ӟеч ӧвӧл. 20Таӵе курон-косонъёсты тодӥськод: азон-калгон сьӧлыке эн пыры; эн виы; эн лушкаськы; ӧрекчаськыса ӧвӧлтэмзэ эн вера; атайдэ но, анайдэ но сӥлы кар». 21Нош со шуиз: «Ваньзэ тае мон егит дырысеным ик быдэсъяй». 22Тае кылыса, Иисус солы шуиз: «Одӥгез гинэ уг тырмы на тыныд: маид вань, ваньзэ вуза но кураськисьёслы сётъя, со понна тынад узырлыкед Инмын луоз. Лыкты, Мон сьӧры мын». 23Нош со тае кылыса ӝожомиз, малы ке шуоно туж узыр вал. 24Иисус талэсь ӝожомемзэ адӟыса шуиз: «Макем секыт трос узырлыксы ванё муртъёслы Инмар Эксэйлыке пырыны! 25Уго узыр муртлы Инмар Эксэйлыке пырон сярысь, верблюдлы капчигес вень пась пыр потыны». 26Тае кылӥсьёс шуизы: «Кин бен утиськыны быгатоз?» 27Иисус шуиз: «Адямиос мае лэсьтыны уг быгато, Инмар ваньзэ лэсьтыны быгатэ».

28Петр шуиз: «Тани ми ваньзэ кельтӥмы но Тон сьӧры мыныны потӥмы». 29Иисус соослы шуиз: «Зэм ик тӥледлы верасько: Инмар Эксэйлык понна кин корказэ яке анай-атайзэ, яке агай-вынъёссэ, яке сузэр-апайёссэ, яке кышнозэ, яке нылпиоссэ кельтӥз, 30со таяз улонын ик тросгес басьтытэк уз кыльы, вуоно даурын быронтэм улон со басьтытэк уз кыльы».

31Иисус, Аслэсьтыз дас кыксэ ик дышетскисьёссэ ӧтьыса, соослы шуиз: «Тани асьмеос Иерусалим пала тубиськомы, пророкъёс пыр Адями Пи сярысь ваньмыз гожтӥськем быдэсмоз: 32Сое язычникъёс кие сётозы, сӥтэм-сантэм карозы, ултӥялозы, Со вылэ сялалозы, 33жугозы, виёзы; нош Со куинетӥ нуналаз улӟыса султоз». 34Но соос та верамысь номырзэ но ӧз валалэ; та кылъёс соослэсь ватӥськемын вал, верамез соос ӧз валалэ.

35Иерихон доры вуыкуз, сюрес дурын кураськыса пуке вал одӥг синтэм мурт. 36Со вӧзтӥ калык ортче шуыса кылӥз но адямиослэсь юаз: «Мар та таӵе?» 37Солы Назаретысь Иисус лыктэ шуизы. 38Соку со черектӥськиз: «Давидлэн Пиез Иисус! Жаля монэ». 39Азьпалтӥ мынӥсьёс сое шыпыт улыны косӥзы; нош со эшшо но бадӟыменгес кесяськиз: «Эй, Давидлэн Пиез! Жаля монэ». 40Иисус дугдӥз но сое Ас дораз вайыны косӥз. Со доры лыктэм бере солэсь юаз: 41«Мар тыныд Мынэсьтым кулэ?» Со шуиз: «Кузёе! Синмы мед усьтӥськысал». 42Иисус солы шуиз: «Адӟись лу! Тынад осконэд тонэ утиз». 43Со соку ик адӟыны кутскиз но, Инмарез данъяса, Иисус бӧрсьы мынӥз. Вань калык, тае адӟыса, Инмарез ушъяны-данъяны кутскиз.

Currently Selected:

Лука 18: УДМБИБ

Highlight

Copy