Лука 19

19-тӥ ЛЮКЕТ

1Собере Иисус Иерихонэ пыриз, со пыр ортчиз. 2Соку выт бичасьёслэн йырзы, Закхей нимо узыр адями, 3Иисусэз, кин Со шуыса, адӟыны турттыса утчаз, но калык сьӧрысен адӟыны ӧз быгаты, малы ке шуоно со лапег мугоро вал. 4Азьпала бызьыса потӥз но, Иисусэз адӟон понна, смоквапуэ тубиз, – Со та вӧзтӥ ортчыны кулэ вал уго. 5Иисус та интые вуэм бераз вылэ учкиз но, Закхеез адӟыса, солы шуиз: «Закхей! Ӝоггес васькы, туннэ Мон тынад коркад луыны кулэ». 6Со ӝогак васькиз но шумпотыса Иисусэз дораз пыртӥз. 7Тае адӟыса, ваньзы ӟургетыны кутскизы, Со сьӧлыко мурт доры пыриз шуыса вераськизы. 8Нош Закхей султӥз но Кузё-Инмарлы шуиз: «Кузёе! Ӝыны ваньбурме кураськисьёслы сёто, кинэ ке маин ке ӝоже уськытӥськем ке, пунэмме ньыль полэс берыкто». 9Иисус солы шуиз: «Туннэ нуналэ та коркалы утиськон лыктӥз, малы ке шуоно со но Авраамлэн пиез, 10Адями Пи быремзэ утчаны, сое утьыны лыктӥз уго».

11Соос тае кылзӥськыку, мадён ватсаз на. Иерусалимлы матэ вуэм бере соос малпазы, ӝоген Инмар Эксэйлык вуыны кулэ шуыса. 12Иисус вераз: «Вылӥ, дано выжыысь кыӵе ке но адями кыдёкысь шаере мыныны но аслыз эксэйлык басьтыса берытскон вылысь сюрес вылэ дасяськем. 13Дас ляльчиоссэ ӧтем но соослы дас мина#19:13 мина – Рим кунысь зарни яке азвесь коньдон коньдон сётыса шуэм: ”Мон бертытозь, соосты уже кутэ”. 14Нош татын улӥсьёс сое кӧтвеськантэм каро вылэм. Со бӧрсьы вераськон нуисьёсты ыстыса шуиллям: ”Милям сое асьмелы эксэй кареммы уг поты”. 15Эксэйлык басьтыса берытскем бераз, кинлэсь мар басьтэмзэ тодыны шуыса, азвесьсэ сётъям ляльчиоссэ ӧтьытэм. 16Нырысетӥез лыктыса шуэм: ”Кузё! Тынад минаед дас мина вайиз”. 17Солы шуэм: ”Ярам, лякыт ляльчи! Ӧжытын но оскымон луэмед понна басьты дас городэз киулад”. 18Кыкетӥез лыктыса шуэм: ”Кузё! Тынад минаед вить мина вайиз”. 19Таизлы но шуэм: ”Тон но вить городлы кивалтӥсь лу”. 20Куинетӥез лыктыса шуэм: ”Кузё! Тани тынад минаед, сое мон кышетэ бинялтыса вози. 21Мон тынэсьтыд кышкай, тон лек адями ук: мае ӧд тыры – басьтӥськод, мае ӧд кизьы – араськод”. 22Кузёез солы верам: ”Ымысьтыд потэм кылыдъя тонэ, кескич ляльчи, судить каро! Тон тодӥськод вал, мон лек адями, тырымтэме басьтӥсько, кизьымтэме арасько шуыса. 23Бертэм берам отысь мон пайда поттыса басьтысал, нош малы тон мынэсьтым азвесьме уже ӧд куты?” 24Сылӥсьёслы верам: ”Басьтэ солэсь мина коньдонзэ но, кинлэн дас минаез вань, солы сётэ”. 25Солы шуиллям: ”Кузё! Солэн дас минаез вань”. 26”Тӥледлы верасько: ванё муртлы сётӥськоз, нош ӧвӧло муртлэн маиз вань, соизэ но басьтозы. 27Монэ эксэй каремзы потӥсьтэм тушмонъёсме, татчы вайыса, мон азьын тышкалэ”». 28Тае верам бераз Иисус азьлане кошкиз, Иерусалим пала тубиз.

29Виффагияен Вифания гуртъёс доры, Елеон шуон гурезьлы матэ вуэм бераз Аслэсьтыз кыксэ дышетскисьёссэ ыстӥз 30но соослы шуиз: «Вадьсысьтыды гуртэ мынэлэ. Отчы пырем берады ик гозыям ишакпиез шедьтоды, адямиос пӧлысь со вылэ нокин но, ноку но ӧз на пуксьылы. Пертчыса сое татчы вае. 31Нош кин ке тӥлесьтыд юаз ке: ”Малы пертчиськоды?” Солы тазьы шуэлэ: ”Со Кузё-Инмарлы кулэ”». 32Ыстэм муртъёс мынӥзы но шедьтӥзы озьы, кызьы Со вераз соослы. 33Ишакпиез пертчылыкузы, кузёосыз соослы шуизы: «Малы ишакпиез пертчылӥськоды?» 34Соос ответ сётӥзы: «Со Кузё-Инмарлы кулэ». 35Сое Иисус доры вайизы; ишакпи вылэ дӥськутсэс вализы но со вылэ Иисусэз пуктӥзы. 36Со мыныку, адямиос сюрес вылэ дӥськутсэс вӧлдӥзы. 37Елеон гурезьысь васьконлы матэ вуэм бераз вань дышетскисьёсыз шумпотыса, вань паймымон ужъёсты адӟемзы понна бадӟым куараен Инмарез данъяны кутскизы. 38Веразы: «Кузё-Инмарлэн нимыз понна лыктӥсь Эксэй дано! Каньыллык Инмын, данлык вылӥын!»#19:38 Пс. 117:26 39Калык пӧлысь куд-ог фарисейёс Иисуслы шуизы: «Дышетӥсь! Эн лэзь, дугдыты дышетскисьёстэ». 40Нош Со ответ сётыса шуиз: «Тӥледлы верасько: соос дугдӥзы ке, изъёс черектӥськозы». 41Иерусалимлы матэ вуэм бераз, солэн шораз учкыса, со сярысь малпаса бӧрдыны кутскиз. 42Собере Иисус шуиз: «Эй, Иерусалим! Туннэ нуналад ке но коть тон тодысалыд ке, кыӵе ужъёс каньыллыке мыныны тыныд юртто! Но али тынад син азьысьтыд со ватэмын. 43Уго тон доры вуозы сыӵе нуналъёс, – тушмонъёсыд, окопъёс гудыса, тонэ котыртозы, котыр ласянь тонэ ӝиптозы, 44Инмарлэсь тон доры лыктон дырзэ тодымтэед понна тонэ таркалозы, пушкад нылпиостэ виылозы, из вылад издэ но уз кельтэ». 45Храме пырыса, Иисус отын вузкарисьёсты, басьяськисьёсты улляса поттаны кутскиз. 46Соослы Иисус шуиз: «Гожтэмын: ”Мынам коркае – вӧсяськон корка”, нош тӥ сое лушкаськисьёслы люкаськон интылы пӧрмытӥды». 47Котькуд нунал храмын дышетыса улӥз. Архиерейёс, книга тодӥсьёс, калыклэн тӧроосыз Сое виён амал утчазы. 48Но ӧз шедьтэ, кызьы Сое виыны луысал, малы ке шуоно вань калык, сьӧрысьтыз кыльытэк, Сое кылзӥськыса ветлӥз.

Currently Selected:

Лука 19: УДМБИБ

Highlight

Copy