Лука 20

20-тӥ ЛЮКЕТ

1Одӥгаз нуналэ Иисус храмын калыкез дышетыса, Ӟеч Ивор вераса улон дыръя Со доры архиерейёс, книга тодӥсьёс тӧроосын ӵош лыктӥзы 2но Солы шуизы: «Милемлы вера, кыӵе кужымен Тон тае лэсьтӥськод, кин Тыныд таӵе кужым сётӥз?» 3Соослы ответ сётыса, Иисус шуиз: «Мон но тӥледлы одӥг юан сёто, вералэ Мыным: 4Иоаннлэн пылатонэз Инмысен вал-а яке адямиос бордысен-а!» 5Нош соос куспазы вераськыса шуизы: «”Инмысен” ке шуимы, Со шуоз: ”Малы нош тӥ солы ӧд оске?” 6”Адямиос бордысь” ке шуимы, вань калык асьмемыз изэн тышкалоз, уго калык, Иоанн пророк вал шуыса оскыса улэ». 7Соин ответ сётӥзы: «Ум тодӥське, кытысь». 8Иисус соослы шуиз: «Мон но тӥледлы уг вера, кыӵе кужымен Мон тае лэсьтӥсько».

9Иисус таӵе мадёнэз калыклы вераны кутскиз: «Одӥг адями виноград бакча мерттэм, сое виноград будэтӥсьёс кие сётэм но кема дырлы кошкем. 10Дыр вуэм но, виноград будэтӥсьёс доры виноград бакчаысь емышъёс мед сётозы шуыса, со ляльчизэ ыстэм. Нош виноград будэтӥсьёс жугиллям сое, номыр но сётытэк келяллям. 11Эшшо мукет ляльчизэ ыстэм, нош соос тазэ но жугыса, тышкаськыса номыр но сётытэк келяллям. 12Эшшо куинетӥзэ ыстэм на, нош соос тазэ но ляльчиез вӧсь, яраё карыса улляса лэзиллям. 13Соку виноград бакчалэн кузёез шуэм: ”Мыным мар кароно? Ысто аслэсьтым яратоно пиме; оло нош сое адӟыса возьдаськозы”. 14Нош виноград будэтӥсьёс, сое адӟыса, куспазы вераськыса шуиллям: ”Та атай юртлы кузёе кылёно. Ойдолэ, мыныса сое виёме, солы сюроно ваньбур асьмелы луоз”. 15Виноград бакча сьӧры поттыса, сое вииллям. Виноград бакчалэн кузёез соослы мар бен кароз? 16Лыктоз но со виноград будэтӥсьёсты виылоз, виноград бакчазэ мукетъёслы сётоз». Тае кылэмъёс шуизы: «Тазьы ноку но медаз лу!» 17Нош Иисус шоразы учкыса шуиз: «Мар шуэм луэ тазьы гожтэм: ”Корка пуктӥсьёслэн кулэтэм карыса куштэм иззы корка сэреглэн улаз инъет йыр луыса пуксиз”?#20:17 Пс. 117:22 18Ваньмыз, кин та из вылэ усёз – пазьгиськоз; нош кин вылэ со усёз, сое паньгатоз». 19Со дыре архиерейёс, книга тодӥсьёс Иисусэз киултыны турттыса утчазы, но калыклэсь кышказы, уго валатскизы, соос сярысь та мадён верамын вал шуыса. 20Иисус сьӧрын чакласькыса улӥзы; йӧно, оскись тусъем кариськыса, кыӵе ке но кыл вылын Сое кутыны но кузёйыръёслы, кивалтӥсь кие сётыны мед быгатозы шуыса, кескич адямиосты ыстӥзы. 21Соос Иисуслэсь юазы: «Дышетӥсь! Ми тодӥськомы, Тон шонер вераськод, дышетӥськод; нокыӵе но ымныр шоры уд учкиськы, Инмарлэн сюресэзлы шонер дышетӥськод. 22Яра-а милем кесарьлы выт тырыны, уг яра-а?» 23Нош Иисус, кескич сямзэс тодыса, соослы шуиз: «Малы тӥ Мынэсьтым визьме сынаськоды? 24Возьматэ Мыным динарийдэс: кинлэн со вылын тусбуез но гожтӥськемез». Соос шуизы: «Кесарьлэн». 25Иисус соослы шуиз: «Озьы бере, кесарьлэсьсэ кесарьлы сётэлэ, нош Инмарлэсьсэ – Инмарлы». 26Калык азьын Сое кыл вылын кутыны ӧз быгатэ, Солэн ответ сётэмезлы абдраса, шып кариськизы.

27Соку «улӟыса султон ӧвӧл» шуыса дышетӥсь саддукейёс пӧлысь куд-огез лыктыса юазы: 28«Дышетӥсь! Моисей милемлы гожтӥз: ”Кинлэн ке кышнояськем агаез кулыса кышнозэ нылпитэк кельтӥз ке, солэн выныз сое кышно вайыны но агаезлэсь выжызэ утьыны кулэ”. 29Сизьым агай-вынъёс вал: нырысетӥез кышнояськиз но нылпи кельтытэк кулӥз. 30Кыкетӥез сое кышнолы вайиз, соиз но нылпи кельтытэк кулӥз. 31Куинетӥез сое кышно басьтӥз; ваньзы, сизьымназы ик, нылпи кельтытэк кулӥзы. 32Ваньзы бере кышномурт но кулӥз. 33Озьы бере, улӟыса султон нуналэ кудзылы со кышно луоз? Сизьымназы но сое кышно каризы вал уго». 34Иисус соослы ответ сётыса шуиз: «Та дуннелэн нылпиосыз кышноясько, бызё. 35Сояз дуннее вуыны но кулэмысь улӟыса султыны кылдэмъёс уг но кышноясько, уг но бызё, 36уг но куло ни, – соос Кылчинъёслы ӵошало. Улӟыса султо но Инмарлэн пиосыз луо. 37Кулэмъёслэсь улӟыса султонзэс Моисей но куак дорысен возьматӥз, соку со Кузё-Инмарез Авраамлэн Инмарез, Исааклэн Инмарез, Иаковлэн Инмарез шуыса нимаз. 38Инмар – кулэмъёслэн Инмарзы ӧвӧл, Со – улэпъёслэн Инмарзы. Инмар азьын ваньмыз улэпесь». 39Та ласянь книга тодӥсьёс пӧлысь куд-огез шуизы: «Дышетӥсь! Тон умой верад». 40Номыр сярысь но Солэсь юалляськыны ӧз дӥсьтэ ни. Иисус соослы шуиз: 41«Малы нош верало, Христос Давидлэн Пиез шуыса? 42Нош псалом книгаын ачиз Давид вера: ”Кузё-Инмар мынам Кузё-Инмарелы шуиз: 43”Тушмонъёстэ пыд улад понытозям, Мынам бурпалам пук”.#20:43 Пс. 109:1 44Озьыен, Давид Сое Кузё-Инмар шуэ, кызьы Со солэн Пиез луоз?» 45Вань калык кылзӥськыса улыку, Иисус дышетскисьёсызлы шуиз: 46«Чаклаське книга тодӥсьёслэсь: соос кузь дӥськутэн ветлыны ярато, калык люкаськон интыосын ӟечкыламез, сӥнагогаосын азьпалан пуконэз, сиён-юонъёс дыръя нырысетӥ радъёсын улонэз ярато. 47Соос палкышноослэсь юртъёссэс сиё, чеберъяськыса кема вӧсясько; со понна соос эшшо но юнгес судить каремын луозы».

Currently Selected:

Лука 20: УДМБИБ

Highlight

Copy