Улон-вылон 11
11
11-тӥ ЛЮКЕТ
1Быдэс музъем вылын одӥг кыл, одӥг вераськон вал. 2Шундыӝужан палась вырӟыса, соос Сеннаар музъемысь ӵошкыт интыез шедьтӥзы но отчы улыны интыяськизы. 3Огзылы огзы соос шуизы: «Кирпичъёс лэсьтоме, тылын кыдатоме». Изъёс интые кирпичъёс тыризы, нош раствор интые сюй сир (битум) тыризы. 4Соос шуизы: «Ойдолэ, асьмелы город пуктоме, инме вуись ӝужыт каланча-башня отчы ӝутоме, озьы, быдэс дунне вылэ пазьгиськеммылэсь азьло ниммес данэ поттомы». 5Соку Кузё-Инмар васькиз адямиослэсь лэсьтоно городзэс, каланчазэс учкыны. 6Кузё-Инмар шуиз: «Тани, таос ваньзы одӥг калык, ваньзылэн соослэн одӥг вераськон кылзы, тани, мар лэсьтыны соос кутскизы, мар малпазы, сое лэсьтэмысь соос уз дугдэ. 7Ваелэ васькоме но соослэсь кылзэс сураломе, ог-огзэс валамысь мед дугдозы». 8Кузё-Инмар соосты отысь быдэс дунне вылэ улыны пазьгытӥз; соку соос городэз [но, каланчаез но] пуктэмысь дугдӥзы. 9Соин солы таӵе ним сётэмын: Вавилон#11:9 Вавилон – «сураськон» шуыса берыктӥське, уго отысен Кузё-Инмар быдэс дуннелэсь вераськон кылзэ сураз но татысен Кузё-Инмар соосты быдэс дунне вылэ улыны пазьгытӥз.
10Тани Сӥмлэсь вордӥськем выжыоссэ гожъян: Сӥмлы сю арес вал, ву нюртон дугдэм бере кык ар ортчыса, солэн Арфаксад пиез вордӥськиз; 11Арфаксад вордӥськем бере Сӥм вить сю ар улӥз на, солэн пиосыз, нылъёсыз вордӥськизы; [собере со кулӥз]. 12Арфаксад куамын вить [135] ар улӥз но солэн [Каинан] пиез вордӥськиз. [Каинан вордӥськем бере Арфаксад куинь сю куамын ар улӥз, солэн пиосыз, нылъёсыз вордӥськизы, собере со кулӥз. Каинан сю куамын ар улӥз но, солэн пиез вордӥськиз –] Сала. 13Сала вордӥськем бере Арфаксад [Каинан] ньыль сю куинь [330] ар улӥз на, солэн пиосыз, нылъёсыз вордӥськизы, [собере со кулӥз]. 14Сала куамын [130] ар улӥз но, солэн Евер пиез вордӥськиз. 15Евер вордӥськем бере Сала ньыль сю куинь [330] ар улӥз, солэн пиосыз, нылъёсыз вордӥськизы, [собере со кулӥз]. 16Евер куамын ньыль [134] ар улӥз, солэн Фалек пиез вордӥськиз. 17Фалек вордӥськем бере Евер ньыль сю куамын [370] ар улӥз, солэн пиосыз, нылъёсыз вордӥськизы, [собере со кулӥз]. 18Фалек куамын [130] ар улӥз но, солэн Рагав пиез вордӥськиз. 19Рагав вордӥськем бере Фалек кык сю укмыс ар улӥз, солэн пиосыз, нылъёсыз вордӥськизы, [собере со кулӥз]. 20Рагав куамын кык [132] ар улӥз но, солэн Серух пиез вордӥськиз. 21Серух вордӥськем бере Рагав кык сю сизьым ар улӥз, солэн пиосыз, нылъёсыз вордӥськизы, [собере со кулӥз]. 22Серух куамын [130] ар улӥз но, солэн Нахор пиез вордӥськиз. 23Нахор вордӥськем бере Серух кык сю ар улӥз, солэн пиосыз, нылъёсыз вордӥськизы, [собере со кулӥз]. 24Нахор кызь укмыс [79] ар улӥз но, солэн Фарра пиез вордӥськиз. 25Фарра вордӥськем бере Нахор сю дас укмыс [129] ар улӥз, солэн пиосыз, нылъёсыз вордӥськизы, [собере со кулӥз]. 26Фарра сизьымдон ар улӥз но, солэн Аврам, Нахор но Аран пиосыз вордӥськизы.
27Тани Фарралэсь вордӥськем выжыоссэ гожъян: Фарралэсь вордӥськизы Аврам, Нахор но Аран. Аранлэсь Лот вордӥськиз. 28Аран Халдеяысь аслаз вордӥськем Ур городаз, атаез дорын Фарра улэп дыръя кулӥз. 29Аврам но, Нахор но кышно басьтӥзы; Аврамлэн кышноезлэн нимыз Сара; Нахорлэн кышноезлэн нимыз Милка, со Аранлэн нылыз, Аран Милкалэн атаез, Искалэн атаез. 30Сара нылпи вайисьтэм вал, солэн нылпиез ӧй вал. 31Фарра Аврам пизэ, Аранлэсь Лот пизэ – пиезлэсь пизэ, Сара кензэ – Аврам пиезлэсь кышнозэ – бордаз люказ но соосын ӵош Халдеяысь Ур городысь потӥз Ханаан музъеме мынон вылысь; нош Харранэ вуизы но отчы дугдӥзы. 32[Харран музъемын] Фарралы кык сю вить арес тырмиз но Фарра Харранысен кулӥз.
Currently Selected:
Улон-вылон 11: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
