Улон-вылон 17
17
17-тӥ ЛЮКЕТ
1Аврамлы укмыстон укмыс арес вал, Кузё-Инмар Аврамлы возьматскиз но шуиз: «Мон Ваньмызлэсь Кужмо Инмар, Мон азьын ул, дун-шектэм лу; 2Аслэсьтым сӥзён-косонме Асэным тон вискы пукто, выжыдэ туж-туж трос лыдо каро». 3Соку Аврам пыдесъяськыса музъемозь йыбырттӥз. Инмар солы ялан вераз на, Со шуиз: 4«Мон – тонэн сӥзён-косон пыр кусып кылдытӥсь: туж трос калыкъёслэн атайзы тон луод. 5Та дырысен тонэ Аврам уз ни шуэ, тынад нимыд Авраам#17:5 Авраам (Абрагам) – «трос калыкъёслэн атайзы» шуэм луэ луоз, уго Мон тонэ трос калыкъёслы атай каро; 6тон бордысь трос-трос лыдо калык потто, тон бордысь калыкъёсты потто, эксэйёс но тон бордысь потозы. 7Асэным тон куспы сӥзён-косонме пукто, тон бере вордӥськем нылпиосыд куспы но, выжыысь выжыосы, ышисьтэм-бырисьтэм сӥзён-косонме пукто: Мон тынад Инмаред луо, тон бере нылпиосыдлы но Инмар луо; 8тыныд, тон бӧрсьы кылем тынад выжыедлы та музъемез сёто, кудӥз кузя тон али ветлӥськод, – быдэс Ханаан музъемез киулазы пумтэм вапумъёс ӵожелы сёто; соослы Инмар луо». 9Собере Инмар Авраамлы шуиз: «Нош тон Мынэсьтым сӥзён-косонме уть, тон но, тон бере улӥсь нылпиосыд но выжыысь выжыосы. 10Та Мынам сӥзён-косонэ, сое тӥ Монэн тӥ куспын утьыны кулэ, тон бере улоно нылпиосыд куспын но, [выжыысь выжыосы]: вань пиосмуртъёстылы вандӥськон сямез ортчытыны кулэ; 11пиосмурт луон тодметтылэсь йылзэ вандэ: вандӥськон сямез ортчытон – со Монэн тӥ куспын сётэм сӥзён-косонлэн тодметэз луоз. 12Тямыс нунал тырмем бере тӥляд выжыысьтыды вань пи нуныостылы вандӥськон сямез ортчытоно – тӥляд коркады-а со вордӥськемын, я мурт выжыысь адямилэсь азвесь тырыса басьтэмын-а, тынад кидысэдлэсь вордскемын ке но ӧвӧл. 13Тынад коркад вордскемезлы но, азвесь тырыса басьтэмедлы но одно ик вандӥськон сямез ортчытоно, соку Мынам сӥзён-косонэ тӥляд мугор вылады пусъемын луоз, сӥзён-косонэ пумтэм вапумъёс улоз. 14[Тямыс нунал тырмыса] вандӥськон сямез ортчытымтэ пимурт ас калыкез пӧлысь быдтэмын луоз, со Мынэсьтым сӥзён-косонме сӧриз уго». 15Соку Инмар Авраамлы шуиз: «Сара кышнодэ Сара шуыса эн ни нима, солэн нимыз Сарра мед луоз; 16Мон сое бакель каро, со пыр тыныд пи сёто; сое бакель каро но, со бордысь калыкъёс, калыкъёслэн эксэйёссы потозы». 17Авраам пыдесъяськыса музъемозь йыбырттӥз но серекъяны кутскиз, аслыз ачиз шуиз: «Сю аресъем муртлэсь пи вордскоз шат? Сарралы укмыстон арес, нуны вайыны быгатоз шат?» 18Соку Авраам Инмарлы шуиз: «Э, Измаил Тынад син азьысьтыд медаз усьы вал!» 19Нош Инмар [Авраамлы] шуиз: «Ӵапак тынад кышноед, Сарра, тыныд пи нуны ваёз, солы тон Исаак ним сётод; пумтэм вапумъёс ӵожелы сӥзён-косон пыр соин кусып кылдыто: [Мон солы но,] со бӧрсьы солэн улоно выжыезлы но [Инмар луо]. 20Измаил сярысь тынэсьтыд курондэ но кылӥ: тани, Мон сое бакель каро, йылэто, туж-туж трос лыдо каро; дас кык кивалтӥсь йыръёс со бордысь потозы; со бордысь трос лыдо калык потто. 21Но вуоно арын та дыре ик Сарралэн тыныд ваем Исаак пиеныд Мон сӥзён-косон пыр кусып кылдыто». 22Инмар Авраамен вераськемысь дугдӥз, со дорысь ӝутскиз.
23Авраам кутӥз аслэсьтыз Измаил пизэ, ас корказ вань вордӥськемъёсты яке азвесь тырыса дунэн вань басьтэмъёсты, Авраам юртысь вань пиосмуртъёсты, ваньзылы вандӥськон сямез ортчытӥз самой со нуналэ, кызьы солы Инмар вераз. 24Авраамлы укмыстон укмыс арес вал, солы вандӥськон сямез ортчытыку. 25Нош пиезлы, Измаиллы, дас куинь арес вал, вандӥськон сямез ортчытыку. 26Со нуналэ ик вандӥськон сям ортчытэмын вал Авраамлы но, солэн Измаил пиезлы но, 27Авраамен ӵош солэн корказ улӥсь вань пиослы – солэн корказ вордскем, мурт выжыысь азвесь тырыса басьтэм вань пиослы вандӥськон сям ортчытэмын вал.
Currently Selected:
Улон-вылон 17: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
