Улон-вылон 18
18
18-тӥ ЛЮКЕТ
1Нуназе ӟырдыт пӧсь вакытэ, Мамре тыпы сурд вӧзысь балаганаз пырон дорын пукыкуз, Кузё-Инмар Авраамлы возьматскиз. 2Синъёссэ ӝутыса учкиз но, тани, солэн ваче пумитаз куинь пиосмуртъёс сыло. Соосты адӟем бераз балаганаз пырон ӧс выжыысен бызьыса пумитазы мынӥз но музъемозь ик йыбырттӥз. 3Со шуиз: «Кузё-Атае! Тон азьын гажаны-жаляны ярамон адями мон луи ке, Ас ляльчиед вӧзтӥ эн кошкы; 4ӧжытак ву вайыса, пыдъёстэс миськозы; та писпу улын шутэтскоды, 5нош мон нянь ваё, соин тӥ лулдэс-мугордэс юнматоды; собере [мыноно сюрес вылады] потэ; уго тӥ ляльчидылэн вӧзтӥз мынӥськоды». Соос шуизы: «Кызьы вераськод, озьы лэсьты». 6Авраам дыртыса балаганаз Сара доры мынӥз но [солы] шуиз: «Ӝоггес куинь сата умойзэ пызьдэ кот но юмал уднянь пыж». 7Авраам пудо уллёез доры бызьыса мынӥз, куайытэм, чебер кунянзэ кутӥз но сое егит пилы сётӥз, соиз дыртӥз солэсь сиён дасяны. 8Вӧй, йӧл басьтӥз, дасям кунян сӥльзэ вайиз но соос азе пуктӥз; нош ачиз соос вӧзын писпу улын сылӥз. Соос сиизы. 9Собере солы шуизы: «Кытын Сарра, тынад кышноед?» Со шуиз: «Татын, балаган пушкын». 10Соос пӧлысь одӥгез шуиз: «[Вуоно аре,] та виын ик, Мон нош ик тон дорын луо, соку тынад кышноедлэн, Сарралэн, пи нуныез вордскемын луоз ини». Сарра балаганэ пырон ӧс дорын, солэн бераз кылзӥськыса сылӥз. 11Нош Авраам но Сарра пересесь, бадӟым арлыдоесь вал, толэзьлы быдэ кышномуртлэн маиз луэ, Сарралэн соиз уг ни луы. 12Сарра ас пушказ серектыса шуиз: «Мынам-а, пересьмем муртлэн, таӵе шумпотонэ луоз? Кузёе но пересь ини». 13Соку Кузё-Инмар Авраамлы шуиз: «Малы Сарра [ас пушказ] серектыса тазьы шуиз: ”Зэм ик-а, оло, мон, пересьмем мурт, нылпи вайыны быгато на”? 14Кузё-Инмар понна кыӵе ке но быгатонтэм уж вань шат? Пусъем дыре, вуоно арын, Мон тон дорын луо, соку Сарралэн пи нуныез вордскемын луоз ини». 15Сарра шара ӧз вера, но шуиз: «Мон ӧй серекъя». Уго со кышказ. Нош Кузё-Инмар [солы] шуиз: «Зэмзэ уд вераськы, тон серектӥд». 16Со воргоронъёс султӥзы но отысен Содомен [Гоморра] пала кошкизы; Авраам соосын ӵош соосты келяны потӥз.
17Кузё-Инмар шуиз: «Ма Мон карыны ӧдъясько, Авраамлэсь, [Аслам ляльчиелэсь], вато шат?! 18Зэм ик, Авраам бордысь быдӟым, кужмо калык потоз, дунне вылысь вань калыкъёс со пыр бакель каремын луозы, 19уго Мон сое бырйи со понна: аслаз пиосызлы, аслаз вуоно выжыезлы курон-косон мед сётоз, Кузё-Инмарлэн сюрес кузяз мед ветлозы, шонерлыкез, зэмлыкез мед утёзы; соку Кузё-Инмар Авраам сярысь мар вераз, [ваньзэ] быдэстоз». 20Кузё-Инмар шуиз: «Содомен Гоморра вылэ туж бадӟым ӝожтӥськон, сьӧлыксы нош туж но туж секыт; 21васько но учко, зэм ик-а соос Мон доры вуэм ӝожтӥськонын кадь уло, яке уг-а, – мыныса тодо». 22Отысь пиосмуртъёс берытскизы но Содоме мынӥзы; нош Авраам ялан Кузё-Инмар азьын сылӥз на. 23Авраам лыктыса шуиз: «Оло нош Тон шонер улӥсез сьӧлыклэсь кышкасьтэмен ӵош огазе быдтод-а [шонер улӥсьлы со ик луоз-а, мар луоз сьӧлыклэсь кышкасьтэмлы]? 24Оло нош та городын витьтон шонер улӥсь муртъёс вань? Витьтон шонер улӥсьёс вань вылысь но [вань ке соос] быдтод-а, уд жаля-а [быдэс] та интыез? 25Озьы луыны уз быгаты – шонер улӥсез, сьӧлыклэсь кышкасьтэмен огазе мед быдтод, сьӧлыклэсь кышкасьтэмлэсь шонер улӥсен адӟонзэс одӥг кадь мед карод, – таӵезэ Тон уд лэсьты! Быдэс музъемлэн Судьяез шонертэм судить кароз шат?» 26Кузё-Инмар шуиз: «Содом городысь Мон витьтон шонер улӥсь муртэ шедьтӥ ке, соос понна Мон [быдэс городэз,] быдэсак та интыез но уг быдты». 27Авраам Солэн пумитаз шуиз: «Тани, Мон, сюй-тузон но пень, Кузё-Атаелы вераны дӥсьтӥсь луи: 28витьтон шонер улӥсь муртлы вить мурт ӧз ке тырмы нош, оло, вить мурт тырмымтэысь быдэс городэз быдтод?» Кузё-Инмар шуиз: «Уг быдты, отысь ньыльдон вить муртэ шедьтӥ ке». 29Авраам Соин вераськемысь ӧз дугды, со шуиз: «Отысь, оло, ньыльдон мурт шедёз». Со шуиз: «Ньыльдон мурт ке но шедиз, сое уг быдты». 30Соку Авраам шуиз: «Кузё-Атайлэн вожез медаз поты вал, али мар верай ке: оло нош отысь куамын мурт гинэ шедёз?» Со шуиз: «Отын куамын мурт ке но шедиз, сое уг быдты». 31Авраам шуиз: «Тани, мон Кузё-Атаелы вераны дӥсьтӥсь кариськисько: оло нош отын кызь мурт гинэ шедёз?» Со шуиз: «Кызь муртлы луыса уг быдты». 32Авраам шуиз: «Эшшо одӥг пол верай на ке, Кузё-Атаелэн вожез медаз поты вал: оло нош отын дас мурт гинэ шедёз?» Со шуиз: «Дас муртлы луыса уг быдты». 33Кузё-Инмар кошкиз, Авраамен вераськемысь дугдӥз; нош Авраам аслаз интыяз берытскиз.
Currently Selected:
Улон-вылон 18: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
