Улон-вылон 24
24
24-тӥ ЛЮКЕТ
1Авраам пересь вал ини, бадӟым арлыдэ вуиз ни. Кузё-Инмар Авраамез котьмар ласянь бакель кариз. 2Авраам аслаз юртысьтыз бадӟымезлы ляльчиезлы, юртэныз, ваньбуреныз кивалтӥсьлы, вераз: «Макес улам кидэ пон но 3Инлэн но, музъемлэн но Инмареныз Кузё-Инмарен кыл сёт мыным: [Исаак] пиелы хананейёслэсь, кинъёс пӧлын мон али улӥсько, нылзэс кышно уд басьты шуыса; 4мынам дорам, вордскем музъем вылам, [мынам улы-бечеосы доры] мынод но [отысь] мынам Исаак пиелы кышно басьтод». 5Ляльчи солы шуиз: «Нош нылмуртлэн та музъеме монэн лыктэмез ӧз ке поты, соку мон кулэ-а тынэсьтыд пидэ потэм музъемад берыктыны?» 6Авраам солы шуиз: «Чакласькы, пиме отчы нуыса эн кельты; 7Инлэн Инмарез [музъемлэн но Инмарез] Кузё-Инмар монэ вордскем музъемысьтым, атай юртысьтым басьтӥсь, мыным вераз но кыл сётыса шуиз: ”[Тыныд но,] тынад выжыосыдлы но та музъемез сёто”, – Со Аслэсьтыз Кылчинзэ ыстоз тынад азяд, отысь тон Исаак пиелы кышно басьтод; 8нош нылмуртлэн тон сьӧры [та музъеме] лыктэмез ӧз ке поты, соку тон мыным кыл сётэмедлэсь мозмытскиськод; пиме отчы нуыса эн кельты». 9Соку ляльчи Авраам кузёезлэн макес улаз кизэ понӥз но та пумысен кыл сётӥз. 10Кузёезлэн верблюдъёсыз пӧлысь дас верблюдзэ ляльчи басьтӥз но азьлане вырӟиз. Солэн кияз вал кузёезлэн пӧртэм пумо дуно арбериосыз. Со султӥз но Месопотамияе, Нахорлэн городаз, мыныны потӥз; 11верблюдъёссэ ӝытпал город вӧзысь ошмес дуре дугдытӥз, – таӵе дыре кышномуртъёс ву вайыны мыно. 12Со шуиз: «Кузё-Инмаре, Авраам кузёелэн Инмарез! Туннэ со нылмуртэз мынам пумитам ысты, гажа-жаля мынэсьтым Авраам кузёме; 13тани, мон ошмес дурын сылӥсько, городысь нылъёс ву омыръяны ветлон интыязы пото; 14нылмуртлы мон шуи ке: ”Кунгандэ (кувшиндэ) мыкырты, мон вудэ юо”, нош нылмурт [мыным] шуиз ке: ”Ю, верблюдъёсыдлы но юыны сёто [сюзы юзматозь]”, – со нылмурт мед луоз вал Тынад Исааклы, Аслад ляльчиедлы, дасям ичименед; озьы луиз ке, мон тодо, Тон мынэсьтым [Авраам] кузёме гажаськод-жаляськод шуыса». 15Со веранзэ йылпумъяса ӧз на вуы [визьмыныз], тани, Ревекка потӥз, – Авраамлэн Нахор братэзлэн Милка кышноезлэн Вафуил пиезлэн вордэм нылыз, пельпум вылаз кунганэз пуктэмын вал; 16нылмурт туж чебер, пиосмуртлэн соин кусыпез ӧй на вал. Со ошмес дуре васькиз, кунганзэ вуэн тырмытӥз но дор палаз тубыны кутскиз. 17Авраамлэн ляльчиез солэн пумитаз бызьыса потӥз но шуиз: «Вай кунганысьтыд вудэ ӧжытак юо». 18Нылмурт шуиз: «Ю, кузёе!» Соку ик кунганзэ ки вылаз васькытӥз но сое сектаз. 19Сое сектам бераз шуиз: «Верблюдъёсыдлы но омырто, [ваньзылэн] сюзы куасьмытозь омыръяло». 20Соку ик кунганысьтыз вузэ тусе кисьтӥз но нош гудӟем доры [ву] омыртыны бызьыса мынӥз, вань верблюдъёсызлы омыръяз. 21Та адями со шоры шып гинэ учкыса улӥз, валаны тыршиз, Кузё-Инмар солэсь сюрессэ бакель кариз-а, ӧз-а шуыса. 22Верблюдъёс ву юэмысь дугдэм бере со адями ӝыны сӥкль кыскись зарни угы басьтӥз, нылмуртлэн кияз поныны дас сӥкль кыскись кык зарни поскес басьтӥз, 23[солэсь юаса] шуиз: «Кинлэн тон нылыз? Вера мыным: тынад атаедлэн корказ вань-а милемлы изьыны инты?» 24Со солы шуиз: «Мон Милкалэн Нахорлы ваем Вафуил пиезлэн нылыз». 25Ревекка солы шуиз на: «Милям трос куромы, пудо сиёнмы; кӧлон интымы но вань». 26Со адями йырзэ мыкыртӥз, Кузё-Инмарлы йыбырттӥз но 27шуиз: «Данлыко мынам Авраам кузёелэн Инмарез Кузё-Инмар, кузёелы Со гажан-жалянзэ, зэмлыксэ возьматытэк ӧз кельты. Кузё-Инмар монэ шонерак вуттӥз кузёелэн братэзлэн коркаез доры». 28Нылаш бызьыса мынӥз но аслаз анаезлэн корказ та сярысь вераз. 29Ревеккалэн Лаван агаез вал. Лаван бызьыса ошмес дуре со адями доры мынӥз. 30Сузэрезлэсь угызэ, киысьтыз поскесъёссэ адӟем бераз, Ревекка сузэрезлэсь «Тазьы монэн та адями вераськиз» шуэм кылъёссэ кылэм бераз соку ик Лаван со адями доры мынӥз но тани, со али ошмес дурын, верблюдъёсыз дорын сылэ; 31соку со [солы] шуиз: «Кузё-Инмарлэн бакель карем муртэз пыр; малы тон педпалаз сылӥськод? Мон тыныд корка, верблюдъёсыдлы но инты дасяй». 32Адями пыриз. Лаван верблюдъёсты юскиз но куро, сиён сётӥз; солы, соин ӵош лыктэм адямиослы пыдзэс миськыны ву сётӥз; 33солы сиён но ӵектэмын вал. Нош со шуиз: «Ужпуме сярысь вератозям уг сиськы». Солы шуизы: «Вера». 34Со мурт шуиз: «Мон Авраамлэн ляльчиез; 35Кузё-Инмар котьмар ласянь мынэсьтым кузёме бакель кариз, со быдӟым, узыр адями луиз: Кузё-Инмар солы ыжъёс, ошъёс, азвесь, зарни, ляльчи пиос, ляльчи нылъёс, верблюдъёс, ишакъёс сётӥз; 36Сарра, мынам кузёелэн кышноез, мынам кузёелы пересьмыса ини [одӥг] пи нуны вайиз, солы, маиз вал, ваньзэ сётӥз; 37кузёе кылме сётыны косыса шуиз: ”Мон хананейёслэн музъем вылазы улӥсько, соослэн нылъёссы пӧлысь пиелы кышно эн басьты, 38мын тон атаелэн юртаз, ӵыжы-выжыосы доры, [отысь] тон пиелы кышно басьтод”. 39Мон кузёелы шуи вал: ”Нылмурт мон сьӧры, оло, уз но мыны”. 40Со мыным шуиз: ”Кузё-Инмар [Инмар], Кинлэн азьтӥз мон ветлӥсько, тон сьӧры Аслэсьтыз Кылчинзэ ыстоз но сюрестэ ӟеч радъялоз, соку тон пиелы ӵыжы-выжыосы пӧлысь, атаелэн юртысьтыз, кышно ваёд; 41ӵыжы-выжыосы доры вуылэмед бере гинэ тон кыл сётытэме улысь мозмытскиськод; соос тыныд нылзэс ӧз ке но сётэ, мыным кыл сётэмед улысь мозмытскиськод”. 42Али мон ошмес доры лыктыса шуи: ”Кузё-Инмаре, Авраам кузёелэн Инмарез! Ӟеч сюрес мыным мыныны сётӥд ке, 43соку тани, мон ошмес дурын сылӥсько, [отчы городын улӥсьёслэн нылъёссы ву омыръяны ветло,] ву омыртыны нылаш лыктӥз ке, мон солы шуо: ”Кунганысьтыд ӧжытак ке но вудэ юыны сёт вал”, 44со нылаш соку шуиз ке: ”Тон но ю, верблюдъёсыдлы но омыръяло”, – со ик Кузё-Инмарлэн кузёелэн пиезлы [Исааклы, Аслаз ляльчиезлы,] дасям кышно мед луоз вал; [озьы луиз ке, мон тодо, Тон мынэсьтым Авраам кузёме гажаськод-жаляськод шуыса”]. 45Визьмыным вераськемысь мон ӧй на дугды на вал, но, тани, Ревекка потӥз, пельпум вылаз кунган ӝутэмын, ошмес дуре васькиз но [ву] омыртӥз; соку мон солы шуи: ”Вуэн секта монэ”. 46Соку ик со пельпумысьтыз кунганзэ [ки вылаз] басьтӥз но шуиз: ”Ю, верблюдъёстэ но люктало”. Мон юи, верблюдъёсме но люктаз. 47Нылашлэсь юаса, мон шуи: ”Кинлэн тон нылыз? [Вера мыным]”. Со шуиз: ”Милкалэн Нахорлы ваем Вафуил пиезлэн нылыз”. Мон солы угы, киосаз поскесъёс сётӥ. 48Йырме мыкыртӥ, Кузё-Инмарелы йыбырттӥ но Авраам кузёелэсь Инмарзэ Кузё-Инмарез данъяй, Со монэ шонер сюрес кузя вуттӥз кузёелэн братэзлэсь нылзэ солэн пиезлы кышно вайыны. 49Али вералэ мыным: мынам кузёелы гажамдэс-яратэмдэс, оскиськымон луэмдэс возьматыны мылкыдды вань-а, ӧвӧл-а? Вералэ мыным, соку мон тодо, бурпала-а, паллян пала-а кожоно». 50Ответ сётыса, Лаванэн Вафуил шуизы: «Кузё-Инмар дорысь та уж вуиз; тыныд пумит ми уродзэ но, ӟечсэ но вераны ум быгатӥське; 51тани Ревекка тон азьын; кутыса ну [сое], кузёедлэн пиезлы со кышно мед луоз, кызьы вераз Кузё-Инмар». 52Авраамлэн ляльчиез та верам кылъёсты кылэм бераз Кузё-Инмарлы музъемозь йыбырттӥз. 53Авраамлэн ляльчиез азвесь арбериос, зарни арбериос, дӥськут поттӥз но Ревеккалы сётӥз; солэн агаезлы но, анаезлы но дуноесь кузьымъёс сётӥз. 54Со но, соин ӵош лыктэм муртъёс но сиизы, юизы, уйзэс потӥзы. Ӵукна султэм беразы ик со шуиз: «Лэзе монэ, кузёе доры [мыно]». 55Нош Ревеккалэн агаез, анаез шуизы: «Дас нунал ке но нылаш милемын огазьын мед улоз; собере кошкод». 56Ляльчи соослы шуиз: «Монэ ӝегатыса эн возе, уго Кузё-Инмар сюресме ӟечкын радъяз; лэзе монэ, мон кузёе доры мыно». 57Соос шуизы: «Нылашез ӧтёме, юаломе, со мар шуоз». 58Ревеккаез ӧтизы но солы шуизы: «Та адями сьӧры мынод-а?» Нылаш шуиз: «Мыно». 59Ревеккаез, сузэрзэс, солэсь сюдӥсь-вордӥсьсэ, Авраамлэсь ляльчизэ но солэсь адямиоссэ келязы. 60Ревеккаез бакель карыса, солы шуизы: «Сузэрмы! Тынэсьтыд сюрсъёсын сюрсъёс мед вордскозы, тынад выжыед тушмонъёсызлэсь улон интызэс киулаз мед возёз!» 61Ревекка но соин ӵош медо нылъёсыз султӥзы, верблюдъёс вылэ пуксизы но со адями сьӧры вырӟизы. Ляльчи Ревеккаез басьтӥз но кошкиз. 62Нош Исаак Беэр-Лахай-Роиысь лыктӥз, уго со лымшор музъемын улӥз. 63Ӝыт вуэм бере Исаак бусые малпаськыны потӥз, синъёссэ ӝутыса учкиз но адӟиз: тани, верблюдъёс лыкто. 64Ревекка учкиз но Исаакез адӟиз, верблюд вылысь васькиз. 65Ляльчилы шуиз: «Кин со бусы вылтӥ асьмелэн пумитамы лыктӥсь мурт?» Ляльчи шуиз: «Со мынам кузёе». Со сюлыксэ басьтӥз но шобырскиз. 66Ляльчи мар лэсьтэмзэ ваньзэ Исааклы вераз. 67Соку Исаак Ревеккаез анаезлэн, Сарралэн, балаганаз пыртӥз, сое бордаз кутӥз, Ревекка солы кышно луиз, Исаак кышнозэ юн яратӥз; анаез [Сарра] кулэм бере Исаак куректыса улэ вал, нош табере со буйгатскиз.
Currently Selected:
Улон-вылон 24: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
