Улон-вылон 29
29
29-тӥ ЛЮКЕТ
1Иаков султӥз но шундыӝужанлэн пиосызлэн музъемазы мынӥз [арамей выжыысь Вафуиллэн Лаван пиез доры, Иаковен Исавлэн анайзылэн, Ревеккалэн, агаез доры]. 2Со адӟиз: тани, бусыын гудӟем, со котырын куинь уллё ыжъёс, кечъёс выдыса кыллё, уго пудо уллёосты та гудӟемысь вуэн люктало. Гудӟемлэн пасез бадӟым изэн ӵоксамын вал. 3Со доры вань уллёос люкаськем бере гудӟемлэсь пасьсэ шобыртӥсь изэз палэнтылӥзы но ыжъёсты люкталлязы; бӧрысь нош ик гудӟемлэсь пасьсэ изэн пытсаллязы. 4Иаков пудо возьмасьёслэсь юаз: «Агай-вынъёсы! Кытысь тӥ?» Соос шуизы: «Ми – Харранысь». 5Иаков соослы шуиз: «Нахорлэсь Лаван пизэ тӥ тодӥськоды-а?» Соос шуизы: «Тодӥськомы». 6Иаков соослэсь юаз на: «Кызьы улэ со?» Соос шуизы: «Ӟеч улэ; тӥни, солэн Рахиль нылыз ыжъёсын лыктэ». 7[Иаков] шуиз: «Нунал кузь на, пудоез огазе люканы вазь на, ыжъёсыз люкталэ но возь вылэ сюдыны лэзе». 8Соос шуизы: «Вань пудо уллёос огазе люкаськытозь но гудӟемлэсь пасьсэ шобыртӥсь изэз палэнтытозь, кошкыны ум быгатӥське; соку ми ыжъёсмес люктасалмы». 9Рахиль [Лаванлэн нылыз] атаезлэн ыжъёсыныз, кечъёсыныз татчы вуыку, соосын со вераське на вал, уго со [атаезлэсь ыжъёссэ, кечъёссэ] возьма вал. 10Иаков Лаван ӵужмуртэзлэсь Рахиль нылзэ, ӵужмуртэзлэсь ыжъёссэ адӟем бераз со гудӟем доры мынӥз, солэсь пасьсэ пытсась иззэ палэнтӥз но Лаван ӵужмуртэзлэсь ыжъёссэ вуэн люктаз. 11Иаков Рахилез чупаз но бадӟым куараен бӧрдыны кутскиз. 12Иаков Рахильлы вераз, со солэн атаезлы ӵыжы-выжыез луэ, со – Ревеккалэн пиез луэ. Нош Рахиль бызьыса кошкиз но [та учыр сярысь] атаезлы вераз. 13Лаван кылӥз сузэрезлэн Иаков пиез сярысь, соку ик солэн пумитаз бызьыса мынӥз, ӟыгыртӥз, чупаз но корказ пыртӥз. Иаков Лаванлы ваньзэ мадиз. 14Нош Лаван солы шуиз: «Зэм ик тон мынам лыэ, мугоры». Иаков со дорын быдэс толэзь улӥз.
15Лаван Иаковлы шуиз: «Тон мынам ӵыжы-выжые ке но, малы тон дунтэк мон дорын ужаны-тыршыны кулэ? Вера мыным, кызьы тыныд тыроно?» 16Лаванлэн кык нылъёсыз вал: бадӟымезлэн нылызлэн нимыз Лия, покчиезлэн – Рахиль. 17Лиялэн синъёсыз лябесь вал, нош Рахиль – мугорын но, ымнырын но чебер. 18Иаков Рахилез яратӥз, солы со шуиз: «Рахиль покчи нылыд понна мон тон дорын сизьым ар ужало-тыршо». 19Лаван [солы] шуиз: «Кинлы ке мукет муртлы сётытозь, эсьмаса мон сое тыныд кышнолы сёто, ул мон дорын». 20Рахиль понна Иаков сизьым ар ужаса-тыршыса улӥз; та аръёс солы кӧня ке нунал кадь гинэ потӥзы, ортчемзэс шӧдыса ик ӧз вуы, уго со Рахилез яратӥз. 21Соку Иаков Лаванлы шуиз: «Вай кышноме, дыр вуиз ини мыным со доры пырыны». 22Лаван котыр ёросысь калыкез ӧтчаз но юондыр ортчытӥз. 23Нош ӝыт [Лаван] Лия нылзэ со доры пыртӥз; [Иаков] со доры пыриз. 24Зелфа нимо медо нылзэ Лаван Лия нылызлы юрттӥськыса улыны сётӥз. 25Ӵукна тодмо луиз: та – Лия. Соку [Иаков] Лаванлы шуиз: «Мар тон монэн лэсьтӥд? Рахиль понна тон дорын мон ужаса ӧй улы-а? Малы тон монэ ӧрекчад?» 26Лаван шуиз: «Ми дорын тазьы уг лэсьто: пичизэ бадӟымезлэсь азьло кышнолы уг сёто; 27таиныз улоно арнязэ йылпумъя но собере мон дорын эшшо сизьым ар ӵоже ужаса-тыршыса улӥд ке, таизэ но тыныд сётом». 28Иаков озьы ик лэсьтӥз: таиныз улоно арнязэ йылпумъяз. Соку [Лаван] солы кышнолы Рахиль нылзэ сётӥз. 29Рахиль нылызлы юрттӥськыса улыны Лаван Валла нимо медо нылзэ сётӥз. 30[Иаков] Рахиль доры но пыриз, Лияез сярысь, Рахилез со юнгес яратӥз; Лаван дорын со эшшо сизьым ар ужаса улӥз на.
31[Инмар] Кузё-Инмар адӟиз, Иаков Лияез уг яраты шуыса, соку солэсь нуны вайыны пушсэ усьтӥз, нош Рахиль нуны вайисьтэм вал. 32Лия секытэн луиз но [Иаковлы] пи нуны вайиз, солы Рувим ним сётӥз, малы ке шуоно Лия шуиз: «Кузё-Инмар мынэсьтым куректон-кайгуме адӟиз [но мыным пи нуны сётӥз], табере монэ кузпалы яратоз ини». 33[Лия] нош ик секытэн луиз но [Иаковлы кыкетӥ] пизэ ваем бераз шуиз: «Кузё-Инмар кылӥз, картэ монэ уг яраты шуыса, соин ик таизэ но сётӥз на». Таизлы Симеон ним сётӥз. 34Эшшо секытэн луиз на, пи нуны вайиз но шуиз: «Табере ини картэ мон борды биниськоз, уго куинь пи мон солы вайи ини». Соин ик солы Левий ним сётӥзы. 35Эшшо секытэн луиз на, пи нуны ваем бераз шуиз: «Табере Кузё-Инмарлы ушъян-данъян кылъёс верало». Соин ик таизлы Иуда ним сётӥз. Табере со нуны ваемысь дугдӥз.
Currently Selected:
Улон-вылон 29: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
