Улон-вылон 30
30
30-тӥ ЛЮКЕТ
1Рахиль адӟе Иаковлы нылпи вайыны быгатымтэзэ но апаезлы вожъяськыны кутске, Иаковлы шуэ: «Вай мыным нылпи, яке мон куло». 2Иаковлэн Рахильлы вожез потӥз но [солы] шуиз: «Мон тынад пушкыдлы емыш сётӥсьтэм Инмар-а?» 3Рахиль шуиз: «Тани мынам медо нылы Валла, пыр со доры, мынам алвылам со нуны мед ваёз, мынам но со пыр нуные мед луоз». 4Валлаез, медо нылзэ, солы кышнолы сётӥз; со доры Иаков пыриз. 5Валла [Рахильлэн медо нылыз] секытэн луиз, Иаковлы пи нуны вайиз. 6Рахиль шуиз: «Инмар монэ шонере поттӥз, мынэсьтым тэльмырем куараме кылӥз но мыным пи нуны сётӥз». Соин ик солы Дан ним сётӥз. 7Рахильлэн Валла медо нылыз эшшо секытэн луиз но Иаковлы мукетсэ пи нуны вайиз. 8Соку Рахиль шуиз: «Кужмо нюръяськонэн мон апаеным нюръяськи но ворми». Солы Неффалим ним сётӥз. 9Лия адӟиз нылпи ваемысь дугдэмзэ, соку со аслэсьтыз Зелфа нимо медо нылзэ Иаковлы кышно интые сётӥз; [Иаков со доры пыриз]. 10Лиялэн Зелфа медо нылыз [секытэн луиз но] Иаковлы пи нуны вайиз. 11Соку Лия шуиз: «Ватсаськиз». Солы Гад ним сётӥз. 12Зелфа, Лиялэн медо нылыз, [нош ик секытэн луиз,] Иаковлы мукетсэ пизэ вайиз. 13Соку Лия шуиз: «Та мыным ӟечлы луиз, табере кышномуртъёс монэ шудо мурт шуозы». Та пиезлы Асир ним сётӥз. 14Чабей аран вакытэ Рувим мынӥз но бусыысь мандрагор улмоос шедьтӥз, соосты анаезлы, Лиялы, вайиз. Соку Рахиль Лия [апаезлы] шуиз: «Пиедлэсь бичам мандрагоръёссэ вай мыным». 15Нош [Лия] солы шуиз: «Эшшо уг на тырмы-а тыныд – картме киултӥд, табере пиелэсь мандрагоръёссэ курыса ёртӥськод на-а?» Рахиль шуиз: «Пиедлэн мандрагоръёсыз понна та уе со тонэн артэ мед выдоз». 16Ӝыт Иаков бусыысь берытскиз но Лия солэн пумитаз потыса шуиз: «[Туннэ] мон доры пыр, мон пиелэн мандрагоръёсыныз тонэ басьтӥ уго». Та уе Иаков соин артэ выдӥз. 17Инмар Лиялэсь тэльмыремзэ кылӥз, со секытэн луиз но Иаковлы витетӥзэ пизэ вайиз. 18Соку Лия шуиз: «Медо нылме кузпалы кие сётэме понна Инмар мыным медзэ-кузьымзэ сётӥз». Пиезлы Иссахар ним сётӥзы [та ним «мед-кузьым» шуэм луэ]. 19Лия эшшо секытэн луиз но Иаковлы куатетӥзэ пизэ вайиз. 20Соку Лия шуиз: «Инмар мыным туж дуно-чебер кузьым сётӥз, табере кузпалы мон дорын улоз ни, уго мон солы куать пи нуны вайи». Таизлы пиезлы Завулон ним сётӥз. 21Та бере ныл нуны вайиз но солы Дина ним сётӥз. 22Инмар Рахилез тодаз вайиз, солэсь тэльмыремзэ Инмар кылӥз но солэсь нуны вайыны пушсэ усьтӥз. 23Со секытэн луиз но [Иаковлы] пи нуны вайиз, соку [Рахиль] шуиз: «Мон вылысь сӥтэм-сантэм луонэз Инмар басьтӥз». 24Тазьы шуыса, солы Иосиф ним сётӥз: «Кузё-Инмар мыным мукет пи но мед сётоз».
25Рахиль Иосиф пизэ ваем бере Иаков Лаванлы шуиз: «Лэзь монэ, мон ас интыям, ас музъемам берто; 26кышноосме, нылпиосме [мыным] сёт, соос понна мон тон дорын ужаса улӥ уго, нош табере мон кошко, тон тодӥськод, кызьы мон тон вылэ ужаса-тыршыса улӥ». 27Лаван солы шуиз: «Э, ӟеч мылкыддэ тон мыным возьматысалыд ке! Мон шӧдӥсько: тон понна Кузё-Инмар монэ бакель кариз». 28Эшшо шуиз на: «Вера, мар быдӟа мед-кузьым тыныд тырыны кулэ, мон сое [тыныд] сёто». 29Соку [Иаков] солы шуиз: «Тон тодӥськод, кызьы мон тон дорын ужаса-тыршыса улӥ, кыӵеесь луизы тынад пудоосыд мон дыръя; 30уго мон дырозь пудоед ӧжыт вал, табере трос луиз; мон лыктэм бере Кузё-Инмар тонэ бакель кариз; ку нош мон аслам юртэ-семьяе понна ужалом?» 31[Лаван солы] шуиз: «Мар тыныд сётоно?» Иаков [солы] шуиз: «Номыр но кулэ ӧвӧл мыным. Али верано ужме лэсьтӥд на ке мыным, соку мон нош ик тынэсьтыд ыжъёстэ утьыса, возьмаса уло. 32Туннэ мон быдэс ыж уллёед пыр ортчо; соос пӧлысь вань виштыоссэ, пӧртэм буёло гонэн ыжъёстэ висъя, ыжъёсыд пӧлысь сьӧд гоно пудоостэ висъя, озьы ик пӧртэм виштыё, пӧртэм буёло гонэн кечъёстэ но. Таӵе пудо мыным медлы-кузьымлы тупалоз, [со мыным луоз]. 33Шонер лэсьтэме азьпалан мыным дурбасьтоз, тынад уллёысьтыд аслым медлы-кузьымлы басьтэм пудоосме учкыны лыктӥд ке, ачид адӟод. Мон дорысь вань виштытэм, пӧртэм буёло гонтэм кечъёс, сьӧд гонтэм ыжъёс лушкамын шуыса лыдъяськозы». 34Лаван [солы] шуиз: «Умой, тынад верам кылыдъя мед луоз». 35Со нуналэ Лаван куӵо-маӵоесьсэ, виштыё-пужыё вань кечтакаосты, ваньзэ виштыё, пӧртэм буёло мумы кечъёсты, кудъёсызлэн ӧжытак тӧдьы гонзы но вал, вань сьӧд гоно ыжъёсты висъяз но аслаз пиосызлэн киулазы сётӥз; 36куинь нунал мынон кемозь со Иаковлэсь палэнскиз. Нош Иаков Лаванлэсь мукет (висъятэк кельтэм) ыжъёссэ, кечъёссэ возьмаса улӥз. 37Тополь, миндаль, явор (платан) пуослэсь вайёссэс чигтыса, Иаков кияз кутӥз но соос вылэ тӧдьы гожъёс вӧлӥз, тӧдьызы потытозь та ньӧръёссэ сулӥз, сулзэс-курзэс басьтӥз но 38пужыё вӧлэм ньӧръёсты ву люктан тусьёсы ву юыны лыктӥсь пудо азе тыриз, татчы лыктэм беразы, ньӧръёс азьын ворттылыса, секытэн луылӥзы. 39Ньӧръёс азьын секытэн-кӧто луэм пудолэн куӵо-маӵоесь, виштыё, пӧртэм буёло гонэн пиоссы вордскылӥзы. 40Иаков та ыжпиосты, кечпиосты аслыз карыны висъяз; аслэсьтыз пудозэ Лаванлэн вань куӵо-маӵоесь, сьӧд гоно пудоез азе султытъяз; аслэсьтыз уллёоссэ нимаз возиз, Лаванлэн пудоеныз огазе ӧз карылы. 41Таза пудо ворттылон вакытэ котьку но Иаков тусе, пудолэн азяз ньӧръёсты тыриз, ньӧръёс азьын секытэн-кӧто мед луозы шуыса. 42Начар пудо ворттылыку, со ньӧръёссэ ӧз тырылы. Таӵе амалэн начар пудо Лаванлы сюриз, нош тазаосыз – Иаковлы. 43Та адями узырмиз но узырмиз, трос вал солэн ыжъёсыз, кечъёсыз, [ошъёсыз, скалъёсыз но,] верблюдъёсыз, ишакъёсыз, ляльчи пиосыз, ляльчи нылъёсыз.
Currently Selected:
Улон-вылон 30: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
