Улон-вылон 31
31
31-тӥ ЛЮКЕТ
1Соку [Иаков] кылӥз Лаван пиослэсь тазьы вераськемзэс: «Атаймылэн маиз вал, Иаков ваньзэ киултӥз, атаймылэн ваньбур бордысьтыз аслэсьтыз вань ваньбурзэ люказ». 2Иаков Лаванлэсь ымнырзэ адӟиз но валаз: толон кадь, толон валлян кадь со шоры уг ни учкы. 3Соку Кузё-Инмар Иаковлы шуиз: «Атайёсыдлэн музъемазы, вордскем шаерад берытскы; Мон тонэн огазьын луо». 4Иаков Рахилен Лияез бусые ыж, кеч уллёез доры ӧтьыны ыстӥз. 5Соослы шуиз: «Адӟисько, тӥляд атайды мон шоры толон кадь, валлян кадь уг ни учкы; но мынам атаелэн Инмарез монэн огазьын вал; 6тӥ асьтэос тодӥськоды, кызьы мон, вань кужымме поныса, атайды дорын ужаса-тыршыса улӥ, 7нош атайды монэ пӧялляз, ог дас пол ини уждун басьтонме воштылӥз; но мыным урод лэсьтыны Инмар солы луонлык ӧз сётылы; 8куке со шуиз: ”Вань виштыё пудоез тыныд медлы-кузьымлы сёто”, соку вань пудолэн виштыё гоно пиосыз вордӥськизы. Нош куке со шуиз, ”куӵоосыз тыныд медлы-кузьымлы сётӥськозы”, соку вань пудо куӵо-маӵо вордӥськиз. 9Атайдылэсь [вань] пудозэ Инмар талаз но мыным сётӥз. 10Огпол, пудо ворттылон вакытэ, мон уйвӧтам адӟи: тани кечтакаос, [такаос] пудо вылэ [кечъёс вылэ, ыжъёс вылэ] тубемъёс – куӵо-маӵоесь, виштыё, пӧртэм буёло гоноесь. 11Инмарлэн Кылчинэз мыным уйвӧтам шуиз: ”Иаков!” Мон шуи: ”Мон татын”. 12Со шуиз: ”Синъёстэ ӝутыса учкы: вань кечтакаос, [такаос] пудо вылэ [кечъёс вылэ, ыжъёс вылэ] тубемъёс – куӵо-маӵоесь, виштыё, пӧртэм буёло гоноесь, уго Мон ваньзэ адӟисько, Лаван тыныд мар лэсьтэ. 13Мон – Вефильын [тыныд возьматскем] Инмар, отысен синпелет (памятник) карыса пуктэм изэд вылэ вӧй кисьтӥд, отысен тон Мыным кыл сётӥд. Табере султы но та музъемысь пот, ас вордскем музъемад берытскы, [Мон тонэн огазьын луо]”». 14Рахилен Лия солэн пумитаз шуизы: «Атаймылэн юртаз милям паймы, люкетмы вань на-а? 15Милемыз со мурт шуыса уг лыдъя-а? Уго со милемыз вузаз, милесьтым азвесьмес гинэ но сииз; 16соин ик Инмарлэн атаймылэсь талам [ваньбурез,] узырлыкез – со милям но, нылпиосмылэн но люкетсы луэ; озьыен, Инмар мар тыныд вераз, ваньзэ лэсьты».
17Иаков султӥз но нылпиоссэ, кышнооссэ верблюдъёс вылэ пуктӥз, 18вань пудооссэ бӧрсяз нуиз, вань ужаса поттэм узырлыксэ но, Месопотамияысь октэм аслэсьтыз пудозэ но [вань ваньбурзэ] бӧрсяз Ханаан музъеме нуиз атаез, Исаак, доры мынон вылысь. 19Лаван ыжъёссэ ӵышкыны кошкем бере Рахиль атаезлэсь сульдэръёссэ-идолъёссэ лушказ. 20Нош Иаков арамей пиез, Лаванэз, ӧрекчаз: малы ке шуоно кошкемез сярысь солы ӧз иворты. 21Маиз вал, ваньзэ бордаз кутыса, сюрес вылэ потӥз; шурез выжем беразы Галаад гурезь пала вамыштӥзы. 22Куинетӥ нуналаз [арамей пилы,] Лаванлы, ивортӥзы, Иаков кошкиз шуыса. 23Соку со [пиоссэ,] ӵыжы-выжыоссэ бордаз кутӥз но Иаков сьӧры сизьым нунал ӵоже уйиськыса мынӥз, Галаад гурезьысен сое сутӥз. 24Арамей пилы, Лаванлы, уйин уйвӧтаз Инмар возьматскыса шуиз: «Утиськы, Иаковлы ӟечсэ но, уродзэ но эн вера». 25Лаван Иаковез сутӥз; Иаковлэн балаганэз гурезь йылэ пуктэмын вал, Лаван но аслаз ӵыжы-выжыосыныз ӵош Галаад гурезь йылэ балаганъёссэ пуктӥз. 26Соку Лаван Иаковлы шуиз: «Мар тон лэсьтӥд? Малы тон монэ ӧрекчад но, ожмаськыса пленэ шедемъёсты музэн, мынэсьтым нылъёсме бӧрсяд нуид? 27Малы тон лушкемен пегӟид, дорысьтым лушкаськись музэн кошкид, мыным номыр но ӧд вера? Мон тонэ кырӟаса, тимпанэн, крезен шудыса, шулдырен келясал; 28нылъёсылэсь нылпиоссэс, нылъёсме но чупаны эрик ӧд сёты; укылтэмъяськид тон. 29Тӥледлы урод лэсьтыны мынам киям кужыме вань, но тӥляд атайдылэн Инмарез кылем уе монэн вераськиз но шуиз: ”Утиськы, Иаковлы ӟечсэ но, уродзэ но эн вера”. 30Кошкиськод ке, кошкы вал, уго тынад чидатэк атаедлэн юртаз укыр улэмед потэ вал ини, – но малы тон мынэсьтым инмаръёсме лушкад?» 31Иаков Лаванлы ответ сётыса шуиз: «Уго мон кышкай, мон малпай, мон киысь нылъёстэ, [мукетсэ но, маи мынам вань] медад тала вал шуыса». 32[Соку Иаков шуиз:] «Кинлэн киысьтыз тон аслэсьтыд инмаръёстэ шедьтод, со мурт улэп уз кыльы; ӵыжы-выжыосмы азьын тод, маид [тынад] мынам киулам вань, ваньзэ аслыд басьты». [Нош со солэсь номыр но ӧз тоды.] Иаков ӧз тоды, [солэн] Рахиль [кышноез] соосты лушказ шуыса. 33Лаван вуылӥз Иаковлэн балаганаз, Лиялэн балаганаз, кык медо нылъёслэн балаганазы [но соос дорын утчаськиз-бугыръяськиз,] но ӧз шедьты. Лиялэн балаганысьтыз потыса, Рахильлэн балаганаз пыриз. 34Нош Рахиль сульдэръёсты-идолъёсты кутӥз но верблюдлэн энер улаз ватӥз, ачиз со вылэ пуксиз. Лаван быдэс балаган пушез бугыръяз, но ӧз шедьты. 35Рахиль атаезлы шуиз: «Кузёелэн вожез медаз поты вал, тон азе султыны уг быгатӥськы шуыса, уго нылкышноослэн котьку но луись висёнзы али мынам кутскиз». [Быдэс балаган пушкысь Лаван] утчаськиз, нош сульдэръёссэ-идолъёссэ ӧз шедьты. 36Иаковлэн вожез потӥз но Лаванэн ченгешыны кутскиз. Иаков, вераськыны кутскыса, Лаванлы тазьы шуиз: «Кыӵе янгыше вань, кыӵе сьӧлыке вань, мон сьӧрын уйылӥськыса ветлӥськод бере? 37[Мынам коркасьтым] вань тӥрлыкме бугыръяд ини тон, мар шедьтӥд аслад коркасьтыд ваемъёссэ? Татын мынам ӵыжы-выжыосы азьын, аслад ӵыжы-выжыосыд азьын возьматы: соос асьмелэсь кусыпмес мед сэрттозы-пертчозы. 38Тани, мон тон дорын кызь ар вал; ыжъёсыд, кечъёсыд пи ӧз куялэ; пудо уллёысьтыд такаостэ ӧй сиы; 39пӧйшуръёсын кесям пудоез тон доры ӧй вайылы, изъянэз ачим чидай; нуназе куазен-а мар ке ыше, – монэ тырытылӥд, уйин-а мар ке ыше, – монэ тырытылӥд; 40нуназе, пӧсьлы чидатэк, каньсыралляй, нош уйин – кезьытлы чидатэк, курадӟи, умме усеме ӧз луы. 41Тазьы тынад коркад ортчизы мынам улоно кызь аръёсы. Кык нылъёсыд понна мон тон дорын дас ньыль ар ужай-тырши, эшшо куать арзэ – пудоосыд понна; нош тон дас пол вошъялляд ужаме понна мед-кузьым сётондэ. 42Атаелэн Инмарез, Авраамлэн Инмарез, Исааклэн кышкано-йыбыртъяно Инмарез, монэн огазьын ӧй ке луысал, тон али монэ номыр сётытэк келясалыд. Инмар адӟиз мынэсьтым шугадӟон пӧлы сюремме, ас киыным быдэстэм ужъёсты адӟиз но толон мон пала дурбасьтӥз». 43Лаван Иаковлы ответ сётыса шуиз: «Та нылъёс – мынам нылъёсы; нылпиос – мынам нылпиосы; пудо – мынам пудое, мае адӟиськод, – ваньмыз со мынам: маке но али карыны быгатӥсько-а нылъёсыным, соослэн ваем нылпиосынызы но? 44Али куспамы эшъяськыса улыны кыл сётомы, со асьмелэсь кусыпъёсмес адӟись-тодытӥсь луоз». [Иаков солы шуиз: «Тани асьмемын ӵош нокин ӧвӧл; учкы, асьмелэсь кусыпмес Инмар адӟись-тодӥсь луэ».]
45Иаков изэз кутӥз но сое синпелетлы (памятниклы) пуктӥз. 46Аслаз ӵыжы-выжыосызлы Иаков шуиз: «Изъёс люкалэ». Соос изъёс кутӥзы но соослэсь пичи гурезь лэсьтӥзы. Отын, вырйылын, соос сиизы-юизы. [Лаван солы шуиз: «Та пичи гурезь асьмелэсь кусыпъёсмес адӟись-тодытӥсь луэ».] 47Лаван сое Иегар-Сагадуфа шуыса нимаз, нош Иаков сое Галаад шуыса нимаз. 48Соку Лаван [Иаковлы] шуиз: «Туннэ та пичи гурезь [мынам пуктэм синпелетэ но] асьмелэсь кусыпъёсмес адӟись-тодытӥсь луэ». Соин ик солы ним но сётэмын: Галаад, 49озьы ик: Мицпа, Лаван тазьы шуэмен сэрен: «Кузё-Инмар монэ но, тонэ но чакласа-эскерыса мед улоз, огмы дорысь огмы кыдёке кошкимы ке; 50мынам нылъёсыным урод улоно ке луид, яке нылъёсме сяна, мукет кышноос октӥд ке, асьме куспын али кыл сётон кутэммес [адӟись] адями ӧвӧл ке но, но учкы, монэ но, тонэ но Инмар адӟе». 51Соку Лаван Иаковлы шуиз: «Тани та пичи гурезь но тонэн мон куспы мынам пуктэм синпелетэ (памятнике); 52та пичи гурезь адӟись-тодытӥсь, та синпелет адӟись-тодытӥсь: мон тон доры та пичи гурезь сьӧры урод лэсьтыны уг выжы, тон но мон доры та гурезьлэн сьӧраз, та синпелет сьӧры но урод лэсьтон понна уд выжы; 53Авраамлэн Инмарез, Нахорлэн Инмарез, соослэн атайзылэн Инмарез асьме куспын Судья мед луоз». Иаков аслаз атаезлэн, Исааклэн, кышкано-йыбыртъяно Инмарезлэн нимыныз кыл сётӥз. 54Гурезь йылын Иаков курбон сётӥз, ӵыжы-выжыоссэ ӧтчаз нянь сиыны; соос нянь сиизы, [юизы,] гурезь йылын ик кӧлӥзы. 55Лаван ӵукна вазь ик султӥз но нылъёссэ, нылъёсызлэсь нылпиоссэс чупаз, соосты бакель кариз. Собере Лаван отысь кошкиз, улон интыяз берытскиз.
Currently Selected:
Улон-вылон 31: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
