Улон-вылон 32
32
32-тӥ ЛЮКЕТ
1Иаков ас сюрестӥз кошкиз. [Учкиз но Инмарлэсь ожмаськыны дасяськись ожгарчиоссэ адӟиз.] Сое Инмарлэн Кылчинъёсыз пумитазы. 2Иаков соосты адӟыса шуиз: «Та Инмарлэн ожгарчиосыз». Та интылы со «Маханаим» ним сётӥз. 3Едом шаерысь Сеир музъеме, Исав братэз доры, Иаков аслаз азяз иворчиосты ыстӥз но, 4косон сётыса, соослы тазьы шуиз: «Кузёелы, Исавлы, тазьы шуэ: ”Тани, Иаков ляльчиед мар шуэ: ”Мон Лаван дорын улӥ, та дырозь улӥ; 5мынам ошъёсы, ишакъёсы, кечъёсы, ыжъёсы, ляльчи пиосы, ляльчи нылъёсы вань; ачим сярысь [Исав] кузёелы ивортыны лэзи, тон [ас ляльчиедлы] ӟеч мылкыддэ возьматы вал». 6Иворчиос Иаков доры берытскыса шуизы: «Исав братэд доры ми ветлӥмы, со тынад пумитад лыктэ, соин ӵош ньыль сю мурт лыктэ». 7Иаков туж кышкатскиз, куалектӥз; ас бордысьтыз адямиосты, ыжъёсты-кечъёсты, ошъёсты-скалъёсты, верблюдъёсты кык уллёлы люкиз. 8Соку [Иаков] шуиз: «Исав, одӥг уллё вылэ урдскыса, со уллёез виылыса быдтӥз ке, соку мукетыз утиськыны быгатоз». 9Иаков шуиз: «Авраам атаелэн Инмарез, Исаак атаелэн Инмарез, [Инмаре] Кузё-Инмаре, Тон мыным шуид: ”Ас музъемад, дор музъемад берытскы, Мон тыныд ӟечлык сётыса уло”. 10Ас ляльчиедлы Тон мар сётӥд – вань гажан-жалянъёстэ, вань ӟечлыкъёстэ басьтыны мон ярасьтэм мурт, уго мон, бодыме кутыса, та Иордан пыр выжи, нош али мынам кык уллёе. 11Уть монэ братэлэн киулаз сюронлэсь, Исавлэн киызлэсь уть; уго мон солэсь кышкасько, со лыктыса монэ [но] нылпиосме анайёсынызы ӵош виёз шуыса кышкасько. 12Тон шуид: ”Мон тыныд ӟеч каро, тынэсьтыд выжыдэ йылэто, зарезь дурысь лыдъяны луонтэм луо мында каро”». 13Со уйзэ Иаков отын потӥз. Маиз солэн бордаз вал, со пӧлысь со Исав братэзлы саламлы-кузьымлы [ыстӥз]: 14кык сю кеч, кызь кечтака, кык сю ыж, кызь така, 15куамын кысконо верблюдъёсты кунянъёсынызы валче, ньыльдон скал, дас ош, кызь мумы ишакъёсты, дас ишаклэсь ошпиоссэ. 16Аслаз медоосызлы-ляльчиосызлы нимаз-нимаз пудо уллёосты сётӥз но шуиз: «Мынам азьпалам мынэ, котькуд уллё куспын вис мед луоз». 17Нырысь мынӥсезлы косон сётыса шуиз: «Исав братэ тонэн пумиськиз ке, тынэсьтыд тазьы шуыса юаз ке: ”Кинлэн пиез тон? Кытчы мынӥськод? Тон азьын кинлэн со пудо уллёез?” 18Тон соку шу: ”Иаков ляльчиедлэн уллёез со, Исав кузёелы саламлы-кузьымлы ыстэмын со, тани, со ачиз асьме бӧрсьы [мынэ]”». 19[Нырысетӥезлы кадь ик] кыкетӥезлы но, куинетӥезлы но, – ваньзылы уллёос сьӧрын мынӥсьёслы, косон сётыса, тазьы шуиз: «Пумиськиды ке, Исавлы тазьы шуэ; 20вералэ на солы: ”Тани, тынад ляльчиед Иаков но асьме бӧрсьын [мынэ]”». Уго со аслыз ачиз шуиз: «Исавлэсь ымнырзэ адӟемелэсь азьвыл мон сое азям ыстэм саламъёсын-кузьымъёсын либато, оло нош монэ ӟеч мылкыдын пумиталоз». 21Иаковлэн саламез-кузьымез солэн азьпалаз мынӥз, нош таизэ уез со станын потӥз. 22Со уе со султӥз, кык кышнозэ, кык ляльчи нылъёссэ, кышнооссэ, аслэсьтыз дас одӥг пиоссэ кутӥз но Иавок шурлэн лазег азьтӥз тупалаз выжиз; 23соосты шурлэн мукет палаз выжытӥз, маиз вал, ваньзэ тупала выжытӥз.
24Иаков огназ кылиз, ӵук ӟардытозь Кин ке но Со соин нюръяськыса улӥз; 25Кин ке но Со адӟиз, Иаковез вормемез уг луы шуыса, соку, нюръяськыкузы, Со Иаковлэн макес ёзэз борды йӧтӥськиз но солэсь макес ёззэ вӧсь кариз, 26Со шуиз: «Лэзь Монэ, куазь сактэ ни ук». Иаков шуиз: «Монэ бакель карытозяд, уг лэзьы». 27Соку Со юаз: «Кызьы тынад нимыд?» Со шуиз: «Иаков». 28Соку Со шуиз: «Туннэ нуналысен тынад нимыд Иаков уз ни луы, Израиль луоз, уго тон Инмарен нюръяськид, адями пиосты вормылӥсь тон луод». 29Иаков но тазьы шуыса юаз: «Тон [мыным] Аслэсьтыд нимдэ вера». Со шуиз: «Малы тон Мынэсьтым нимме юаськод? [Со паймымон]». Соку сое отысен бакель кариз. 30Та интылы Иаков Пенуэл ним сётӥз, со шуиз: «Мон ваче ымныр Инмарез адӟи, но улэп кыли». 31Пенуэл пыр ортчыку, шунды ӝужаз ни; макесыз вӧсь луэмен, со чутыса мынӥз. 32Соин ик та нуналозь но Израиль пиос макес ёзысь сӧнэз уг сиё, малы ке шуоно Иаковен Нюръяськись солэн макес ёзысьтыз сӧнэз борды йӧтӥськиз.
Currently Selected:
Улон-вылон 32: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
