Улон-вылон 33
33
33-тӥ ЛЮКЕТ
1Иаков учкиз но адӟиз: тани Исав [солэн братэз] лыктэ, соин ӵош ньыль сю адями. [Иаков] Лияез, Рахилез но кык медо кышноосты ваньзэс асьсэ нылпиосынызы огазе карыса висъяз. 2[Кык] медо кышноосты нылпиосынызы ӵош азьпал радэ султытӥз, соос бӧрсьы Лияез нылпиосыныз ӵош, нош Рахилез Иосиф пиеныз ваньзы бӧрсьы султытӥз. 3Нош ачиз ваньзылэн азьпалазы мынӥз, братэз азе мыныку, музъемозь сизьым пол йыбырттӥз. 4Исав солэн пумитаз бызьыса мынӥз, ӟыгыртӥз сое, чырты бордаз ошиськиз, чупаз но [кыкназы ик] бӧрдыны кутскизы. 5[Исав] учкиз но, кышноосты, нылпиосты адӟыса, шуиз: «Кинэд та тынад?» Иаков шуиз: «Тынад ляльчиедлы Инмарлэн сётэм нылпиосыз». 6Медо кышноос нылпиосынызы лыктыса йыбырттӥзы; 7Лия нылпиосыныз лыктыса йыбырттӥз; ваньзы бере Иосифен Рахиль лыктӥзы но йыбырттӥзы. 8Соку Исав шуиз: «Малы табыдӟа уллё мынам пумитам сюриз?» Иаков шуиз: «Мон [тынад ляльчиед], тыныд, кузёелы, ярамон мед луом шуыса ыстӥ». 9Исав шуиз: «Братэ, мынам аслам но ваньмыз тырмыт; тынадэз тынад кияд мед луоз». 10Иаков шуиз: «Ӧвӧл, тон азьын мон ярамон адями луи ке, мынам киысьтым саламме-кузьымме басьты; уго мон тынэсьтыд ымнырдэ адӟи но Инмарлэсь ымнырзэ адӟем кадь луи, тон мыным ӟеч мылкыддэ возьматӥд; 11бакель карем саламъёсме кут, уго ваньзэ мыным Инмар сётӥз, котьмаи но мынам вань». Сое тэльмырыса куриз но, Исав саламъёссэ басьтӥз но 12шуиз: «Ойдо, султомы но азьлане вырӟомы, мон тынад азяд мыно». 13Иаков солы шуиз: «Кузёе, тон тодӥськод, пиналъёс эркиесь шуыса, нош мынам ыжъёсы, кечъёсы, скалъёсы – кысконоесь, нош соосты одӥг нунал куспын ик ӝог улляса нуид ке, вань пудо кулыса быроз; 14соин ик кузёе ляльчиезлэн азьпалаз мед мыноз, нош мон, Сеире кузёе доры вуытозям, азьпалысьтым пудоосыным ӵош, пичи пиналъёсыным ӵош каллен мыно». 15Исав шуиз: «Аслэсьтым кӧнязэ ке адямиосме тон борды кельто». Иаков шуиз: «Малы нош кельтод? Кузёе азьын ярамон адями гинэ мон мед луом вал». 16Со нуналэ Исав Сеире ас сюрестӥз бертыны потӥз. 17Нош Иаков Сокхоф пала вырӟиз, аслыз корка пуктӥз, пудоезлы лапасъёс пуктылӥз. Тӥни соин ик та инты Сокхоф шуыса нимаське. 18Иаков Месопотамияысь берытскем бераз ӟечкын Ханаан музъемысь Сӥхем городэ вуиз но город азе балаганъёссэ пуктылӥз. 19Емморлэн Сӥхем пиезлэсь, мукет пиосызлэсь но музъемзылэсь оглюкетсэ сю манет тырыса басьтӥз но отчы балаганзэ пуктӥз. 20Отчы со курбон сётон инты лэсьтӥз но Израильлэн Инмарезлы Кузё-Инмарлы вазиськиз.
Currently Selected:
Улон-вылон 33: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
