Улон-вылон 35
35
35-тӥ ЛЮКЕТ
1Инмар Иаковлы шуиз: «Султы но Вефиле мын, отын ул, Исав братэд азьысь пегӟон дыръяд тыныд возьматскем Инмарлы сӥзьыса, отчы курбон сётон инты лэсьты». 2Аслаз семьяезлы, асэныз ӵош учырамъёслы Иаков шуиз: «Мукет инмаръёстэс дорысьтыды куштэ, чылкытатӥське, дӥськуттэс воштэ. 3Султомы но Вефиле мыномы; курадӟон нуналъёсам монэ кылӥсь, пӧртэм улон сюресъёсы кузя ветлыкум монэн огазьын луись, [монэ утись] Инмарлы мон отчы курбон сётон инты лэсьто». 4Киулазы возиськись вань мурт инмаръёсты Иаковлы сётӥзы, пельысьтызы угыоссэс но сётӥзы; Иаков соосты Сӥхем вӧзысь тыпы улэ согиз. [Кыӵе арбериос отын вал, туннэ нуналозь но тодмо ӧвӧл.] 5[Сӥхемысь] соос кошкизы. Инмарлэсь кышкан котыр городъёс вылын улӥз, Иаковлэн пиосыз сьӧры нокин но уйиськыса ӧз мыны. 6Иаков но соин ӵош вань ветлӥсьёс Ханаан музъемысь Луз городэ вуизы, со городлэн мукет нимыз Вефиль. 7Отын со курбон сётон инты лэсьтӥз, со интыез Эл-Вефиль шуыса нимаз, уго со [Исав] братэз дорысь пегӟыса кошкыку, та интыысен солы Инмар возьматӥськиз. 8Ревеккалэн сюдӥсь-вордӥсез Девора кулӥз но, Вефильлэн улӥяз тыпы улэ ватӥзы, Иаков со интыез «Бӧрдон тыпы» шуыса нимаз.
9Месопотамияысь берытскем бераз [Лузысен] Иаковлы Инмар выльысен возьматскиз но сое бакель кариз. 10Соку Инмар солы шуиз: «Тынад нимыд Иаков; туннэ нуналысен тынад нимыд Иаков уз ни луы, тынад нимыд Израиль луоз». Солы Израиль ним сётӥз. 11Инмар солы шуиз: «Мон Ваньмызлэсь Кужмо Инмар; йыл, трос лу; калык, трос калыкъёс тон бордысь потозы, тынад макес вискысьтыд эксэйёс потозы; 12Авраамлы но Исааклы Аслэсьтым сётэм музъемме Мон тыныд сёто, та музъемдэ тон бере улоно выжыедлы сёто». 13Соин вераськон интыысьтыз, со дорысь Инмар инме ӝутӥськиз. 14[Инмарлэн] соин вераськон интыяз Иаков синпелет#35:14 синпелет – памятник пуктӥз, сое излэсь лэсьтӥз, со вылын со Инмарлы курбон сётӥз: со вылэ курбон-салам вина, вӧй кисьтӥз. 15Инмарлэн соин вераськем интыезлы Иаков Вефиль ним сётӥз.
16Собере Вефильысь кошкизы. [Аслэсьтыз балаганзэ Гадер каланча сьӧры пуктӥз.] Ефрафа дорозь огшап мынон кылемын на вал, – Рахиль нуны вайиз, нунызэ туж секытэн вайиз. 17Нунызэ вайыку курадӟыкуз, гогы вандӥсь#35:17 гогы вандӥсь – повивальная бабка солы шуиз: «Эн кышка, таиз но пи нуны тыныд вордӥськиз». 18Пушкысьтыз лулыз потыку, кулон азяз ик Рахиль нуныезлы Бенони ним сётӥз вал. Нош нунылэн атаез солы Вениамин ним сётӥз. 19Рахиль кулӥз но, сое Ефрафае – Вифлееме – мынон сюрес дуре ватӥзы. 20Солэн шайгу вылаз Иаков синпелет (памятник) пуктӥз. Рахильлэн шайгу вылаз пуктэм синпелет туннэ нуналозь но сылэ на. 21[Отысь] Израиль#35:21 Израиль – Иаковлэн мукет нимыз, Инмар солы та нимез сётӥз кошкиз но Гадер каланча сьӧры балаганзэ пуктӥз. 22Израиль та кунын улон вакытэ Рувим мынӥз но атаезлэн [Иаковлэн] медо кышноеныз, Валлаен, кӧлӥз. Израиль кылӥз [но кӧтыз ӝож луиз].
Иаковлэн дас кык пиосыз вал. 23Лиялэн пиосыз: Иаковлэн нырысетӥез вордскем пиез Рувим, со бӧрсьы – Симеон, Левий, Иуда, Иссахар но Завулон. 24Рахильлэн пиосыз: Иосиф но Вениамин. 25Рахильлэн Валла медо нылызлэн пиосыз: Дан но Неффалим. 26Лиялэн Зелфа медо нылызлэн пиосыз: Гад но Асир. Та Иаковлэн Месопотамияын вордскем пиосыз.
27Иаков Мамрее, Кириаф-Арбае, мукет нимыз Хеврон, Исаак атаез доры лыктӥз, [со улэп на вал,] та [Ханаан] музъемын Авраамен Исаак палэнысь лыктэм сьӧр муртъёс кадь улӥзы. 28Исааклэн [улоно] нуналъёсыз сю тямыстон аресозь вуизы. 29Исаак пересьмиз, улыса жадем бераз со кулӥз, лулыз потӥз, ас калыкез пӧлы пыриз. Исавен Иаков пиосыз сое ватӥзы.
Currently Selected:
Улон-вылон 35: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
