Улон-вылон 37
37
37-тӥ ЛЮКЕТ
1Иаков атаезлэн, [Исааклэн,] сьӧрлось лыктэм мурт радын улэм музъемаз, Ханаан музъеме, улыны кылиз. 2Тани Иаковлэн выжыез сярысь мадён. Иосиф дас сизьым арес тырмем бераз агайёсыныз, атаезлэн Валла но Зелфа кышноосызлэн пиосынызы ӵош [атаезлэсь] пудозэ возьмаса улӥз. Иосиф соос сярысь атаезлы [Израильлы] уродэсь иворъёс вуттылӥз. 3Израиль вань пиосыз пӧлысь Иосифез юнгес яратӥз, малы ке шуоно солэн пересьмон вакытаз со вордӥськиз, – солы пӧртэм буёло кузь дӥсь вурытӥз. 4Агай-вынъёсыз адӟизы атайзылэсь сое вань агай-вынъёс пӧлысь юнгес яратэмзэ; сое адӟемпотостэм карыны кутскизы, эшлыко мылкыдын соин вераськыны но ӧз быгатэ ни. 5Иосиф уйвӧт адӟиз но [сое] агай-вынъёсызлы вераз: нош соос эшшо но юнгес сое адӟемпотостэм карыны кутскизы. 6Соослы со шуиз: «Кылзэ, уйвӧтэ сярысь верало: 7тани, асьмеос бусы шорын культоос думылӥськомы; но, тани, мынамез думем культое султӥз, шонерак кариськиз; тани, тӥляд культоосты мынам культое котыре султӥзы но солы йыбырттӥзы». 8Соку агай-вынъёсыз солы шуизы: «Оло нош тон эксэй луыса милемын кивалтод-а? Оло тон милемын кузёяськыса улод-а?» Уйвӧтъёсыз понна, верам кылъёсыз понна соос сое эшшо но юнгес адӟемпотостэм карыны кутскизы. 9Со мукет уйвӧтэз адӟиз на, со сярысь со [атаезлы но,] агай-вынъёсызлы но вераз: «Тани, мон эшшо уйвӧт адӟи на: тани, шунды но толэзь, дас одӥг кизилиос мыным йыбыртъяло». 10Атаезлы но, агай-вынъёсызлы но со мадиз. Атаез сое тышкаськыса шуиз: «Кыӵе сыӵе со тынад адӟем уйвӧтэд? Оло нош мон но, анаед но, агай-вынъёсыд но музъемозь йыбырттыны тон азе лыктомы?» 11Агай-вынъёсыз солы вожъяськизы, нош атаез та учырез тодаз возиз.
12Агай-вынъёсыз атайзылэсь пудозэ возьманы Сӥхеме кошкизы. 13Соку Израиль Иосифлы шуиз: «Агай-вынъёсыд пудо уг возьмало-а Сӥхемын? Мын, мынам тонэ соос доры ыстэме потэ». Со шуиз: «Мон дась». 14[Израиль] солы шуиз: «Мын, учкы, тод, агай-вынъёсыдлэн кыӵе тазалыксы, пудоос ваньзы интыязы-а, – соос сярысь мыным ивор вай». Хеврон нёжалысь сое келяз. Иосиф Сӥхеме вуиз. 15Бусыетӥ лёгаськыса ветлыкуз, сое одӥг адями пумитаз но солэсь юаз: «Мар тон утчаськод?» 16Со шуиз: «Агай-вынъёсме мон утчасько; вера мыным, кытын соос пудозэс возьмало?» 17Со адями талы шуиз: «Соос татысь кошкизы, мон кылӥ соослэсь тазьы вераськемзэс: ”Ойдолэ Дофанэ мыноме”». Иосиф агай-вынъёсызлэн пытьы кузязы мынӥз но соосты Дофанысь шедьтӥз. 18Кыдёкысен, соослэн матазы вуэмезлэсь азьло ик соос сое адӟизы но сое виён вылысь куспазы вераськыны кутскизы. 19Огзылы огзы шуизы: «Тӥни, уйвӧт верась лыктэ; 20ойдолэ мыныса али ик сое виёме, кыӵе ке но гуэ-гопе куштоме но шуоме: ”Сьӧсь пӧйшур сое кесяз”; соку адӟомы, солэн уйвӧтысьтыз маиз быдэсмиз». 21Та вераськонэз Рувим кылӥз но Иосифез соослэн киулысьтызы мозмытыса шуиз: «Сое ум вие». 22Рувим соослы шуиз: «Вир эн кисьтэ, луоё кыр дуннеысь гуэ куштэ, нош кидэс со вылэ эн вуттэ». Тае со [таӵе малпанэн] вераз: сое соослэн киулысьтызы мозмытоно но атаез доры берыктоно. 23Иосиф агай-вынъёсыз доры вуэм бере солэн вылысьтыз дӥсянзэ, пӧртэм буёло дӥсянзэ, кылизы. 24Кутӥзы но сое гуэ куштӥзы; со гу тырттэм вал, вуэз ӧй вал. 25Асьсэос нянь сиыны пуксизы, учкизы но адӟизы: Галаадысь измаил калыклэн трос верблюдъёсыз лыкто, соос Египетэ ческыт зын поттӥсь смола, бальзам, ладан нуо. 26Соку Иуда агай-вынъёсызлы шуиз: «Вынмес виыса, йыружмес ватӥмы ке, асьмелы кыӵе пайдаез луоз? 27Ойдолэ сое измаил пиослы вузаломе, со вылэ киосмес медам вуттэ, со асьмелэн вынмы, асьмелэн мугормы ук». Солэсь верамзэ агай-вынъёс санэ понӥзы. 28Мадиан вузчиос вӧзтӥзы ортчыкулы агай-вынъёс Иосифез гуысь поттӥзы но сое кызь азвесь шекелен измаил пиослы вузазы, нош соос Иосифез Египетэ нуизы. 29Рувим нош ик гу доры лыктӥз, нош гуын Иосиф ӧвӧл ни. Соку со вылысьтыз дӥськутсэ ӵажак кесиз. 30Агай-вынъёсыз доры лыктыса, со шуиз: «Пияш отын ӧвӧл, нош мон таре мар каром на?» 31Соку агай-вынъёс кечпиез вандӥзы но солэн вирыныз Иосифлэсь дӥськутсэ наштазы. 32Пӧртэм буёло выл дӥсянзэ атайзы доры вайизы но шуизы: «Ми тае шедьтӥмы, учкы, та дӥськут тынад пиедлэн-а, ӧвӧл-а?» 33Иаков дӥсянэз тодмаз, куректонэ усьыса шуиз: «Бен, та мынам Иосиф пиелэн дӥсянэз. Сьӧсь пӧйшур сое кесям, зэм ик, Иосиф кесямын». 34Иаков вылысьтыз дӥсянзэ кесяз, куссэ чурыт бышкись дэраен бинялтӥз но трос нуналъёс ӵоже, пизэ жаляса, бӧрдыса улӥз. 35Вань пиосыз, вань нылъёсыз сое буйгатыны люкаськизы; нош солэн буйгатскемез ӧз поты, со шуиз: «Куректыса-кайгырыса пие доры дунне пыдэскы лэзисько». Пиез понна тазьы курыт синвуэн бӧрдыса улӥз атай. 36Мадиан пиос нош сое Египетысен фараонлэн эксэй юртысьтыз кузёйырлы, возьмаськисьёслэн кивалтӥсьсылы, Потифарлы вузазы.
Currently Selected:
Улон-вылон 37: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
