Улон-вылон 38
38
38-тӥ ЛЮКЕТ
1Со виын Иуда агай-вынъёсыз дорысь палэнскиз но Одолламысь потэм Хираен артэ улыны интыяськиз. 2Отысен Иуда Шуа нимо одӥг хананей пилэсь нылзэ адӟиз но кышнолы басьтӥз, соин кӧлӥз. 3Кышноез секытэн луиз но пи нуны вайиз; Иуда солы Ир ним сётӥз. 4Нош ик секытэн луиз, пи нуны вайиз, солы Онан ним сётӥз. 5Эшшо [куинетӥзэ] пизэ вайиз на, солы Шела ним сётӥз. Та нунызэ вайыку, Иуда Хезивын вал. 6Иуда нырысь вордскем Ир пиезлы кышно вайиз, солэн нимыз Фамарь. 7Иудалэн нырысь вордскем Ир пиез Кузё-Инмарлы ярамон адями ӧй вал, Кузё-Инмар сое вииз. 8Соку Иуда Онанлы шуиз: «Агаедлэн кышноез доры пыр, солы шыднар#38:8 шыднар – картлэн выныз, ӟуч сямен: деверь луиськод бере, сое аслыд кышнолы басьты, солы шыднар луиськод бере, агаедлэсь выжызэ ышонлэсь-быронлэсь уть». 9Онан тодэ вал, вордскем нылпиос солэн шуыса уз лыдъяське, соин ик со агаезлэн кышноез доры пыракуз, [кидыссэ] музъем вылэ кисьтэ вал, – агаезлэсь выжызэ йылэтытонтэм понна. 10Мар со лэсьтӥз, Кузё-Инмар азьын со лек уж вал; Со Онанэз вииз. 11Соку Иуда [кык пиосыз кулэм бере] Фамарь кенэзлы шуиз: «Шела пие быдэ вуытозь, палкышно радын атай юртад ул». Со [ас понназ] шуиз уго: «Агайёсыз музэн со но медаз кулы вал». Фамарь кошкиз но атай юртаз улыны кутскиз.
12Трос дыр ортчем бере Иудалэн кышноез, Шуалэн нылыз, кулӥз. Иуда буйгам бераз Фамнае ыж ӵышкисьёсыз доры мыныны потӥз, соин ӵош Одолламысь Хира эшез мынӥз. 13Фамарьлы ивор вуттӥзы: «Тани, айымуртэд Фамнае ыжъёссэ ӵышкыны лыктэ». 14Палкышноын улонлэсь дӥськутсэ вылысьтыз кылиз, бадӟым кышетэн шобырскыса, ымнырзэ ватӥз но Енаиме пырон капка азе пуксиз, – Фамнае мынӥсь сюрес вылын интыяськемын вал со. Со адӟе вал ни уго: Шела быдэ вуиз ни, нош сое солы кышно уг басьто. 15Иуда, Фамарез адӟыса, [сое ӧз тодма,] калгись ныл, дыр, та шуыса малпаз, уго Фамарь ымнырзэ кышетэныз ворсаз. 16Иуда сюрес вылысь со доры кожиз но шуиз: «Мон тон доры пыро». Уго со ӧз тодма, та солэн кенэз шуыса. Фамарь шуиз: «Мон доры пырид ке, мар тон мыным сётод?» 17Иуда шуиз: «[Ас] уллёысьтым тыныд кечпиме келяло». Фамарь шуиз: «Ыстытозядлы, верам кылдэ юнматон понна мардэ кельтод?» 18Иуда шуиз: «Верам кылэз юнматон понна мар тыныд сётоно?» Фамарь шуиз: «Гайтан#38:18 гайтан – шнур; перевязь борды шедьытэм печатьтэ, киысьтыд бодыдэ». Мар куриз, сое со солы сётӥз но со доры изьыны пыриз; Фамарь Иудалэсь нуны ваёно луиз. 19Фамарь султыса кошкиз но бадӟым кышетсэ йырысьтыз куштӥз, нош ик палкышно кылён дӥськутсэ дӥсяз. 20Иуда Одолламын вордӥськем эшез пыр кечпизэ келяз верам кылзэ юнматон понна кышномурт доры кельтэм арбериоссэ берен басьтон вылысь; нош со Фамарез ӧз шедьты. 21Со интыын улӥсьёслэсь со тазьы юаз: «Кытын Енаимысь сюрес дурын пукись калгыса улӥсь нылмурт?» Нош отын улӥсьёс шуизы: «Татын калгись нылмурт ӧй вал». 22Иуда доры берытскыса, со шуиз: «Мон сое ӧй шедьты; отын улӥсьёс шуизы: татын нокыӵе но калгись ныл ӧй вал». 23Иуда шуиз: «Дораз кельтэм арбериосме аслыз мед басьтоз, соин сэрен асьмеды серем медаз каре; тани та кечпиез мон келяй вал, нош тон сое ӧд шедьты». 24Ог куинь толэзь ортчиз но, Иудалы тазьы шуизы: «Фамарь кенэд азыса-калгыса улыны кутскиз, тани со, азыса улэменыз, нуны ваёно луэмын». Иуда шуиз: «Сое кыре поттэ но сутэ». 25Сутыны нуыкузы, со айымуртэзлы вераны ыстӥз: «Мон секытэн луи та тӥрлыкъёслэн кузёзылэсь». Шуиз на: «Тодма, кинлэн та печатез, гайтанэз но бодыез». 26Иуда таосты тодмам бераз шуиз: «Со мынэсьтым шонергес, малы ке шуоно мон сое Шела пиелы кышнолы ӧй вайы». Фамарь борды Иуда ӧз ни йӧтӥськылы. 27Пиян дырыз вуэм бере тодмо луиз: солэн пушказ кыкто нуныосыз. 28Нуны вайыкуз, [огезлэн] киыз мычиськиз; гогы вандӥсь солэн кияз горд сӥньыс думиз но шуиз: «Таиз нырысь потӥз». 29Соку та нуны кизэ берен анаез пушкы кыскиз, братэз азьло потӥз. Гогыясь кышномурт шуиз: «Кызьы тон могӟеттэ тӥяса потыны быгатӥд?» Солы Фарес ним сётӥзы. 30Таиз бере кияз думем горд сӥньысэн братэз потӥз. Солы Зара ним сётӥзы.
Currently Selected:
Улон-вылон 38: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
