Улон-вылон 39
39
39-тӥ ЛЮКЕТ
1Иосифез Египетэ вуттӥзы. Измаил пиос киысь сое египет пи Потифар, фараон юртысь кузёйыр, возьмаськисьёслэн кивалтӥсьсы, уксё тырыса басьтӥз. 2Кузё-Инмар Иосифен ӵош вал: ужъёсыз азинлыко мынӥзы, кузёезлэн, Египет пилэн, корказ со улӥз. 3Кузёез адӟиз, Кузё-Инмар соин ӵош шуыса, мар гинэ со уг лэсьты, Кузё-Инмар солы ужъёсаз азинлык сётэ. 4Иосиф кузёезлы яраз, солы со ужаса-тыршыса улӥз. Со Иосифез юртэныз кивалтӥсь кариз, маиз солэн вал, ваньзэ со кие сётӥз. 5Юртэныз кивалтӥсе пуктэм бераз, ваньбурезлы кузё карем бераз Иосифлы луыса Кузё-Инмар Египет пилэсь дорзэ бакель кариз; маиз вал юртаз, маиз вал бусыяз, ваньзэ Кузё-Инмар бакель кариз. 6Маиз солэн вал, ваньзэ Иосиф кие сётӥз, сиён-юон сярысь гинэ солэн сюлмаськонэз кылиз на.
Иосиф мугорын веськрес, тусбуйын чебер вал. 7Кузёлэн кышноезлэн синмыз Иосиф шоры усиз но со шуиз: «Кӧл монэн». 8Иосиф пумит луиз но кузёезлэн кышноезлы шуиз: «Мон вань дыръя мынам кузёе юртэз пумысен чик сюлмаськыны кулэ ӧвӧл, маиз солэн вань, ваньзэ мон кие сётӥз; 9та юртын мынэсьтым бадӟымез ӧвӧл; монэ ваньзэ лэсьтыны лэзиз – тонэ аслым карон сяна, малы ке шуоно тон солэн кышноез; таӵе уродлэсь но урод ужез лэсьтыны, Инмар азьын сьӧлыканы быгатӥсько шат?» 10Со нуналлы быдэ Иосифез ёртыса улӥз ке но, Иосиф соин валче луыны но соин артэ кӧлыны соглаш ӧз луы. 11Одӥгаз нуналэ пӧрмиз озьы: Иосиф корка пушкы ужзэ лэсьтыны пыриз, нош юртын улӥсьёс пӧлысь татын нокин но ӧй вал. 12Кышномурт Иосифлэн дӥськут бордаз кырмиськыса шуэ: «Выд мон вӧзы». Нош Иосиф дӥськутсэ солэн кияз кельтӥз но коркась бызьыса потыса кошкиз. 13Нош кышномурт адӟиз, Иосиф дӥськутсэ солэн кияз кельтӥз но бызьыса кошкиз шуыса, 14юртаз улӥсьёсты кеськыса дораз ӧтиз но шуиз: «Учкелэ, кузпалы асьме доры евреез вайиз, асьмеды мед сантэмалоз шуыса. Со мон доры лыктӥз монэн изён вылысь, нош мон бадӟым куараен кеськи, 15со кылӥз мынэсьтым черекъяны кутскемме, вузэмме, соку со, мон доры дӥськутсэ кельтыса, бызьыса кошкиз, пегӟиз». 16Иосифлэсь дӥськутсэ ас дораз кельтӥз кузё дораз бертытозьлы. 17Та кылъёсты ик картэзлы вераз: «Асьме доры тынад ваем еврей ляльчиед мон доры, монэ сантэманы малпаса, вуылӥз [тон вӧзы, пе, выдо, со шуиз]; 18нош мынэсьтым черекъяны, вузыны кутскемме [кылӥз] но, дӥськутсэ мон доры кельтыса, бызьыса кошкиз». 19Кузё кышноезлэсь солы «тазьы кариз тынад ляльчиед монэн» шуыса верам кылъёссэ кылэм бераз лек йыркурен пурӟиз; 20кузё Иосифез кутӥз но эксэйлэн жильыетын пукисьёсыз пӧлы пытсэтэ ворсатӥз. Пытсэтын со улӥз.
21Нош Кузё-Инмар Иосифен ӵош вал, солы Со гажан-жалянзэ возьматӥз, ӟечлыксэ сётӥз: пытсэтэн кивалтӥсь йырез Иосифлы ӟеч мылкыдзэ возьматӥсь кариз. 22Пытсэтэн кивалтӥсь йыр ваньзэс жильыетын пукисьёсты Иосифлэн киулаз сётӥз, кыӵе гинэ ужъёс соос ӧз быдэсъялэ, со ваньмыныз кивалтӥз. 23Пытсэтэн кивалтӥсь йыр ӧз но учкылы, мар солэн киулаз вал, малы ке шуоно Кузё-Инмар Иосифен ӵош вал, мар гинэ со ӧз лэсьтылы, Кузё-Инмар солы азинлык сётылӥз.
Currently Selected:
Улон-вылон 39: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
