Улон-вылон 4
4
4-тӥ ЛЮКЕТ
1Адам кышнозэ, Еваез, кышно кариз но соиз секытэн луиз, Каин пиез вордӥськиз, соку Ева шуиз: «Кузё-Инмар дорысь адями басьтӥ». 2Солы вынлы Авелез нуны вайиз на. Авель ыж возьмась вал, Каин – музъем ужась.
3Кӧня ке но дыр ортчыса, Каин музъем вылаз будэтэм емышез пӧлысь Кузё-Инмарлы салам-кузьым вайиз. 4Авель но ыж уллёысьтыз, нырысь вордскемъёсыз пӧлысь ыжпиоссэ, соослэсь кӧйзэс но салам-кузьым вайиз. Кузё-Инмар Авель шоры яратыса учкиз, солэсь саламзэ-кузьымзэ кабыл басьтӥз; 5нош Каин шоры, солэн салам-кузьымез шоры яратыса ӧз учкы. Каин туж юн ӝоже усиз, йырзэ ошиз. 6Соку [Инмар] Кузё-Инмар Каинлы шуиз: «Малы ӝоже усид, йырдэ ошид? 7Ӟеч уж лэсьтӥськод ке, малы йырдэ ошыса возиськод? Нош ӟеч уж уд ке лэсьтӥськы, ӧс выжыын сьӧлык кылле, со тонэ ас дораз ӧте, но тон солы сётӥськытэк, сое вормыса ул». 8Соку Каин Авель вынызлы шуиз: [«Ойдо, бусые мыном»]. Бусыын дыръязы Каин Авель вылэ, выныз вылэ, урдскиз но вииз сое.
9Соку [Инмар] Кузё-Инмар Каинлы шуиз: «Кытын Авель выныд?» Со шуиз: «Уг тодӥськы, мон выны бӧрсьын возьмаськыса ветлӥсько шат?» 10[Кузё-Инмар] шуиз: «Мар тон лэсьтӥд? Музъем вылысен выныдлэн вирызлэн тэльмырем куараез Мон доры кылӥське. 11Та дырысен музъем вылысь тон каргамын, музъем ымзэ усьтӥз тынад киыныд вием выныдлэсь вирзэ басьтыны; 12музъемдэ утялтыкуд, со тыныд аслэсьтыз кужымзэ уз ни сёты; тон уллям мурт, музъем вылтӥ костаськыса ветлӥсь мурт луод». 13Каин [Инмарлы] Кузё-Инмарлы шуиз: «Ӝутыса вормыны луонтэм монэ вӧсь карон: 14тани, Тон табере монэ музъем вылысь улляськод, Тынад син азьысьтыд ватӥсько, уллям мурт, музъем вылтӥ костаськыса ветлӥсь мурт луо; котькин монэ мед пумиталоз, со монэ виёз». 15[Инмар] Кузё-Инмар солы шуиз: «Со понна: кин Каинэз вииз, солы сизьым полэс пунэм берыктӥськоз». [Инмар] Кузё-Инмар Каин пумысен паймымон тодмет лэсьтӥз, нокин но соин пумиськись мурт сое медаз виы шуыса. 16Каин Кузё-Инмарлэн син азьысьтыз кошкиз но Едемлэн шундыӝужан палысьтыз Нод музъеме улыны интыяськиз. 17Каин кышноеныз валче кариськиз но, кышноез нуны ваёно луиз, – Енох пиез вордӥськиз. Каин город пуктӥз но солы ас пиезлэсь нимзэ сётӥз: Енох. 18Енохлэн Ирад [Гаидад] пиез вордӥськиз; Ирадлэн Мехиаель [Малелеил] пиез вордӥськиз; Мехиаельлэн Мафусал пиез вордӥськиз; Мафусаллэн Ламех пиез вордӥськиз. 19Ламех аслыз кык кышно басьтӥз: огезлэн нимыз Ада, мукетызлэн – Цилла [Селла]. 20Адалэн Иавал пиез вордӥськиз: со пудоосын кӧчыса, балаганъёсын улӥсьёслэн атайзы вал. 21Иаваллэн выныз Иувал: со – крезен, чипчирганэн вань шудӥсьёслэн атайзы. 22Циллалэн Тувалкаин [Фовел] пиез вордӥськиз, ыргонлэсь, кортлэсь вань арбериосты дурыны быгатӥсь вал. Тувалкаинлэн Ноема сузэрез вал. 23Ламех кышноосызлы шуиз: «Ада но Цилла! Мынэсьтым верам кылъёсме кылзэ, Ламехлэн кышноосыз! Верам кылъёсме пеляды понэ! Воргоронэз виыса, мон асме яраё кари, егит пиез виыса, асме вӧсь кари. 24Каин понна сизьым полэс пунэм берытскиз ке, нош Ламех понна – сизьымдонэз сизьым пол йылэтытозь».
25Адам [Ева] кышноеныз эшшо валче кариськиз но, кышноез пи нуны вайиз, солы Сӥф ним сётӥз, малы ке шуоно [Ева шуэ вал:] «Каин Авелез вием бере Инмар мыным мукет кидыс сётӥз». 26Сӥфлэн но пиез вордӥськиз, солы со Енос ним сётӥз; соку [Инмарлэн] Кузё-Инмарлэн нимызлы вазиськыны ӧдъязы.
Currently Selected:
Улон-вылон 4: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
