Улон-вылон 41
41
41-тӥ ЛЮКЕТ
1Кык ар ортчыса, фараон уйвӧт адӟиз: тани, со шур дурын сылэ; 2но тани, шурысь сизьым скалъёс пото, учкыны чебересь, кӧй мугороесь, вудур камыш пӧлтӥ сиськыса ветло; 3но тани, таосыз бере шурысь сизьым мукетъёсыз скалъёс пото: учкыны начаресь, чиед мугороесь. Таре таосыз шур дуртӥ сиськыса ветлӥсь скалъёс вӧзы султӥзы; 4начаресь, чиед мугороесь скалъёс учкыны чебересь, кӧй мугороесь скалъёсты сиизы. Соку фараон сайказ. 5Таре нош ик умме усиз, таре мукет вӧт адӟе ини: одӥг куро модосын сизьым удалтэм, чебересь шепъёс; 6но тани, таосыз бере шундыӝужанпал тӧлэн куасьтэм сизьым удалтымтэ шепъёс потӥзы; 7начар, удалтымтэ шепъёс сизьым удалтэм, тыр шепъёсты сиизы. Сайкам бераз фараон валаз, та уйвӧт шуыса. 8Ӵукна фараонлэн секыт мылкыдыз вал, со Египетысь вань туноосты, визьнодчиосты ӧтьытыса вайытӥз но соослы аслаз уйвӧтэз сярысь вераз; нош солэсь пуштроссэ фараонлы усьтыны одӥг мурт но ӧз шедьы. 9Вина омыръясьёслэн йырзы фараонлы тазьы вераны кутскиз: «Али мон сьӧлыкъёсме тодам вайисько; 10фараонлэн ас ляльчиосыз вылэ вожез потӥз, монэ но нянь пыжисьёслэсь йырзэс возьмаськисьёслэн кивалтӥсьсылэн корказ интыяськем пытсэтэ ворсатӥз; 11одӥг уе ми соин уйвӧт адӟимы, солы но, мыным но аспӧртэмлыко пуштросэн уйвӧт возьматскиз; 12отын, ми пӧлын, егит еврей пи вал, возьмаськисьёслэн кивалтӥсьсылэн ляльчиез; ми солы уйвӧтмес мадимы но, кыкмылэсь ик уйвӧтмес, солэсь пуштроссэ пыр-поч валэктӥз; 13солэн валэктэмезъя ик ваньмыз быдэсмиз: мон аслам интыям берыктэмын, нош соиз ошемын». 14Фараон Иосифез ӧтьыны ыстӥз. Дыртыса сое пытсэтысь поттӥзы. Йырзэ ӵышкиз, дӥськутсэ воштӥз но фараон доры лыктӥз. 15Фараон Иосифлы шуиз: «Мон уйвӧт адӟи, нош нокин но солэсь пуштроссэ валэктыны уг быгаты; тон сярысь мон кылӥ, уйвӧтъёслэсь пуштросъёссэс валэктыны быгатӥськод шуыса». 16Иосиф фараонлы ответ сётыса шуиз: «Мон уг быгаты, Инмар быгатоз, Со фараонлы ӟеч ответ сётоз». 17Фараон Иосифлы шуиз: «Мон таӵе вӧт адӟи: тани, мон шур дурын сылӥсько, 18со виын шурысь сизьым куаем, чебер адӟиськись скалъёс пото но камыш пӧлтӥ сиськыса ветлыны кутско; 19но тани, таосыз бере вуысь пото мукетъёсыз сизьым скалъёс – начаресь, туж шушесь, мугорзы чиед: быдэс Египетысь таос кадь начаресьсэ адӟеме ик ӧвӧл; 20начаресь, чиедэсь скалъёс азьвылъёссэ сизьым куаем скалъёсты сиизы. 21Куаем скалъёс таосызлэн пушказы пыризы, но тодманы уг луы вал, таос соослэн пушказы пыризы шуыса: азьвыл кадь ик таос начаресь вал. Соку мон сайкай. 22Та бере таӵе уйвӧт адӟи: тани, одӥг куро модосэ сизьым шепъёс пушйизы – тыресь, чебересь; 23но тани, таосыз бере векчиесь, начаресь, шундыӝужанпал тӧл улын куасьмем шепъёс пушйизы но, 24начар шепъёс сизьымзэ чебересь шепъёсты сиизы. Та вӧтъёсме туноослы верай, нош соос огзы но таослэсь пуштроссэс мыным валэктыны ӧз быгатэ». 25Соку Иосиф фараонлы шуиз: «Фараонлэн уйвӧтъёсыз – одӥг уйвӧт: Инмар лэсьтоно ужзэ фараонлы ивортӥз. 26Сизьым чебересь скалъёс – со сизьым аръёс; сизьым удалтэм шепъёс но – со сизьым аръёс: та одӥг уйвӧт; 27таосыз бере потэм сизьым начаресь, чиедэсь скалъёс – со сизьым ар, озьы ик сизьым начаресь, шундыӝужанпал тӧлэн куасьтэм шепъёс – со сизьым сютэм аръёс. 28Тӥни, со понна ик уго мон фараонлы шуи: ”Инмар мар лэсьтоз, сое Со фараонлы возьматӥз”. 29Тани, сизьым ар ӵоже быдэс Египетын туж узыр, удалтэм аръёс луозы; 30та аръёс бере вуозы сизьым сютэм аръёс, Египетын узырлыко луэм аръёсыз вунэтозы, сютэм улон та музъемез тырттэм кельтоз, 31азьвыл узырлыклэн пытьыез но уз кыльы та музъеме, уго лыктӥсь сютэм аръёс туж секытэсь луозы. 32Фараонлы уйвӧт кык пол возьматскиз ке, со возьматэ ини, Инмарлэн кылыз зэм луэ, Инмар верам кылзэ ӝоген быдэстоз шуыса. 33Фараон мед шедьтоз ук табере нодлыко, визьмо адямиез, сое мед пуктоз Египетэн кивалтыны. 34Со удалтэм сизьым аръёс ӵоже Египет музъемын [мар будӥз, солэсь] витетӥ люкетсэ бичаны эскерись-чакласьёсты фараон мед пуктоз ук; 35та лыктӥсь ӟечлыко аръёсы вань кизем будосъёслэсь юзэс мед бичалозы но фараонлэн кивалтэм улсаз городъёсысь ю кеносъёсы мед люкалозы, мед утёзы; 36та люкам сиён-юонэз утьыса мед возёзы, Египетын сизьым ар ӵоже сютэм улон луиз ке, калык, сютэм улыса, медаз быры».
37Та ӵектон фараонлы но, солэн вань медоосызлы но кельшиз. 38Аслаз медоосызлы фараон шуиз: «Шедьтомы-а мукетсэ таӵе адямиез, кин пушкын Инмарлэн Духез мед улысал?» 39Фараон Иосифлы шуиз: «Инмар тыныд ваньзэ тае усьтӥз бере, тынэсьтыд но нодоез, визьлыкоез соку ӧвӧл ини; 40тон мынам юртэным кивалтӥсь луод, вань калыке тынэсьтыд верам кылъёстэ санэ поноз; эксэй пуконын пуконэным гинэ мон тынэсьтыд вылӥын луо». 41Фараон Иосифлы шуиз: «Тани, мон тонэ быдэс Египет музъемен кивалтӥсь каро». 42Соку фараон чиньыысьтыз печать нюртон зундэссэ басьтӥз но Иосифлэн чиньыяз понӥз; дуно, векчи-векчи етӥн дэралэсь вурем дӥськут вылаз дӥсяз, чыртыяз зарни жильы ошиз; 43ожмаськон уробоосыз пӧлысь кыкетӥяз уробое сое султытыса нуыны, солэн азяз, тазьы кесяськыса, мыныны косӥз: «Йырдэс мыкыртэ!» Быдэс Египет музъемлы сое кивалтӥсе пуктӥз. 44Соку фараон Иосифлы шуиз: «Мон – фараон, но тон косытэк, одӥг мурт но кизэ уз вырты, пыдзэ но уз вырты – быдэс Египет музъемын». 45Фараон Иосифлы Цифнаф-панеах ним сётӥз; Илиопольысь Потифер вӧсясьлэсь Асенефа нылзэ солы кышнолы сётӥз. Иосиф быдэс Египет музъемез пырпотӥз. 46Египетлэн эксэез, фараон, азе султыкуз, Иосифлы куамын арес вал. Иосиф фараон дорысь потӥз но быдэс Египет музъемез пыр ортчиз. 47Со музъемысь узыр, удалтӥсь сизьым аръёс ӵоже одӥг кидысысь быдэс кырым ю люкаськылӥз. 48Египетын улэм [удалтэм] аръёсы вань кизем будосъёслэсь юзэс со городъёсысь ю кеносъёсы тыриз; котькудаз городэ котырысьтыз бусыосын будэтэм юэз люказ. 49Иосиф туж трос нянь люказ, зарезь дурысь луо мында, кудмындазэ ӧз но лыдъя ни, лыдъянтэм трос юэз люкаськиз уго.
50Сютэм аръёс вуэмлэсь азьвыл Иосифлэн Асенефа кышноез – Илиопольысь Потифер вӧсясьлэн нылыз – кык нуны вайиз. 51Иосиф нырысь вордскем нуныезлы Манассия ним сётӥз, [со шуиз] уго: «Инмар монэ вунэтытӥз вань шугадӟон нуналъёсме, атаелэсь семьязэ-юртсэ». 52Мукетызлы пиезлы Ефрем ним сётӥз, [со шуиз] уго: «Курадӟон чидаса улоно музъемам Инмар монэ емыш вайись кариз».
53Египетын сизьым ар ӵоже узырмыса улон йылпумъяськиз, 54сютэм улоно сизьым аръёс вуизы, кызьы Иосиф вераз вал. Вань музъемъёсы-шаеръёсы сютэм аръёс вуизы, нош быдэс Египет музъемын нянь вал. 55Быдэс Египетын улӥсьёс сютэм улыны кутскем бере калык фараон азьын, нянь курыса, тэльмырыны кутскиз. Вань Египет калыклы фараон шуиз: «Мынэлэ Иосиф доры, мар со косӥз, сое быдэсъялэ». 56Быдэс музъем вылын сютэм ар вал; соку Иосиф вань ю кеносъёсты усьтӥз но Египетын улӥсьёслы нянь вузаны кутскиз. Египет музъемын сютэм улон кужмогес но кужмогес луиз. 57Вань кунъёсысь адямиос Египетэ, Иосиф доры, нянь басьтыны лыктылӥзы, уго быдэс музъем вылын сютэм улон кужмо но кужмо луиз.
Currently Selected:
Улон-вылон 41: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
