Улон-вылон 7
7
7-тӥ ЛЮКЕТ
1[Инмар] Кузё-Инмар Нойлы шуиз: «Тон но, вань семьяед но пыже пыре, уго та вакытэ вань адямиос пӧлын Тон гинэ Мон азьын шонер улӥськод шуыса, Мон адӟи; 2вань чылкыт пудоос пӧлысь сизьымен-сизьымен басьты айыоссэ но, мумыоссэ но, нош чылкыттэм пудоос пӧлысь кыкен-кыкен басьты, соос но айыен мумы мед луозы; 3озьы ик [чылкыт] ин тылобурдоос пӧлысь быдэн сизьымен – айыоссэ но, мумыоссэ но басьты, [вань чылкыттэм тылобурдоос пӧлысь но кыкен-кыкен – айыен мумызэ – басьты] – быдэс музъем вылэ выжылы кельтон понна; 4уго сизьым нунал ортчыса, Мон музъем вылэ ньыльдон нунал но ньыльдон уй ӵоже зор ву кисьто; вань улэп макеосты, мае кылдытӥ, музъем вылысь ваньзэ быдто». 5[Инмар] Кузё-Инмар Нойлы ма гинэ карыны ӧз косы, со ваньзэ быдэстӥз.
6Музъем вылэз ву нюртыны кутскыку, Нойлы куать сю арес вал. 7Ной но солэн пиосыз, кышноез, кенъёсыз ву нюртонлэсь утиськон понна пыже пыризы. 8[Чылкыт но чылкыттэм тылобурдоос пӧлысь,] чылкыт пудоос пӧлысь, чылкыттэм пудоос пӧлысь, [пӧйшуръёс пӧлысь,] музъем вылтӥ вань нюж кыстӥськыса ветлӥсьёс пӧлысь 9кузэн-кузэн – айыосыз но, мумыосыз (месъёсыз) но – Ной доры пыже пыризы, кызьы Инмар [Кузё-Инмар] Нойлы косон сётӥз.
10Сизьым нунал ортчыса, музъемез ву нюртыны кутскиз. 11Нойлы куать сю аресэз тырмон арын, кыкетӥ толэзьлэн дас сизьыметӥ [27] нуналаз, та нуналэ быдӟым пыдэстэм дуннелэн вань ву поттӥсь синъёсыз усьтӥськизы, ин укноос но усьтӥськизы; 12ньыльдон нунал, ньыльдон уй ӵоже музъем вылэ дугдылытэк зориз. 13Самой та нуналэ Ной, Сӥм, Хам но Иафет, Нойлэн пиосыз, Нойлэн кышноез, куинь кенъёсыз соосын ӵош пыже пыризы. 14Соос но [музъем вылысь] вань пӧйшуръёс выжыен-выжыен, вань пудоос выжыен-выжыен, музъем вылтӥ вань гыж кыстӥськыса ветлӥсьёс выжыен-выжыен, вань лобасьёс, вань тылобурдоос, вань бурдо улэп макеос выжыен-выжыен. 15Вань улэп макеос пӧлысь, кинъёс пушкын улонлэн духез возиське, [айыосыз но, мумыосыз но] Ной доры пыже кузэн-кузэн пыризы. 16Вань улэп макеос пӧлысь – айыез но, мумыез но – [Ной доры пыже] пыризы, кызьы солы Инмар [Кузё-Инмар] косӥз. Ной пырем бере [Инмар] Кузё-Инмар [пыжез] ворсаз. 17Ньыльдон нунал [но ньыльдон уй] ӵоже музъем вылын ву ялан йылӥз, ву будӥз но пыжез интыысьтыз ӝутӥз, музъемлэн вылӥяз со ӝутскыса улӥз; 18ву йылӥз но йылӥз, музъем вылын туж трос луиз, пыж ву вылтӥ уяса ветлыны кутскиз. 19Музъем вылэ туж но туж трос ву люкаськем бере ин улысь вань ӝужыт гурезь йылъёс ву улэ кылизы. 20Соослэн йылазы дас вить гырпумлы вылӥе ву ӝутскиз, озьы [вань ӝужыт] гурезьёс ву улэ кылизы. 21Музъем вылтӥ вань мынӥсь-ветлӥсь улэп макеос кулӥзы – тылобурдоос но, пудоос но, пӧйшуръёс но, музъем вылтӥ ваньмыз нюж кыстӥськыса ветлӥсьёс но, вань адямиос но; 22музъем вылын нырынызы шокаса улӥсьёс ваньзы кулӥзы. 23[Быдэс] музъем вылысь вань улэп макеос быдтэмын вал: адямиос но, пудо-животъёс но, нюж кыстӥськыса ветлӥсьёс но, ин тылобурдоос но – музъем вылысь ваньзы быдтэмын вал; Ной но соин ӵош пыже пыремъёс гинэ быдэс кылизы. 24Нош ву музъем вылын сю витьтон нунал ӵоже йылӥз но йылӥз.
Currently Selected:
Улон-вылон 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
