Улон-вылон 8
8
8-тӥ ЛЮКЕТ
1Инмар тодаз вайиз Ноез, соин ӵош пыжын улӥсь вань пӧйшуръёсты, вань пудо-животэз, [вань тылобурдоосты, вань нюж кыстӥськыса ветлӥсьёсты]. Инмар музъем вылэ тӧл лэзиз но, ву синыны кутскиз. 2Пыдэстэм дуннелэн ву потон синъёсыз ворсаськизы, инлэн укноосыз но ворсаськизы, инмысь зор виямысь дугдӥз. 3Сю витьтон нунал ортчем бере музъем вылысь ву синыны кутскиз, пумен со ас интыяз берытскиз. 4Сизьыметӥ толэзьлэн дас сизьыметӥ нуналаз пыж Арарат гурезе дугдӥз. 5Дасэтӥ толэзёзь ву пумен-пумен синӥз но синӥз, дасэтӥ толэзьлэн нырысетӥ нуналаз гурезьёслэн йылъёссы адӟиськыны кутскизы.
6Ньыльдон нунал ортчем бере Ной пыжезлэсь укнозэ усьтӥз но 7кырныжез кыре лэзиз, [музъем вылын ву вань на-а шуыса тодыны;] кырныж лобӟыса кошкылӥз но берен лобыса вуылӥз – ву улысь музъем куасьмытозь озьы лобаз. 8Собере Ной дорысьтыз дыдыкез лэзиз, музъемлэн вылысьтыз ву кошкем-а ини шуыса тодыны; 9нош дыдык, музъем вылэ лёгиськыны инты шедьтытэк, Ной доры пыже берытскиз, уго быдэс музъем вылын ву улэ на вал; со кизэ мычиз но сое кутӥз, ас бордаз пыже пыртӥз. 10Эшшо сизьым нуналлэсь ортчемзэ возьмаз на, собере дыдыкез пыжысь нош ик кыре лэзиз. 11Ӝыт дыдык со доры берытскиз но, тани, ымаз куртчыса, вӧйпулэсь выль куарзэ вайиз. Соку Ной тодӥз, музъем вылысь ву кошкем ни шуыса. 12Эшшо сизьым нуналлэсь ортчемзэ возьмаса улӥз на, собере Ной [нош ик] пыжысьтыз дыдыкез кыре лэзиз, но со берен ӧз ни берытскы.
13[Нойлы] куать сю одӥгетӥ ар мыныку, нырысетӥ толэзьлэн нырысетӥ [нуналаз] музъем вылысь ву быриз; соку Ной пыжлэсь (ковчеглэсь) выл шобретсэ-липетсэ усьтӥз но адӟиз: музъем выл куасьмем ни. 14Кыкетӥ толэзьлэн кызь сизьыметӥ нуналэз вуыкулы музъем куасьмиз.
15Соку Инмар [Кузё-Инмар] Нойлы шуиз: 16«Пот пыжысь; кышноед но, пиосыд но, кенъёсыд но тонэн ӵош мед потозы; 17сьӧрад басьтэм вань улэп макеосты пыжысьтыд потты: вань луло макеосты – тылобурдоосты, пудо-животъёсты, музъем вылтӥ вань нюж кыстӥськыса ветлӥсьёсты, – быдэс музъем вылэ соос мед вӧлмозы, мед йылозы, музъем вылын тросгес мед луозы». 18Соку Ной, солэн пиосыз, кышноез, кенъёсыз соин ӵош потӥзы; 19вань пӧйшуръёс, [вань пудоос,] вань нюж кыстӥськыса ветлӥсьёс, вань тылобурдоос, музъем вылтӥ вань ветлӥсьёс, ваньмыз ас выжыеныз ӵош пыжысь потӥзы.
20Ной Кузё-Инмарлы курбон сётон инты лэсьтӥз; вань чылкыт пудоос пӧлысь, вань чылкыт тылобурдоос пӧлысь кутӥз но курбон сётон интыын, тылын сутыса, курбон сётӥз. 21Ческыт зынлэсь потэмзэ Кузё-Инмар шӧдӥз, соку [Инмар] Кузё-Инмар Ас сюлмаз шуиз: «Азьланяз адями понна музъемез уг ни карга, малы ке шуоно адями егит дырысеныз ик сюлмаз урод-лек малпанэн улэ; азьланяз вань улэп макеосты уг ни погыръя-виылы, кызьы али Мон лэсьтӥ: 22азьланяз, музъемлэн вань улон нуналъёсаз, кизён но аран, кезьыт но пӧсь, гужем но тол, нунал но уй уз ни бырылэ».
Currently Selected:
Улон-вылон 8: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
