Wenía 11
11
Babelnamã mai shovo tokopáma iti ivo yoã
1Vevotiã yorarasĩ ashkã atõ anõ ipawa vanaro westíkase. 2Askái yorarasĩ vari oátõsho shokosho voí, Sinar mainamã mató sapa roaka merasho shokokévo. 3Askái ano arí katxívaĩsho chinãmakinanãvo. “Tijolo avaikĩ nõ shoinõ”, ikívo. Naaivo mainamãro shasho mashko anõ shovo amísmavo, tijolo apawavo. Anõ vestoti askásevi, massa amísma, karovi pae apawavo. 4Askávai arímamẽ vanaóvo. “Cidade shovimashõ, mai shovo tsaõníki ainavaĩki, naí nõ nokonõ. Askái ora mai wetsã peás itãimai, ashkã nõ shokomaĩnõ, noke ave kakanõvo”, ikívo.
5Aská akĩ yorarasĩni cidade, mai shovo aká atõ shovimamaĩnõ, Yavepa “awesáraki oĩnõ”, iinã ato chinãpakei okĩ. 6Aská oĩinã, “ii yorarasĩ chinã westíse, vana westítõse ikí shokovo. Rama atõ txitavirívi askámẽkĩ txipo atõ akátĩpa yama ikatsai”, ikĩ chinãki. 7Askátani oí, vanaói. “Shokopakésho nõ oĩnõ voãna. Ato nõ vana wetsa apánõ, arímamẽ ave tanatima ikinanãnõvo”, ikí.
8Askáki Yavepa ato vana wetsa apáki, maitio akĩ ato peás akĩ. Ato ãwẽ aská akatõsho, atõ cidade shovimaa mashtema enevo. 9Askái anosho shavá ane “Babel”, ikí meráti, Yavepa ato vana wetsa apátõsho ikí.#11.9 Hebraicõ vana “Babel” ikíro “tanatĩpa aká” keská Askáki anosho maitioki ato peás akĩ.
Semni revomati ivo yoã
10Naarasĩro Semni ato revomaa. Enẽ ato txivãchna txipo vari ravévakĩ tavákemaĩnõ, Sem ãwẽ vari 100namãsho ãwẽ vake venevake Arfaxade merati. 11Arfaxade meravaí, 500 vari tavái nishõ, venevakerasĩ, aĩvakerasĩ aká meraóti.
12Arfaxadero 35 varinamãsho ãwẽ vake Salá merati. 13Salá merasho, 403 vari tavái nishõ, venevakerasĩ, aĩvakerasĩ aká meraóti.
14Saláro 30 varinamãsho, vake venevake Héber merati. 15Héber merasho, 403 vari tavái nishõ, venevakerasĩ, aĩvakerasĩ aká meraóti.
16Héberro 34 varinamãsho, ãwẽ vake venevake Pelegue merati. 17Pelegue merasho, 430 vari tavái nishõ, venevakerasĩ, aĩvakerasĩ aká meraóti.
18Peleguero 30 varinamãsho, ãwẽ vake venevake Reú merati. 19Reú merasho, 209 vari tavái nishõ, venevakerasĩ, aĩvakerasĩ aká meraóti.
20Reúro 32 varinamãsho, ãwẽ vake venevake Serugue merati. 21Serugue merasho, 207 vari tavái nishõ, venevakerasĩ, aĩvakerasĩ aká meraóti.
22Seruguero 30 varinamãsho, ãwẽ vake venevake Naor merati. 23Naor merasho, 200 vari tavái nishõ, venevakerasĩ, aĩvakerasĩ aká meraóti.
24Naorro 29 varinamãsho, ãwẽ vake Tera merati. 25Tera merasho, 119 vari tavái nishõ, venevakerasĩ, aĩvakerasĩ aká meraóti.
26Teraro 70 vari tavái nishõ, ãwẽ vake venevakerasĩ Abrão, Naor, Harã aatii merati.
Terã revomati ivo yoã
27Naatíiro Terã ato revomarasĩ, Abrão, Naor, Harã aatíi. Harãne ivõro vake venevake Ló merati. 28Ló meravai, nii niisho, ãwẽ anõ vaketi ivo mai, “Ur”, atõ akánamãsho vopiti. Aaivo mairo, caldeu yorarasĩni mai. Aská ã vopiatiã, ã papa Teraro vopima, niisa. 29Askámaĩnõ Abrãonĩ Naor ravéshóse shavo ninivarãvo. Abrãone aĩro Sarai. Naorpa aĩro Milca aká. Milca ãwẽ take Iscá akáro Harãne vake aĩvakerasĩ. 30Askámaĩnõ Sarairo revosma.
31Askái txipo, Tera, ãwẽ vake Abrão, ãwẽ vakẽ aĩ Sarai, ãwẽ shokó Ló aatíi, Ur, caldeu yorarasĩni mainamãsho ato kawivaĩi, Canaã mai chinãvaĩi kaí. Askái ano atõ voámẽkĩ Harã shavapáse shokokétivo. 32Askái Tera, Harãnamã nishõ, ãwẽ vari 205 nokóanamãsho vopiti.
Currently Selected:
Wenía 11: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
